1, 2. (1) Tiheeni Yesu aathokoronryeiye ni arummwa awe ohiyu ahaakumve okhwa? (Moone eruku yoopacerya.) (2) Ntakhara heeni eryaaya yookhweleya wuupuwela ntakhara heeni ninnalaleerya? (3) Tiheeni nnahaalaahu othokororya?

OHIYU ahaakumve okhwa, Yesu aahimaliha elukuluku yincipale avaanelaka ni arummwa we. Owo aahaaroromeliha wi aanaasivela vancipale. Aahaaleela niphwanaphwaniho na mwiri, nenlo nthokoronryaahu mmwaha ovinre. Yesu aachuna waalipiha amuhuseryaawe otitelela ovaha “sawima sintxipale” yeeyo eri ovilela olaleerya michaka vooloca sa Omwene.—Yohani 15:8.

² Koma, Yesu aahaaleela arummwa awe ohiya pahiru yeeyo yaaphwanelaaya opaka nto ntakhara heeni yaaphwanelaaya opaka. Aahaavaha mathowa ntakhara heeni yaaphwanelaaya otitelela olaleerya. Eyo ti yookhweleya wa hiyo wuupuwela ntakhara heeni ninnaphwanela otitelela olaleerya. Wuupuwelela hiiha enahaala onceenyerya ovilela vaavaa nnavahaahu “onamona maloko othene.” (Mateu 24:13, 14) Mmwaha yoola, nnahaala othokororya mathowa masese a mu Soorempwa ntakhara heeni ninnalaleerya. Nnahaalatho othokororya soovaha sese soorweela wa  Yehova wi inikhaviherye otitelela ovaha sawiima.

3. (1) Mwawiiwanana ni Yohani 15:8, tinivi nri nthowa nookhweleya ntakhara heeni ninnalaleerya? (2) Mirai mu niphwanaphwaniho na Yesu nneemelela eheeni, nave ntakhara heeni olikanyiha owo oryaaya woophwanelela?

³ Nthowa nookhweleya ntakhara heeni ninnalaleerya ti yawi nnachuna omvuwiha Yehova ni weeliha nsina nawe. (Mwaalakhanye Yohani 15:1, 8.) Vaavaa Yesu aalonceiye niphwanaphwaniho na mwiri, owo aahimulikanyiha Yehova ntoko mulipa oolima, naari mulipa eemaca, yoowo oniimiha mpesa. Yesu aahiiloca mukhateiye wi aari mwiri nave oomuchara we yaari mirai. (Yohani 15:5) Mwawiihiiha, mu niphwanaphwaniho, mpesa eneemelela sawiima seiyo amuhuserya a Yesu aniimihaaya, naari muteko woolaleerya awo anapakaaya. Yesu aahaaleela arummwa awe: “Nyuwo mwavahaka sawima sintxipale, Atithi aka annavuwihiwa.” Elukuluku mwiri oniimihaaya sawiima sa mpesa, eyo ennamvuwiha mulipa a emaca. Mmukhalelo woolikana, vaavaa nnapaakaahu owetha wahu nlaleeryaka michaka sa Omwene, eyo ennamvuwiha Yehova.—Mateu 25:20-23.

4. (1) Nneeliha hai nsina na Muluku? (2) Nnoona hai okhalano ekari ya weeliha nsina na Muluku?

