1, 2. (1) Ntakhara heeni othokororya sootakiherya sa Nowa, Taniyeli, ni Yupu sinnanilipiha? (2) Mikhalelo taani saarivo vaavaa Esekiyeli aarempeiye masu anaphwanyeya mu Ezekiyeli 14:14?

APWANNE nyuwaano munnahoolela makacamiho nthowa na wiiceliwa, ohikhalano ikhorowa naari wiikariwa? Apwanne mu ilukuluku ikina munnoona okhala woovila okhala oohakalala mu omurumeela wanyu Yehova? Wakhala wi munnoona mmukhalelo yoola, othokororya sootakiherya sa Nowa, Taniyeli, ni Yupu inamoolipihaani. Alopwana yaala yaari oohiphaameya nyenya yaahikhalano makacamiho ntoko yaala nryaahuno olelo. Mu ikwaha ikina, ikumi saya saakhala va yawoopiha. Nyenya yaahititelela okhala oororomeleya wa Yehova, nave owo aahiwoona yaawo ntoko sootakiherya sa ororomeleya ni wiiwelela.​—Mwaalakhanye Ezekiyeli 14:12-14.

² Esekiyeli aahirepa masu a yoorepa ya mwaha ahu o Papulu  mu iyaakha waacamela 612 ahaakumve Kristu. * (Moone masu avathi.) (Ezekiyeli 1:1; 8:1) Hiyaavinrevo elukuluku yawaaca ovinyerya vaavaa Yerusalemu aakurumuliweiye mu eyaakha ya 607. Pahiru achu vakhaani o Yerusalemu yaawo yaari oororomeleya ntoko Nowa, Taniyeli ni Yupu ti yaawo yaavulunwe. (Ezekiyeli 9:1-5) Yeremiya, Parukhi, Epetemeleki, ni a Rekapi yaari akina a yaawo yaavulunwe.

3. Tiheeni nnahaalaahu ohuserya mmwaha yoola?

³ Moolikana ni mahiku ahu, pahiru achu yaawo Yehova onawooneiye okhala awookololowa, achu ntoko Nowa, Taniyeli, ni Yupu, anahaala ovuluwa omakuchuwelo wa elapo yeela yootakhala. (Wupulula 7:9, 14) Mwawiihiiha hankooni nihuserye ntakhara heeni Yehova aapharihenleiye alopwana yaala araru ntoko sootakiherya sa achu yaale yaapanke yeeyo eri yawookololowa vamiithoni vawe. Nnahaala othokororya (1) makacamiho mmoha ti mmoha aareiyeno nave (2) mukhalelo nneeraahu ntakiherye nroromelo ni wiiwelela waya.

4, 5. Taavi yaari makacamiho a Nowa, nave tiheeni yaari yootikhiniha vooloca sa yoowo?

⁴ Taavi yaari makacamiho a Nowa? Mu elukuluku ya ataata a Nowa yiichaniwa Enoki, achu yaari oonanaraxa murima. Awo yaanaloca “masu othene òruwana” vooloca sa Yehova. (Yuda 14, 15) Elapo yaamvira enanaraka ni nlala. Mmahiku a Nowa, ‘elapo ya vathi yàri yònanara.’ Ankeelo ootakhala yaarwa veelaponi, yiiwarihela mwiili woomuchu, nave yaahaathela athiyana. Anaaya yaari oonanara murima ni a nlala. (Maphatxuwelo 6:2-4, 11, 12) Nyenya muchu ti muchu aanoona wi Nowa aari oohiyana. Piipiliya onnaloca wi “Nowe àphwanya mahala a Muluku.” Moohiyana ni achu yaamurukurenrye, owo aapaka yeeyo yaari yawookololowa. “Nowe . . . mmetxeloni mwawe ànamusiveliha Muluku [eeparipari].”​—Maphatxuwelo 6:8, 9.

⁵ Mano, masu ala ananleela eheeni vooloca sa Nowa? Voopacerya, muupuwele vooloca sa elukuluku yincipale yaavinrevo Nowa amurumeelaka Yehova moororomeleya mu elapo yeele yoonanara ehaakumve orwa Maahi Mancipale. Elukuluku eyo hiyaari ya iyaakha makhumi mathanu nameeli naari makhumi mathanu namararu, nyenya iyaakha waacamela masana mathanu nammoha! (Maphatxuwelo 7:11) Yanaawiili, muupuwele wi owo haarino muloko wi omukhaviherye ni omulipiha ntoko hiyaano nryaahuno olelo. Enakhala ntoko wi ahimaawe naari arokora awe hiyamukhaviherya. *​—Moone masu avathi.

