1. Atamu ni Eva emanle ocheka tiheeni Yehova uupulunleiye vooloca sa mwiicani ahu?

ATAMU aahisuwela wi enowa henaloca. Mwawiihiiha vaavaa owo aasuwenleiye wi enowa yaahiloca ni Eva, akhweya Atamu aahuupuwela wi waari munepa yoowo waaloca. (Maphatxuwelo 3:1-6) Atamu ni Eva, hiyaasuwela munepa wa mukhalelo taani yoowo waaloca. Naamwi hiiha, Atamu aahithanla omwiiwelela muchu yoowo ahimusuwenleiye nave aammwareela Tiithi awe oosivela awirimu. (1 Timóteo 2:14) Mwawaakuveya, Yehova aahipacerya wuupulula sincipale vooloca sa mwiicani oonanara ole nave aahiroromeliha wi aahaala omutoloxa vookuchulani. Koma Yehova aahilopola wi mu elukuluku emohamoha, munepa ole waalonce orweela mwa enowa waahaala wiicana ni oothene yaale anamusivela Yehova.—Maphatxuwelo 3:15.

2, 3. Tinivi nri nthowa ntakhara heeni Yehova ayaaka omuupulula vakhaani Satana, Mesiya ahaakumve orwa?

² Yehova hatonko onileela nsina na munkeelo yoowo ommwarwenle. * (Moone masu avathi.) Eyo yeeren’ye ivinrevo iyaakha  macikhwi meeli ni masana mathanu omwareya o Eteni omanle weereya vaava Yehova omupulunleiye mulipa oomwaryeya. (Yobi 1:6) Owo onasuweliwa ni masu awi “Satana” yeeyo enataphulela “Mwicani.” Pahiru mu aliivuru araru mu Soorempwa sa Ehepiri, 1 Matharihelo, Yobi, ni Zakariya, annamuromola Satana. Ntakhara heeni uupululiweiye vakhaani mwiicani ola ahaakumve orwa Mesiya?

³ Yehova haphitaanyenrye sooleeliherya sincipale mu Soorempwa sa Ehepiri vooloca sa Satana ni yeeyo owo onapakeiye. Ohiya yeeyo, yoolakelela ya Soorempwa sa Ehepiri yaari yawi saakhaviherye achu omusuwela ni omuchara Mesiya. (Luka 24:44; Galasya 3:24) Elukuluku Mesiya aaphiyaleiye, Yehova aahimpharihela yoowo ni amuhuserya awe wi yuupulule sincipale hiyaano nsuwenlaahu vooloca sa Satana ni ankeelo yaawo yaaphitanne ni yoowo. * (Moone masu avathi.) Ela ti yoophwanelela, nthowa nawi Yehova onahaala ompharihela Yesu ni oothanliwa wi emutolose Satana ni oomuchara awe.—Aroma 16:20; Wupulula 17:14; 20:10.

4. Ntakhara heeni hannaphwanela othukumela vooloca sa Musaserya?

⁴ Murummwa Petro omutharinhe Satana Musaserya ntoko “mwatxho onopa murika,” nave Yohani omwiichanne owo ntoko “enowa” ni “Enama yeyo etokwene.” (1 Pedro 5:8; Wupulula 12:9) Koma hannaphwanela othukumela nthowa na Musaserya. Ikuru sawe ti sookotakota. (Mwaalakhanye Tiyako 4:7.) Nookhalano okhapelela wa Yehova, Yesu, ni ankeelo oororomeleya. Nnikhaviheryo naya, nnanwerya omvootha mwiicani ahu. Nlelo ninnachuna osuwela maakhulo a makoho mararu ookhweleya: Ophiyerya mweeryo taani Satana onavoloweleiye? Mukhalelo taani oneereryeiye waavolowela achu? Nave ichu taani owo ohinaweryeiye opaka? Hankooni naakhule makoho yaala nave noone yeeyo nneeraahu nihuserye.

5, 6. Ntakhara heeni alamuleli a achu hanawerya oruuha matorokelo yaawo achu anachunaayasa?

⁵ Ankeelo ancipale yaahiphitaana ni Satana mu ommwareela Muluku. Ehaakumve Maahi Mancipale, Satana aahiweererya akina a yaawo opaka ocapaheya ni athiyana. Piipiliya onathariha eyo mmukhalelo woosiphela vaava onaloceiye wi enama yeeyo yaamonre wirimu yaahicucha makupa mararu a itheneeri sa wirimu. (Maphatxuwelo 6:1-4; Yuda 6; Wupulula 12:3, 4) Elukuluku yeeyo ankeelo yaawo yaakhummaaya va emusi ya Muluku, awo yaahithanla ohooleliwa ni Satana. Nihuupuwele wi nikhuuru nenlo na ankeelo nri noohireheryeya. Mu elapo yoohooneya yoomunepani, Satana ootikitherya olamulelo awe atakiheryaka Omwene wa Muluku. Owo ohiipaka mukhateiye mwene, nave oorehererya masololo, aavaha owerya, nave aapaka awo alamuleli a elapo.—Éfeso 6:12.

