1-2. Tiheeni yaamweerinhe Yesu oloca masu anaphwanyeya mu Yohani 4:35, 36?

VAAVAA aareiye vamukwahani, Yesu aavira mu imaca, akhweya waarimo soolya ikithi. (Yoh. 4:3-6) Wi ephiye elukuluku ya ohepha, sinahala miyeeri mixexe. Vano, Yesu onnaloca echu enooniwa okhala yoohiphwanelela: “Mviihe muru, muwehe mmacani, moone wi soolya soomalela, inakhwela ohephiwa!” (Mwaalakhanye Yohani 4:35, 36.) Tiheeni Yesu achuneiye oloca?

² Mwawooneya, Yesu haaloca sa ohephiwa wa soolya, nyenya ohephiwa wa achu. Muupuwele echu yeeren’ye mu elukuluku vakhaani muculi. Naamwi Ayuta yahaakhaliha phaama Asamariya, Yesu aahimulaleerya muthiyana o Samariya—nave owo aahiwiriyana! Ophiyerya wi vaavaa Yesu aalonceiye “wi soolya soomalela, inakhwela ohephiwa”, asamariya ancipale yaamwiiwale muthiyana alocaka sa Yesu yaanaya wa yoowo wi yahuserye sincipale. (Yoh. 4:9, 39-42) Alocaka sa iversikulu iha liivuru mmoha oriye: “Nchuno ntokweene achu awo yaaryaayano wi enwiriyane Yesu . . . yaahooniherya wi awo yaari ntoko soolya saachuna ohephiwa.”

3. Wakhala wi munawoona achu ntoko Yesu aawooneiye, ichu taani saphaama inahaala okhumelele mmuteko anyu woolaleerya?

³ Hanka achu a ekulucu anyu? Apwanne munawoona ntoko soolya inachuna ohephiwa? Mmukhalelo yoola, ichu chaaru saphaama inahaala weereya. Yoopacerya, nyuwaano munahaala olaleerya mwawaakuveya. Elukuluku ya ohepha ti yavakhaani; henachuneya oyeleeleya elukuluku. Yanaawiili, nyuwaano munahaala otepa ohakalala owoona achu yeemereryaka michaka saphaama. Piipiliya oni: ‘Achu annahakalala elukuluku yoohepha.’ (Isa. 9:2) Nave yaneeraru, munahaala omoonaka muchu ti muchu ntoko oohuserya okhweleya, nthowa na yeeyo, munahaala otoroka olaleerya wanyu mwawiiwanana ni nchuno nawe.

4. Tiheeni nnahaalaahu ohuserya vooloca sa murummwa Paulo?

 ⁴ Oohuserya a Yesu akhweya yaawoona Asamariya ntoko achu oohiphwanelela. Nyenya tahi yeeyo Yesu uupuweleiye. Moohiyana Yesu awoona Asamariya ntoko oohuserya oophwanelela. Hiyaano tho nnaphwanela owoonaka achu a ekulucu ahu ntoko oohuserya oophwanelela a Kristu. Murummwa Paulo oonivaha yootakiherya yaphaama wi ncharihe. Tiheeni nneeraahu nihuserye wa yoowo? Mmwaha yoola, nnahaala woona ti mwawiihai Paulo (1) aasuweleiye savakhaani vooloca sa soororomela sa oowiriyana we, (2) annaavyaavya osuwela ichu soochuneya wa yaawo, (3) nave aamoona muchu ti muchu okhala oohuserya oophwanelela.

5. Ntakhara heeni Paulo anwerya waasuwela oowiriyana awe mu sinakooka?

⁵ Mu ikwaha sincipale Paulo aanalaleerya mu sinakooka a Ayuta. Ntoko yootakiherya, mu sinakooka o Tesalonika, Paulo mu “mahiku mararu awiichuwa aanaakasihanano [Ayuta] mu soorempwa.” (Saw. 17:1, 2) Ti yawooneya wi Paulo haarino nikacamiho na olaleerya mu sinakooka. Mweeparipari, owo aaphuiwale ntoko Muyuta. (Saw. 26:4, 5) Owo aanaasuwela Ayuta, wa nthowa na yeeyo, aanawerya olaleerya wa yaawo moohoovelela.— Fil. 3:4, 5.

