1, 2. (1) Ophiyerya mweeryo taani elapo eryaaya yookawanyeya? (2) Makoho taani nnahaalaahu waakhula mmwaha yoola?

MUROKORA o Europa ooloca sa okumi wamuculi: “Ovinyerya kiri mwaana koona pahiru ohookololowa, mwawiihiiha kaahikhooca mukhalelo wa miyaha sa elapo mu elapo aka, nave kaahikhaviherya yeeyo ancipale yoonaaya ntoko muupuwelo wookhweleyaxa. Mweeparipari, mu iyaakha sincipale kaari mpwana a mulipa awiipha.” Munna o Afrika oothariha nthowa naamweerinhe okhala oowali: “Keemererya wi nihimo naka naari nookhweleyaxa wa mahimo oothene, nave kaahipaka makupa a nikhuuru na epartitu. Naahihusihiwa owiipha amwiicani ahu ni munra, ophitaanyerya a nihimo nahu yaawo yaakhaviherya ipartitu ikina.” Nave murokora mukina o Europa ooloca: “Kaahikhalihiwa mwa nthalu, nave kaanawiica achu oothene a elapo ekina naari a malapelo makina.”

² Mmahiku ahu, achu ancipale aakhalano moonelo woolikana yaarino achu yaala araru. Makhuuru makina a ipoliitika annapharihela owali wi ekhale ootaphuwa. Ti yawunlaana achu  owana vooloca sa miyaha sa elapo. Nave mu ilapo sincipale, achu annaahoosa vancipale akhopela. Hiiha ntoko Piipiliya aalohenryeiye, achu ari ‘òhikhurumuwa’ variyari va mahiku yaala oomaliherya. (2 Timóteo 3:1, 3) Vano, Akristu eni etitelele hai okhala awiiwanana vaavaa achu mulaponi anatepaaya okhala ookawanyeya? Nnanwerya ohuserya sincipale orweela wa yootakiherya ya Yesu. Mmahiku awe achu yaari ookawanyeya moorweela wa okhalano moonelo woolipa vooloca sa miyaha sa elapo. Mmwaha yoola, nnahaala ohuserya maakhulo a makoho mararu: Ntakhara heeni Yesu aahikhooca ovolowela mmiyaha vyakala sa elapo? Yesu oonihenrye hai wi achu a Muluku hanaphwanela opaka makupa mmiyaha sa elapo? Nave Yesu onihusinhe hai wi hannaphwanela opharihela owali?

3, 4. (1) Mmahiku a Yesu, tiheeni Ayuta ancipale yaachunaaya? (2) Moonelo yoowo waavolowenle hai amuhuserya a Yesu?

³ Ayuta ancipale yaawo Yesu aalalenryeiye, mweeparipari yaanachuna okhala ootaphuwa orweela wa Aroma. Ayuta yaawo yiichaniwa Maselote, nikhuuru naapaka makupa mmiyaha sa elapo, yaanapaka soothene yaaweryaaya wi eweerihe achu okhalano moonelo yoowo. Maselote ancipale yaanamuchara mulopwana yoowo iichaniwa Yuta o Kalileya, yoowo aakhanle mu elukuluku ya Yesu. Yuta aari mesiya atheru, yoowo aahuwelinhe ancipale. Mulipa a miyaha sa Ayuta Yosefu aahiloca wi Yuta aanaakhinyererya Ayuta owaniha ni Aroma nave aanawiichana yaale yeemererya waaliva musokho Aroma ntoko “anawoove.” Veelukuluku aya Aroma yaahimwiipha Yuta. (Saweriwa T’arummwa 5:37) Maselote akina yaari oowali wi ekhwaaniherye yoolakelelaaya.