6. Nowa oonihenrye hai olipa murima?

⁶ Nowa huupuwenle wi ti yawaakhwanela okhala pahiru muchu aphaama. Moolipa murima owo aahaaleela akina vooloca sa ororomeleya wawe wa Yehova. Piipiliya onamwiichana owo “namalaleya a wokolola.” (2 Pedro 2:5) Murummwa Paulo aahithariha vooloca sa Nowa: “Wa wemererya weiwo Muluku awoniha ekoi atxhu ònanara murima.” (Ahebri 11:7) Moohikhwa minikwa achu yaanamunyoosa nave yaaheererya ommaaliha. Akhweya awo yaahiphiyerya omoopopiha wi emphoreihe. Nave Nowa haawoomve achu. (Masiposipo 29:25) Opwaha yeeyo, aahikhalano nroromelo, mwawiihiiha Yehova aahimvaha olipa murima. Nave olelotho Yehova onnaavaha alapeli awe oororomeleya olipa murima omohamoha.

7. Makacamiho taani Nowa aareiyeno vaavaa aamutekeiye mwaaceya?

 ⁷ Nowa nlelo aanaroromeleya wa Yehova ophiyerya iyaakha opwaha masana mathanu vaavaa Yehova aamulenleiye omuteka mwaaceya mutokotoko. Mwaaceya owo aaya ophariheliwa wi evuluxiwemo achu akina ni asinama orweela wa Maahi Mancipale. (Maphatxuwelo 5:32; 6:14) Omuteka mwaaceya mutokotoko yaari ntoko echu yoovila wa Nowa. Nave owo aahisuwela chiryene wi achu yaahaala omunyemulaka ni weeriha okumi awe okhala wookacamiha. Nyenya Nowa aahikhalano nroromelo nave aahimwiiwelela Yehova. “Nowe àhera sothene.”​—Maphatxuwelo 6:22.

8. Nowa aamuroromenle hai Yehova wi aahaala ovakulela echoko awe?

⁸ Nowa aahikhalano makacamiho makina. Owo aaphwanela omvakulela mwaariye ni anaawe. Ehaakumve maahi mancipale, achu yaanalapa moowetha wi ephwanye soolya. Nowa tho aaneerano yeela. (Maphatxuwelo 5:28, 29) Naamwi hiiha, owo heemerenrye okhala awiiniwa murima nthowa na soothowa sa emusi awe. Omurumeela Yehova ilukuluku soothene, yaari echu yookhweleyaxa mu okumi awe. Naamwi Nowa aari oweiwa omuteka mwaaceya akhweya mu iyaakha makhumi masese naari makhumi mathanu, owo aahiikhalelaru ootikitheryeya mwa Yehova. Nave aaheerano yeeyo mu iyaakha ikina masana mararu ni makhumi mathanu emanle ovira maahi mancipale. (Maphatxuwelo 9:28) Nowa aari yootakiherya yaphaama ya ororomeleya ni wiiwelela!

9, 10. (1) Nni niwerye hai otakiherya nroromelo ni wiiwelela wa Nowa? (2) Wakhala wi moolakelela wiiwelela malamulo a Muluku, munaphwanela ororomela eheeni?

⁹ Nni niwerye hai otakiherya nroromelo ni wiiwelela wa Nowa? Moorweela wa waakiha moonelo wa Yehova wa yeeyo eri yawookololowa, vaavaa nihinapakaahu makupa a elapo ya Satana, navetho vaavaa nnamuhelaahu Yehova mu nipuro noopacerya. (Mateu 6:33; Yohani 15:19) Chiryene, orweela wa mathowa yaala, elapo henasiveliwa ni hiyo. Ntoko yootakiherya, nthowa na okhala oolakelela wiiwelela malamulo a Muluku vooloca sa okonihana ni othelana, akhweya achu anamuloca masu oophuca ntakhara hiyaano mu ikhankoonya. (Mwaalakhanye Malakiya 3:17, 18.) Moolikana ni Nowa, hiyaanotho hannawoova achu. Nnamoova Yehova, eyo tiwi, ninnamucicimiha yoowo mwawiiseela nave hinnachuna omuthananiha. Noosuwela wi ti Yooworu pahi onahaala onivaha okumi woohimala.​—Luka 12:4, 5.

