Malamulo a Muluku anathipeleya mmalakiheryo awe. Malakiheryo yaala iparipari inathipeleya Mpiipiliyani. Annanikhaviherya osuwela yeeyo Muluku onuupuweleiye vamoha ni moonelo awe vooloca sa miyaha vyakala. Malakiheryo tho annanikhaviherya opaka soolakelela saphaama mu okumi ahu ni weerano yeeyo eri yawookololowa. Awo annanikhaviherya xaxaxa vaavaa onachuneyaayavo opaka yoolakelela nyenya hinnaphwanya nlamulo na Muluku, nenlo nri nooluluwanya nlocaka sa yeeyo nnaphwanelaahu weera.

▸ Mwaha 1, eparakrafo 8

Omwiiwelela Yehova onataphulela weerano ni murima woothene ichu seiho owo onanivekeiye. Yehova onachuna wi nimwiiweleleke nthowa nawi ninnamusivela. (1 Yohani 5:3) Wakhala wi ninnamusivela Muluku ni omuroromela yoowo, nnahaala wiiwelela malakiheryo awe mu soothene. Nnahaala omwiiwelela naamwi ori woovila wa hiyaano. Wa hiyaano, ti yaphaama omwiiwelela Yehova, ntakhara wi onnanihusiha okhala ni okumi woohakalaliha hiihaano nave onnalaiherya onivaha mareeliho mancipale muhoolo.—Isaiya 48:17.

▸ Mwaha 1, eparakrafo 10

Yehova oonivaha mmoha ti mmoha a hiyo othanla wootaphuwa naari wi, nnanwerya opaka soolakelela sahu. Owo hanipanke ntoko maakina yaawo anapakiwa wi ephareke muteko wammoori. (Malamulo 30:19; Yosuwa 24:15) Nnanwerya opharihela othanla wahu wootaphuwa wi nipake soothanla saphaama. Nyenya wakhala wi hinaanono ekaasoope, nnanwerya opaka soolakelela soonanara. Okhalano othanla wootaphuwa enataphulela wi mmoha ti mmoha a hiyo ookhalano owerya wa olakelela meekheiye aachunaka okhala oororomeleya wa Yehova vamoha ni wooniherya wi onnamusivela mweeparipari.

▸ Mwaha 1, eparakrafo 12

Yehova ootikitherya malakiheryo, naari sooleeliherya vooloca sa yeeyo eri yaphaama ni yoonanara. Mpiipiliyani, nnanwerya ohuserya malakiheryo  yaawo ni woona mukhalelo ananikhaviheryaaya omuhakalaliha Yehova ni okhalano okumi woohakalaliha. (Masiposipo 6:16-19; 1 Korinto 6:9-11) Sooleliherya iha sinnanihusiha mukhalelo Muluku onuupuweleiye. Sooleeliherya tho iho sinnanihusiha mukhalelo wa wooniherya osivela, opaka soolakelela saphaama, ni oweerela akina saphaama. Naamwi meecelo a elapo etitelelaka onanara, yeeyo Yehova onaloceiye wi ti yaphaama naari ti yoonanara henatorokeya. (Malamulo 32:4-6; Malakiya 3:6) Wiiwelela sooleeliherya sa Yehova sinnanaakiha mu sawiicela sincipale ni makacamiho.

▸ Mwaha 1, eparakrafo 17

Yawuupuxerya-ya-murima ti osuwela ori mpuwa mwahu yoowo anansuweliha yeeyo eri yaphaama ni yoonanara. Yehova oomvaha mmoha ti mmoha a hiyo yawuupuxerya-ya-murima. (Aroma 2:14, 15) Wi yawuupuxerya-ya-murima ahu elapeke phaama, onachuneya ovyakiha mwawiiwanana ni yeeyo Muluku onaloceiye wi ti yaphaama naari ti yoonanara. Neerano yeeyo yawuupuxerya-ya-murima ahu enanwerya onikhaviherya opaka soolakelela sini simuhakalalihe Muluku. (1 Pedro 3:16) Yawuupuxerya-ya-murima enanwerya onleela naahaalaka opaka soolakelela soonanara. Nave wakhala wi noheera echu yoonanara yawuupuxerya-ya-murima ahu enahaala onihooxa. Elukuluku ekina yawuupuxerya-ya-murima ahu enamukhala yooceecheya nyenya nnikhaviheryo na Yehova enanwerya okookela okhala yoolipa. Yawuupuxerya-ya-murima yaphaama ennanruhela murecele wa mmuupuweloni.

▸ Mwaha 2, eparakrafo 3

Omoova Muluku onataphulela omusivela ni omucicimiha vancipale ni oheera echu yaahaala omuhiciha. Omoova Muluku onnanikhaviherya opka yeeyo eri yaphaama ohiya weera yeeyo eri yoonanara. (Salumu 111:10) Va nthowa na yeeyo, ninnawiriyana phaama soothene Yehova onaloceiye. Omoova Muluku onnanikhaviherya tho waakhwaniherya yeeyo nroromelinhaahu wa Yehova, woona wi ninnamucicimiha vancipale. Omoova Muluku onnavolowela mukhalelo nnuupuwelaahu, nnaakhalihaahu akina vamoha ni soothanla nnapakaahu nihiku nnihiku.

