1, 2. Ntakhara heeni nivekelo ekari etokweene, nave ntakhara heeni nnaphwanelaahu osuwela yeeyo Piipiliya onaloceiye sa nivekelo?

YEHOVA aawehaka elapo yavathi, onoona okhala ekhaanixa, nave achu naari maloko a achu anakhala ntoko ncoicoi na maahi nnakhuma mmukoroni. (Salumu 115:15; Isaiya 40:15) Naamwi nri ooyevaxa naalikanyihiwaka ni elapo, Salumu 145:18, 19 onnaloca: “Apwiya ari vakhiviru va yale anawitxhana, wa yale anawasya ni murima wohiwoka. Annera otxhuna wa yale anatxitximiha, annawiriyana wupulela waya, nave annàvulusa yawo.” Ela ekari etokweene nryaahuno! Yehova, Mpatuxa a ichu soothene, onachuna opaka onthamwene ni hiyaano, nave onnachuna owiriyana mavekelo ahu. Aai, nivekelo ekari etokweene, yamahala yeeyo Yehova omvanheiye muchu ti muchu a hiyo.

² Nyenya Yehova onahaala oniwiriyana pahiru wakhala wi nnaloca ni yoowo mmukhalelo oneemereryeiye. Nnii neereno mwawiihai yeeyo? Hankooni noone yeeyo Piipiliya onaloceiye sa nivekelo.

3. Ntakhara heeni munaphwanelaanyu opakaka mavekelo?

³ Yehova onachuna wi nyuwaano mpakeke mavekelo, naari muloceke ni yoowo. Nnasuwela hai yeeyo? Ninnoovekaani wi mmwaalakhanye Filipi 4:6, 7. Muupuwelele nwopelo ola woosivela. Mutokweene a elapo onnoothokororyaani nave onachuna wi nyuwaano mmuleele moonelo ni makacamiho anyu.

4. Ovekela moohihiyererya wa Yehova onii wookhaviheryeni hai?

 ⁴ Nivekelo ninnanikhaviherya opaka onthamwene ni Yehova. Vaavaa asinthamwene analocihanaaya mukina ni mukhwaawe, eleelanaka makacamiho, ni moonelo aya, onthamwene aya onnalipa. Eyo emohamoha ni oloca ni Yehova mu nivekelo. Moorweela Mpiipiliyani, owo onnoolelaani moonelo ni muupuwelo awe, nave onnoolelaani yeeyo onahaaleiye weera omwaahiyu. Nyuwaano tho munanwerya omuleela muupuwelo ni moonelo anyu moorweela wa opaka nivekelo moohihiyererya. Weerano yeela, onthamwene anyu onahaala winnuwa ni okhala woolipa.—Tiyako 4:8.

5. Nnasuwela hai wi Yehova hanawiriyana mavekelo oothene?

⁵ Apwanne Yehova onnawiriyana mavekelo oothene? Hooye, owo hanawiriyana. Elukuluku ya mulipa a miririmu Isaiya, Yehova ahaaleela Aisarayeli: “Munamwi mulekelihaka mavekelo anyu, miyano nkinawiriyana,  ntakhara mata anyu àsareya nikhami.” (Isaiya 1:15) Wakhala wi hinaano ekasope, nnamweerano ichu seiho sinahaala oneeriha okhala ocai ni Yehova, yeerihaka wi owo ahiwiriyaneke mavekelo ahu.

6. Ntakhara heeni nroromelo ti noochuneya? Munii mooniherye hai wi mookhalano nroromelo?

⁶ Naachunaka wi Yehova awiriyaneke mavekelo ahu, nnaphwanela omuroromela. (Marko 11:24) Murummwa Paulo aaloca: “Mutxhu ohirino wemererya [naari nroromelo] hanawerya omusiveliha Muluku. Yole onamwatxamela Muluku onnaphwanela wemererya wi Muluku okhala, nave wi ti owo onavaha ntxhuwelo yale anamwasya.” (Ahebri 11:6) Nyenya henaakhwanela pahiru oloca wi nookhalano nroromelo. Nnaphwanela wooniherya nroromelo nahu moorweela wa omwiiwelela Yehova nihiku nnihiku.—Mwaalakhanye Tiyako 2:26.

