ACHU annachuna okhala oohakalala. Nyenya ala mahiku ookuchula, nave muchu ti muchu onnahoolela “ilukuluku sokatxamiha.” (2 Timóteo 3:1) Achu akina aayeleela ohakalala waya nthowa nawi annakhalihiwa moonanara, wiiceliwa, oyeleela muteko aya, naari okhwa wa muchu yoowo yaamusivelaaya. Akina annayeleela ohakalala waya nthowa nawi yookhala echu yeeren’ye yeeyo enaweeriha okhala awoova naari ooximwa. Ophiyeryatho alapeli a Yehova annakhala ookhulumuwa nave vakhaani, vakhaani annayeleela ohakalala waya. Wakhala wi ela yoheereya ni nyuwaano, muni nwerye hai okhala oohakalala?

Wi naakhule nikoho nenla, voopacerya nnachuna wiiwexexa yootaphulela ya ohakalala nave ti mwawiihai akina yaakhapelenlaaya ohakalala waya naamwi yaarino makacamiho. Voocharela, nnahaala woona mukhalelo wa okhapelela ni waaceererya ohakalala iwo.

Okhala oohakalala tahi emohamoha ni okhala a weeliwa murima. Nkuupuwelani ela: Muchu oohapaliwa onanwerya otheya vancipale. Nyenya vaavaa owo onathoteiye, owo hanatheya nave nlelo munnasuwela wi okhalano makacamiho manceene. Weeliwa wawe murima waari wa elukuluku vakhaani pahiru nave hiwaari ohakalala weeparipari.​—Masiposipo 14:13.

Mmakupa makina, ohakalala mukhalelo woolipa nnoonaahu mmurimani mwahu vaavaa nnakhalaahuno naari nnawehereryaahu echu yaphaama. Okhalano ohakalala onataphulela okhala oohakalala moohipwacha mikhalelo sahu saari saphaama naari soonanara. (1 Tesalónika 1:6) Mweeparipari, nnanwerya okhala awuukhuleya ni echu vyakala nyenya nlelo ntitelele okhala ohakalala. Ntoko yootakiherya, arummwa yaahimaniwa nthowa na olaleerya vooloca sa Yesu. Nyenya, awo “yàkhumamo mu Sinédriyo ehakalanle, ntakhara yàphwanelihiwa ti Muluku ohawela nsina na Yesu.” (Saweriwa T’arummwa 5:41) Tahi wi awo yaahakalanle nthowa na omaniwa nyenya nthowa nawi awo yaahiwerya otitelela okhala oororomeleya wa Muluku.

Ohakalala tahi echu nnayariwahuno naari echu enamoona orwa meekhaaya. Ntakhara heni? Nthowa nawi ohakalala weeparipari makupa a sawiima sa munepa waweela wa Muluku. Munepa wa Muluku onnanikhaviherya omunnuwiha “mutxhu musyani” yoowo onaphitaanyerya ohakalala. (Éfeso 4:24; Galasya 5:22) Nave vaavaa nnakhalaahuno ohakalala, onahaala okhala wookhweya ovilela ni makacamiho ahu.

Yehova aachuna wi seereyeke ichu saphaama veelaponi, oohiya ichu soonanara nnoonaahu olelo. Nyenya naamwi achu epakaka ichu soonanara, Yehova hayelenle ohakalala wawe. Piipiliya oni: “Owerya ni ohakalala sosareya mpa mwaya.” (1 Matharihelo 16:27) Mwawaaceererya, ichu saphaama akapuro a Yehova anapakaaya sinnamuhakalaliha.​—Masiposipo 27:11.

Ninnamutakiherya Yehova vaavaa nihinayeleelaahu ohakalala wahu wakhala wi ichu hasineereya ntoko naawehereryaahu. Opwaha okhala awoova,  nnaphwanela othokororya ichu saphaama nryaahuno hiihaano ni oweherya moopisa murima ichu saphaama soomwaahiyu. *​—Moone masu a vathi.

