Yesapeli aahiiwa yeeyo yeeren’ye ni alipa a miririmu a Pala nave aatepa onanariwa. Owo aarumiha michaka wa Eliya ariki: ‘Omeelo, kinanweerela yeele oweerenlaawe alipa a miririmu a Pala.’ Eliya aathanana nave aachawela mutakhwani. Owo aavekela: ‘Pwiya, wookimalelavo! Kinachuna okhwa!’ Ikhove saamurweela Eliya nave aakona vathi va mwiri.

Munkeelo mmoha aamviiha nave amulocela mweepewe ariki: “Vinya ni olye.” Aavinyaleiye aahoona ephaawu yoovilikana eri va maluku ooviha ni ekahi ya maahi. Aalya ni aawurya nave aakookela orupa. Munkeelo aamviiha wanaawiili nave aaloca: ‘Olye nivano, ntakhara mukwaha aa wootepa orakama.’ Vaavaa aalyileiye, aapaka mukwaha wa mahiku 40 othana ni ohiyu ophiyerya o Mwaako Horepi. Aaphiyaleiye weiwo, Eliya aavolowa mu nikhuku, akona. Nto Yehova aaloca ni yoowo ariki: ‘Eliya, oneeramo eheeni muumu?’ Owo aahaakhula: ‘Achu a Isarayeli aananariha waataana wanyu. Ahaakumula altare anyu ni owiipha alipa a miririmu anyu. Nto vano anachuna okiipha.’

Yehova aamuleela: ‘Khumamo munikhuku ni owele va mwaako.’ Voopaceryani, echeku yaahoopela mu nikhuku. Aavira mwaacikinye ni mooro. Vookuchula Eliya aahiiwa nsu noomaaleleya. Vanonto Eliya aakhuneela ethoi awe ni malaya nave aaheemela vaate va nikhuku. Yehova aamukoha ntakhara heeni onachaweiye. Eliya aahi: ‘Kihanle meekhaaka.’ Nto Yehova aahi: ‘Hori mukhataa. Aakhala Aisarayeli 7.000 yaawo anakilapela. Vano vinya, wamuthanle Eliseu wi ooraceele.’ Mwawaakuveya, Eliya aaya weerano yeeyo Yehova aamurummeiye. Onuupuwela wi Yehova onahaala tho wookhaviherya wakhala wi onneera yeeyo onoorumeiye? Aai onamookhaviherya. Hankooni noone echu yeeren’ye elukuluku ya elimwi.