⁶ Satana onnapharihela marehereryo awe wi ahoolela olamulelo woothene wa achu. Ninnasuwela yeeyo, nthowa nawi aahimooniha Yesu  “omwene wothene wa elapo ya vathi,” nave aahiloca: “Kinnovaha owerya ni ovuwa wa omwene wothene ole, ntakhara kòhiyeriwa, kinanvaha yowo kimukhwenlakano.” (Luka 4:5, 6) Nlelo, alamuleli ancipale annapaka ichu saphaama wa anamuralaaya, nave alamuleli akina mweeparipari annachuna waakhaviherya achu. Koma hiwaavovo olamulelo wa achu oni opake matorokelo yaawo nnachunaahusa.—Salumu 146:3, 4; Wupulula 12:12.

7. Mu waapharihela alamuleli, Satana opharihenle hai malapelo atheru ni maroca a elapo? (Moone eruku yoopacerya.)

⁷ Satana ni masololo annapharihelatho malapelo atheru ni maroca a elapo wi ehuwelihe “elapo yothene,” naari achu oothene. (Wupulula 12:9) Satana onnapharihela malapelo atheru wi amwaramwase sawootha vooloca sa Yehova, nave onneererya ovitha nsina na Muluku. (Yeremiya 23:26, 27) Ntoko yookhumelela, achu yaawo oororomeleya anuupuwela wi anamulapa Muluku mweeparipari analapela masololo. (1 Korinto 10:20; 2 Korinto 11:13-15) Satana onnapharihelatho maroca a elapo wi amwaramwase sawootha, hiiha ntoko yawootha yawi ikhorowa ni ichu soomwiilini sinaweeriha achu okhala oohakalala. (Masiposipo 18:11) Yaawo aneemererya yawootha yeeyo annapharihela ikumi saya elapelaka “Muhakhu” ompwaha Muluku. (Mateu 6:24) Moohipwacha waakhanle wi yaahintoko omusivela Muluku, osivela waya ichu soomwiilini onnakhala woolipa ophiyerya omusivela waya Muluku ocakanela.—Mateu 13:22; 1 Yohani 2:15, 16.

8, 9. (1) Soohuserya taani piili nnahuseryaahu orweela wa meerelo a Atamu ni Eva, ni ankeelo oomwaryeya? (2) Ntakhara heeni eryaaya yaphaama wa hiyo osuwela wi Satana tonalamulela elapo?

⁸ Sookhalavo soohuserya piili sookhweleya nnahuseryaahu orweela wa meerelo a Atamu ni Eva, ni ankeelo oomwaryeya. Yoopacerya, ninnahuserya wi arivo makupa meeli pahiru nave wi nnaphwanela othanla nimoha. Nnanwerya okhala makupa a Yehova naari a Satana. (Mateu 7:13) Yanawiili, ninnahuserya wi yaale anakhala makupa a Satana anakhalano mphurelo wookotakota. Atamu ni Eva yaahikhalano ekari ya olakelela mukhataaya yeeyo yaari yaphaama ni yoonanara. Nave masololo aakhalano ikuru variyari va olamulelo wa achu. (Maphatxuwelo 3:22) Koma othanla makupa a Satana wiiliwiili wookhalano sookhumelela soowaawa. Hiwaavovo mphurelo weeparipari!—Yobi 21:7-17; Galasya 6:7, 8.

⁹ Ntakhara heeni eryaaya yaphaama wa hiyo osuwela wi Satana tonalamulela elapo? Ela ennanikhaviherya okhalano moonelo woophwanelela vooloca sa alamuleli nave ennanceenyerya olaleerya michaka saphaama. Noosuwela wi Yehova onachuna wi naacicimiheke alamuleli. (1 Pedro 2:17) Owo onawehererya wi niiweleleke malamulo aya wakhala wi hanavaanyihana ni malakiheryo awe. (Aroma 13:1-4) Noosuwelatho wi nnaphwanela otitelela ohipaka makupa a elapo ni ohikhaviherya olamulelo vyakala naari mulamuleli. (Yohani 17:15, 16; 18:36) Woona wi noosuwela wi Satana onachuna ovitha nsina na Yehova ni onanariha ophwanelela  Wawe, ninnapaka soothene nnaweryaahu wi naahusihe achu eparipari vooloca sa Muluku ahu. Ninniirumiha wiichaneliwa nsina nawe ni opharihela nlo. Omusivela Muluku ti wasisapo opwaha osivela ikhorowa naari ichu soomwiilini.—Isaiya 43:10; 1 Timóteo 6:6-10.