▸ Mwaha 2, eparakrafo 9

Ocharuwa onavolowela othanana otokotoko muchu onakhaleiyeno nthowa na weera echu yoonanara. Yaawo anamusivela Muluku annatepa othanana wakhala wi ahoona wi aheerano echu yeeyo ehiniiwanana ni yeeyo Yehova onaloceiye wi ti yaphaama. (Mateu 26:28; 1 Yohani 2:1, 2) Wakhala wi noocharuwa ni murima woothene ni ohiya weera yoonanara, nnaphwanela ororomela wi Yehova onahaala onikhurumuwela. Hannaphwanela otitelela wuukhuwa vooloca sa yeeyo nipankaahu khalai. (Salumu 103:10-14; 1 Yohani 1:9; 3:19-22) Nnaphwanela wiilipixerya ohuserya orweela wa soohesa sahu, otoroka muupuwelo ahu woonanara ni okhala mwawiiwanana ni yeeyo Yehova onaloceiye wi ti yaphaama.

▸ Mwaha 2, eparakrafo 18

Wakhala wi muchu yoowo opanke yoocheka etokotoko hanacharuwa nave hanachuna ochariha ohoolela wa Yehova, owo hanaphwanela otitelela opaka makupa a muloko. Owo onaphwanela wiikariwa mmulokoni. Wakhala wi muchu ohiikariwa mmulokoni, ninnahiya okhala ni yoowo nave tho ninnahiya olocano. (1 Korinto 5:11; 2 Yohani 9-11) Marehereryo yaala a owiikara yaale ahinacharuwa, annaakiha nsina na Yehova vamoha ni muloko. (1 Korinto 5:6) Wiikariwa mmulokoni tho yoolaka yeeyo enawerya omukhaviherya muchu ochenke wiiwexexa wi onaphwanela ohiya weera yoonanara wi awerye okookela wa Yehova.—Luka 15:17.

▸ Mwaha 3, eparakrafo 19

Yehova onnanisivela nave onnachuna onikhaviherya. Ti yeeyo enamweeriha onivaha ohoolela ni miruku moorweela wa Piipiliya vamoha ni achu yaawo anamusivela Muluku. Woona wi na achu oohiphaameya, hannaphwanela okhala nihirino nikhaviheryo. (Yeremiya 17:9) Wakhala wi ninnaawiriyana ni ncicimiho yaale Yehova onaaphariheleiye wi enihooleleke, ninnooniherya wi ninnamucicimiha Yehova nave wi ninnachuna omwiiwelela.—Ahebri 13:7.

▸ Mwaha 4, eparakrafo 2

Woona wi na achu oohiphaameya, ti wookhweya okhala a miiko ni wiirumiha. Nyenya Yehova onaweherya wi nikhale achu awiiyeviha. Wiiliwiili, ninnahuserya okhala awiiyeviha wakhala wi nohiilikanyiha ni Yehova nave noona wi nootepa oyeva. (Yobi 38:1-4) Mukhalelo mukina tho wa ohuserya okhala awiiyeviha, ori owuupuwela vancipale akina ni echu eni ekhale yaphaama wa yaawo ohiya wiisoona mukhatiihu. Wiirumiha onnamweeriha muchu wuupuwela wi owo toophwanelela waapwaha akina. Muchu awiiyeviha, onnoona moophimelela mavyakelo awe vamoha ni sooceecheya sawe. Hanoova weemererya soohesa sawe, oveka nikhurumuwelo, ni weemererya miruku naari ohoolela. Muchu awiiyeviha onnamuroromela Yehova ni ochariha ohoolela wawe.—1 Pedro 5:5.

▸ Mwaha 4, eparakrafo 4

Okhalano owerya enataphulela okhalano ophwanelela wa ovaha malamulo ni opaka soolakelela. Pahiru Yehova tarino owerya otokweene wirimu ni veelaponi yavathi. Woona wi topatunxe ichu soothene, owo tori Muchu a ikuru mu elapo yoothene. Ilukuluku soothene owo onnapharihela ikuru seiho wi aakhaviherye akina. Yehova ohaavaha achu awaalakhanyeya murici wa onikhapelela. Ntoko yootakiherya, asitiithi, asitokweene vamoha ni alamuleli aakhalano murici yoowo, nave Yehova onachuna mmoha ti mmoha a hiyo nchariheke ohoolela waya. (Aroma 13:1-5; 1 Timóteo 5:17) Nyenya wakhala wi malamulo a achu annavuhana ni malamulo a Muluku, hiyaano ninnamwiiwelela Muluku waahiya achu. (Saweriwa T’arummwa 5:29) Vaavaa nnaacicimihaahu achu yaawo Yehova aavanheiye owerya, ninnooniherya wa Yehova wi ninnacicimiha soolakelela sawe.

▸ Mwaha 4, eparakrafo 7

Atokweene anna arino mavyakelo yaawo Yehova onaaphariheleiye wi ekhapelele muloko. (Malamulo 1:13; Saweriwa T’arummwa 20:28) Alopwana yaala annanikhaviherya wi onthamwene ahu ni Yehova otitelele okhala woolipa. Nave tho annanikhaviherya omurumeela Yehova mmukhalelo wooreheryeya ni mwawiiwanana. (1 Korinto 14:33, 40) Wi atokweene  ewerye othanliwa ni munepa waweela, awo anaphwanela waakhwaniherya soovekeya inaphwanyeya Mpiipiliyani. (1 Timóteo 3:1-7; Tito 1:5-9; 1 Pedro 5:2, 3) Hiyaano ninnaroromela marehereryo a Yehova nave ninnahakalala owiiwelela ni waakhaviherya atokweene.—Salumu 138:6; Ahebri 13:17.