⁴ Ayuta ancipale yaari ooreheryeya ewehereryaka orwa wa Mesiya. Awo yuupuwela wi Mesiya aahaala owoopola orweela wa Aroma ni oweeriha Aisarayeli okhala nloko ntokweene wanawiili. (Luka 2:38; 3:15) Ancipale yeemererya wi Mesiya aahaala otikitherya omwene wa Aisarayeli veelaponi yavathi. Vaavaa ela yeereyaaya, Ayuta oothene yaakhala mmapuro oohiyanahiyana yaahaala okookela o Isarayeli. Ophiyeryatho Yohani Mpatisi ekwaha emoha aahimukoha Yesu: “Ti weyano ole onahawela orwa, nari onakhweleya nin’weheryeke mukina?” (Mateu 11:2, 3) Akhweya Yohani uupuwela wi muchu mukina aahaala orwa wi awoopole Ayuta. Ohoolo waya, Yesu aahiwaacamela amuhuserya eeli mu ephiro ya Emau, amanle oviihiwa mookhwani. Awo yaahiloca wi yaaweherya wi Yesu aari yoowo aahaala owoopola Aisarayeli. (Mwaalakhanye Luka 24:21.) Ohoolo waya ovinyerya vaavale, arummwa yaahimukoha Yesu: “Pwiya, tivano onerawe wemese wiliwili omwene wa Isarayele?”—Saweriwa T’arummwa 1:6.

5. (1) Ntakhara heeni achu o Kalileya yaanachuna wi Yesu akhale mwene aya? (2) Yesu ookolonle hai muupuwelo aya?

⁵ Ayuta yaaweherya wi Mesiya aahaala omaliha makacamiho aya. Ti nthowa nenlo naaweerinhe achu o Kalileya ochuna wi Yesu akhale mwene aya. Awo yuupuwela wi aahaala okhala muhooleli aphaama. Owo aari namaloca aphaama, aanawerya openusa ireca, nave ophiyerya ovahererya yoolya wa yaale yaari oovoliwa. Yesu amanle waalyiha achu awaakhwana macikhwi mathanu, achu yaahitepa otikhiniheya. Owo aahisuwela yeeyo yaachunaaya opaka. Piipiliya  oni: “Yesu asuwelaka wi yànarwela omukusa wi emwere mwene, apwahavo mekheiye àya omwako.” (Yohani 6:10-15) Nihiku noocharela achu yaahikhurumuwa. Yesu voocharela aahaatharihela wi owo haarwenle ovahererya soothowa saya soomwiilini nto olaleerya Omwene wa Muluku. Owo aahaaleela: “Mphareke muteko, nto muhilapeleke yolya enamala, nto yolya enalekela mpaka wa ekumi yohimala.”—Yohani 6:25-27.

6. Yesu oonihenrye hai wi haachuna okhalano olamulelo mmiyaha sa elapo? (Moone eruku yoopacerya.)

⁶ Mahiku vakhaani ahaakumve okhwa, Yesu aahisuwela wi oomuchara awe akina yeemererya wi aahaala opacerya olamulela ntoko mwene o Yerusalemu. Yesu aahiloca niphwanaphwaniho na mina wi aakhaviherye wiiwexexa wi eyo hiyaahaala weereya. Niphwanaphwaniho nlo naari vooloca sa “mulopwana mmoha òsuwanyeya,” aari Yesu, yoowo aahaala okhumavo mu elukuluku yincipale. (Luka 19:11-13, 15) Yesu aahimuleelatho mulamuleli o Roma Pontiyu Pilato wi owo haapaka makupa mmiyaha sa elapo. Pilato aahimukoha Yesu: “Weyano wà mwene a ayuda?” (Yohani 18:33) Akhweya Pilato oova wi Yesu aahaala oweeriha achu waarukunuwela Aroma. Yesu aahaakhula: “Omwene aka tahi wa elapo yela.” (Yohani 18:36) Yesu aahikhooca ovolowela miyaha sa elapo, woona wi Omwene awe waahaala okhala wa wirimu. Aahiloca wi muteko awe veelaponi waari ‘ohelela onamona wa eparipari.’—Mwaalakhanye Yohani 18:37.

