1. Makacamiho taani Akristu yaaryaayano mu nsana noopacerya?

ELUKULUKU ekina variyari va iyaakha 62 ni 64 murummwa Petro aahirepa wa ‘òthanliwa yamwalamwalenle o Ponto, o Galásya, o Kapadósya, w’Asya ni o Bitínia.’ (1 Pedro 1:1) Anna ni arokora yaawo yaarwenle mmapuro oohiyanahiyana. Awo yaanahoolela “sohosa” naari wiikariwa, nave yaanachuna olipihiwa ni ohooleliwa. Awotho yaahikhala mu ilukuluku sawoopihaxa. Petro aarepa: “Ori vakhiviru omala wa itxhu sothene.” Sihaakumve waakhwana iyaakha khumi Yerusalemu aahaala otoloxiwa. Tiheeni yaahaala waakhaviherya Akristu mmapuro oothene ovilela mu ilukuluku seiyo sookacamiha?—1 Pedro 4:4, 7, 12.

2, 3. Ntakhara heeni Petro aaceenyenreiye annawe waahayiha aleco? (Moone eruku yoopacerya.)

² Echu emoha Petro aavenkeiye annawe opaka waari ‘ohayihana mukina ni mukhwawe.’ (1 Pedro 4:9, NN) Mu Ekriki nsu nawi “ohayihana” nnataphulela “waasivela, naari wooniherya mahala wa anamarwa.” Nyenya Petro aahaaceenyerya anna ni  arokorawe wi ehayihaneke “mukina ni mukhwawe,” naamwi yaasuwelanne ni opaka ichu vamoha. Mano waahayiha aleco waakhavihenrye hai?

³ Eyo yaahaala owaacameliha ni yaawo. Hanka nyuwaano? Apwanne munnuupuwela elukuluku yoohakalaliha vaavaa mwaawompwaanyu ni muchu mukina wi muye owannyawe? Nave vaavaa mwanwompaanyu muchu wi aphiye owannyu, mwaahisuwelana phaama. Mukhalelo waphaama wa waasuwela anna ni arokorahu ori waahayiha. Akristu yaakhala mu elukuluku ya Petro waanachuneya okhala vamoha vaavaa makacamiho yaatempaaya. Mmahiku yaala “òmaliherya” nnaphwanela opaka emohamoha.—2 Timóteo 3:1.

4. Makoho taani nnahaalaahu othokororya mmwaha yoola?

⁴ Mmikhalelo taani nneeraahu nihayihaneke “mukina ni mukhwawe”? Echu taani eni enihiihe waahayiha aleco, nave nni nirehererye hai? Tiheeni enahaala onikhaviherya okhala aleco aphaama?

5. Nni niwaakhele hai aleco mmithukumano sahu Seekristu?

⁵ Mmithukumano: Yehova ni marehereryo awe annaniwopa wi nithukumaneke. Nnachuna wi oothene yaale anaphiya mmithukumano sahu yooneke okhala awaakheliwa, xaxaxa avyaani. (Aroma 15:7) Awotho aleco a Yehova, mwawiihiiha nnachuna oweeriha ohikhala awuukhuwa, moohipwacha makhalelo naari mawarelo aya. (Tiyako 2:1-4) Waakhala wi moomoona muleco ori mukhateiye, apwanne mwanwerya onwopa wi mukiraathi vamoha ni yoowo? Akhweya owo onahaala othamalela wakhala wi moomukhaviherya wiiwexexa echu enahaala weereya variyari va muthukumano naari ophwanya soorepa seiyo sinaalakhanyiwa. Ola onahaala okhala mukhalelo wa “owakhela phama aletxo.”—Aroma 12:13.