6. Ohiyana taani warivo variyari va oowiriyana a Paulo a wa Atena ni o sinakooka?

⁶ Amanle waachawa amwiicani o Tesalonika nave tho o Pereya, Paulo aahiphiya wa Atena. Wanaawiili, Paulo “aanaakasihana ni aYuuta ni aKereku oomoova Muluku.” (Saw. 17:17) Nyenya vaavaa aakeleiye olaleerya mmapuro a waaciwamo, Paulo aahaaphwanya achu ahaasuwenleiye. Wa yaawo yaahikhalavo mafilosofu ni achu akina yahaari Ayuta yaawo yoona muchaka wa Paulo ntoko “ehusiho . . . ya hiihaano.” Awo yaaloca ni Paulo: “Munnanruuhela Muupuwelo makina ootikiniha.”— Saw. 17:18-20.

7. Mwawiiwanana ni Saweriwa T’arummwa 17:22, 23, matorokelo taani Paulo aapankeiye mu olaleerya wawe?

⁷ Mwaalakhanye Saweriwa T’arummwa 17:22, 23. Paulo haaperenkhe muchaka awe wa achu yahaari Ayuta o Atena ntoko eenreiyeno ni Ayuta mu sinakooka. Akhweya Paulo aahiikoha woosiilo ‘Tiheeni achu a wa Atena aneemereryaaya?’ Owo aahivareryeela ichu saari moorukurerya mwaya nave oona sookhovelela sa malapelo aya. Voocharela, Paulo aaheererya osuwela moonelo aya wa wunlaana vooloca sa malapelo aya ni eparipari ya mu  Soorempwa. Namaloca mmoha a Piipiliya oriye: “Ntoko Mukristu Muyuta, Paulo aahisuwela wi Akereku yahaarino malapelo hiyaamulapela Muluku ‘eparipari’ a Ayuta ni a Akristu. Nyenya owo aaheererya owooniherya wi, Muluku aamulaleyeiye haari oohisuwanyeya wa achu o Atena.” Paulo aari ooreheryeya otoroka mukhalelo awe wa olaleerya. Owo aahiloca wa Atena wi muchaka awe waarwa wa “Muluku oohisuwanyeya” yoowo awo yeereryaaya omulapela. Naamwi achu ale yahaari Ayuta yahaasuwenle Soorempwa, Paulo haavelavenle. Ohiiya yeeyo, owo aawonne achu ale ntoko soolya saachuna ohephiwa. Eyo yaamweeriha Paulo otoroka mukhalelo awe wa olaleerya michaka saphaama.

8. (1) Muni musuwele hai ichu seiho achu mu ekulucu anyu aneemereryaaya? (2) Wakhala wi muchu olonce wi okhalano malapelo awe, tiheeni munaphwanelaanyu oloca?

⁸ Hiiha ntoko Paulo, mukhale oovareryela. Mwaavye ineneeryo inooniherya soororomela sa achu a ekulucu anyu. Ntoko yootakiherya, apwanne sookhalamo ineneeryo sa malapelo mu empa naari mu ekaaro ya mulipa a vaate? Apwanne nsina nawe, soowara sawe ni masu awe annooniherya echu vooloca sa malapelo awe? Vakina vaya mwaneene a vaate onanwerya oloca mooluluwanya wi ookhalano malapelo. Tiheeni munaphwanelaanyu weera? Piyoneera mmoha oniichaniwa Flutura wiiliwiili onaakhula ariki: “Miyaano nkiruule wi kookhinyereryeeni weemererya soororomela saka, nyenya wi nivaanele vooloca sa mwaha ola . . . ”