7. Ntakhara heeni enamukhala yoovila osepa okhaviherya nikhuuru na epoliitika mmurimani mwahu?

⁷ Yesu aahiiwexexa yootaphulela ya murici awe. Elukuluku nniiwexexaahu yootaphulela ya murici ahu, nnahaala osepa okhaviherya nikhuuru vyakala na epoliitika mmurimani mwahu. Wiiliwiili eyo tahi yookhweya. Ooweherya aweeceeca mmoha ooloca wi achu mu elapo awe annatepa okhala oowali. Awo tawiirumiha vooloca sa nloko naya nave anneemererya wi ikumi saya saahaala okhumelela phaama waakhanle wi  analamuleliwa ni achu a nloko naya. Owo ohaacererya: “Kinnathamalela woona wi anna annakhapelela wiiwanana waya ntoko Akristu moorweela wa oweiwa elaleeryaka michaka saphaama sa Omwene. Awo anaweherya wi Muluku amalihe ohookololowa ni makacamiho makina anahoolelaaya.”

8. Ohookololowa taani Ayuta ancipale yaahoolelaaya mmahiku a Yesu?

⁸ Elukuluku achu anoonaaya ohookololowa weereyaka mmapuro aya, awo annavolowela miyaha sa elapo. Mmahiku a Yesu, oliva musokho waari mwaha yoowo waaweeriha achu ancipale opaka makupa mmiyaha sa elapo. Mweeparipari, Yuta o Kalileya aahimwareela olamulelo wo Roma nthowa nawi Aroma yaahaarepela achu echunaka wi eliveke misokho. Nave saahikhalavo misokho mincipale sa oliva, ntoko wa sookhalano, nipuro, ni wa ipa. Navetho alipa ooliviha misokho, yaari oohookololowa, yeerihaka makacamiho waaceereryeya. Ikwaha ikina awo yaanaaliva alipa oolamulela wi evahiwe murici nave yaanapharihela owerya waya wi ekhaleno ikhorowa sincipale. Sakewu, muhooleli a alipa a musokho o Yeriko, aahitepa okanyaari nthowa nawi aanaweeriha achu oliva ikhorowa sawaaca.—Luka 19:2, 8.

9, 10. (1) Amwiicani a Yesu yeerenrye hai omvoliiherya mmiyaha sa elapo? (2) Tiheeni nnahuseryaahu orweela wa naakhulo na Yesu? (Moone eruku yoopacerya.)

⁹ Amwiicani a Yesu yaaheererya omvoliiherya vooloca sa oliva misokho. Awo yaahimukoha vooloca sa “oliva musokho” wa etenaariyu yeeyo Ayuta oothene yaaphwanelaaya oliva. (Mwaalakhanye Mateu 22:16-18.) Mweeparipari Ayuta yaaniica oliva musokho yoowo woona wi yaanawuupuserya wi olamulelo wo Roma waanaalamulela. “Atxhu akina a muloko wa Heróde,” eyo tiwi, yaale yaamukhaviherya Herote mmiyaha sa elapo, yaaweherya wi wakhala wi Yesu ooloca wi hiyaaphwanela oliva musokho, yaahaala omuthoriha ntoko mwiicani a Olamulelo wo Roma. Koma waakhanle wi Yesu ooloca wi yaanaphwanela oliva musokho, achu yaahaala ohiya omuchara. Vano, tiheeni Yesu aapankeiye?

¹⁰ Yesu aahikhalano ephoole wi atitelele ohipaka makupa mmiyaha sa elapo. Owo aahiloca: “Mmukòkiherye Sèsar eri ya Sèsar, ni mmukokiherye Muluku eri ya Muluku.” (Mateu 22:21) Yesu aahisuwela wi alipa ooliviha misokho yaari oohookololowa, nto haathokororya yeeyo. Opwaha yeeyo, aathokororya echu yaahaala owoopola achu mmakacamiho aya, Omwene wa Muluku. Yesu oovaha yootakiherya wa hiyo. Hannaphwanela opaka makupa mmiyaha sa elapo, moohipwacha waakhanle wi nikupa nimoha nnakhala wi ti nawookololowa ni naphaama nave nikina noonanara ni noohookololowa. Akristu anathokororya Omwene wa Muluku ni yeeyo Muluku olonceiye wi ti yawookololowa. Wa nthowa na yeela, hinaanono moonelo woolipa vooloca sa ohookololowa naari waaloca yaawo.—Mateu 6:33.