▸ Mwaha 4, eparakrafo 8

Yehova ohaavaha asitiithi murici wa waahoolela anaaya vamoha ni oothene a veechokoni. Nyenya, Piipiliya onnaloca wi mulopwana tori muru wa echoko. Nyenya wakhala wi echoko eyo haavo tiithi, mai onnakuxa murici yoola. Murici wa muru wa echoko onavolowela waavaha aveechokoni vawe yoolya, soowara, ni nipuro na okhalavo. Ti woochuneyaxa wi muru wa echoko onahoolela mu waakhaviherya a veechokoni vawe omurumeela Yehova. Ntoko yootakiherya, owo onaphwanela opaka marehereryo wi oothene a veechokoni enaphiya mmithukumanoni, oya mmuteko woolaleerya, ni omuhuserya Piipiliya vamoha. Muru wa echoko tonahoolela opaka soolakelela. Ilukuluku soothene onniilipixerya omutakiherya Yesu moorweela wa okhala eepewe ni oophimelela, ohiya okhala oowali naari oohooxa. Ela ennakhaviherya opaka echoko yookilaatheya, wi oothene a veechokoni ekhaleke ookhapeleleya ni wunnuwiha onthamwene aya ni Yehova.

▸ Mwaha 4, eparakrafo 12

Nikhuuru Noolamulela nri nikhuuru na anna yaawo arino ewehereryo ya oya wirimu anaphariheliwa ti Muluku wi aahoolele achu awe. Mmahiku a arummwa, Yehova aapharihela nikhuuru noolamulela wi aahoolele Akristu oopacerya mmalapelo awe vamoha mmuteko woolaleerya. (Saweriwa T’arummwa 15:2) Olelo, anna yaawo anarumeela ntoko Nikhuuru Noolamulela annahoolela waahusiha, waahoolela, ni waakhapelela achu a Muluku. Anna yaala onnaroromela mu ohoolela onaphwanyeya Mpiipiliyani vaavaa anapakaaya soolakelela. Yesu aawiichana alopwana yaala awoocihiwa ntoko “namuteko oororomeleya ni a miruku.”—Mateu 24:45-47.

▸ Mwaha 4, eparakrafo 15

Elukuluku ekina murokora ananwerya ovekiwa wi eere echu mmulokoni yeeyo yahaala weeriwa ni munna. Yakhala wi eyo yoheereya annaphwanela wooniherya ncicimiho wa Yehova moorweela wa ohuruwela muru awe. Nyenya owo pahiru oneerano hiiha wakhala woochuneya chiryene. Ntoko yootakiherya, wakhala wi murokora anaya weeciha yoohuserya ya Piipiliya ari vamoha ni iyawe naari munna oopatisiwa, owo onnaphwanela ohuruwela muru awe.—1 Korinto 11:11-15.

▸ Mwaha 4, eparakrafo 17

Wakhala wi ninniivalaanya ni elapo, hanrwa neemererya ovolowela miyaha sa epoliitika. (Yohani 17:16) Achu a Yehova annakhaviherya Omwene wa Muluku. Hiyaano ninniivalaanya ni miyaha sa elapo hiiha ntoko Yesu eereiye.

Yehova onnanleela wi nnaphwanela “owiiwelela alipa oolamula ni mamwene.” (Tito 3:1, 2; Aroma 13:1-7) Nyenya tho malamulo a Muluku annanleela wi ti yoonanara wiipha. Mwawiihiiha, yawuupuxerya-ya-murima ya Mukristu henamweemererya oya okhoconi. Wakhala wi aakhalavo marehereryo a ophara muteko mukina, ela tiwi muteko ohinapaka makupa a owaniha, Mukristu onaphwanela wuupuwelela waakhanle wi onahaala weerano yeeyo.

Hiyaano nnamurumeela pahiru Yehova, nthowa nawi Mpatuxa ahu. Naamwi nooniheryaka ncicimiho wa elapo nnakhalaahumo, hinnakokhorela epantera naari mano omwiipa iinu nasiyonale. (Isaiya 43:11; Daniyeli 3:1-30; 1 Korinto 10:14) Ohiya yeeyo, kapuro a Yehova ori oothene onalakelela mukhateiye ohipaka makupa a epartitu eri yoothene naari omuthanla muchu ori oothene. Ninneera hiiha nthowa nawi noothanla olamulelo wa Muluku.—Mateu 22:21; Yohani 15:19; 18:36.

▸ Mwaha 5, eparakrafo 2

Elapo ennaaceenyerya achu wuupuwela moolikana ni Satana. Mukhalelo yoowo wa wuupuwela ti wawunlaana ni achu yaawo ahinamusivela  ni anakhooca ochariha malakiheryo a Yehova. (1 Yohani 5:19) Mukhalelo yoowo wa wuupuwela vamoha ni meerelo aniichaniwa munepa wa elapo. (Éfeso 2:2) Achu a Yehova annapaka wiilipixerya woothene wi ehivoloweliwe ni munepa yoola. (Éfeso 6:10-18) Moohiyana, hiyaano ninnasiveliwa ni meerelo a Yehova nave ninniilipixerya wi nuupuweleke moolikana ni yoowo.

