Tiithi a Ropowamu, Solomoni, aari mwene o Isarayeli mu iyaakha makhumi masese. (1 Mamwene 11:42) Amanle tiithi awe okhwa, Ropowamu aahipaka mukwaha ovinyerya o Yerusalemu ayaaka o Sikemi wi akhale mwene. (2 Matharihelo 10:1) Apwanne aanoova okhala mwene oocharela? Solomoni aahisuweliwa ntakhara miruku sawe soohilikanyiheya. Ohoolo waya, Ropowamu aahaala wooniherya waakhanle wi aari a miruku wi amalihe makacamiho.

Aisarayeli yaanahoosiwa nave yaahimurumiha muchu wi amuleele Ropowamu yeeyo awo yaachunaaya wi apake: “Atithi à Salomoni yananihosa vatokovene. Vano weyano wavukula ekoi navahiwahu ohosiwa wahu t’atithi à nave wayeviha miritxi solimela yantxukhulihaya, hiyano nni nnamolapela.”—2 Matharihelo 10:3, 4.

Ropowamu aahikhalano yoothanla yoovila vooloca sa echu yoopaka. Waakhanle wi oopaka yeeyo achu yaachunaaya, owo ni emusi awe ni yaale yaakhala mu empa ya mwene akhweya hiyaahaala okhalano muhakhu yoowo yaaryaayano. Waakhanle wi ookhooca yooveka ya achu, awo yaahaala ommwareela. Tiheeni aapankeiye? Voopaceryani, aahiloca ni alopwana awuuluvala yaawo yaakhavihenrye atiithi awe. Awo yaahimuleela wi aawiriyane achu. Voocharela, Ropowamu aahiloca ni yaale aalikaneiyeno iyaakha nave aahilakelela waakhaliha achu moonanara. Owo aahaaleela achu: “Atithi aka yahohasulani nto miyano kinamutepa wohasulani. Atithi aka yànowasulani ni miripitxho, nto miyano kini kowasulekeni ni miripitxho sa ethoka ya mithipo!”—2 Matharihelo 10:6-14.

Apwanne mohoona yoohuserya ntakhara hiyo? Olelo, nookhalano awuuluvala ancipale variyari vahu yaawo anamurumeela Yehova mu iyaakha sincipale nave eni enikhaviherye opaka soolakelela saphaama. Hankooni nikhale amiruku nave naawiriyane.—Yobi 12:12.

Ropowamu aahaathukumanya akhoco awe wi yawane ni mahimo oomwaryeya. Nto Yehova aahimurumiha mulipa a miririmu Semaya wi aaleele: “Muhiwane ekhotxo ni atxhu a nloko na Isarayele wona wi awo ari asinninyu. Mutxhu ti mutxhu akòkele owannyawe,  ntakhara ti miyano kitxhunne wi itxhu ikhale hiha.”—1 Mamwene 12:21-24. *—Moone masu avathi.

Apwanne yaari yookhweya Ropowamu onwiriyana Yehova? Tiheeni achu yaahaalaaya wuupuwela vooloca sa mwene aya muvyaani? Owo aahiloca wi aahaala waawasula ni “miripitxho sa ethoka ya mithipo,” nto vano haahaala opaka echu vooloca sa omwareya! (Mulikanyihe ni 2 Matharihelo 13:7) Naamwi hiiha, moohipwacha yeeyo achu yuupuwelaaya, mwene ni akhoco awe “yawiwelela Apwiya nave yakokela owannyaya.”

Tiheeni nnahuseryaahu? Ti yookhweleya elukuluku yoothene omwiiwelela Muluku naamwi achu eninyemulaka mu weereno hiiha. Muluku onahaala otitelela onireeliha vaavaa nnamwiiwelelaahu.—Malamulo 28:2.

Apwanne Ropowamu aahireelihiwa ntakhara wiiwelela wawe? Ropowamu nlelo aanalamulela mahimo a Yuta ni a Peniyamini, nave aahilakelela opaka ipooma ivyaani mmiceche mwemmo. Owotho “atepa olipiha phama ipoma iho.” (2 Matharihelo 11:5-12) Echu yookhweleyaxa, veelukuluku aya owo aahiiwelela malamulo a Yehova. Woona wi omwene wa mahimo khumi waapacerya olapela soophwaniherya, ancipale a mapuro yaawo yaanaya o Yerusalemu wi yamukhaviherye Ropowamu ni malapelo eeparipari. (2 Matharihelo 11:16, 17) Woona wi Ropowamu aahimwiiwelela Yehova, omwene awe waahikhala woolipa.