Mpiipiliyani sookhalamo sootakiherya sincipale sa achu yaawo yaatitelenle okhala oohakalala naamwi yaarino makacamiho mancipale. Aparahamu aahititelela okhala oohakalala naamwi okumi awe waari va yawoopiha ni vaavaa achu akina yaamukumiheryaaya makacamiho. (Maphatxuwelo 12:10-20; 14:8-16; 16:4, 5; 20:1-18; 21:8, 9) Owo aawenrye hai yeela? Moorweela wa wuupuwelela ewehereryo awe ya okhala mu elapo evyaani elamuleliwaka ni omwene wa Mesiya. (Maphatxuwelo 22:15-18; Ahebri 11:10) Yesu aahiloca: “Abrahamu, tithinyu, òhakalala wa nthowa na wona nihiku naka.” (Yohani 8:56) Ninnamutakiherya Aparahamu vaavaa nnatitelelaahu wuupuwelela vooloca sa ohakalala nnahaalaahu okhalano omwaahiyu.—Aroma 8:21.

Paulo ni Sila yaahikhalanotho nroromelo noolipa nave yaahititelela okhala oohakalala moohipwacha makacamiho mancipale yaahoolenlaaya. Ntoko yootakiherya, emanle owasuliwa ni ovonyeriwa mukalaposo, awo “yànavekela ni yànipa matxipo a Muluku.” (Saweriwa T’arummwa 16:23-25) Awo yaanwerya ovilela makacamiho aya nthowa nawi yaahititelela wuupuwelela sa soororomeliha sa Muluku ntakhara omwaahiyu. Nave osuwela wi yaahooxeya nthowa na okhala oomuchara a Kristu yaahaavaha ohakalala. Ninnamutakiherya Paulo ni Sila vaavaa nnuupuwelelaahu sookhumelela saphaama inarweela mu omurumeela Muluku moororomeleya.​—Filipi 1:12-14.

Olelotho, sookhalavo sootakiherya sincipale sa anna ni arokora yaawo anakhapelela oohakalala waya moohipwacha makacamiho anahoolelaaya. Ntoko yootakiherya, mu Novempuru a 2013 Mwaacikinye Mutokweene oniichaniwa Haiyan aahimwarya ipa opwaha ncikhwi sa Anamoona a Yehova o Filipina. Xorxe, yoowo empa awe o epooma ya Tacloban yaamaryiwe moomalela, aahiloca: “Moohipwacha yeeyo yeeren’ye, anna ari oohakalala. Ti yoovila wa miyo oloca ohakalala nryaahuno.” Wakhala wi ninnuupuwela vooloca sa yeeyo Yehova onapakeiye wa hiyo nave ntitelela omuthamalela, nnahaala okhapelela ohakalala wahu naamwi nihoolelaka makacamiho matokweene. Ichu taani ikina Yehova onavahereryeiye seiyo inanivaha mathowa a ohakalala?

Nthowa nahu ntokotoko na ohakalala ti onthamwene ahu ni Yehova. Noomusuwela Mwene a elapo yoothene. Owo Tiithiihu, Muluku, ni Nthamwene ahu!​—Salumu 71:17, 18.

Ninnathamalelatho vancipale wi Yehova oonivaha ekumi ni meerelo a opuha. (Eklesiyaste 3:12, 13) Woona wi owo onnanaacameliha wa yene, nnanwerya wiiwexexa yookhwela awe wa hiyo nave noosuwela mukhalelo wa okhala. (Kolosi 1:9, 10) Nyenya, achu ancipale haniiwexexa yoolakelela ya okumi. Aceenyeryaka ohiyana wuuwu, Paulo aahirepa: “Mitho ahonnaya, maru ahiwalaya, ni murima wa atxhu wahasuwenlaya, yeyo Muluku areheryenle yale anamukhwela yowo Muluku ànsuweliha yela ni Munepa. Txhiri, Munepa onnasuwela sothene ophiyerya mpuwa mwenesa mwa Muluku.” (1 Korinto 2:9, 10) Wiiwexexa yookhwela ya Yehova ni yoolakelela awe ennanivaha ohakalala.

Yehova onnapaka sincipale ntakhara hiyo. Owo oheeriha okhala wooweryeya wi soocheka sahu ileveleliwe. (1 Yohani 2:12) Owo oonivaha ewehereryo ya okumi mu elapo evyaani, yeeyo enahaala ophiya moohilekela. (Aroma 12:12) Naamwi hiihaano, Yehova oonivaha asinthamwene ancipale yaawo nnamulapaahuno vamoha. (Salumu 133:1) Owotho onnanaakiha wa Satana ni masololo. (Salumu 91:11) Wakhala wi nootitelela wuupuwelela ichu seiha saphaama Yehova onanivaheiye, nnahaala okhalano ohakalala wawaaca.​—Filipi 4:4.