9. Miyaha taani sawunlaana munahaalaanyu ophwanya ni muchu orino malapelo?

⁹ Ichu taani munaphwanelaanyu oloca ni muchu orino malapelo? Mwaavye mwaha ori wawunlaana. Owo akhweya onamulapela Muluku mmoharu, onneemererya wi Yesu Mvuluxa a achu oothene naari wi onoona wi nnakhala mu elukuluku ya sookacamiha yeeyo enahaala omala moohilekela. Mpharihelaka mwaha ori wawunlaana, mperekhe muchaka wa Mpiipiliya mmukhalelo onahaala otannya nchuno na muchu.

10. Tiheeni nnaphwanelaahu weererya opaka, nave ntakhara heeni?

¹⁰ Musuwele wi tahi wi achu anneemererya ichu soothene malapelo aya anahusihaaya. Vano, mmanle osuwela malapelo a muchu, mweererye osuwela ichu oneemereryeiye. David, yoowo ori piyoneero avameekheiye o Australiya, oriye: “Olelo achu ancipale anaphitaanyerya soororomela sa malapelo ni filosofia.” Donalta, murokora o Alpaniya, oriye: “Achu akina analoca wi aakhalano malapelo, nyenya voocharela analoca wi hanamweemererya Muluku.” Nave munna ori misiyonaariyo o Arxentina ohoona wi aakhala achu aneemererya mwa amuluku araru mwa  mmoha, nyenya haneemererya wi Atiithi, Mwaana ni munepa waweela Muluku mmoharu. Misiyonaariyo owo oriye: “Osuwela yeela, onnakhala wookhweya ophwanya moonelo wawunlaana ni muchu.” Nthowa na yeeyo mweererye osuwela yeeyo achu aneemereryaaya chiryene. Mmukhalelo yoola, munahaala owerya okhala ‘soothene wa oothene wi mwa makhalelo oothene, mwaavulushe akina’ hiiha ntoko Paulo.—1 Kor. 9:19-23.

11. Mwawiiwanana ni Saweriwa T’arummwa 14:14-17, Paulo aaperenkhe hai muchaka awe mmukhalelo waasivenle achu o Lustra?

¹¹ Mwaalakhanye Saweriwa T’arummwa 14:14-17. Paulo aanasuwela yoochuna ya oowiriyana awe nave aanatoroka muchaka. Ntoko yootakiherya, achu o Lustra yaasuwenle vakhaani naari wi hiyaasuwenle echu vooloca sa Soorempwa. Mwa yeeyo, Paulo aahipharihela mukhalelo yoowo awo yaahaalaaya wiiwexexa. Owo aaloca sa ohephiwa wa sawiima ni mukhalelo wa oopuha okumi. Paulo aahipharihela masu ni sootakiherya seiyo oowiriyana awe yeeraaya yiiwexexe mwawaakuveya.

12. Muni musuwele hai ichu inaasivela achu wi mpaceryihe ovaanela?

¹² Mweererye osuwela yeeyo enaasivela achu a ekulucu anyu nave mutoroke muchaka anyu. Nyenya vaavaa muchu onaphiyeiye vaate, oni asuwele hai ichu mwaneene a vaate inamusivela? Wanawiili mukhale oovareryela. Akhweya onamurehererya kapinka, onamwaalakhanya liivuru, onarehererya ekaaro naari onapaka echu ekina. Wakhala woophwanelela, munoona hai opaceryiha ovaanela mpharihelaka echu mwaneene a vaate onapakeiye? (Yoh. 4:7) Ophiyerya wi soowara sa muchu inanwerya wooniherya mukhalelo wa muchu—ntoko yootakiherya, ta woowi, muteko onalapeiye naari nikhuuru na mapokha onakhaviheryeiye. Munna oniichaniwa Gustavo oriye: “Miyaano kaahipacerya ovaanela ni mmiravo a iyaakha 19 aawanre malaya yaawo yaarino eruku ya mulipa a wiipa oovuwa. Kaamukoha mmiravo ole vooloca sa  malaya nave aakileela wi iilikanyiha ni mulipa awiipa. Ovaanela waakumiherya yoohuserya ya Piipiliya, nave olelo owo munnihu.”