⁴ Nsina na Muluku nlelo ti naweela. Hiyaavovo echu nnaweryaahu opaka enahaala weeriha okhala naweelasa. Vano, mukhalelo taani nneelihaahu nsina na Muluku elukuluku nnalaleeryaahu? Moone yeeyo mulipa a miririmu Isaiya aalonceiye: “Apwiya [Yehova] a owerya wothene, kiri Awèla.” (Isaiya 8:13) Ninneeliha nsina na Muluku, Yehova, vaava nnoonaahu nno ntoko noopwahaxa wa masina oothene ni vaavaa nnaakhaviheryaahu akina wiiwexexa wi nlo ti naweela. (Mateu 6:9) Ntoko yootakiherya, elukuluku nnaahusihaahu achu vooloca sa mikhalelo saphaama sa Yehova ni yookhwela awe ntakhara achu okhala mu Parataiso, ninnaakhaviherya osuwela, wi ichu soothene soonanara Satana olonceiye ntakhara Yehova ti sawootha. (Maphatxuwelo 3:1-5) Ninnaakhaviheryatho achu weeliha nsina na Muluku vaavaa nnaakhaviheryaahu osuwela wi Yehova onnaphwanela “wakhela ovuwa, ntxitximiho ni owerya.” (Wupulula 4:11) Rune, yoowo onarumeela ntoko piyoneero mu iyaakha 16, ooloca: “Osuwela wi koovahiwa ekari ya ovaha onamoona wa Mpatusa a elapo yoothene ennakeeriha othamalela. Eyo ennakivaha nchuno na otitelela olaleerya.”

5. (1) Nthowa taani na olaleerya nnaromoliwa mu Yohani 15:9, 10? (2) Yesu aakhavihenrye hai amuhuserya awe wiiwexexa wi awo yaanachuna ovilela?

⁵ Mwaalakhanye Yohani 15:9, 10. Nthowa nanawiili ntakhara heeni ninnalaleerya vooloca sa Omwene ti yawi ninnamusivela Yehova ni Yesu. (Marko 12:30; Yohani 14:15) Yesu aahaaleela amuhuserya awe wi yaaphwanela ‘okhala mokhwelani mwawe.’ Ntakhara heeni Yesu aaloca yeela? Nthowa nawi aahisuwela wi oomuchara we yaaphwanela ovilela wi ekhale ntoko Akristu eeparipari. Mweevelevelo, mu Yohani 15:4-10, ninnoona wi Yesu aahipharihela nsu  ‘munamukhala’ ikwaha sincipale wi aakhaviherye amuhuserya awe wiiwexexa wi awo yaanachuna ovilela.

6. Nnooniherya hai wi ninnachuna okhala mu osivela wa Kristu?

⁶ Nnooniherya hai wi ninnachuna okhala mu osivela wa Kristu ni okhalano weemererya wawe? Moorweela wa omwiiwelela. Yesu onaniveka opaka pahiru yeeyo owo opankeiye. Owo aahiloca: ‘Hihatho miyano kokhapelela malamulo a Atithi aka ni kinakhala mokhwelani mwaya.’ Yesu ootikitherya yootakiherya wa hiyo.—Yohani 13:15.

7. Wiiwelela onaphitaana hai ni Osivela?

⁷ Yesu oohiya vanlakani wi wiiwelela onaphitaana ni osivela vaavaa aalonceiye: “Mutxhu onakhela malamulo aka ni antxhariha, yowo t’onakikhwela.” (Yohani 14:21) Malamulo a Yesu arweenle wa Tiithi awe, mwawiihiiha elukuluku nniiwelelaahu nlamulo na Yesu na olaleerya, ninnooniherya wi ninnamusivela Yehova. (Mateu 17:5; Yohani 8:28) Nave vaavaa nnooniheryaahu wi ninnamusivela Yehova ni Yesu, annanikhapelela mu osivela waya.

8, 9. (1) Tinivi nri nthowa nikina ntakhara heeni ninnalaleerya? (2) Masu a Yehova anaphwanyeya mu Ezekiyeli 3:18, 19 ni 18:23 ananceenyerya hai otitelela olaleerya?

⁸ Nthowa naneeraru ntakhara heeni ninnalaleerya ti yawi ninnachuna waalopola akina vooloca sa nihiku na Yehova. Mu Piipiliya, Nowa otharihiwe ntoko “namalaleya.” (Mwaalakhanye 2 Pedro 2:5.) Maahi Oosasa ehaakumve orwa, muchaka wa Nowa ntakhara achu akhweya waaphitaanyerya olopola vooloca sa otolosa waahaala orwa. Ntakhara heeni nnalocaahu hiiha? Nthowa nawi Yesu aahiloca: “Ntoko seren’yaya mwa elukuluku ya mahi òsasa ehiphiyale, atxhu yànalya, yànawurya, yanathela ni yànatheliwa ophiyerya nihiku Noè avolonweiye mmwatxeyani, ni hiyasuwela etxhu ophiyerya orwa wa mahi yatolonse atxhu othene; oni wereye hihatho orwa wa Mwana a mutxhu.” (Mateu 24:38, 39) Naamwi achu ancipale yahaamwiwelela Nowa, moororomeleya aahilaleerya muchaka woolopola yoowo Yehova amvanheiye.