11. Nni naakhaviherye hai akina ophwanya wookololowa weeparipari?

¹¹ Anamoona a Yehova ancipale annakhumelela phaama ohipaka makupa mmiyaha sa elapo. Ntoko yootakiherya, murokora mmoha o Krapretanya ahaakumve ohuserya eparipari, aahikhalano mahusiheryo avasulu yaawo yaamweerinhe okhalano moonelo woolipa vooloca sa miyaha sa elapo. Owo ooloca: “Kaachuna waakiha ophwanelela wa  anamaripa, woona wi naanatepa ohooxiwa. Naamwi kaakhumelela phaama mu ovootha miyaha, nlelo kaanakhala awuukhuwa mmuupuweloni. Nkaasuwela wi nthowa neeriha okhalavo nthalu echu etikitheren’ye mmurimani mwaachu. Koma elukuluku kaapacenryaaka omuhuserya Piipiliya, kaahisuwela wi kaaphwanela opaceryiha murima ohirino nthalu.” Nave murokora yoowo aari mukunya taamukhavihenrye otoroka moonelo awe. Owo onnaaceererya: “Vano kinarumeela ntoko Piyoneera ookilaatheya mmuloko wa elocelo ya ineneeryo, nave kinahuserya waakhaviherya achu a mukhalelo woothene.”

12. Mukhalelo taani wa “miropo” Yesu aaleenleiye amuhuserya awe osepa?

¹² Mmahiku a Yesu, asitokweene a malapelo wiiliwiili yaanakhaviherya makhuuru a miyaha sa elapo. Ntoko yootakiherya, liivuru Daily Life in Palestine at the Time of Christ (Okumi wa Nihiku ti Nihiku o Palestina Elukuluku ya Kristu) ooloca wi Ayuta yaari ookawanyeya mmakhuuru a malapelo yaawo yaari oolikana ni ipartitu sa ipoliitika. Mwawiihiiha Yesu aahaalopola amuhuserya awe: “Mwikosope ni miropo sa afarisi ni sa Heróde.” (Marko 8:15) Vaavaa Yesu aamulonceiye Herote, akhweya owo aaloca achu akina a muloko wa Herote. Nikhuuru nikina, yaari Afarisi, yaawo yaachuna wi Ayuta ekhale ootaphuwa orweela wa Olamulelo wo Roma. Mwawiiwanana ni yaweereya ya Mateu, Yesu aahaalopolatho amuhuseryaawe vooloca sa Asatuki. Awo yaachuna wi Aroma etitelele olamulela woona wi yaanaweemererya okhalano mirici mitokweene. Yesu aahaalopola amuhuserya osepa “miropo” naari mahusiheryo a makhuuru yaala mararu. (Mateu 16:6, 12) Nave ti yoophwanelela woona wi Yesu aavanhe olopola yoola achu emanle omweeriha owo okhala mwene.

13, 14. (1) Ti mwawiihai miyaha sa elapo ni sa malapelo inahoolelaaya owali ni ohookololowa? (2) Ntakhara heeni ehiryaaya yoophwanelela okhala oowali, naamwi nikhalihiwaka moohookololowa? (Moone eruku yoopacerya.)

¹³ Elukuluku makhuuru a malapelo anapakaaya makupa mmiyaha sa elapo, wiiliwiili onnakhalavo owali. Yesu aahaahusiha amuhuseryaawe otitelela ohipaka makupa mmiyaha sa elapo. Ti nthowa nene asitokweene a anamukucho ni Afarisi yaachunaaya omwiipha Yesu. Awo yoova wi achu yaahaala omuwiriyana nave emaale waachara. Waakhanle wi ela yoheereya, yaahaala oyeleela mirici saya mmalapelo ni mmiyaha sa elapo. Awo yaahiloca: “Hiyo namuhiyà hiha, atxhu othene anammwemererya yowo, nave Aroma anamurwa emwarye empa ya Muluku ni nloko nahu.” (Yohani 11:48) Mwawiihiiha Mutokweene a Anamukucho Kayafa aahipaka marehereryo wi amwiiphe Yesu.—Yohani 11:49-53; 18:14.

