Ovinyerya iyaakha saka sa osikola hiyaavo etoroken’ye. Asinthamwene anyu a ekalaasi mu eyaakha yoopacerya yaari amohamoha mu eyaakha yookuchula. Vano moosuwela masina a achu ancipale anakhala mu epooma, nave awo asuwela nsina nanyu.

Epooma yo Liberty yaarukureryiwe ni imaca ikhaani, nave aalimmwamo aari nampece. Vaava kaayariwaaka apapa yaalapa mu imaca seiyo. Ntoko ponkwe, kaahihuserya omweeciha taratore nave kaanalapa muteko mukina mmacani.

Nkintonko okhalano tiithi mmiravo. Atiithaaka yaarino iyaakha 56 sa oyariwa nave amama yaarino iyaakha 35. Naamwi hiiha Atiithaaka yaari akuru nave yaahikhalano ekumi yaphaama. Awo yaanasiveliwa ni muteko wakuru nave yaahinihusiha osiveliwanotho. Awo hiyaarino ikhorowa sincipale nave yaanipakela nipuro nookhalavo, soowara, ni yoolya. Nave yaanamaliha elukuluku yincipale ni hiyo. Atiithaaka akhwile erino iyaakha 93. Amama akhwile erino iyaakha 86. Haavo wa yaawo aamulapela Yehova. Munnaka mmoha mutokweene oororomeleya ovinyerya eyaakha ya 1972.

Amama yaanasiveliwa ni malapelo. Awo yaananikusa eyaaka okerexa Patista amurunku oothene. Vaavaa kaaryaakano iyaakha khumi napiili sa oyariwa, kaahipacerya owiriyana nihusiheryo na amuluku araru mwa mmoha. Mwawiihiiha kaahaakoha amama:  “Onaweryeya hai Yesu okhala Mwaana nave mu elukuluku emohamoha akhale Tiithi?” Kinnuupuwela naakhulo naya: “Mwanaka, ichu iho tisamalavi. Hannaphwanela ochuna wiiwexexa iho.” Chiryene eyo yaari yamalavi wa miyaano. Naamwiihiiha, vaavaa kaaryaakano iyaakha waacamela khumi nasese, kaapatisiwa mmuhice wawaacamela. Awo yaahikiruweya ikwaha raru, emoha wa Tiithi, wa Mwaana ni emoha wa munepa waweela!

Vaavaa kaaryaaka mu esikola yavasulu, kaakhalano nthamwene aavonya mapokha, nave owo aahikiwopa wi keererye ovonya mapokha. Kaahipacerya wiivyakiha, ophiyerya kipaka nikupa na marehereryo a mapokha, yiichaniwa Iluuva sa Ewooro. Nkaasiveliweno, mwawiihiiha kimanle owaniha vakhaani, kaahihiya. Elukuluku vakhaani, kaahiichaniwa o Nikhuuru na Anakhoco o Estatu Unitu nave kirumiheliwa o Alemanya. Kiri weiwo, ahooleli aka yaahikirumihela o nipuro na anakhoco yuupuwelaka wi miyo kaahaala okhala muhooleli aphaama. Awo yaachuna wi otoropa okhale muteko aka. Nto, nkaakhwelaru okhala mutoropa, mwawiihiiha vaava kaamalinhaaka murici aka wa iyaakha piili, kaahihiya etoropa mu 1956. Elukuluku vakhaani, kaahivolowa mu nikhuuru na akhoco noohiyana vancipale.

Kihaakumve ohuserya eparipari, kaahikhalano muupuwelo wooheseya wa yeeyo yaataphulelaaya okhala mulopwana eeparipari. Kaahivoloweliwa ni ixilema navetho ni yaale yaakirukurenrye. Kuupuwela wi alopwana yaawo yaaloca sa Piipiliya yaari alopwana a nsina pahiru. Nto kaahipacerya ohuserya ichu ikina seiho saatoronke okumi aka. Nihiku nimoha, keecihaka ekaaro aka yoophilivila o pooma, asimwali eeli yaakuuvela mata wi kaaphwanye yaaryaayavo. Awo yaari arokora a mulamu yoowo aamuthenle murokoraka mutokotoko. Asimwali awo yaari Anamoona a Yehova. Mahiku a muculi yiiha ekivanhe irevista Mulipeleli ni Despertai!, nto kaahoona wi Mulipeleli aari oovila omwiiwexexa. Mu ekwaha ela, awo yaahikiwopa wi kiphiye va Yoohuserya ya Liivuru ya va Mulokoni, muthukumano mukhaani wa yoohuserya ya Piipiliya ni othokororya seiyo seeriwa owannyaya. Kaahaaleela wi kaahaala wuupuwela vooloca sa yeeyo. Etheyaka yaahikikoha eriki, “Moororomeliha, apwanne munahaala wooceela orwa?” Kaahiwaakhula, “chiryene koororomeliha.”