⁹ Olelo ninnalaleerya muchaka vooloca sa Omwene wi naavahe achu ekari ya ohuserya yeeyo Muluku onahaleiye opaka ntakhara achu omwaahiyu. Ntoko Yehova, ninnachuna chiryene wi achu ewiriyane muchaka nave etitelele ‘okhala.’ (Ezekiyeli 18:23) Vaavaa nnalaleeryaahu empa ni empa ni vanlakani, ninnaalopola achu ancipale anaweryeya wi Omwene wa Muluku onahaala orwa ni otolose elapo yeela yoonanara.—Ezekiyeli 3:18, 19; Daniyeli 2:44; Wupulula 14:6, 7.

10. (1) Nthowa taani vooloca sa olaleerya nnalociwa mu Mateu 22:39? (2) Paulo ni Sila yaamukhavihenrye hai mulipeleli a ekalaposo o Filipi?

¹⁰ Nthowa na neesese ntakhara heeni ninnatitelela olaleerya ti yawi ninnaasivela achu. (Mateu 22:39) Osivela owo onnanikhaviherya otitelela olaleerya nthowa nawi noosuwela wi achu akhweya anamutoroka moonelo aya vaavaa mikhalelo saya sinatorokeyaaya. Ntoko yootakiherya, amwiicani yaahimvonyerya Paulo ni Sila mukalaposo o epooma yo Filipi. Nyenya ohiyu eriyari, waahikhalavo mwaacikinye yoowo aacikinnye ekalaposo nave mikhora ihuleya. Mulipeleli a ekalaposo aahitepa woova uupuwelaka wi alipa oowaleliwa yaahikhuma ophiyerya anachuna wiisiipha. Nto Paulo aahimmaaliha nave aahikhuwela: “Ohere yeyo!” Mulipeleli aahikoha: “Atxhu nyu kereni miyo wi kivuluwe?” Paulo ni Sila yaahimuleela: “Omwemererye Yesu Kristu ni onanvulusiwa.”—Saweriwa T’arummwa 16:25-34.

11, 12. (1) Tiheeni yaweereya ya mulipeleli a ekalaposo enanihusihaaya vooloca sa muteko ahu woolaleerya? (2) Ntakhara heeni ninnachuna otitelela olaleerya?

¹¹ Tiheeni yaweereya vooloca sa mulipeleli a ekalaposo enanihusihaaya vooloca sa muteko woolaleerya? Moone wi waari pahiru amanle mwaacikinye ovira mulipeleli taatoronkeiye moonelo awe nave aveka nikhaviheryo. Mmukhalelo woolikana, achu yaawo ahinachuna owiriyana muchaka wa Piipiliya ananwerya otoroka moonelo aya ni oveka nikhaviheryo vaavaa echu yootutusa enapakeyaaya mookumini mwaya. Ntoko yootakiherya, akina akhweya annahaleeliheya nthowa na oyeleela muteko naari omwalana. Akina annakhala oothanana nthowa nawi aasuwela wi aakhalano ereca etokweene naari vaavaa mmusi aya onakhweiye. Vaavaa ichu seiya inaphacuwaaya, achu akhweya anampacerya opaka makoho vooloca sa okumi, makoho yaawo ahintonkwaaya oloha mano. Anamphiyerya okoha, ‘tiheeni kinaphwanelaaka opaka wi kivuluwe?’ Anamuchuna owiriyana muchaka ahu wa ewehereryo mu ekwaha yoopacerya mookumini mwaya.