¹⁰ Mwiikohe: ‘Apwanne kinahaala otitelela opaka yeeyo eri yawookololowa vamiithoni va Muluku naamwi akina ekinyemulaka naari ekiphucaka? Apwanne kinnaroromela wi Yehova onahaala ovakulela emusi aka, naamwi okumi okhalaka woovila?’ Wakhala wi munnamuroromela Yehova ni omwiiwelela yoowo ntoko Nowa enreiye, nyuwotho munahaala ororomela wi Yehova onahaala wookhapelelaani.​—Filipi 4:6, 7.

11. Makacamiho taani matokweene Taniyeli ni asinthamwene awe araru yaaryaayano o Papulu? (Moone eruku yoopacerya.)

¹¹ Taavi yaari makacamiho a Taniyeli? Taniyeli aahititelihiwa okhala o Papulu, epooma yookhopela yeeyo yaasaren’ye ni amuluku atheru ni onamulosiwe. Achu a weiwo yaanaakhaliha moonanara Ayuta nave yaanawiica yaawo vamoha ni Muluku aya, Yehova. (Salumu 137:1, 3) Moohikhwa minikwa ela yaanamunanara Taniyeli ni Ayuta akina yaawo yaamusivela Yehova! Navetho, achu ancipale yaanamvarerya Taniyeli ni asinthamwene awe araru Hananiya, Misayeli ni Asariya nthowa nawi awo  yaaya ovyakihiwa wi emulapeleke mwene o Papulu. Yaaweheryiwa wi elyeeke yoolya ya mwene, yeeyo yaaphitaanyerya ichu seiho Yehova aahichuneiye wi achu awe elyeeke. Nyenya Taniyeli “hatxhunne orava mwikho wa nthowa na yolya ni yowurya ya mwene.”​—Daniyeli 1:5-8, 14-17.

12. (1) Taniyeli aari muchu a mukhalelo taani? (2) Yehova aamoona hai Taniyeli?

¹² Taniyeli aahikhalano nikacamiho nikina, nenlo voopacerya nooneya okhala ntoko nookhweya. Owo aari oophwanelelaxa, nave wanthowa na yeeyo, mwene aahimvaha muteko wavameekhaaya. (Daniyeli 1:19, 20) Nlelo, Taniyeli hiirumiha naari wuupuwela wi moonelo awe ilukuluku soothene waari wawookololowa. Owo aahititelela okhala awiiyeviha ni awiichacala. Mahiku oothene aanaloca wi Yehova taari mathipelo a okhumelela wawe phaama. (Daniyeli 2:30) Nkuupuwelelani: Yehova aahimuromola Taniyeli ophitaanyerya Nowa ni Yupu ntoko yootakiherya yaphaama ya ochariha. Mu elukuluku yeele, Nowa ni Yupu yiiha emurumenle Yehova moororomeleya mu okumi aya woothene, nyenya Taniyeli nlelo ari mmiravo. Mweeparipari Yehova aahimuroromela Taniyeli! Nave ti yoophwanelela, nthowa nawi Taniyeli aahititelela okhala ororomeleya wa Muluku mu okumi awe woothene. Vaavaa Taniyeli aareiyeno iyaakha waacamela nsana, munkeelo a Muluku aahiloca masu ala aphaama: “Weyano Daniyeli, Muluku onnokhwela vantxipale.”​—Daniyeli 10:11.

13. Nthowa taani naamweerinhe Yehova omukhaviherya Taniyeli okhaleno murici wa vasulu?

¹³ Nnikhaviheryo na Yehova, Taniyeli aahikhala mulamuleli ookhweleya, voopacerya mu Olamulelo wo Papulu voocharela mu Olamulelo wo Metiya. (Daniyeli 1:21; 6:1, 2) Akhweya Yehova aaheeriha wi Taniyeli akhaleno murici yoola wa vasulu wi awerye waakhaviherya achu awe, hiiha ntoko Yosefe enreiye o Yikuputu nave Estere ni Mortekai yeenraaya o Persiya. * (Moone masu avathi.) (Daniyeli 2:48) Apwanne munnawerya waanyiherya mukhalelo Esekiyeli ni Ayuta akina yonnaaya mukhalelo Yehova aampharihenleiye Taniyeli wi aakhaviherye? Chiryene ela yaahaalipiha yaawo vatokovene!

14, 15. (1) Mukhalelo ahu onalikana hani ni wa Taniyeli? (2) Tiheeni alipa ooyara anaphwanelaaya ohuserya orweela wa alipa oomuyara Taniyeli?