13. Muni mvahe hai yoohuserya ya Piipiliya mmukhalelo onahaala otannya nchuno na achu?

¹³ Vaavaa munamvahaanyu muchu yoohuserya ya Piipiliya, mweereno eyo mmukhalelo onahaala otannya murima awe. Mmoonihe mukhalelo yoohuserya ya Piipiliya enahaalaaya okhala yamphurelo wa yene. (Yoh. 4:13-15) Ntoko yootakiherya, murokora mmoha awiichaniwa Poppy aamulaleerya muthiyana, nave muthiyana aanwopa wi avolowe mpa. Vaavaa aavolonweiye mpa, Poppy ahoona wi muthiyana aahikhalano ekaarata ya exikola ya vasulu, Voocharela, Poppy ahiloca wi hiyaano tho ninnaahusiha achu moorweela wa yoohuserya ya Piipiliya ni mithukumano sahu. Muthiyana aheemererya yoohuserya ya Piipiliya, mu nihiku noocharela aahiphiya mmithukumano sa muloko nave ohoolo waaya aahiphiya va muthukumano wa ekulucu. Evinrevo eyaakha emoha owo aahipatisiwa. Mwiikohe: ‘Yaale kinayaaka waaxekurya ichu taani sinaasivela? Kini kivahe hai yoohuserya ya Piipiliya mmukhalelo onahaala otannya nchuno?’

14. Muni murehererye hai yoohuserya ya Piipiliya wa oohuserya anyu?

¹⁴ Mmanle opaceryiha yoohuserya ya Piipiliya, murehereryeke phaama nikupa ti nikupa na yoohuserya. Elukuluku muniirehereryaanyu, muthanle soorepa taani munayaanyu waalakhanya, ixilema munayaanyu omooniha ni maphwanaphwaniho munayaanyu opharihela. Mwiikohe: ‘Tiheeni enahaala okhala yookhweleyaxa wa oohuserya yoowo? Tiheeni enahaala otannya murima awe?’ (Masi. 16:23) O Albânia murokora mmoha ori piyoneera oniichaniwa Flora aahikhalano oohuserya awe yoowo aaloca ni murima woothene ariki: “Nkineemererya ichu munahusihaanyu vooloca sa ovinya mookhwani.” Flora haatitelenle mmwaha yoola. Owo onnathariha: “Kaahoona okhala woochuneya wi apacerye omusuwela Muluku yoowo olaihenrye ovinya muukhwani.” Ovinyerya vaava, Flora aahipacerya omuhusiha vooloca sa osivela, miruku ni owerya wa Yehova mu yoohuserya eri yoothene. Ohoolo waya oohuserya aahipacerya okhalano nroromelo mu ovinya muukhwani.

15. Mwawiiwanana ni Saweriwa T’arummwa 17:16-18, nikacamiho taani Paulo aakumanneiyeno o Atena, nave ntakhara heeni haavelavenle ni achu a weiwo?

¹⁵ Mwaalakhanye Saweriwa T’arummwa 17:16-18. Atena waari muceche waasaren’ye soophwaniherya, ocapaheya ni ifilosofiya saachu yahaamulapela Muluku. Nyenya Paulo haahiyerenrye waalaleerya achu o Atena, naamwi aanyemuliwe ni yaawo. Paulo aanuupuwela wi naamwi aari “oomunyemula Muluku, oowiikara achu awe, ni awiikhoma,” owo aahikhala Mukristu. (1 Tim. 1:13) Hiiha ntoko Yesu onneiye ophwanelela wawe, Paulo tho aawoona achu a wa Atena ntoko achu oophwanelela. Nave moonelo yoola waphaama waakumiherya mphurelo.— Saw 9:13-15; 17:34.