¹² Mwawiihiiha wakhala wi moororomeleya ninnatitelela olaleerya, nnahaala ophwanyeya vaavaa achu anakhalaaya ooreheryeya wi yeemererye ohakararya nnaruuhaahu. (Isaiya 61:1) Charlote, yoowo onarumeela ntoko piyoneero mu iyaakha 38 ooloca: “Olelo achu aarimeela. Awo annachuna matorokelo wi ewiriyane michaka saphaama.” Ejvor, yoowo onarumeela ntoko piyoneero mu iyaakha 34, ooloca: “Olelo opwaha khalai, achu ancipale ari ooceecheya mmuupuweloni. Mweeparipari kinnachuna waakhaviherya. Eyo ennakiceenyerya olaleerya.” Mwawooneya, waasivela achu nthowa naphaama wi ntitelele olaleerya!

13, 14. (1) Yoovaha taani enalociwa mu Yohani 15:11? (2) Nni niwerye hai okhalano ohakalala Yesu aareiyeno? (3) Ohakalala onanikhaviherya hai mmuteko woolaleerya?

¹³ Ohiyu ahaakumve okhwa, Yesu aahiromola soovaha seiyo saahaala waakhaviherya arummwa awe otitelela ovaha sawiima. Tisivi siri soovaha, nave sini sinikhaviherye hai olelo?

¹⁴ Yoovaha ya ohakalala. Apwanne olaleerya ti woovelaveliha wa hiyo? Hooye. Yesu amanle oloca niphwanaphwaniho vooloca sa mwiri, owo aahiloca wi elukuluku neeraahu nlaleerye naahaala okhalano ohakalala wawe. (Mwaalakhanye Yohani 15:11.) Eneereya hai eyo? Muupuwele, mu  niphwanaphwaniho na Yesu, owo aahiilikanyiha ni mwiri nave amuhuserya awe ni mirai. Mirai sinahaala okhaleno maahi ni esenya pahiru wakhala wi siri vamwirini. Mmukhalelo woolikana, nnahaala okhala oohakalala ntoko Yesu aakhanleiye wakhala wi nri awiiwanana ni yoowo ni ochariha inaani sawe vakhivirukhiviru. Voocharela nnahaala okhalano ohakalala yoowo aareiyeno, ohakalala onarweela mu weerano yookhwela ya Muluku. (Yohani 4:34; 17:13; 1 Pedro 2:21) Hanne, yoowo onarumeela ntoko piyoneero mu iyaakha opwaha 40, ooloca, “Ohakalala wiiliwiili kinoonaaka kimanle okhala mmuteko woolaleerya onnakiceenyerya otitelela mmuteko wa Yehova.” Ohakalala onahaala onilipiha otitelela olaleerya naamwi achu ancipale ehichunaka oniwiriyana.—Mateu 5:10-12.

15. (1) Yoovaha taani enalociwa mu Yohani 14:27? (2) Murecele onanikhaviherya hai otitelela ovaha yawiima?

¹⁵ Yoovaha ya murecele. (Mwaalakhanye Yohani 14:27.) Omapacereryo wa ohiyu Yesu ahaakumve okhwa, owo aahaaleela arummwa we: “Kinnovahani muretxele aka.” Murecele wa Yesu oni onikhaviherye hai otitelela olaleerya? Elukuluku nnatitelelaahu olaleerya, ninnoona murecele nthowa nawi noosuwela wi ninnamweeriha Yehova ni Yesu okhala oohakalala. (Salumu 149:4; Aroma 5:3, 4; Kolosi 3:15) Ulf, yoowo onarumeela ntoko piyoneero mu iyaakha 45, ooloca, “Muteko woolaleerya onnakeeriha okhala oovelavela, nto onnakiruuhela weeliwa murima ni okhalano yootaphulela yeeparipari mu okumi aka.” Ninnathamalela okhalano murecele yoowo ohinamala!

16. (1) Yoovaha taani enalociwa mu Yohani 15:15? (2) Arummwa yaahaala otitelela hai okhala asinthamwene a Yesu?

