Yesu onnasuweliwa phaama variyari va iyaakha ovinyerya vaavaa opatisiweiye. Macikhwi a Ayuta annoona sootikhiniha sawe, nave soolokoha vooloca sa miteko sawe sinnamwaramwaseya orukurerya elapo. Vano, o efesta ya misakala o Yerusalemu ancipale annamwaavya yoowo.

Miyoonelo vooloca sa Yesu siri sookawanyeya vatokotoko. Akina annaakhula: “T’aphama!” Akina annaakhula: “Hoye! Onnawoka nloko.” (Yohani 7:12) Sincipale sa sooloca seiya saphaama sineereya variyari va mahiku oopacerya a efesta. Mwawiihiiha haavovo naari muchu mmoha onalipa murima wi aloce vanlakani saphaama vooloca sa Yesu nthowa nawi achu annoova mukhalelo ahooleli a Ayuta anahaalaaya waakhula.

Variyari va efesta, Yesu onnooneya mu empa ya Muluku. Achu ancipale annatikhina ni mavyakelo a ohusiha wawe. Owo hantonko ohuserya mu esikola ya Aramaiko, mwawiihiiha Ayuta anniikoha: “Ola osuwenle hai itxhu sothene iha ahihusenrye mu esikola?”—Yohani 7:15.

“Mahusiho aka tahi aka.” Yesu onnathariha, “nto ti a yole okirumme. Yole onakhwela wera okhwela wa Muluku onamusuwela mahusiho aka yarì a Muluku, nari kalotxaka sa mmuruni mwaka.” (Yohani 7:16, 17) Mahusiheryo a Yesu aniiwanana ni Malamulo a Muluku, mwawiihiiha enakhala yawooneya wi owo onaavya ovuwa wa Muluku, oohiya wawawe.

Voocharela Yesu onnaloca: “Tahi Mose óvahileni nyuwo malamnlo, nave havovo mmoha mwa nyuwo anera malamulo? Munakhwelelani okipha?” Akina a muloko akhweya aleco anarweela mmakupa makina a epooma, hanasuwela sa wiilipiserya yoola wa ochuna omwiipha. Enakhala yoohiphwanelela wa yaawo wi ookhalavo onachuna omwiipha muhusiha ntoko yoowo. Mwa yeela, awo annaphiyerya oloca wi ichu hasinamweecela phaama Yesu mu oloca masu yaala. Awo annaloca: “Muri ni nsololo: tani anakhwela owiphani?”—Yohani 7:19, 20, Nlakano Nahihano.

Yoovira eyaakha emoha ni emeya, ovinyerya vaavale ahooleli a Ayuta yaachunaaya omwiipha Yesu amanle ompenusa mulopwana va nihiku na Sapata. Vano Yesu onnapharihela moonelo yoowo waatannyile makacamiho nave onnaloca sa ohuupuwela waya phaama. Owo onnaloca yaweereya yeeparipari wi mu nlamulo, mwaana onniineliwa arino mahiku mathanu namararu, naamwi nri nihiku Nawoorowa. Voocharela owo onnaakoha: “Mutxhu ineliwaka nihiku naworowa, wi nihinanarihiwe nlamulo na Mose, ntakhara seni munanariwanyu ni miyo wa nthowa na ompenusa mutxhu nihiku naworowa? Muhithoriheke ni merelo awoneya, nto muthoriheke ni mathorihelo awokolola!”—Yohani 7:23, 24.

Achu o Yerusalemu yaawo asuwenle yaweereya yeeyo annaloca: “Tahi yola anamwasyaya omwipha? Nto onnalotxa veri va atxhu ni hanamulèla etxhu! Wakhweya asitokwene ahu arimusuwela txhiri wi owo ori Kristu?” Ntakhara heeni vano achu ahineemereryaaya wi owo Kristu? Awo annaloca “Nto hiyo nosuwela onrweiyewo ola. Vano Kristu arwà, havo oni asuwele onarweiyewo.”—Yohani 7:25-27.

Moohilekela mu empa ya Muluku mwemmo, Yesu onnaakhula: “Vano nyuwo mòkisuwela ni mòsuwela kinarwakawo! Nto miyo nkirwele okhwela waka. Yowo okirumme ti èparipari, nave nyuwano himunamusuwela. Nto miyo kòmusuwela yowo, ntakhara kinarwa wa yowo, nave ti yowo okirumme.” (Yohani 7:28, 29) Mu waakhulela masu ala ookwakwaleya, awo anneererya  omootherya Yesu, echunaka onwalela mukalaposo naari wi emwiiphe. Mwawiihiiha, weererya ola ti woohiweryeya nthowa nawi nlelo tahi elukuluku yawi Yesu akhwe.

Ancipale annamuroromela Yesu ophiyerya anaweryelaayavo. Owo aaheeca vasulu va maahi, omaaliha echeku, mootikhiniha waalyiha achu macikhwi awaaca ni iphaawu navetho ihopa vakhaani, omweeriha muchu oorakala weeca, ohula miitho a alipa eevaasi, waapenusa achu a mareca, navetho ophiyerya omviiha muchu ookhwa. Mwa yeeyo aakhalano mathowa aphaama a okoha: “Kristu arwà, wakhweya anamwera ineneryo ompwaha ola?”—Yohani 7:31.

Vaavaa Afarisi aniiwaaya muloko wa achu olocaka ichu seiha, awo vamoha ni asitokweene a anamukucho annaaruma alapeli wi emphare Yesu.