▸ Mwaha 5, eparakrafo 7

Michaka sa achu oomwaryeya iri michaka seiho sinahucukula iparipari sa Mpiipiliyani. Alipa oomwaryeya tookhoma nave hanachuna omwiiwelela Yehova ni Yesu, yoowo ori Mwene a Omwene wa Muluku, nave anneererya waahuweliha akina wi ekhale vamoha ni yaawo. (Aroma 1:25) Awo anachuna oruuha minikwa mmuupuweloni mwa yaale anamurumeela Yehova. Khalai, elukuluku ya Akristu oopacerya, akina yaahikhala oomwaryeya, nave emohamoha enneereya tho olelo. (2 Tesalonika 2:3) Yaale ari oororomeleya wa Yehova hanachariha echu eri yoothene ya alipa oomwaryeya. Hannaphwanela weemererya wi ochuna woonexexa naari okhinyererya wa akina oneerihe waalakhanya, naari owiriyana miruku sa alipa oomwaryeya. Hiyaano nri oororomeleya wa Yehova nave nnamurumeela yooworu pahi.

▸ Mwaha 5, eparakrafo 9

Mwawiiwanana ni Malamulo a Mose, vaavaa Aisarayeli yaavekaaya oleveleliwa soocheka saya, awo yaanamukuxa mwaaxinama, aseeti ni isoro wi sikhale mukucho mu empa ya Muluku wi Yehova aakhurumuwele. Mikucho seiha, siichaniwa mikucho sa oleveleliwa soocheka. Eyo yaanawuupuxerya Aisarayeli wi Yehova aanawerya okhurumuwela soocheka sa nloko noothene naari yoocheka ya muchu ti muchu. Ohoolo waya Yesu amanle ovaha okumi awe wi akhuneele, naari okhurumuwela soocheka sahu, hiwaari tho woochuneya waavaha asinama. Mukucho Yesu ovanheiye “ovahiwe khuluwi, omoharu.”—Ahebri 10:1, 4, 10.

▸ Mwaha 7, eparakrafo 6

Ntoko Nlamulo na Mose naalocaaya, achu yaaheemereryiwa owiipha axinama wi ekhale mathaapa. Awo tho yaanapharihela axinama wi eveleele mukucho wa Yehova. (Onamukutxho 1:5, 6) Nyenya Yehova hantonko weemererya wi achu awe ewiipheke axinama mwaapure-mwaapure. (Masiposipo 12:10) Tiyawi, Malamulo yaakhalano sooleeliherya seiho saakhapelela axinama wi ehikhalihiweke moonanara. Nlamulo naanaloca wi Aisarayeli yaaphwanela waakhapelelaka phaama axinama.—Malamulo 22:6, 7.

▸ Mwaha 7, eparakrafo 6

Ifarasau sa nikhami. Nikhami nookhalano makupa maxexe oochuneya—glóbulos vermelhos, glóbulos brancos, plaquetas ni plasma. Makupa yaala oochuneya ananwerya okawanyiwa mmakupa makhaani, yaawo aniichaniwa ifrasau sa nikhami. *

Akristu haneemererya waakhela nikhami noothene naari makupa yaala maxexe oochuneya. Mano, apwanne anaphwanela weemererya murece yoowo onapakiwa ni ifrasau sa nikhami? Piipiliya hanavaha naakhulo nooluluwanya. Mwawiihiiha Mukristu ti Mukristu onaphwanela opaka yoolakelela awe mwawiiwanana ni yawuupuxerya-ya-murima yoovyakihiwa ni Piipiliya.

Akristu akina annalakelela okhooca waakhela ifrasau sa nikhami. Akhweya yuupuwelaka wi mu Nlamulo na Muluku wa Aisarayeli yaalamuleliwa wi “eyeeheryeke vachayani” nikhami noothene na mwaaxinama.—Malamulo 12:22-24.

Nyenya akina annapaka soothanla soohiyana. Yawuupuxerya-ya-murima aya ennaweemererya waakhela ifrasau sa nikhami. Akhweya awo arino muupuwelo wawi ifrasau ihe hasineemelela ekumi ya muchu naari ya mwaaxinama nikhami nle nikuxiwaayawo.

Vaavaa Mukristu onapakeiye soolakelela vooloca sa ifrasau sa nikhami, onaphwanela othokororya makoho anacharela:

• Wakhala wi nkineemererya ifrasau sa nikhami, apwanne eyo enataphulela wi nkineemererya murece ori woothene onamaliha ireca ikina naari onahiiha wi nikhami nihiyeeheyeke?

•   Kini kitharihe hai wa totore wakhala wi koolakelela opharihela efrasu emoha naari sincipale sa nikhami?