Kaahikhalano ekeerelani oloca yeela, koma kaahoona wi nkaaphwanela ohikhwaaniherya yoororomeliha aka. Mwa yeela, ohiyu yoole kaayawo o muthukumano. Anamwane yaahikicapara vancipale. Nkeemererya ophiyerya mweeryo taani yaasuwenlaaya vooloca sa Piipiliya! Naamwi kaanaya okerexa ni amama aka amurunku oothene, nlelo kaasuwela vakhaani vooloca sa Piipiliya. Vano, kaanachuna ohuserya sincipale, mwawiihiiha kaaheemererya yoohuserya ya Piipiliya. Echu yoopacerya kaahusenryaaka yaari ya wi nsina na Muluku a Owerya Woothene ti Yehova. Mu iyaakha sa muculi, vaava kaakonhaaka amama vooloca sa Anamoona a Yehova, awo pahi yaalonce wi, “Oo, awo anamulapela mulopwana awuuluvala oniichaniwa Yehova.” Nto vano kaahoona wi miitho aka yaanahuleya!

Kaaya vahoolo mwawaakuveya, nthowa nawi kaahisuwela wi koophwanya eparipari. Mu Marsu a eyaakha ya 1957, pahiru mu miyeeri thanu nasese ovinyerya vaavale kaakelaaka o muthukumano ekwaha yoopacerya, kaahipatisiwa. Muupuwelo aka waahitorokeya. Kinnatepa ohakalala woona wi koohuserya yeeyo Piipiliya onahusiheiye vooloca sa mulopwana eparipari. Yesu aari mulopwana oophaameya. Owo aari ooweryaxa ni akuru ompwaha mulopwana vyakala. Nto hantonko ovolowela owana. Ohiya yeeyo, “owo ohìhiya  wi ahasuliwe” hiiha ntoko yaaloheryiwaaya. (Isaiya 53:2, 7) Kaahihuserya wi oomuchara a Yesu eeparipari “akhale òpisa murima n’atxhu othene.”—2 Timóteo 2:24.

Mu eyaakha yoocharela, kaahipacerya opiyoneero, mu 1958. Mwawaakuveya, kaahimaala mu elukuluku vakhaani. Ntakhara heeni? Kaahilakelela opaka othela ni Gloria, mmoha a asimwali yaale yaakiwompe oya o yoohuserya ya liivuru! Nkaarino ekeerelani ni yoolakelelaaka. Gloria aari ntoko nluku nasisapo, nave ori hiihaatho ophiyerya olelo. Wa miyaano owo tasisapo opwaha nluku nasisapo, nave kinnahakalala othelana ni yene! Mmuwiriyane ooleeleeni vakhaani vooloca sa yene:

“Kaarino asinna ni arokora aka khumi nathanu nammoha. Amama yaari Namoona oororomeleya. Awo yaakhwile kirino iyaakha khumi nasese. Amama emanle okhwa, apapa yaahipacerya omuhuserya Piipiliya. Woona wi hinaarino amama, apapa yaahipaka marehereryo ni mutokweene oosikola. Munnaka mutokotoko iiha ahanleno eyaakha emoha wi amalihe mahusiheryo avasulu, nave apapa yaahinikoha waakhanle wi naahaala oyaaka osikola mahiku oohiyana. Mmukhalelo yoola, mmoha aanwerya ohalaka vaate aakhapelelaka anamwane akhaani. Nanweryatho olyaaka vamoha yoolya yoohiyu apapa emanle okooka omutekoni. Mutokweene oosikola aaheemererya, nave naahititelela weerano yeela ophiyerya munnaka omaliha esikola. Imusi piili sa Anamoona saanahuserya ni hiyo, nave anamwane khumi nammoha a hiyo, naahikhala Anamoona a Yehova. Kaanahakalala ni muteko woolaleerya, naamwi waakhala woovila. Iyaka Sam, aanakikhaviherya mu iyaakha soothene seiya.”