Elukuluku omwene wa Ropowamu waaryaaya woolipa, owo aahipaka echu yoonanara. Aahimaala wiiwelela malamulo a Yehova nave aahipacerya waalapela amuluku atheru! Ntakhara heeni? Apwanne amamaawe, yaawo yaari Amonita, yaahivolowela soolakelela sawe? (1 Mamwene 14:21) Hansuwenle, koma nloko naahichariha yootakiherya awe yoonanara. Mwawiihiiha Yehova aahimweemererya Mwene Sisaki o Yikuputu wi akuse ipooma sincipale mu omwene wo Yuteya. Ela yaaheereya naamwi Ropowamu aalipinhe ipooma!—1 Mamwene 14:22-24; 2 Matharihelo 12:1-4.

Mukhalelo ola waahitepa onanara vaavaa Sisaki ni akhoco awe yaaruulaaya wi emutolose Yerusalemu, weiwo Ropowamu aalamuleleiyewo. Mu elukuluku yeeyo, mulipa a miririmo Semaya aahimvahererya Ropowamu ni asitokweene awe muchaka wa Muluku: “Nyuwano mokinyanyala nave miyano kihonyanyalani mmatani mwa Sisaki.” Ropowamu aakhulenle hai olaka wuuwu? Mmukhalelo woophwanelela! Piipiliya oni: “Mwene ni asitokwene yahona (yàsuwela) yotxheka aya nave yahi: ‘Apwiya àlotxa yeparipari!’” Mwawiihiiha, Yehova aahimoopola Ropowamu nave Yerusalemu haatolosiwe.—2 Matharihelo 12:5-7, 12.

Ovinyerya vaava, Ropowamu aahititelela olamulela omwene woothene wo Yuteya. Ahaakumve okhwa, aahaavaha anaawe samahala sincipale. Owo akhweya aachuna wi aroromele wi hiyaahaala ommwareela munnaya Apiya, yoowo aahaala okhala mwene oocharela. (2 Matharihelo 11:21-23) Mu weerano hiiha, Ropowamu aaheerano mwamiruku opwaha vaavale aareiye mmiravo.

Naamwi Ropowamu eerenrye opaka ichu saphaama, Piipiliya onnaloca sa olamulelo awe: “Robowamu àhera yonanara.” Ntakhara heeni? Nthowa nawi “halipisenrye watxhara Apwiya mwa sothene.” Mmukhalelo yoola, Yehova haahakalanle ni yoowo.—2 Matharihelo 12:14.

Tiheeni nnahuseryaahu orweela wa okumi wa Ropowamu? Veelukuluku aya aahimwiiwelela Muluku. Nave aahipaka ichu saphaama ntakhara achu a Yehova. Koma owo haarino onthamwene waphaama ni Yehova, nave haarino nchuno na omuhakalaliha. Owo aahimaala opaka yeeyo yaari yawookololowa nave aahipacerya waalapela amuluku atheru. Akhweya munamukoha: ‘Elukuluku Ropowamu eemerenryeiye olopola wa Yehova, apwanne naari nthowa na othanana ntakhara soocheka sawe ni ochuna omuhakalaliha Muluku? Naari pahiru waari wanthowa na yeeyo akina yaaloncaaya wi apake?’ (2 Matharihelo 11:3, 4; 12:6) Ohoolo waya owo aahipaka yeeyo yaari yoonanara. Aari oohiyana ni ataataawe, Mwene Tavite! Eparipari wi Tavite aahipaka soocheka. Koma aahicharuwa ni murima woothene soocheka itokotoko seiyo aapankeiye. Nave aanamusivela Yehova  ni malapelo eeparipari mu okumi awe woothene.—1 Mamwene 14:8; Salumu 51:3, 17; 63:2.

Nnanwerya ohuserya sincipale orweela wa yaweereya yeela ya Mpiipiliya. Enakhala yoothamaleleya vaavaa achu anavakulelaaya imusi saya ni opaka ichu saphaama ntakhara akina. Koma wi nikhaleno mahala a Yehova, nnaphwanela omurumeela mmukhalelo onamuhakalaliha, nave nnaphwanela okhalano onthamwene woolipa ni yoowo.

Wi nikhwaaniherye yoolakelela yeela, nnaphwanela omusivela mwawiiseela Yehova. Hiiha ntoko okhapelela mooro onachuneyaaya wi nihelavo ikhuuni sawaaca, ninnakhapelela osivela wahu ntakhara Muluku moorweela wa ohuserya Masu awe moohihiyererya, wuupuwelela, ni ovilela mmavekeloni. (Salumu 1:2; Aroma 12:12) Nave osivela yoola onahaala onceenyerya omuhakalaliha Yehova mu soothene nnapakaahu. Onahaalatho onceenyerya ocharuwa ni murima woothene wakhala wi noopaka yoocheka ni omveka Yehova wi anikhurumuwele. Hinni nikhale ntoko Ropowamu nto nnahaala otitelela okhala oororomeleya wa malapelo eeparipari.—Yuda 20, 21.