Oloola wa oxipitale. Ntoko Akristu, hiyaano hannavaha naari winlaathi nikhami nahu wi niphariheliwe namala wooperariwa. Nyenya, aakhalavo meerelo makina a opharihela nikhami na yoole onooperariwa. Mukristu ori oothene onaphwanela olakelela mukhalelo onachuneiye wi nikhami nawe neeriweno variyari va wooperaariwa, waalikheliwa, naari meerelo makina. Variyari va meerelo yaala akhweya nikhami na muchu owo nnanwerya okuhiwa okhwipi wa mwiili mu elukuluku yavakhaani.—Wi mukhaleno sooleeliherya sincipale, mmoone Mulipeleli a 15 a Otupuru a 2000, ipaaxina 30-31 a Ekunya.

Ntoko yootakiherya, aakhalavo meerelo aniichaniwa hemodiluição, variyari va wooperaariwa, nikhami ninnakuxiwa nikerihiwa makupa makina  nave mu elukuluku yeeyo muchu onnaheliwa echu ntoko maahi. Nave mwawaakuveya amanle opakiwa operasau, onnakookiheryiwa wanaawiili nikhami nawe.

Meerelo makina aniichaniwa recuperação intraoperatória de células. Mmukhalelo yoola, nikhami nnayeeheya variyari va operasau ninnaroleliwa, nrapihiwa nave voocharela onnakookiheryiwa mwaneene variyari naari amanle operasau.

Mwawiiwanana ni meetiko ti meetikiku, mukhalelo wa weerano onanwerya ohiyana vakhaani. Mwawiihiiha, ahaakumve weemererya oloola ori woothene, waalikheliwa naari echu ekina, Mukristu onaphwanela osuwela phaameene mukhalelo nikhami nawe nnahaalaaya weeriwano.

Wakhala wi munapaka yoolakelela vooloca sa meerelo yaawo anapharihela nikhami nanyu, muthokororye makoho ala:

• Wakhala wi nikhami naka nookerihiwa okhwipi wa mwiili aka mu elukuluku vakhaani, apwanne yawuupuxerya-ya-murima aka enahaala okeemererya ni woona nikhami nenla nlelo okhala naaka, hankiveka wi ‘niyeheryiwe vachayani’?—Malamulo 12:23, 24.

• Wakhala wi variyari va operasau nikhami naka nookumihiwa mmwiilini mwaka, nipakeliwa matorokelo nave nikookiheryiwa wanaawiili mmwiilini mwaka. Apwanne yawuupuxerya-ya-murima aka yaahaala okacamiheya?

• Wakhala wi kookhooca meerelo oothene a opharihela nikhami naka, apwanne eyo enataphulela wi nkineemererya waalikheliwa orweela wa nikhami, emotiyalise naari ophariheliwa wa maakina coração-pulmão?

 Muhaakumve opaka yoolakelela vooloca sa ifrasau sa nikhami vamoha ni meerelo yaawo anaphariheliwa nikhami na muchu mwaneene, ti woochuneya ovekela wa Yehova wi nikhaleno ohoolela wawe voocharela nitholathole mwaha owo. (Tiyako 1:5, 6) Voocharela, nipharihele yawuupuxerya-ya-murima ahu esyakihiwe ni Piipiliya. Hannaphwanela waakoha akina wi enileele tiheeni yaahaalaaya weera waakhanle wi ari mmukhalelo yoowo, nave tho akina hanaphwanela onileela echu yaweera.—Aroma 14:12; Galasya 6:5.

▸ Mwaha 7, eparakrafo 11

Okhalano meecelo aweela onataphulela wi soothene nnapakaahu ti saphaama vamiithoni va Muluku. Meecelo aweela anavolowela ichu nnuupuwelaahu, nnalocaahu ni seiho nnapakaahu. Yehova onaloca wi nnaphwanela osepa mukhalelo ori woothene wooriipiheya naari okonihana woohiphwanelela. (Masiposipo 1:10; 3:1) Nnaphwanela oolakelela okhala aweela vamiithoni va Yehova ni ochariha malamulo awe avasulu nihaakumve weereryiwa opaka echu yoonanara. Nnaphwanela ovekelaka ilukuluku soothene wi niveke nikhaviheryo na Muluku wi nikhaleno mawuupuwelo aphaama ni aweela, nave nnaphwanela okhala oolakelela okhooca saweeha soothene sa ocapaheya.—1 Korinto 6:9, 10, 18; Éfeso 5:5.

▸ Mwaha 8, eparakrafo 11

Meerelo oohiphwanelela onavolowela oloca naari weera ichu soohiphwanelela yooniheryaka ohicicimiha malamulo a Muluku. Muchu oneera ichu seiha onooniherya wi haniiwelela malamulo a Muluku. Meerelo oohiphwanelela anavolowela soocheka itokotoko soohiyanahiyana. Mwawiiwanana ni wunnuwa waya wa mwaha owo, miyaha mikina inavolowela oriipiheya inanwerya omweeriha muchu okiraathihiwa ni asitokweene araru a mmulokoni.—Galasya 5:19-21; Éfeso 4:19; wa sooleeliherya sawaaceererya, mwaalakhanye mwaha orino muru “Makoho a Alipa Waalakhanya” mu Mulipeleli a Ekunya, 15 a Yulyu a 2006