¹⁶ Yoovaha ya asinthamwene. Yesu amanle waaleela arummwa awe wi owo aachuna wi ekhale oohakalala, aahithariha ntakhara heeni waaryaaya wookhweleya wa yaawo wooniherya osivela weeparipari. (Yohani 15:11-13) Voocharela aahiloca: “Kìwitxhanneni asinthamwene.” Yoovaha yasisapo okhala nthamwene a Yesu! Nto arummwa yaahaala otitelela hai mu onthamwene awe? Yesu aahithariha: ‘Muye nave wi [mutitelele] ovaha sawima.’ (Mwaalakhanye Yohani 15:14-16.) Mmasu makina, otitelela olaleerya. Waacamela iyaakha piili muculi, Yesu aahaaleela arummwa awe: “Munaviranyuwo mulaleyeke muriki: ‘Omwene wa wirimu ori vakhiviru.’” (Mateu 10:7) Ti nthowa neni ohiyu ahaakumve okhwa, Yesu aaceenyenreiye amuhuserya awe okhalano  nthiti mmuteko woolaleerya. (Mateu 24:13; Marko 3:14) Nave Yesu aahisuwela wi wiiwelela nlamulo nawe hiyaahaala okhala yookhweya. Koma yaaphwanela weerano yeela wi etitelele okhala asinthamwene awe. Mwawiihai? Nnikhaviheryo na yoovaha ekina.

17, 18. (1) Yoovaha taani enalociwa mu Yohani 15:7? (2) Yoovaha yeeyo yaakhavihenrye hai amuhuserya a Yesu? (3) Yoovaha taani enanikhaviherya olelo?

¹⁷ Yoovaha ya waakhuliwa mavekelo ahu. Yesu aahiloca: “Nvekeke munakhwelanyu ni munanvahiwa.” (Yohani 15:7, 16) Yoororomeliha ya Yesu mweeparipari yaahaalipiha arummwa! * (Moone masu avathi.) Arummwa hiyiiwexenxe mwawaakhwanela wi Yesu aahaala okhwa moohilekela. Nto okhwa wawe hiyaahaala otaphulela wi hiyi ekhaleno nikhaviheryo. Yehova aari ooreheryeya waakhula mavekelo aya ni waakhaviherya mmuteko aya woolaleerya. Nave owo aaheerano hiiha. Moohilekela Yesu amanle okhwa, arummwa yaahimveka Yehova wi aavahe olipa murima, nave Yehova aahaakhula mavekelo aya.—Saweriwa T’arummwa 4:29, 31.

¹⁸ Emohamoha enneereya olelo. Elukuluku nnavilelaahu mmuteko woolaleerya, ninnatitelela okhala asinthamwene a Yesu. Nave nnanwerya ororomela wi Yehova ori ooreheryeya waakhula mavekelo ahu wi enikhaviherye vaavaa nnoonaahu okhala woovila olaleerya. (Filipi 4:13) Ninnatepa othamalela osuwela wi Yehova onnaakhula mavekelo ahu nave nookhalano Yesu ntoko nthamwene ahu. Soovaha seiya sa Yehova sinnanilipiha otitelela ovaha sawiima.—Tiyako 1:17.

19. (1) Ntakhara heeni ninnatitelela olaleerya? (2) Tiheeni eni enikhaviherye omaliha muteko yoowo Muluku onivanheiye?

¹⁹ Mmwaha yoola, noohuserya vooloca sa mathowa masese ntakhara heeni ninnatitelela olaleerya: omvuwiha Yehova ni weeliha nsina nawe, wooniherya osivela wahu ntakhara Yehova ni Yesu, waalopola achu, ni wooniherya wi ninnaasivela achu. Noohuseryatho vooloca sa soovaha sese: ohakalala, murecele, asinthamwene, ni waakhuliwa wa mavekelo ahu. Soovaha seiya sinnanilipiha wi nimalihe muteko yoowo Muluku onivanheiye wi nipake. Yehova onnatepa ohakalala vaavaa onanooneiye nlapaka mwakuru wi ntitelele ovaha “sawima sintxipale”!