¹⁴ Kayafa aahiweherya ophiyerya ohiyu nave aahaarumiha anakhoco wi yamphare Yesu. Nto Yesu aahisuwela marehereryo a wiiphiwa wawe. Mwawiihiiha variyari va yoolya yookuchula ni arummwa awe, owo aahaaleela okusa masipaaca. Meeli yaahaala  okhwaanela wi aahusihe echu yookhweleya. (Luka 22:36-38) Mu ohiyu yoole, nikhuuru naahirwa wi nimphare Yesu, nave Petro aahitepa oyeenyeya vooloca sa ohookololowa, mwawiihiiha aahikusa nsipaaca amphoreiha mulopwana mmoha. (Yohani 18:10) Yesu aahimuleela Petro: “Kuhà nsipatxa nà, ntakhara atxhu othene anaphoreiha ni nsipatxa, enahawela ekhwetho ni nsipatxa.” (Mateu 26:52, 53) Naari nihusiheryo noophwanelela Yesu aahusinheiye amuhuseryaawe! Wi awo hiyaaphwanela opaka makupa mmiyaha sa elapo. Ti yeeyo Yesu aavekenleiye woopaceryani wa ohiyu yoole. (Mwaalakhanye Yohani 17:16.) Pahiru Muluku torino ophwanelela wa omaliha ohookololowa.

15, 16. (1) Masu a Muluku aakhavihenrye hai Akristu osepa owanawana? (2) Ohiyana taani Yehova onooneiye vaava onaweheiye elapo mmahiku ahu?

¹⁵ Murokora o Europa olociwe omapacereryo wa mwaha ola aahihuserya echu emohamoha. Owo ooloca: “Kaahoona wi owali honaruuha wookololowa. Kaahisuwelatho wi yaale anapaka soowali wiiliwiili annakhwa. Nave ancipale annakhala awuukhuwa. Kaahitepa ohakalala ohuserya orweela Mpiipiliya wi pahiru Muluku tonahaala oruuha wookololowa weeparipari veelaponi yavathi. Iha michaka kinalaleeryaka mu iyaakha makhumi meeli nathanu.” Munna o Afrika oohico aahiraceeliha masu awe ni “nsipatxa na munepa,” Masu a Muluku. (Éfeso 6:17) Olelo owo onalaleerya muchaka wa murecele wa achu a mukhalelo woothene, moohiphwacha nihimo anarweelaayawo. Murokora mukina o Europa amanle okhala Namoona a Yehova, aahitheliwa ni munna a nihimo nenlo murokora owo iiceiye. Achu ooraaru yaale yaahipaka matorokelo yaala woona wi yaanachuna okhala ntoko Kristu.

¹⁶ Ti yookhweleya opaka matorokelo yaala! Piipiliya onnaloca wi achu ari ntoko ephareya etannyiwe nave enaviluwa ehinakhala mmureceleni. (Isaiya 17:12; 57:20, 21; Wupulula 13:1) Miyaha sa epoliitika sinnaawaniha achu, sinnaakawanya, nave sinnatannya owali. Koma hiyo nri a murecele ni awiiwanana. Vaavaa Yehova onooneiye mukhalelo achu aryaaya ookawanyeya, owo onnatepa ohakalala woona mukhalelo achu awe aryaaya awiiwanana.—Mwaalakhanye Sofoniya 3:17.

17. (1) Mikhalelo taani miraru nneeraahu nikhaviherye wiiwanana? (2) Tiheeni nneeraahu nthokororye mmwaha onacharela?

¹⁷ Mmwaha yoola noohuserya wi nnanwerya okhaviherya wiiwanana mmikhalelo miraru: (1) Ninnaroromela wi Omwene wa Muluku tonahaala omaliha ohookololowa woothene, (2) hannapaka makupa mmiyaha sa elapo, ni (3) ninnakhooca owali. Koma echu eni enanarihe wiiwanana wahu nri nthalu. Mmwaha onacharela, nnahaala ohuserya mukhalelo wa ovootha nthalu hiiha ntoko Akristu oopacerya yenraaya.