Michaka vooloca sa ochika wa Yesu o Tekapoli sinnamwaramwaxeya variyari va Ayuta anakhala omoko wa oseresere wa Ephareya yo Kalileya. Akhweya ancipale ahiiwa wi variyari va echeku etokotoko, Yesu aahimaaliha echeku ni maahi, nave akina akhweya aasuwela wi ohaapenusa alopwana yaaphariwe ni masololo. Mwawiihiiha “atxhu antxipale” annathukumana oseresere wa ephareya, akhweya makupa o Kafarnau, wi emwaakhele wanaawiili Yesu. (Marko 5:21) Vaavaa onakitheiye mmwaaceyani, awo annaweherya woona ichu owo onahaaleiye opaka.

Xairo, yoowo ori mutokweene a sinakooka onnachuna omoona Yesu. Owo onnakokhora variyari va inaani sa Yesu nave onnaveka mwa nthiti: “Mwanaka amwamuthiyana ohanle vakhani okhwa. Orwe, wamukuherye mata wi awerye ovuluwa ni akhale.” (Marko 5:23) Vanonto, Yesu oni aakhulele hai oveka wa Xairo wi amukhaviherye mwanawe mwaamuthiyana, yoowo orino iyaakha 12 nave ori ookhweleya wa yene?—Luka 8:42.

Va mukwaha awe wa oya vaate va Xairo, Yesu onnahoolela echu ekina yootikhiniha. Ancipale anamuhoola Yesu ari oohakalalaxa, yiikohaka waakhanle wi enahaala owerya omoona apakaka yootikhiniha ekina. Nyenya, muthiyana mmoha variyari va achu ancipale ale onateteiwa ni nikacamiho nawe na ereca yawoopiha.

Mu iyaakha khumi napiili, muthiyana yoola ori Muyuta onnahooxeya ni ereca ya okhuma nikhami. Owo ohaavya nikhaviheryo wa alipa a murece ancipale, ayeehaka ikhorowa sawe soothene ni mirece awo yaamurumaaya. Nyenya haakhaviheryen’ye. Mweeparipari, owo “ànvira atepaka.”—Marko 5:26.

Mwaanyiherye wi ereca awe, ohiya pahiru okhala yooceecheiha ti yookhulumula ni yawuuliha muru. Muchu si yoowo haaloca vanlakani sa mukhalelo awe. Opwahaxa, mu Nlamulo na Mose, ovuuva nikhami waanamweeriha muthiyana okhala mmwiikhoni. Muchu aahaala ophara mwiili awe naari mano yoowara awe aaphwanela orapa ni okhala mmwiikhoni ophiyerya osekuwa.—Onamukutxho 15:25-27.

Muthiyana ola ‘ohiwa alotxiwaka Yesu,’ nave vano onnamwaavya. Wa nthowa na okhala wawe mmwiikhoni, owo onnavira variyari va achu ancipale mwawiikasoopa, alocaka mmurimani mwawe: “Katannyaru sowara sawe, kinampenuwa.” Vaavaa otannyileiye oniveruni wa yoowara awe, “owo àhona wi mmwilini mwawe àpenuwa,” nave nikhami naamaala okhuma!—Marko 5:27-29.

Voocharela Yesu onnaloca: “Tani okitannyile?” Munnawerya waanyiherya moonelo wa muthiyana vaavaa iiwaleiye masu yaawo? Petro onnaakaaha mu omvaanya Yesu: “Muloko wa atxhu onnoritxa ni onnowomanya.” Vano ntakhara heeni Yesu onakoheiye, “Tani okitannyile?” Yesu onnatitelela oloca: “Òkhala okiphanre. Miyo kìhona wi ikuru sòkhuma mwa miyo.” (Luka 8:45, 46) Aai, openusa yoowo weeren’ye okhumme mu owerya wa Yesu.

Asuwelaka wi ahooniwe, muthiyana onnakokhora vamiithoni va Yesu, oovaka ni athukumelaka. Ohoolo wa achu oothene, owo onnaloca eparipari vooloca sa ereca awe nave wi vano oopenuwa. Mweepewe Yesu onamuhakararya: “Mwanaka, nroromelo nà nìhopenusa: hawé ni muretxele, wòpenuwa.”—Marko 5:34.

Mweeparipari, Muchu yoowo Muluku omuthanlileiye wi alamulele elapo yavathi taphaama, muchu aikharari ohiya pahiru mu waakhapelela achu nyenyatho ookhalano owerya wa waakhaviherya!