Kaapanke othela ni Gloria mu Fevereru a 1959. Naanapuha muteko woopiyoneero vamoha. Mu Yulyu a eyaakha yeele, naahirepela epetisau ya muteko wa Opeteli. Naanachuna vancipale orumeela o nipuro ntokotoko. Munna mmoha oosivela, Simon Kraker aahinipakela okoha ni waakhula. Owo aanileela wi o Peteli hiyeemereryiwa atheli mu elukuluku yeele. Hiyaano nlelo naanachuna orumeela o Peteli, nave saahiviravo iyaakha sincipale nihikele o Peteli.

Naahirumiha ekaarata o nipuro ntokotoko nivekaka orumiheliwa mu ekulucu weiwo waariwo othowa wa alaleeryi. Nave awo yaanivaha yoothanla emoha: Pine Bluff, Arkansas. Mmahiku yaale, saariwo pahiru miloko miili o Pine Bluff. Muloko mmoha waarino alaleeryi yaari asuku, ni mukina wa anamaripa. Naahirumiheliwa mmuloko waari wa anamaripa yoowo waarino alaleeryi khumi nasese.

Akhweya munniikoha ntakhara heeni Anamoona a Yehova yaaphwanela okawanyeya, alaleeryi aasuku ni aanamaripa. Naakhulo tiwi hiwaarivo otaphuwa mmahiku yaale. Hiyaari yoophwanelela maloko a mwiili woohiyana ekhale vamoha, nave naahikhalavo nikacamiho ni nlala. Mmapuro mancipale, anna yaanakhala awoova wi Empa ya Omwene yaahaala omwaryiwa wakhala wi athukumanne achu a mwiili woohiyana wi emulapele Yehova. Ichu sintoko seiha saanereya. Wakhala wi Anamoona ari anamaripa analaleerya empa ni empa veechokoni ya mwaacamani ori musuku, awo yaahaala opuruliwa nave vakina vaya opocoliwa. Mmukhalelo mukina wi muteko woolaleerya opakiwe, naaniiwelela malamulo nave niweheryaka wi ichu saahaala otorokeya wi ikhale phaama.

Muteko ahu hiwaari wookhweya. Vaava naalaleeryaahu mu ekulucu ya anamaripa ikwaha ikina moohisuwela naanamana nsele na emusi yaasuku. Hiyo naaphwanela olakelela mwawaakuveya: waakhanle wi waanachuneya opaka mapaceryiho a Piipiliya awaakuveya naari oveka nikhurumuwelo nave oya empa yoocharela. Tihiiha ichu seereyaaya mu mahiku yaale.

Mweeparipari, ntoko mapiyoneero waanachuneya waavya ikhorowa wi nititelele okhala. Miteko sahu sincipale naalapaahu naaliviwa ikhorowa sawaakhwana itoolare raru vanihikuni. Gloria aapaka miteko vakhaani sa opupucha ipa. Kaaheemereryiwa omukhaviherya mu nipuro nimoha wi awerye okwaasa mu elukuluku yoophwanelela. Emusi yaanivaha yoolya. Yaari yoolya yooriirya yeeyo Gloria ni miyaano naalyilaahu nihaakumve opwaha. Esumana ti esumana, Gloria aaninkomaari ikuwo sa emusi emoha. Kaanamurehererya kapinka, opupucha ixanela, ni opaka miteko mikina orukurerya empa. Mu empa ya emusi yaari akunya, naahipupucha ixanela. Vaavaa Gloria aapupucheiye mpuwa, miyaano keerano vaate. Naahimaliha nihiku noothene, mwawiihiiha yaahinivaha yoolya. Naamwi Gloria aari mpuwa mwa empa aaphwanela omwalamwala ni emusi. Miyaano kaalya vaate mu nipuro na ikaaro, nto nkaapwacha echu. Yaari yoolya yoosiva. Awo yaari achu aphaama, koma yaahivoloweliwa ni achu oorukurerya. Kinnuupuwela  ekwaha emoha vaavaa neemenlaahu va nipuro onatumihiwavo tiisele. Nimanle osariha ekaaro ahu, kaahimukoha musuku yoowo aalapa vaava waakhanle wi Gloria aanaphwanela opharihela etumpusi. Owo aahikiweha anyeenyen’ye nave aahiloca, “yoowaliwa.”

