Vaava oreiye o Yerusalemu ntakhara Paskha a 30 E.K., Yesu onnapaka ineneeryo sootikhiniha. Ntoko yookhumelela, achu ancipale annakhalano nroromelo mwa yoowo. Nikotemu, yoowo ori Nfarisi ni mmoha a nikhuuru ntokweene na othoriha na Ayuta nniichaniwa Sineetriyu, ori ootikhiniheya. Achunaka ohuserya sincipale, onnamusekurya Yesu ohiyu, akhweya onoova ohela vawoopiha ophwanelela wawe vamiithoni va ahooleli akina a Ayuta vaava aneeraaya emoone.

Nikotemu onnaloca: “Rabi, ninnasuwela wi Nyuwo mwá Muhusiha órwela wa Muluku; vawi havovo mutchu anawerya wera ineneryo iha muneranyu, Muluku ahikhanleno.” Amwaakhulaka, Yesu onnaloca wa Nikotemu wi muchu “áhiyariwa’tho [wanawiili]” hani avolowe mu Omwene wa Muluku.—Yohane 3:2, 3, Nlakano Nahihano.

Muchu anii awerye hai oyariwa wanawiili? Nikotemu onnakoha: “Mano anawerya ovolowa’tho m’mirimani mwa amannya ni oyariwa?”—Yohane 3:4, NN.

Tahi yeeyo enataphulela oyariwa wanawiili. Yesu onnathariha: “Mutchu áhiyariwa mwa mahi ni Munepa hawerya ovolowa omwene wa Muluku.” (Yohane 3:5, NN) Vaavaa Yesu aapatisiweiye nave munepa waweela omukhuruwela, owo aahiyariwa “mwa mahi ni Munepa.” Mu elukuluku yeeyo, yaahiiweya masu oorweela wirimu: “Ola ti mwanaka òkhweleyasa, kinaphwanyakamo nihakalaliho naka.” (Mateu 3:16, 17) Mmukhalelo yoowo, Yehova aahilokoha wi aahimuruuha Yesu ntoko mwaana oomunepani yoowo aarino ewehereryo ya ovolowa mu Omwene wa wirimu. Ohoolo waya, mu Pentekoste a 33 E.K., munepa waweela waahaala oyeeheryiwa wa achu oopatisiwa, nave awo yaahaala oyariwa wanawiili ntoko anamwane oomunepani a Muluku.—Saweriwa T’arummwa 2:1-4.

Ti yoovila wa Nikotemu wiiwexexa yeeyo Yesu onamuhusiheiye vooloca sa Omwene. Mwawiihiiha Yesu onnavahererya miselo sawaaceererya vooloca sa muteko awe wavameekhaaya ntoko Mwaana a Muluku. Yesu onnaloca: “Ntoko Mose athomen’yeiye enowa okulutxuni, hihatho ennakhweleya wi Mwana a mutxhu athomeyiwe, wi mutxhu ti mutxhu, oni amwemererye, akhaleno ekumi yohimala.”—Yohani 3:14, 15.

Iyaakha muculi Aisarayeli yaahilummwa ni inowa sawoopiha. Wi evuluwe awo yaaphwanela ovarerya enowa ya parata Mose aathomen’yeiye. (Namarepela 21:9) Moolikana, achu oothene anaphwanela omuroromela mwaana a Muluku wi yoopowe mu yoocheka ni okhwa nave ekhaleno ekumi yoohimala. Alocaka osivela wa Yehova mmuteko yoowo, Yesu voocharela onnamuleela Nikotemu: “Muluku òtepa wakhwela atxhu a mwelaponi, ophiyerya onvaha Mwana awe mmoharu, wi mutxhu onamwemererya yowo, ahirimele, nto akhaleno ekumi yohimala.” (Yohani 3:16) Mwawiihiiha miyeeri mithanu nammoha Yesu apacenre muteko awe woolaleerya, onnooniherya wa Nikotemu wi owo ti ephiro ya waavulusa achu.

Yesu onnaloca wa Nikotemu: “Muluku hàmurumihale Mwanawe mwelaponi wi arimelihe elapo.” Eyo enataphulela wi haarumihiwe wi aathorihe mmukhalelo woonanara, waaphwanyerya mathowa achu oothene wi etolosiwe. Opwaha yeeyo, ntoko Yesu olonceiye, owo orumihiwe “wi evuluwe wa nthowa na yowo.”—Yohani 3:17.

Nikotemu onnatepa woova ophiyerya orwa wa Yesu ohiyu. Mwawiihiiha ti yookhweleya Yesu omaliha ovaanela wawe ni yoowo moorweela  wa oloca: “Ekamama yòrwa mwelaponi, nto atxhu akhwenle epiphi opwaha ekamama, wona wi miteko saya sàri sotakhala. Yole onera miteko sonanara onnitxana ni ekamama, nave hanatxamela ekamama, wi miteko sawe ihisuweliwe. Nto yowo onera separipari onnatxamela ekamama, wi soneyeke miteko sawe onereiye vamithoni va Muluku.”—Yohani 3:19-21.

Vano owo murici wa Nfarisi ola ni muhusiha o Isarayeli, wuupuwelela mwa yeeyo omanleiye owiriyana vooloca sa muteko wa Yesu mu yookhwela ya Muluku.