16-17. Tiheeni enooniherya wi achu a mukhalelo woothene ananwerya okhala ohuserya a Kristu? Mvahe yootakiherya.

¹⁶ Mu nsana noopacerya achu ancipale yaahikhala oomuchara a Yesu. Vaavaa Paulo aarepenleiye ekaarata Akristu o Korinto, owo aalonce wi achu akina a muloko yoole yaari alipa awiipha naari khalai yaari acapaheya. Nave Paulo aahaaceererya: “Akina a nyuwo mwaari awiihiiha. Nto moorapihiwa.” (1 Kor. 6:9-11) Akorinto yaapaka matorokelo nave ekhala oohuserya. Mwaakhanle mu elukuluku yeele, apwanne mwahaala woona ophwanelela waya?

¹⁷ Ancipale olelo ari ooreheryeya opaka matorokelo wi ekhale oohuserya a Yesu. Ntoko yootakiherya, o Australiya, piyoneera mmoha  avameekheiye oniichaniwa Yukina oohuserya wi achu oothene ananwerya weemererya muchaka wa Piipiliya. Ekwaha emoha, Yukina amoona mwali mmoha iirempe nave awanre ikuwo itokotoko. Yukina oriye: “Mu elukuluku vakhaani, kaahuupuwela: ‘Kiloceno naari kihiloceno?’ Voocharela kaalakelela olocano. Kaahoona wi owo aakhalano nchuno ntokweene mu Piipiliya. Ophiyerya wi ichu ikina aarempeiye saari iversikulu sa Salumu!” Mwali aapacerya oohuserya ni ophiya mmithukumano. *

18. Ntakhara heeni hannaphwanela waathoriha achu?

¹⁸ Woona wi, wa Yesu, Imaca saari soomalela wi ihephiwe, apwanne aaweherya wi achu oothene yaahaala omuchara? Hooye. Soorempwa saalaiherya wi achu avakhaani ti yahaala omuroromela. (Yoh. 12:37, 38) Nave Yesu aakhalano owerya wa ovareryela mirima sa achu. (Mat. 9:4) Naamwi hiiha, owo aaweiwa ni achu yaale yaahaala onwiriyana nave aanalaleerya mwamvai wa achu oothene. Waakhanle wi Yesu, aarino owerya wa ovareryela mirima sa achu, haathoriha achu, hanka hiyaano nihirino owerya yoowo! Ohiiya waathoriha achu a ekulucu ahu naari mwaneene a vaate nvareryeke ophwanelela wa achu. Marc, misiyonaariyo o Burkina Fasso, oriye: “Achu yaale kinawoonaaka wi annaya vahoolo wiiliwiili annahiya ohuserya. Vano yaale kinawoonaaka wi hanaya vahoolo annatitelela ohuserya nave annakhumelela phaama. Mwa yeeyo, kohiiwexexa wi ti waphaama ohiiya munepa waweela wa Yehova wi onihoolele.”

19. Nnaphwanela owoonaka hai achu a ekulucu ahu?

¹⁹ Wuupaceryani, akhweya munamoona wi achu a ekulucu anyu haari ntoko soolya inachuna ohephiwa. Nyenya muupuwele echu Yesu aalonceiye wa oohuserya awe. Imaca soomalela naari wi sohaakhwanela wi ihephiwe. Achu ananwerya otoroka okumi aya ni okhala oomuchara a Kristu. Wa Yehova oohuserya yaawo ari oophwanelela “[ichu] sookhweleya.” (Ageu 2:7) Wakhala wi nyuwaano munnawoona achu a ekulucu anyu hiiha ntoko Yehova ni Yesu, munamuceenyeryeya osuwela mikhalelo saya ni nchuno naaya. Munahaala owoonaka, ohiiya ntoko achu muhaasuwenlaanyu nyenya ntoko anna ni arokora oophwanelela.