10-12. (1) Satana aapharihenle hai enyakwa wi aweehe ankeelo? (2) Tiheeni nnahuseryaahu wa yeeyo ankeelo yaapankaaya?

¹⁰ Satana onnapharihela meerelo oophara muteko wi aavolowele akina. Wi aweerihe opaka yeeyo onachuneiye, ikwaha ikina onnapharihela enyakwa wi aweererye awo nave ikwaha ikina onneererya waahoosa.

¹¹ Satana aahipharihela enyakwa wi aweeheno ankeelo ancipale. Akhweya owo aahaavarerya mu elukuluku yincipale wi asuwele echu ya oweehano. Ankeelo akina yaahikusa enyakwa nave epaka ocapaheya ni athiyana. Anaaya yaari achu atokweene yaawo yaahoosa achu moorukurerya mwaya. (Maphatxuwelo 6:1-4) Mwawaaceererya wi apharihele ocapaheya wi aweeheno ankeelo, Satana akhweya aahaaroromeliha awo wi yaahaala okhalano owerya variyari va achu oothene. Mmukhalelo yoowo, Satana eererya onanariha okhwaaniheryeya wa yoolaiherya ya Yehova vooloca sa “nloko” na muthiyana. (Maphatxuwelo 3:15) Nto Yehova heemerenrye wi awerye. Owo aahiruuha Maahi Oosasa, yaawo yaamalinhe yoolakelela ya Satana ni masololo.

¹² Tiheeni nnahuseryaahu orweela wa yeela? Ocapaheya ni wiirumiha enyakwa yeeyo enaphara muteko. Ankeelo yaawo yaaphitanne ni Satana yaahimaliha elukuluku yincipale wirimu vamoha ni Muluku! Naamwi hiiha, awo yaaheemererya minkhela soonanara wunnuwa mwa yaawo, nave minkhela seiyo sahithataana vancipale. Wiiliwiili nnaphwanela wuupuwela wi moohiphwacha waakhanle wi noomaliha elukuluku yincipale nimurumeelaka Yehova, minkhela soonanara sinanwerya okhalano mitathaari mmurimani mwahu. (1 Korinto 10:12) Tinthowa nene nnaphwanelaahu wiiliwiili waalikhela yeeyo eri mmurimani mwahu ni omaliha muupuwelo vyakala woonanara ni wiirumiha!—Galasya 5:26; mwaalakhanye Kolosi 3:5.

13. Teevi eri enyakwa ekina Satana onaphariheleiye, nave nni niwerye hai osepa?

 ¹³ Enyakwa ekina Satana onaphariheleiye nri nchuno vooloca sa woona samalavi. Olelo, owo onneererya oweeriha achu okhalano nchuno mu masololo moorweela wa opharihela malapelo atheru hiiha ntoko mathatelo. Ixilema, axooku a ikhankoonya, meerelo makina a mathatelo yaawo aneeriha wi onamulosiwe onakhala woohakalaliha. Nni nsepe hai enyakwa yeela? Hannaphwanela oweherya wi marehereryo a Muluku evahererye yoochariha ya mathatelo aphaama ni oonanara. Nnaphwanela ovyakiha yawuupuxerya-ya-murima ahu wi niwerye opaka soothanla saphaama sinathipeleya mu malakiheryo a Yehova. (Ahebri 5:14) Wakhala wi okhwela wahu ori “wohiwoka,” nnahaala othanla mwamiruku. (Aroma 12:9) Muchu oowoka onaloca echu ekina nto apakaka ekina. Mwawiihiiha, vaavaa nnathanlaahu mathatelo, nnaphwanela wiikoha mukhatiihu: ‘Apwanne kinnachariha malakiheryo mamohamoha kinaaleelaaka akina wi echarihe? Hanka vooloca sa oohuserya aka a Piipiliya ni achu akina kinavaanelaakano eni yuupuwele hai wakhala wi ahoona mathatelo aka?’ Vaavaa nnacharihaahu malakiheryo mamohamoha nnaaleelaahu achu ochariha, enahaala okhala yookhweya wa hiyo okhooca enyakwa ya Satana.—1 Yohani 3:18.