Mmukhalelo mukina, nahikhalano ilukuluku saphaama ni annihu nave naanasivela muteko ahu woolaleerya! Vaavaa naaphin’yaahu mu ekwaha yoopacerya o Pine Bluff, naakhala vaate va munna yoowo aari murummwa a muloko mu elukuluku yeele. Mwaariye haari mu eparipari, nyenya Gloria aahipacerya omuhuserya Piipiliya ni yene. Mu elukuluku emohamoha, kaahipacerya ohuserya ni mukamwene a murummwa a muloko vamoha ni mwaariye. Mwaara a murummwa a muloko ni mwanawe mwaamuthiyana yaahilakelela omurumeela Yehova nave yaapatisiwa.

Naahikhalano asinthamwene mmuloko waasuku. Awo yaananiwopa wi nalye vamoha ni yaawo yoolya ya ohiyu, nto naaphwanela pahiru oyawo omanle oripavo wi ahikhale aahaala onoona vamoha. Marehereryo yiichaniwa Ku Klux Klan (KKK), marehereryo yaawo yaavuwiha nthalu ni nlala, yaahitepa olucuwa. Kinnuupuwela wi kaahimoona mulopwana mmoha awiirumiha akiraanthe mpithela mwawe ohiyu omoha wa nihiku na Halloween awanre ikuwo saalikana ni sa achu a nikhuuru na KKK. Naamwi waarivo moonelo woonanara, eyo hiyaahinhe anna wooniherya epewe. Mu elimwi, naanachuna ikhorowa wi n’ye o muthukumano wa muceche, nave anna yaaheemererya othuma ekaaro ahu, Ford 1950 wi niwerye oyawo. Mu nihiku nimoha, mweeri ohoolo waya, naahitepa ovelavela nthowa na oviha nimanle olaleerya empa ni empa ni weeciha soohuserya sa Piipiliya. Voocharela naakookela owaani nave naahiphwanya yoovaha. Eyo yaari ekaaro ahu, yeemesiwe ohoolo wa empa! Va nikalaase na ohoolo wa ekaaro yaahikhalawo masu, “kinnookookiheryaani ekaaro anyu ntoko yoovaha aka. Munninyu.”

Yaweereya ekina ya epewe yaatannya murima aka vancipale. Mu eyaakha ya 1962, kaahiwompwa ovolowa Exikola ya Orummwa wa Omwene o South Lansing, Nova York. Eyo yaaya weereya mu mweeri woothene wa ovyakihiwa wa oweherya a mmulokoni, ooweherya aweeceeca, ni a etistritu. Mu elukuluku yeele nkaalapa muteko, nave kaarino ikhorowa vakhaani. Nave, ekompaniya ya telefone yo Pine Bluff yaahikipakela okoha ni waakhula ntakhara muteko. Waakhanle wi aakivaha nlakano na olapa, kaahaala okhala namaripa oopacerya olapa mu ekompaniya yeele. Wookuchulani yaahikileela wi yaachuna okivaha muteko. Tiheeni kaahaalaaka opaka? Nkaarino ikhorowa wi kiye o Nova York. Kaahuupuwela mwawiiseela vooloca sa okhalano muteko ni oheemererya nwopelo wa esikola. Kaahanle vakhaani orepela o Peteli vaavaa yaapaken’yaaya echu kineeraaka kihicuwaleru.