7. (a) Ntakhara heeni ti woochuneya wiiyeviha ni ocicimiha naalocaka ni Yehova? (b) Nnii nooniherye hai wi nnaloca ni Yehova mootaphuwa?

⁷ Ti waphaama okhala awiiyeviha ni a ncicimiho vaavaa nnalocaahu ni Yehova. Ntakhara heeni? Wakhala wi nnaloca ni mwene naari musatoro nnaloca mmukhalelo woocicimiha. Yehova Muluku a ikuru soothene, mwa yeeyo, tahi yaphaama wooniherya ncicimiho vaavaa nnalocaahu ni yoowo? (Maphatxuwelo 17:1; Salumu 138:6) Nnaphwanela tho okhala ootaphuwa oloca ni murima ahu woothene, ohiya wuuluulela masu.—Mateu 6:7, 8.

8. Wakhala wi ninnaveka echu, tiheeni nnaphwanelaahu weera?

⁸ Wookuchula, wakhala wi nooveka echu, nnaphwanela wiilipixerya weeravo mwawiiwanana ni nivekelo nahu. Ntoko yootakiherya, wakhala wi nooveka wa Yehova soochuna sahu sa nihiku, hannaphwanela oweherya wi Yehova onamunivaha soothene nivenkaahu nrimukiraathi  pahi. Ti woochuneya olapa weemererya muteko ori woothene nnaweryaahu olapa. (Mateu 6:11; 2 Tesalónika 3:10) Wakhala wi noomveka Yehova wi anikhaviherye weera echu yoonanara, nnaphwanela osepa mukhalelo ori woothene waahaala oneeha. (Kolosi 3:5) Hankooni nthokororye makoho awunlaana vooloca sa nivekelo.

9. Taani nnaphwanelaahu omvekela? Yohani 14:6 onanihusiha eheeni vooloca sa nivekelo?

⁹ Taani nnaphwanelaahu omvekela? Yesu aahaahusiha oomuchara awe ovekela wa ‘Atithi awe a wirimu.’ (Mateu 6:9) Owo tho aaloca: “Miyo [ka], ephiro, eparipari, ekumi. Havo onaya wa Atithi ahivinre wa miyo.” (Yohani 14:6) Nnaphwanela ovekela pahiru wa Yehova moorweela wa Yesu. Enataphulela eheeni ovekela moorweela wa Yesu? Wi Yehova awiriyane mavekelo ahu, nnaphwanela ocicimiha muteko Yehova omvanheiye Yesu. Ntoko nihusenryaahu, Yesu aarwa veelaponi yavathi wi anoopole mu soocheka ni okhwa. (Yohani 3:16; Aroma 5:12) Yehova tho oomuthanla Yesu ntoko mulipa Eephepa Mutokweene ni Muthoriha.—Yohani 5:22; Ahebri 6:20.

10. Nookhalavo nlamulo nnaloca mukhalelo nnaphwanelaahu okhala naavekelaka? Mutharihe.

¹⁰ Nookhalavo nlamulo nnaloca mukhalelo nnaphwanelaahu okhala naavekelaka? Hooye, Yehova hananiveka okokhora, okiraathi, naari weemela naavekelaka. Piipiliya onnanleela wi nnanwerya oloca ni Yehova mmakhalelo ari oothene. (1 Matharihelo 17:16; Nehemiya 8:6; Daniyeli 6:10; Marko 11:25) Echu eri yoochuneya wa Yehova tahi mukhalelo nnakhalaahu naavekelaka, nyenya owo onapwacha yeeyo nnalocaahu ni mukhalelo waphaama. Nnanwerya ovekela mwawiiweya naari  vathivathi nipuro vyakala naari elukuluku pure othana naari ohiyu. Vaavaa nnavekelaahu wa Yehova, nroromele wi owo onahaala owiriyana naamwi ahirivo muchu onwiriyana.—Nehemiya 2:1-6.