▸ Mwaha 9, eparakrafo 7; Mwaha 12, eparakrafo 10

Yehova oopaka makupa a mwiikho wi ephariheliweke moophwanelela variyari va mulopwana ni muthiyana athelanne wi yooniheryaneke wi annasivelana. Nyenya wakhala wi muchu onnaceha naari othatano mwiikho awe wi apuhe, muchu owo onapharihela mmukhalelo woonanara. Yookhovelela yeela enanwerya omweeriha muchu onanariha onthamwene awe ni Yehova. Enanwerya tho omweeriha muchu okhalano nchuno noopwahererya na opaka mwiikho ni woonaka mwiikho mmukhalelo wooheseya. (Kolosi 3:5) Muchu yoowo orino yookhovelela yeela yooriipiheya, nave anoona wi ti woovila ohiya, hanaphwanela ovelavela. (Salumu 86:5; 1 Yohani 3:20) Waakhanle wi muri mmukhalelo yoola, mvekeleke ni murima anyu woothene wa Yehova nave mveke nikhaviheryo nawe. Musepe ichu inahaala oweerihaani okhalano muupuwelo woonanara, ntoko woona epwitikiri. Muloce ni asitiithi anyu wakhala wi Anamoona a Yehova naari ni nthamwene anyu awiichwelavo omunepani yoowo onacicimiha malamulo a Muluku. (Masiposipo 1:8, 9; 1 Tesalónika 5:14; Tito 2:3-5) Muroromele wi Yehova onnoona wiilipixerya wanyu wi mukhale aweela nave onnathamalela wiilipixerya wanyu woothene.—Salumu 51:17; Isaiya 1:18.

▸ Mwaha 9, eparakrafo 9

Yookhovelela ya okhalano athiyana ancipale naari muthiyana otheliwa ni alopwana ancipale, oniichaniwa waaceya. Yehova oopaka othela wi okhale ophitaana wa mulopwana mmoha ni muthiyana mmoha. Khalai mmahiku a Isarayeli, Muluku aaneemererya wi mulopwana akhalekeno athiyana ancipale, nyenya ela hiyaari yoochuna awe yoopacerya. Olelo, Yehova haneemererya waaceya variyari va achu awe. Mulopwana onaphwanela okhalano muthiyana mmoharu pahi, nave muthiyana akhaleno tho mulopwana mmoharu pahi.—Mateu 19:9; 1 Timóteo 3:2.

▸ Mwaha 10, eparakrafo 12

Yoolakelela ya Yehova yaari wi mulopwana ni muthiyana ekhaleke vamoha ekumi aya yoothene. (Maphatxuwelo 2:24; Malakiya 2:15, 16; Mateu 19:3-6; 1 Korinto 7:39) Owo onneemererya omwalana pahiru wakhala wi mmoha a oothelana ooraruwa. Wakhala wi yooheereya yeela, Yehova onnamvaha ekari mulopwana naari muthiyana yoowo okhumeliwe mpa wi alakelele waakhanle wi onahaala omwalanano naari hooye.—Mateu 19:9.

 Nyenya ilukuluku ikina anna naari arokora akina annalakelela omwalamwala naamwi ehiri mathowa a oraruwa. (1 Korinto 7:11) Moone ichu sahaala omweeriha muchu omwalamwala ni oothelana awe:

• Ohivakulela echoko: Eyo eneereya wakhala wi mulopwana onnakhooca mmikhalelo soothene ovakulela echoko, ophiyerya wi echoko ehinakhalano yoolya naari ikhorowa.—1 Timóteo 5:8.

• Ohooxana: Wakhala wi mmoha a oothelana onnahooxiwa, akhweya moorweela wa omaniwa nave onoona wi ekumi awe eri va yawoopiha.—Galasya 5:19-21.

• Wakhala wi mulopwana naari muthiyana haneemererya wi muchu mukina amurumeele Yehova. Nave eyo ehelaka va yawoopiha onthamwene wa muchu ni Yehova.—Saweriwa T’arummwa 5:29.

▸ Mwaha 11, eparakrafo 19

Oothene ahu ninnachuna othamaleliwa ni olipihiwa. (Masiposipo 12:25; 16:24) Nnanwerya olipihana ni ohakararyana moorweela wa masu oosivela ni aphaama. Masu awiihiiha ananwerya waakhaviherya anna ovilela ni otitelela omurumeela Yehova naamwi ekumanaka ni makacamiho mancipale. (Masiposipo 12:18; Filipi 2:1-4) Wakhala wi muchu ori ooceecheya omunepani, nnaphwanela onwiriyanaka moomaaleleya ni wiilipixerya wiiwexexa mukhalelo oniisooneiye. Eyo enanwerya onikhaviherya osuwela echu ya oloca naari weera wi nimukhaviherye. (Tiyako 1:19) Ekhale yoolakelela anyu waasuwela phaama anna ni arokora wi nwerye wiiwexexaka phaama yeeyo anachunaaya. Mwawiihiiha munanwerya waakhaviherya waavya nikhaviheryo na Muluku a nlipiho noothene, yoowo onavaha wiichuuwiha weeparipari.—2 Korinto 1:3, 4; 1  Tesalónika 5:11.

