Yesu aamanle opatisiwa, aapacerya olaleerya: ‘Omwene wa Muluku ori vakhiviru.’ Oohuserya yaanamuchara ayaaka o Kalileya ni o Yuteya. Vaavaa Yesu aakookenleiye elapo awe o Nasareti, aaya mu sinakooka ahula eroolo ya Isaiya apacerya waalakhanya: ‘Munepa wa Apwiya ori mwa miyo ni wookiruma olaleya michaka yaphaama.’ Masu ala yaataphulela eheeni? Yaataphulela wi naamwi Yesu aanapaka sootikhiniha, nthowa ntokweene na waakhela munepa waweela waari wi alaleerye michaka yaphaama. Owo aaloca ni alipa oowiriyana: ‘Aheereya olelo masu oorempwa mmanlaanyu wiiwa.’

Voocharela Yesu aaya o Ephareya ya Kalileya, wiiwo aawompeiyewo achu axexe yaari alipa oomesa wi ekhale oohuserya awe. Owo aaloca: ‘Kichareeni, mukhale alipa awaatotha achu.’ Yaawo aawompeiye, yaari Petro, Antreya, Yakopo ni Yohani. Yaahiya omesa ihopa emuchara. Awo yaavira o Kalileya woothewene elaleeryaka Omwene wa Yehova. Yaanalaleerya mu sinakooka, mmisikani ni mmakhwaala. Achu yaanaachara voothevene. Michaka vooloca sa Yesu saasareya ophiyerya o Asiriya.

Yesu aahaavaha oohuserya awe ikuru sa waapenuxa achu ni wiikara masololo. Achu akina yaawo aakhaleiyeno vamoha yaanalaleerya muceche ni muceche nave empa ni empa. Athiyana yaarino nroromelo, ophitaanyerya Mariya Matalena, Xowana, Susana ni akina, yaamukhapelela Yesu ni oohuserya awe.

Amanle waavyakiha ohuserya awe, Yesu aahaaruma olaleerya. Vaavaa yaalaleeryaaya o Kalileya, achu ancipale yaanaroromela nave yaanapatisiwa. Ancipale yaanachuna okhala oohuserya, Yesu aahaalikanyiha ni emaca yaaphwanela ohephiwa. Owo aaloca: ‘Mwaaveke vanonto aneene a emaca wi yaarumihelemo anamalapa mmacani mwaya.’ Aahaathanla oohuserya awe 70, aaruma apiili-apiili wi elaleerye o Yuteya woothewene. Awo yaahaahusiha achu oohiyanahiyana vooloca sa Omwene. Vaavaa oohuserya yaakonkaaya, yaamuleela Yesu echu yeereya. Hiyaavo  echu Musaserya aawenryeiye weera wi amaalihe muteko wa olaleerya.

Yesu aapaka marehereryo wi oohuserya awe etitelele muteko yoowo vaava eereiye akookele wirimu. Owo aaloca: ‘Mulaleerye michaka yaphaama makupa oothene a elapo. Mwaahusihe achu masu a Muluku nave mwaapatise yaawo.’