11. Ichu taani ikina seiho nnaphwanelaahu omveka Yehova?

¹¹ Ichu taani nnaphwanelaahu oveka? Nnanwerya oveka echu eri yoothene eri yaweemereryeya wa Yehova. Piipiliya onnaloca: “Hiyo naveka etxhu ntoko okhwela wawe, yowo onnaniwa.” (1 Yohani 5:14) Apwanne ti yaphaama oveka soochuna sahu? Aai. Ovekela wa Yehova ori ntoko oloca ni nthamwene ahu. Nnanwerya omuleela Yehova echu eri yoothene eri mmuupuwelo ni mmurima mwahu. (Salumu 62:8) Nnanwerya oveka munepa waweela wi onikhaviherye weera yeeyo eri yaphaama. (Luka 11:13) Ti woochuneya tho omveka Yehova miruku wi nipake soolakelela saphaama, naari oveka wi anikhaviherye ovootha makacamiho ahu. (Tiyako 1:5) Omveka Yehova wi akhurumuwele soocheka sahu. (Éfeso 1:3, 7) Ti yaphaama tho waavekelela akina, ophitaanyerya amusi ahu vamoha ni anna mmulokoni.—Saweriwa T’arummwa 12:5; Kolosi 4:12.

12. Echu taani enaphwanela okhala yoochuneya mu mavekelo ahu?

¹² Echu taani enaphwanela okhala yoochuneya mu mavekelo ahu? Yehova ni yoochuna awe. Nthamalele ni murima woothene ichu seiho onaneereleiye. (1 Matharihelo 29:10-13) Ninnasuwela yeela ntakhara vaavaa Yesu aareiye veelaponi yavathi, owo ahaaleela oomuchara awe mukhalelo wa ovekela. (Mwaalakhanye Mateu 6:9-13.) Owo aahaaleela wi woopacerya evekeleke wi nsina na Muluku neelihiwe. Voocharela Yesu ahooniherya wi nnaphwanela oveka Omwene wa Muluku wi orwe ni yoochuna ya Yehova yeereyeke veelaponi yoothene. Amanle oloca ichu seiha soochuneya, owo aaloca wi nnaphwanela  oveka soochuna sahu. Vaavaa nnakuhaahu woopaceryani yoochuna ya Yehova mu nivekelo nahu, ninnooniherya yeeyo eri yoochuneyaxa wa hiyaano.

13. Mavekelo ahu anaphwanela olekelaka hai?

¹³ Mavekelo ahu anaphwanela olekelaka hai? Piipiliya hanaakhula. Nnanwerya opaka mavekelo oorakama naari ookhuveya, mwawiiwanana ni elukuluku. Ntoko yootakiherya, munanwerya opaka nivekelo nookhuveya ntakhara yoolya, akhweya opaka nivekelo noorakama vaavaa munamuthamalaanyu  Yehova naari omuleela makacamiho anyu. (1 Samuwele 1:12, 15) Hinnachuna opaka nivekelo noorekama wi naacapare akina, hiiha ntoko akina yeeraaya mmahiku a Yesu. (Luka 20:46, 47) Yehova hanoototheya ni mavekelo ntoko yaawo. Echu eri yoochuneya wa Yehova ori oloca yeeyo eri mmurimani mwahu.

14. Nnaphwanela ovekelaka itila kavi, nave ela enanihusiha eheeni vooloca sa Yehova?

¹⁴ Nnaphwanela ovekelaka itila kavi? Yehova onnaniwopa oloca ni yoowo moohihiyererya. Piipiliya onnanceenyerya ariki: “Mvekeleke,” “òpatxhanyerya mmavekeloni,” ni “muhihiyererye ovekela.” (Mateu 26:41; Aroma 12:12; 1 Tesalónika 5:17) Yehova ori oorehereya wi awiriyane mavekelo ahu. Ti woochuneya omuthamalela Yehova nihiku nnihiku nthowa na osivela ni mahala awe. Nnaphwanela tho oveka ohoolela wawe, olipiha, ni  nihakararyo nawe. Wakhala wi ninnavaha esisapo ekari ya ovekela, nnahaala opharihela elukuluku yoothene nnakhalaahuno wi nloce ni Yehova.