▸ Mwaha 12, eparakrafo 16

Piipiliya haano sooleeliherya soothene vooloca sa mukhalelo wa opaka efesta ya othela. Ichu sinavekiwa ni malamulo vamoha ni sookhovelela ti soohiyana nipuro nnipuro. (Maphatxuwelo 24:67; Mateu 1:24; 25:10; Luka 14:8) Echu yoochuneya va othela nri nlakano atheli anapakaaya wa Yehova. Atheli ancipale annalakelela wi ahima ni asinthamwene aya ekhalevo vaavaa anapakaaya nlakano  nenla nave wi mutokweene a muloko apake mwaha woorweela Mpiipiliyani. Yaawo anaya othela tarino murici wa olakelela waakhanle wi anahaala opaka efesta. (Luka 14:28; Yohani 2:1-11) Moohipwacha mukhalelo mutheli onachuneiye orehererya efesta eyo, echu yoochuneya ori weeriha wi efesta emucicimihe Yehova. (Maphatxuwelo 2:18-24; Mateu 19:5, 6) Malakiheryo a Piipiliya ananwerya waakhaviherya alipa oothela opaka soolakelela saphaama. (1 Yohani 2:16, 17) Wakhala wi awo aalakelela wi sikhalevo soowurya, awo anaphwanela okhalano ekaasoope wi efesta eyo ehipwahe mphimo. (Masiposipo 20:1; Éfeso 5:18) Wakhala wi anachuna wi okhalevo muusika, awo anaphwanela okhalano ekaasoope wi ehimuthananihe Yehova. Nyenya ohiya oteteiwa pahiru nnihiku na othela, atheli Eekristu anateteiwa ni onthamwene aya ni Yehova vamoha ni wiiwanana waya mukina ni mukhwaawe.—Masiposipo 18:22; wi moone sooleeliherya ikina, mmoone Mulipeleli a 15 a Otupuru a 2006, ipaaxina 18-31 a Ekunya.

▸ Mwaha 13, eparakrafo 18

Ninnachuna opaka soolakelela saphaama, seiho iniiwanana ni malakiheryo a Mpiipiliyani. Ntoko yootakiherya, mmwaanyiherye murokora yoowo aiyawe ahiri namoona a Yehova. Iyawe onnamwopa wi yalye vaate va muhima awe mu nihiku na efesta ya elapo. Waakhanle wi ti nyuwaano, tiheeni mwaahaalaanyu weera? Wakhala wi yawuupuxerya-ya-murima anyu ennaweemereryaani oyawo, munaphwanela oloca ni oothelana anyu wi wakhala wi enneeriwawo yookhovelela ya malapelo atheru, nyuwaano hamuni mpake makupa. Nave tho, munaphwanela wuupuwela waakhala wi eyo hiyaakwaculiha akina wakhala wi moolakelela oyawo.—1 Korinto 8:9; 10:23, 24.

Naari akhweya patarawu anyu onnaaceererya ikhorowa mweeri wa efesta. Apwanne nyuwaano munaphwanela okhooca? Tahi woochuneya. Echu enahaala wooniherya waakhanle wi onneemereryeya waakhela naari hooye ari mathowa anamweeriha patarawu anyu weerano yeeyo. Apwanne onaaceererya ikhorowa iho nthowa na efesta? Naari wi owo onachuna wooniherya othamalela? Waalikhela yeela ni ichu ikina, enahaala wookhaviheryaani waakhanle wi ti yaphaama weemererya.

Echu ekina ti ela, akhweya muchu onanwerya woovahaani yamahala mu elukuluku ya ifesta alocaka masu ala: “koosuwela wi hamunapaka makupa a ifesta, naamwi hiiha, kinachuna woovaha ela.” Apaale muchu owo onooniherya mahala. Vakina vaya, ti yaphaama wiikoha: ‘Apwanne onachuna weeha nroromelo naka naari okivoliiherya wi kipake makupa a efesta?’ Mmanle waalikhela nikoho nenla, eri mwa nyuwaano okhooca naari weemererya yoovaha eyo. Mu soolakelela sahu soothene, nnachuna okhalano yawuupuxerya-ya-murima yaphaama ni okhala oororomeleya wa Yehova.—Saweriwa T’arummwa 23:1.

▸ Mwaha 13, eparakrafo 22

Mu ikwaha sincipale, ohiiwanana hokhala mwaha mutokweene wakhala wi woothokororyiwa mwawaakuveya ni mmureceleni. (Mateu 5:23-26) Wa Akristu oothene, echu enaphwanela okhala yoochuneyaxa ori omucicimiha Yehova vamoha ni weeriha wi mmulokoni okhalemo wiiwanana.—Yohani 13:34, 35; 1 Korinto 13:4, 5.

Wakhala wi wookhumelela ohiiwanana vooloca sa mwaha wa nakoso variyari va Akristu, awo anaphwanela weererya omaliha mwaha owo mukhataaya ohiya okeriha wa alipa oothoriha. Mu Korinto oopacerya 6:1-8 murummwa Paulo oovaha miruku vooloca sa munna omusomela munna mukina. Waasomela annihu onahaala oweeriha akina omoonaka Yehova moonanara vamoha ni muloko. Mu Mateu 18:15-17, aakhalamo meerelo mararu yaawo Akristu anaphwanelaaya ochariha wi emalihe ohiiwanana: (1) Woopaceryani awo anaphwanela weererya omaliha mwaha yaawoyaawo; (2) Wakhala wi honaweryeya, awo anaphwanela oveka nikhaviheryo na muchu mmoha naari apiili mmulokoni nave (3) Voocharela, wakhala woochuneya, awo anaphwanela waaveka atokweene mmulokoni wi ethokororye mwaha yoowo. Wakhala wi wohiiwexexeya, atokweene anahaala opharihela malakiheryo a Piipiliya wi yaakhaviherye oothene olevelelana ni otikitherya murecele. Nave wakhala wi muchu mmoha a yaawo hanachuna ochariha  malakiheryo a Piipiliya, onahaala okhala woochuneya wi atokweene a mmulokoni emuthorihe.