Apwanne Mukristu yoowo orinono ohakalala onnachuneyatho waaceererya? Yesu aahiloca:  “Kòlenleni itxhu seiha wi ohakalala waka okhale mwa nyuwano, nave ohakalala wanyu okhale wawakhwanela.” (Yohani 15:11) Ela enooniherya wi nnanwerya mahiku oothene waacereryeya ohakalala. Nnanwerya olikanyiha ohakalala wahu ni mooro. Wakhala wi nnachuna wi mooro ovareleke, nnaphwanela waaceereryavo mawuuni awaaca. Muhicuwale: Munepa waweela onnanikhaviherya okhalano ohakalala. Mwawiihiiha wakhala wi ninnachuna ohakalala wawaaca, nnaphwanela oveka munepa wa Muluku orweela mu nivekelo. Nnaphwanelatho otitelela wuupuwelelaka sa Mpiipiliyani, yoowo oveereliwe ni munepa waweela.​—Salumu 1:1, 2; Luka 11:13.

Echu ekina enahaala onivaha ohakalala wawaaca ori okhala ooweiwa ni ichu seiho sinamuhakalaliha Yehova. (Salumu 35:27; 112:1) Ntakhara heeni? Piipiliya onaloca wi naapatuxiwe wi ‘nimwemereryeke [naari omoova] Muluku ni otxhariha malamulo awe, ntakhara wa mutxhu-ti-mutxhu etokwenesa ti yela.’ (Eklesiyaste 12:13) Nthowa nawi nipakiwe wi neerekeno yookhwela ya Muluku. Mwawiihiiha vaavaa nnamulapelaahu Yehova, chiri nnahaala opuha okumi ahu. *​—Moone masu avathi.

Vaavaa nnaaceereryaahu ohakalala wahu, nnahaala waakhela miphurelo mikina mincipale. Ntoko yootakiherya, Yehova onahaala okhala oohakalalaxa ni hiyo vaavaa nnatitelelaahu omurumeela moohakalala moohipwacha makacamiho nnakhalaahuno. (Malamulo 16:15; 1 Tesalónika 5:16-18) Navetho, nthowa na okhalano ohakalala weeparipari, hinni nuupuwele wi okhalano ichu soomwiilini echu yookhweleyaxa mookumini. Opwaha yeeyo, nnahaala weererya wiilipiserya ntakhara Omwene wa Muluku. (Mateu 13:44) Nave vaavaa nnoonaahu sookhumelela saphaama sinarweela mu opaka sincipale ntakhara Yehova, nnahaala okhalano ohakalala wawaaca, nnahaala okhala phaama, nave nnahaala oweeriha akina okhala oohakalala.​—Saweriwa T’arummwa 20:35; Filipi 1:3-5.

Navetho, nakhalano ohakalala wawaaca, nnahaala okhalano ekumi yaphaama. Piipiliya oriye: “Ohakalala, onnarèriha ekumi.” (Masiposipo 17:22) Mulipa ootholathola onahuserya ekumi o exikola yavasulu yo Nepraska o Estatu Unitu ooloca masu yaawo aniiwanana ni Piipiliya. Owo oriye: “Wakhala wi muri oohakalala ni aweeliwa murima ni okumi anyu hiihaano, akhweya munahaala okhalano ekumi yaphaama omwaahiyu.”

Mwawiihiiha naamwi nikhalaka mu ilukuluku sookacamiha, nnanwerya okhalano ohakalala vaavaa nnaakhelaahu munepa waweela moorweela wa ovekela, ohuserya, ni wuupuwelela Masu a Muluku. Nnahaalatho okhalano ohakalala wawaaca wakhala wi ninnuupuwela vooloca sa ichu saphaama Yehova onanivaheiye hiihaano, wakhala wi ninnatakiherya nroromelo na akina, nave wakhala wi ninneererya opaka yookhwela ya Muluku. Voocharela nnahaala olawiha yeeyo etharihiwe mu Salumu 64:10, oriye: “Awokololowa annahakalala mw‘Apwiya, nave annatxhawela mwa yawo.”