Namukucho Eli aakhalano anamwane apiili yaawo yarumeela mu empa ya mithukumano ntoko anamukucho. Masina aya yiichaniwa, Ofeni ni Fineya. Awo hiyiiwelela malamulo a Yehova, nave yaakhaliha achu moonanara. Vaavaa Aisarayeli yaapakaaya mukucho wa Yehova, Ofeni ni Fineya yaanakuxa okhala wawaya. Eli aahiwa echu anamwane awe yeeraaya, nyenya owo haalanke. Apwanne Yehova aanasiveliwa ni yaweera yeeyo?

Samuwele aari mukhaani wa Ofeni ni Fineya, nyenya owo haatakiherya. Yehova aanasiveliwa ni Samuwele. Ohiyu omoha akonaka, Samuwele aahiwa nsu nichanaka nsina nawe. Owo aavinya achimakela wa Eli nave aakhula: ‘Miyo kiri va!’ Nyenya Eli aahi: ‘Nkiwiichanne, hawe wakoneke.’ Samuwele aakookela okona. Yaaheereya tho voocharela. Vaavaa Samuwele iiwaleiye wiichana ekwaha ekina, Eli aasuwela wi aari Yehova aamwiichana Samuwele. Owo aamuleela wi iiwa nsu nichanaka, aakhule ariki: ‘Locani Pwiya, mulapeli anyu onnawiriyana.’

Samuwele aakookela okona. Aahiwa tho nsu nriki: ‘Samuwele! Samuwele!’ Owo aahaakhula: ‘Locani Pwiya, mulapeli anyu onnawiriyana.’ Yehova aahi: ‘Omuleele Eli wi kinahaala omvaha ekoi ni echoko awe. Ntakhara oosuwela meecelo oonanara a anaawe nave hanaalaka.’ Mmeeloni mwaya Samuwele aahula mikhora sa empa ya muthukumano,  hiiha ntoko eereiye. Owo aanoova omuleela namukucho echu Yehova aalonceiye. Nyenya Eli aamwiichana amukoha: ‘Mwanaka, tiheeni Apwiya oolenlaaya? Ohikikhuwe echu.’ Samuwele aamuleela ichu soothene.

Samuwele aaninnuwa phaama, nave Yehova aanamukhaviherya. Aisarayeli oothene yaasuwela wi Yehova omuthanla Samuwele ntoko mulipa a miririmu ni muthoriha.