15. Ntakhara heeni ninnaloca “amen” wookuchulani wa nivekelo?

¹⁵ Ntakhara heeni ninnaloca “amen” wookuchulani wa nivekelo? Nsu “amen” nnataphulela “eparipari” naari “ekhale hiiha.” Ela enataphulela wi yeeyo nimanlaahu oloca mu nivekelo nahu nlonce ni murima woothene. (Salumu 41:13, Nlakano Nahihano) Piipiliya onnanihusiha wi ti yaphaama oloca “amen,” omakuchuwelo wa nivekelo na vathivathi, nawiiweya naari omakuchuwelo wa nivekelo nnapakiwa va muthukumano wi nooniherye weemererya wahu yeeyo elociwe.—1 Matharihelo 16:36; 1 Korinto 14:16.

16. Apwanne Yehova onnaakhula chiryene mavekelo ahu? Mutharihe.

¹⁶ Apwanne Yehova onnaakhula chiryene mavekelo ahu? Aai, owo onnaakhula. Piipiliya onii: “Nyuwo muniwa mavekelo.” (Salumu 65:2, 3) Yehova onniiwa nave onnaakhula mavekelo a achu ancipale oororomeleya, nave onneerano yeeyo mmukhalelo woohiyana hiyana.

17. Yehova onaapharihela hai ankeelo ni arummwa awe veelaponi yavathi wi aakhule mavekelo ahu?

¹⁷ Yehova onnaapharihela ankeelo ni arummwa awe veelaponi yavathi wi aakhule mavekelo ahu. (Ahebri 1:13, 14) Sookhalavo sawooniherya sincipale sa achu yaavekenle echunaka nikhaviheryo wi emwiiwexexe Piipiliya nave moohilekela exekuryiwa ni Anamoona a Yehova. Piipiliya onnooniherya wi ankeelo annalaleerya “mutxhaka waphama” veelaponi yoothene. (Mwaalakhanye Wupulula 14:6.) Nave tho, ancipale a hiyo ninnavekela wa makacamiho naari yoochuna ahu, nave moohilekela  ninnaakhela nikhaviheryo naachunaahu orweela wa munna naari murokora.—Masiposipo 12:25; Tiyako 2:16.

18. Yehova onapharihela hai Munepa awe ni Piipiliya wi aakhule mavekelo ahu?

¹⁸ Yehova onnapharihela munepa awe waweela wi aakhule mavekelo ahu. Vaavaa nnavekaahu nikhaviheryo wi nivilele ni makacamiho, owo onnapharihela munepa awe waweela wi onihoolele ni onilipiha. (2 Korinto 4:7) Yehova tho onnampharihela Piipiliya wi aakhule mavekelo ahu ni onikhaviherya opaka soolakelela saphaama. Va omwaalakhanya Piipiliya, ninnaphwanya soorepa sinahaala onikhaviherya. Yehova onnaapharihela anna wi evahe yawaakhula aya mmithukumano naari atokweene a mmulokoni oloca echu yeeyo naachunaahu.—Galasya 6:1.

19. Ntakhara heeni ikwaha ikina nnoona wi Yehova haakhunle mavekelo ahu?

¹⁹ Ikwaha ikina, ninniikoha, ‘Ntakhara heeni nlelo Muluku hanaakhula nivekelo naka?’ Muupuwele, owo oosuwela elukuluku ni mukhalelo wa waakhula mavekelo ahu. Owo onnasuwela yeeyo nnachunaahu. Nnaphwanela otitelela ovekela wi nooniherye wi yeeyo nnavekaahu ti yoochuneya ni wooniherya omuroromela wahu. (Luka 11:5-10) Ikwaha ikina Yehova onnaakhula mavekelo ahu mmukhalelo nihinasuwelaahu. Ntoko yootakiherya, nnanwerya oveka wi Muluku amalihe makacamiho ahu, nyenya ohiya omaliha, owo onnanivaha ikuru wi niwerye ovilelano.—Mwaalakhanye Filipi 4:13.

20. Ntakhara heeni ti yaphaama ovekela wa Yehova moohihiyererya?

²⁰ Ekari taani etokotoko nryaahuno oloca ni Yehova mu nivekelo! Nroromele wi owo onnaniwiriyana. (Salumu 145:18) Nave wakhala wi ninnavekela moohihiyererya ni murima woothene, onthamwene ahu ni Yehova onahaala okhala woolipa.