Murokora a muloko ahu, yoowo iyawe ahaari mu eparipari, aahimana mukhora ahu woosiiselo ene nave aahikinnya envelopi. Eyo yaahisareya ikhorowa. Owo ni anaawe ancipale yaanavinya woosiiselo woothene eyaaka omaca wi yakohole nchoce. Awo yaaheerano yeela wi ewerye ophwanya ikhorowa wi kiye o Nova York. Owo aahiloca, “Oye osikola nave wahuserye sincipale ophiyerya onaweryaawe, nave okooke ni onihusihe!” ohoolo waya kaahikoha ekompaniya ya telefone waakhanle wi kaahaala opacerya olapa  ntakhara yaawo isumana thanu ohoolo waya opwaha vaava yaaweheryaaya. Naakhulo aari “hooye!” oomalela. Nto owo hiwaari mwaha. Kaahipaka yoolakelelaaka. Koohakalala oheemererya muteko yoole!

Moone mukhalelo Gloria onuupuweleiye muteko ahu o Pine Bluff. “Kaanasivela ekulucu! Kaarino soohuserya sa Piipiliya 15 ophiyerya 20. Mwawiihiiha naanawerya oya empa ni empa woosiiselo nave voocharela weeciha soohuserya sa Piipiliya omakuchuwelo wa nihiku, ikwaha ikina ophiyerya ewora yaneekhumi nammoha ya ohiyu. Orumeela yaari echu yoohakalaliha! Kaahaala ohakalala waakhanle wi nkikhummewo. Kinachuna oloca eparipari wi nkaachuna otoroka muteko aka nave kivolowe mmuteko wa weeceeca, nto Yehova aahikhalano echu ekina mmuupuweloni.” Mweeparipari owo oheerano.

Vaavaa naarumeelaahu ntoko mapiyoneero o Pine Bluff, naahirepela epetisau wi nikhale mapiyoneero avameekhaaya. Mweeparipari naaweherya othanliwa. Ntakhara heeni? Nthowa nawi naahisuwela wi ooweherya ahu a etistritu aanachuna wi nikhaviherye muloko o Texas, nave aanachuna wi narumeele ntoko mapiyoneero avameekhaaya weiwo. Eyo yaatepa onisivela. Mwawiihiiha naahiweherya naakhulo elukuluku yincipale, ophiyerya wi mu emaili hinaaphwanyamo echu. Wookuchulani vaya, naahaakhela ekaarata. Waari nwopelo wa muteko wa weeceeca! Eyo yeeren’ye mu Yaneru a 1965. Munna Leon Weaver, yoowo vano onarumeela ntoko muhooleli a Nikhuuru na Efiliyale o Estatu Unitu, aahithanliwa wi arumeele ntoko ooweherya a ekulucu mu elukuluku emohamoha.

Nkaasiveliwe vooloca sa okhala ooweherya a ekulucu. Eyaakha emoha naari vakhaani, ooweherya a etistritu, James A. Thompson, Jr., aahaalikhela mikhalelo saka. Owo mweepewe aahithariha makupa kaaphwanelaaka orehererya, alocaka mavyakelo aphaama yaawo ooweherya a ekulucu onachuneiye. Ohoolo waya ovinyerya vaava kaapacenryaaka muteko wa weeceeca, kaahisuwela ophiyerya mweeryo taani kaachunaaka ekano yeele. Kimanle othanliwa, Munna Thompson aari oopacerya orumeela ntoko ooweherya a etistritu yoowo kaarumenlaakano. Kaahihuserya sincipale orweela wa munna yoola oororomeleya.

Mmahiku yaale, ooweherya a ekulucu aavyakihiwa vakhaani. Kaanamvarerya ooweherya a ekulucu vaava aasekuryeiye muloko mmoha. Voocharela owo aanakivarerya esumana emoha vaavaa kaasekuryaaka muloko mukina. Owo aanavahererya sooleeliherya ni ohoolela. Nto ovinyerya vaava hiyaano naakhala mukhatiihu. Kinnuupuwela kilocaka ni Gloria, “Apwanne chiryene onahaala onihiya hiihaano?” Moovira wa elukuluku, kaahiiwexexa echu yookhweleya. Yaahaala okhala yaphaama wiiliwiili anna wookhaviherya, nto pahiru wakhala wi wooweemererya wi yookhaviherye. Nlelo kinnathamalela nikhaviheryo kaakhenlaaka orweela wa anna yaala a mavyakelo ntoko J. R. Brown, voocharela ooweherya aweeceeca, ni Fred Rusk a emusi yo Peteli.