14. Satana oni eererye hai onihoosa, nave nni niwerye hai okhala aweemeleleya?

¹⁴ Satana onamweererya onihoosa ni onoopopiha ophiyerya wi nikhale oohiroromeleya wa Yehova. Ntoko yootakiherya onahaala waavolowela alamuleli wi ehiihe muteko ahu woolaleerya. Onamwaavolowela asinthamwene osikola naari oomutekoni wi eninyemule nthowa na ochariha malakiheryo a Piipiliya. (1 Pedro 4:4) Satana onanwerya waavolowela amusi ahu ahiri Akristu, yaawo eni ekhaleno mathowa aphaama wi yeererye onimaaliha oya mmithukumano. (Mateu 10:36) Tiheeni nnaphwanelaahu opaka wi nikhale aweemeleleya variyari va Satana vooloca sa ohoosa wawe? Hinnaphwanela okhala ootikhiniheya ni ovolowela yoola, nthowa nawi Satana onawaniha ni hiyo. (Wupulula 2:10; 12:17) Navetho nnaphwanela wuupuwela tuuvi ori mwaha weeparipari:  Satana onaloca wi nnamurumeela Yehova vaavaa onakhalaaya wookhweya wa hiyo nave wi nnahaala omukhooca Muluku wakhala wi ichu sinnavila. (Yobi 1:9-11; 2:4, 5) Wookuchulani, nnaphwanela wiiliwiili omveka Yehova wi anivahe ikuru. Muupuwele wi Yehova harwaru anicuwala.—Ahebri 13:5.

15. Apwanne Satana onnanikhinyererya opaka echu yeeyo nihinachunaahu opaka? Mutharihe.

¹⁵ Satana hanawerya waakhinyererya achu opaka echu yeeyo ahinachunaaya opaka. (Tiyako 1:14) Achu ancipale mulaponi hanasuwela wi ari makupa a Satana. Koma vaavaa muchu onahusereiye eparipari, owo onaphwanela othanla waakhanle wi onahaala okhala makupa a Yehova naari a Satana. (Saweriwa T’arummwa 3:17; 17:30) Wakhala wi noolakelela omwiiwelela Muluku, Satana hani awerye onanariha ororomeleya wahu.—Yobi 2:3; 27:5.

16, 17. (1) Echu taani Satana ni masololo ahinaweryaaya opaka? (2) Ntakhara heeni hannaphwanela woova ovekela moovuwa wa Yehova?

¹⁶ Yookhalavo echu ekina Satana ni masololo ahinaweryaaya opaka. Ntoko yootakiherya, Piipiliya hanaloca wi awo aasuwela yeeyo eri mmuupuweloni ni mmurimani mwahu. Pahiru Yehova ni Yesu annasuwela. (1 Samuwele 16:7; Marko 2:8) Mwawiihiiha apwanne ninnaphwanela woova wi wakhala wi ninnaloca naari ovekela moovuwa, Musaserya ni masololo anahaala owiriyana yeeyo nloncaahu ni opharihela sooloca seiyo wi enihoose? Hooye! Ntakhara heeni? Muupuwele yoolikanyiha ela: hiyaano hannoova opaka ichu saphaama mmuteko wa Yehova noovaka wi Musaserya onahaala onoona. Mmukhalelo woolikana, hannaphwanela woova ovekela mmasu oovuwa nthowa nawi Musaserya onahaala oniwiriyana. Piipiliya onnaloca ikwaha sincipale wi akapuro a Muluku yaahivekela mmasu oovuwa, nave hantonko waalakhanya wi yaahoova wi Musaserya aahaala waawiriyana. (1 Mamwene 8:22, 23; Yohani 11:41, 42; Saweriwa T’arummwa 4:23, 24) Wakhala wi noopaka owetha wahu wi nloce nave nipake ichu hiiha ntoko Muluku onachuneiye, nnanwerya ororomela wi Yehova hani amweemererye Musaserya onihoosa mmukhalelo ori woothene.—Mwaalakhanye Salumu 34:7.

¹⁷ Ninnachuna omusuwela mwiicani ahu, nto hannaphwanela okhala oothukumela nthowa na yoowo. Naamwi nri achu oohiphaameya, nnikhaviheryo na Yehova nnanwerya omvootha Satana! (1 Yohani 2:14) Wakhala wi nookhoma ni yoowo, owo onahaala onchawa. (Tiyako 4:7; 1 Pedro 5:9) Olelo, enakhala wi Satana onaahiphela xaxaxa amiravo ni asimwali. Eni ewerye hai omvootha Musaserya? Nnahaala othokororya yeela mmwaha onacharela.