Sookhalavo miyaha mikina akhweya onahaalaaya okhala woochuneya osoma wa alipa oothoriha a elapo, ntoko omwalana, ohicicimiha soophwanelela sa anamwane, okhooca ovakulela echoko, olivela esekuru, ni sikina. Mmiyaha ntoko seiho, wakhala wi Mukristu ooveleela wa alipa oothoriha wi olociwe moomaaleleya, tahi wi oochekela miruku sa Paulo.

Wakhala wi oopakiwa kirime mutokweene, ntoko omukhinyererya muchu opaka sa mwiikho, waakoniha anamwane, omana, wiiya naari wiipha, Mukristu yoowo onalokoha ichu ntoko seiha wa athoriha a elapo tahi wi oochekela miruku sa Paulo.

▸ Mwaha 14, eparakrafo 14

Ovinyerya mu emaca ya Eteni, Satana onneererya waawoka achu. (Maphatxuwelo 3:1-6; Wupulula 12:9) Owo oosuwela wi wakhala wi oovolowela muupuwelo ahu, onahaala owerya onihuweliha wi neere yeeyo eri yoonanara. (2 Korinto 4:4; Tiyako 1:14, 15) Moorweela wa epoliitika, malapelo, maroca, mathatelo, mahusiheryo ni ichu ikina, Satana onnavuwiha muupuwelo awe nave onneeriha wi muupuwelo owo okhaleke ntoko wi ti waphaama.—Yohani 14:30; 1 Yohani 5:19.

Satana oosuwela wi elukuluku ohanleiyeno wi aahuwelihe achu ti yavakhaani. Mwawiihiiha, onneera soothene onaweryeiye wi aahuwelihe achu ancipale. Owo onachuna xaxaxa waahuweliha yaale anamurumeela Yehova. (Wupulula 12:12) Wakhala wi hinaano ekaasoope, vakhaani-vakhaani Musaserya onahaala ovolowela muupuwelo ahu. (1 Korinto 10:12) Ntoko yootakiherya, Yehova onachuna wi achu athelanne ekhaleke vamoha okumi aya woothene. (Mateu 19:5, 6, 9) Nyenya achu ancipale olelo anoona wi othela echu ya esisapo vakhaani, yeeyo enawerya omwaryiwa mookhweya. Muupuwelo yoola onnavuwihiwa tho mu ixilema sincipale, ni aprokrama a mu televisau. Hannaphwanela weemererya wi moonelo wa elapo vooloca sa othela onivolowele.

 Mukhalelo mukina Satana onaphariheleiye wi anihuwelihe ori ovuwiha munepa wa ochuna okhala ootaphuwa. (2 Timóteo 3:4) Wakhala wi hinaano ekaasoope, nnanwerya oyeleela ncicimiho wa achu yaawo Yehova aathanlileiye wi ehooleleke. Ntoko yootakiherya, munna onanwerya opacerya okhooca ohoolela wa atokweene mmulokoni. (Ahebri 12:5) Naari akhweya murokora onampacerya waakaaha marehereryo a Yehova vooloca sa muru wa echoko.—1 Korinto 11:3.

Nnaphwanela okhala oolakelela oheemererya wi Musaserya avolowele muupuwelo ahu. Ohiya yeeyo, nnachuna wuupuwelaka ntoko Yehova ni otikitherya muupuwelo ahu mu “ichu soosulu.”—Kolosi 3:2; 2 Korinto 2:11.

▸ Mwaha 16, eparakrafo 9

Oothene hiyo ninnachuna okhala akumi ni waakhela oloola woophwanelela vaavaa nniiceliwaahu. (Isaiya 38:21; Marko 5:25, 26; Luka 10:34) Olelo matotore mancipale vamoha ni akina annavahererya oloola woohiyana hiyana. Vaavaa nnalakelelaahu ochara mukhalelo wa oloola wammoori, ti woochuneya ochariha malakiheryo a Mpiipiliyani. Noosuwela wi pahiru Omwene wa Muluku tonahaala omaliha ireca soothene. Hannachuna ocicimiheryaxa pahiru okumi ahu ophiyerya ohiya okhwipi omurumeela wahu Yehova.—Isaiya 33:24; 1 Timóteo 4:16.

Nnaphwanela okhalano ekaasoope wi niheemererye mukhalelo wa oloola onakhala ntoko onnavolowela ikuru sa masololo. (Malamulo 18:10-12; Isaiya 1:13) Mwawiihiiha, nihaakumve weemererya oloola naari murece, nnaphwanela waavya osuwela vooloca sa oloola iwo waakhanle wi henavolowela masololo. (Masiposipo 14:15) Nihicuwale wi Satana onahaala osiveliwa wakhala wi noheemererya oloola onavolowela masololo. Wakhala wi ninnakhwa minikwa wi mukhalelo wammoori onnavolowela masololo, ti yaphaama okhooca.—1 Pedro 5:8.

▸ Mwaha 16, eparakrafo 18