 Nthalu naari mmakupa oothene mmahiku yaale. Mu ekwaha emoha, nikhuuru na KKK naaheeceeca va epooma vaava naasekuryaahu o Tennessee. Kinnuupuwela ekwaha emoha vaavaa neemenlaahu o restaurante wi niichuuwe nri mmuteko woolaleerya. Elukuluku kaachunaaka opharihela etumpusi, mulopwana mmoha anyeenyen’ye ni ihuku sa nthalu aahikichara weiwo. Nto voocharela munna aari musuku yoowo aari oorakama onipwaha hiyo, aahirwa. Owo aahikikoha “Ichu sinnaweecela phaama, Munna Herd?” Mulopwana owo aahikhuma mwawaakuveya ahipharihenle etumpusi. Moovira wa iyaakha, koowerya woona wi enatannya nthalu tahi mukhalelo wa mwiili wa muchu koma yoocheka yeeyo eri mwa hiyo oothene. Nave koohuserya wi munna ti munna moohiphwacha mukhalelo wa mwiili awe, nave owo onanwerya okhwa ntakhara weyaano wakhala wooweryeya.

Noomaliha iyaakha khumi napiili mmuteko wa weeceeca ni iyaakha makhumi meeli nammoha mmuteko wa etistritu. Iho saari iyaakha saphaama ni samphurelo, soosareya saweereya soolipiha. Nto waahikhalavo mphurelo mmoha naawehereryaahu. Mu eyaakha ya 1997, echu yeeyo naachunaahu mu iyaakha sincipale yaaheereya. Naahiwompwa orumeela o Peteli yo Estatu Unitu. Saahiviravo iyaakha makhumi mararu nathanu nachaaru ovinyerya vaavale naarepenlaahu epetisau. Mweeri woocharela, naahipacerya orumeela o Peteli. Miyaano kuupuwela wi anna yaarino murici o Peteli yaachuna pahiru wi nikhaviherye mu elukuluku yavakhaani, nto tahi yeeyo yeeren’ye.

Murici aka woopacerya kaarumeela Etepartamentu ya Muteko. Kaahihuserya sincipale! Anna yaarumeela weiwo yaanaakhela makoho mancipale ni oovila yaawo yaarweela wa atokweene ni ooweherya aweeceeca orukurerya elapo. Kinnathamalela ovilela ni nikhaviheryo anna yaaryaayano mu okivyakiha. Waakhanle wi kithanleliwe weiwo wanawiili, nlelo kaahaala okhalano sincipale wi kihuserye orweela wa anna yaale.

Miyaano ni Gloria ninnasiveliwa orumeela o Peteli. Ninnasiveliwa ovinya woosiiselo mahiku oothene, nave yookhovelela eyo mweeparipari ennakhaviherya o Peteli. Evinre eyaakha emoha, kaahipacerya orumeela ntoko mukhaviheryi a Nikhuuru na Muteko wa Nikhuuru Noolamulela na Anamoona a Yehova. Mu eyaakha ya 1999, kaahithanliwa orumeela mu Nikhuuru Noolamulela. Koohuserya sincipale mmuteko yoola. Koma echu yookhweleyaxa kihusenryaaka ti yawi muru wa muloko Weekristu ti Yesu Kristu, ohiya muchu vyakala.

Kaawuupuwelaka vooloca sa okumi aka, ikwaha ikina kinniisoona okhala ntoko mulipa a miririmu Amosi. Yehova aahimoona mukukhuli yoola awiiyeviha yoowo aarino muteko woohisuwanyeya wa oceka sawiima, yoolya yeeyo achu oohaawa pahi yaalyaaya. Koma Muluku aahimuthanla Amosi wi akhale mulipa a miririmu nave aahimureeliha vancipale mu orummwa awe. (Amosi 7:14, 15) Moolikana, Yehova aahikoona, mwaana oohaawa a mulipa eemaca o Liberty, Indiana. Nave Yehova aahikireeliha vancipale, ni mareeliho mancipale yaawo alociwe vaava! (Masiposipo 10:22) Okumi aka waahikhalano mapacereryo oohaawa makupa oomwiilini, nto mweeparipari kinnoona wi makuchuwelo aatepa ooreelihiwa opwaha kahaanyiheryaaka!