¹⁴ Nni niwerye hai otakiherya nroromelo ni wiiwelela wa Taniyeli? Elapo yeela nnakhalaahumo olelo, yoosareya ni ocapaheya ni malapelo  atheru. Achu aavoloweliwa ni Papulu Mutokotoko, malapelo atheru a elapo yoothene, yaawo Piipiliya oniichaneiye “empa ya satana.” (Wupulula 18:2) Nyenya hiyo nri ntoko anamarwa mu elapo yeela. Ntoko yookhumelela, achu ananwerya woona wi nri oohiyanaxa ni yaawo, nave anahaala oniicaka. (Marko 13:13) Naamwi hiiha, moolikana ni Taniyeli, hankooni nimwaacamele Muluku ahu, Yehova. Vaavaa nnakhalaahu awiiyeviha, omuroromela Yehova, ni omwiiwelela, onahaalatho onoona ntoko achu ookhweleyaxa.​—Ageu 2:7.

¹⁵ Alipa ooyara ananwerya ohuseryavo echu orweela wa alipa oomuyara Taniyeli. Vaavaa Taniyeli aareiye ponkwe o Yuteya, achu ancipale a weiwo yaari ootakhala murima. Naamwi hiiha, owo aahunnuwa amusivelaka Yehova. Apwanne ela yaari moona weereya? Hooye. Asitiithi awe yaanamuhusiha vooloca sa Yehova. (Masiposipo 22:6) Naamwi nsina na Taniyeli nenlo nnataphulela “Muthoriha Aka ti Muluku,” naathoonya alipa oomuyara awe omoova waya Yehova. (Daniyeli 1:6) Mwawiihiiha alipa ooyara nyuwo, mukhale oopisa murima vaavaa munaahusihaanyu aniinyu vooloca sa Yehova. Muhivelavele. (Éfeso 6:4) Nvekeleke ni yaawo. Mwaavekeleleke. Nwethe ntoko munaweryelaanyuvo wi mwaahusihe aniinyu osivela yeeyo Yehova onaloceiye eri yawookololowa, nave Yehova onahaala wooreelihaani vatokovene.​—Salumu 37:5.

16, 17. Makacamiho taani Yupu aareiyeno mu ilukuluku soohiyanahiyana sa okumi awe?

¹⁶ Taavi yaari makacamiho a Yupu? Yupu aahihoolela matorokelo mancipale muukumini mwawe. Wuupaceryani, “Yobi àri mutxhu òrèlasa a ilapo onakhumawo nsuwa.” (Yobi 1:3) Owo aari ooreelaxa, nave aahisuweliwa ni achu ancipale nave yaanamucicimiha vancipale. (Yobi 29:7-16) Naamwi hiiha, Yupu hantonko wuupuwela wi aari ophwanelela wapwaha akina naari wi hanamuchuna Muluku. Ninnasuwela yeela nthowa nawi Yehova aahimwiichana “mulapeli aka” nave aloca sa yoowo: “Owo onnakhòtxa yonanara ntakhara onnamulapa Muluku.”​—Yobi 1:8.

¹⁷ Moohilekela, okumi wa Yupu waahitorokeya moomalela. Owo aahiyeleela ichu soothene aareiyeno, nave aahikhala awuukhuwa ophiyerya aanachuna okhwa. Olelo, noosuwela wi aari Satana aatannyile makacamiho a Yupu. Owo aalonce wi Yupu aamurumeela Yehova pahiru ni mathowa a nrima. (Mwaalakhanye Yobi 1:9, 10.) Yehova aahipwachapwacha wootherya wuuwu. Tiheeni Yehova aahaaleiye opaka wi ooniherye wi Satana nawoothe? Yehova aahimvaha Yupu ekari wi ooniherye ororomeleya wawe wa Muluku nave ooniherye wi aamurumeela yoowo nthowa na omusivela.

18. (1) Tiheeni enootikhinihaani vooloca sa Yupu? (2) Tiheeni nnahuseryaahu orweela wa mukhalelo Yehova aamukhalinheiye Yupu?

¹⁸ Satana aahimuhiphela Yupu moopwaha mphimo nave aahimweeriha wuupuwela wi makacamiho awo yaarweela wa Muluku. (Yobi 1:13-21) Voocharela alopwana araru yiisera okhala asinthamwene a Yupu yaahimulocela Yupu ichu soonanara. Awo yaahiloca wi Yupu aari oonanara murima nave wi Muluku ammulaka. (Yobi 2:11; 22:1, 5-10) Moohipwacha soothene seiha, Yupu aahititelela okhala oororomeleya wa Yehova. Eparipari wi Yupu ilukuluku ikina aanaloca ichu sololo. (Yobi 6:1-3) Nyenya Yehova aahiiwexexa wi Yupu aaloca yeela nthowa nawi aari oosooseya ni awuukhuwa. Yehova aahoona wi Yupu haamuhin’ye, naamwi Satana aari ntoko nakuru oowerya, aamuhiphenle ni omunyoosa Yupu wiiliwiili. Emanle omphacuwela epahu yeela, Yehova aahimvaha Yupu sawaaca opwaha seiye aareiyeno wuupaceryani  ni iyaakha opwaha nsana ni makhumi masese sa okumi awe. (Tiyako 5:11) Mu elukuluku yoothene yeele, Yupu aahititelela omurumeela Muluku ni murima awe woothene. Nnasuwela hai yeela? Nthowa nawi Ezekiyeli 14:14, yoorepa ya mwaha ahu, erempwale mu masana a iyaakha muculi Yupu amanle okhwa.

19, 20. (1) Nni ntakiherye hai nroromelo ni wiiwelela wa Yupu? (2) Nni niwooniherye hai ikharari akina hiiha ntoko Yehova oneereiye?

¹⁹ Nni niwerye hai otakiherya nroromelo ni wiiwelela wa Yupu? Moohipwacha mukhalelo wa makacamiho ahu, nnachuna ororomela wi ilukuluku soothene Yehova ti Muchu ookhweleyaxa mu okumi ahu. Nnachuna omuroromela yoowo moomalela ni omwiiwelela ni murima ahu woothene. Mweeparipari, nookhalano mathowa mancipale a weerano yeela ompwaha Yupu. Nkuupuwelani sa ela yeeyo nsuwenlaahu olelo. Noosuwela sincipale vooloca sa Satana ni meerelo awe. (2 Korinto 2:11) Orweela Mpiipiliyani, xaxaxa mu liivuru a Yupu, ninnasuwela ntakhara heeni Muluku onneemererya masooso. Orweela mu yooloherya ya Taniyeli, noosuwela wi Omwene wa Muluku ti weeparipari onalamuleliwa ni Yesu Kristu. (Daniyeli 7:13, 14) Nave noosuwela wi Omwene owo moohilekela onahaala olamulela elapo yoothene ni omaliha ohooxeya woothene.

²⁰ Yaweereyatho ya Yupu ennanihusiha wooniherya ikharari vaavaa annihu anahooxeyaaya. Moolikana ni Yupu, awo akhweya anamuloca ichu sololo. (Eklesiyaste 7:7) Nyenya hannaphwanela waaphwanyerya mathowa naari waakhupanya wakhala wi aheera echu yooheseya. Ohiya yeeyo, nnaphwanela weererya owiiwexexa. Wakhala wi noheerano yeela, nnahaala okhala ntoko Tiithi ahu, Yehova, yoowo ori oosivela ni aikharari.​—Salumu 103:8.

21. Masu anaphwanyeya mu 1 Pedro 5:10 ananuupuxerya hai yaweereya ya Nowa, Taniyeli ni Yupu?

²¹ Nowa, Taniyeli, ni Yupu yaakhanle mu ilukuluku soohiyana mu miyaha sa achu nave yaarino mikhalelo soohiyanaxa. Naamwi hiiha, awo yaahivilela makacamiho aya oothene. Yaweereya aya ennanuupuxerya yeeyo murummwa Petro aalonceiye: “Mwamalihà ohawa elukuluku vakhani, Muluku a mahala othene . . . onan’welihani, onamotikitheryani ni onamolipihani.”​—1 Pedro 5:10.

22. Tiheeni nnahaalaahu ohuserya mmwaha onacharela?

²² Masu tho anaphwanyeya mu 1 Pedro 5:10 teeparipari wa achu a Muluku olelo. Yehova onnaniroromeliha wi onahaala waatikitherya ni waalipiha alapeli awe. Oothene ahu ninnachuna wi Yehova anilipihe, nave nnachuna otitelela okhala ootikitheryeya ni oororomeleya wa Yoowo. Ti nthowa nene nnachunaahu otakiherya nroromelo ni wiiwelela wa Nowa, Taniyeli, ni Yupu. Mmwaha onacharela, nnahaala ohuserya wi alopwana yaala yaahiwerya wiikhalelaru oororomeleya wa Yehova nthowa nawi awo yaahimusuwela yoowo chiryene. Mweeparipari, awo yaahiwerya ‘osuwela sothene’ owo aachuneiye wi epake. (Masiposipo 28:5) Nave hiyo nnanwerya weerano emohamoha.