6. Achu taani nnaphwanelaahuxa waahayiha?

⁶ Wi nalye vamoha: Achu akhalai ikwaha ikina yaanaahayiha aleco moorweela wa waawopa akina wi yalye owannyaya, yooniheryaka wi awo yaanachuna okhala asinthamwene ni okhalano murecele. (Maphatxuwelo 18:1-8; Amuthoriha 13:15; Luka 24:28-30) Achu taani nnaphwanelaahuxa waahayiha? Ananwerya okhala anna ni arokorahu a mmulokoni mwahu. Vaavaa elapo ela enatepaaya onanara, nnahaala ochuna nikhaviheryo na anna ni arokorahu ni okhala asinthamwenaaya oororomeleya. Mu 2011, Nikhuuru Noolamulela naahitoroka elukuluku ya Yoohuserya ya Mulipeleli ya emusi yo Peteli o Estatu Unitu yaapacerya 18:45 wi ekhaleke ewora ya 18:15. Ntakhara heeni? Yoolokoha yaahiloca wi akhweya waahaala okhala waweemereryeya ni wookhweya wa Mapetelita ohayihana mukina ni mukhwaawe, waakhala wi muthukumano woomala elukuluku yaphaama. Ifiliyale ikina saahipaka matorokelo mamohamoha. Eyo enakhala ekari etokweene wa emusi yo Peteli osuwelana mukina ni mukhwaawe.

7, 8. Nni naahayihe hai anna yaawo anaxekurya muloko ahu?

⁷ Ilukuluku ikina anna anarweela mmiloko mikina, ooweherya a ekulucu, naari anna anarweela o Peteli wi eperekhe mwaha mmuloko ahu. Apwanne naanwerya opharihela ilukuluku seiyo wi niwaakhele anna yaawo? (Mwaalakhanye 3 Yohani 5-8.) Mukhalelo mmoha nnahaalaahu weera ori waawopa ophiya owannyahu wi nalye vamoha ni yaawo.

 ⁸ Murokora o Estatu Unitu onnuupuwela: “Moovira wa iyaakha, aiyaka ni miyaano naahikhalano ekari ya ovahererya nipuro na aleco owannyahu ntakhara atheli oohiyana hiyana.” Owo aahoona wi saweereya soothene saahilipiha nroromelo naya nave mu elukuluku emohamoha yaari yoohakalaliha. Owo onnaloca: “Hintonko okhalano ekeerelani.”

9, 10. (1) Taani akhweya onahaala ochuna okhala ni hiyo mu elukuluku yawaaca? (2) Apwanne yaale arino ipa ikhaani ananwerya okhaviherya? Mvahe yootakiherya.

⁹ Aleco anaya omaliha elukuluku yawaaca: Mu ilukuluku sakhalai, yaari yookhovelela waahayiha aleco. (Yobi 31:32; Filémone 22) Olelo, nnaphwanela weerano emohamoha. Ooweherya a ikulucu ikwaha ikina annachuna nipuro na ohayavo vaavaa anaxekuryaaya miloko. Eyotho enamweereya ni anamahuserya a ixikola soomuluku ni anna ooteka awiiveleela. Hanka vooloca sa yaale anayeleela ipa saya ekhumelenle epahu ya maphacuwelo? Awo akhweya anahaala ochuna nipuro na ohayavo ophiyerya ereherenrye empa aya. Hannaphwanela wuupuwela wi pahiru yaale arino ipa itokweene tanaphwanela okhaviherya. Awo akhweya aheerano emohamoha mu ilukuluku sincipale. Apwanne mwanwerya omuhayiha muchu, naamwi empaanyu eri ekhaani?

¹⁰ Munna o Koreya Oohico onnuupuwela vaavaa anamahuserya yaapaka makupa mu ixikola soomuluku yaaryaaya ni yoowo. Owo oorepa: “Wuupaceryani kaanoovelela woona wi kaari mutheli muvyaani nave naakhala mu empa ekhaani. Nyenya waahayiha anamahuserya yaari chiryene yaweereya yoohakalaliha. Ntoko mutheli muvyaani naahiwerya woona ohakalala mutheli onakhaleiyeno vaavaa anamurumeelaya Yehova ni waavya soolakelela soomunepani vamoha.”

11. Ntakhara heeni yaale ari avyaani mmuloko anyu annachuna ohayihiwa?

¹¹ Anna ni arokora avyaani mmulokoni: Anna ni arokora akina naari imusi akhweya anamurwa nipuro nanyu ekhumaka miloko mikina. Awo akhweya arweenle nthowa nawi muloko anyu onnachuna nikhaviheryo. Naari akhweya mapiyoneero athanleliwe wi eye muloko anyu. Anakhala matorokelo matokweene wa yaawo. Awo anahaala wiikhoveleliha mu nipuro nivyaani, muloko muvyaani, nave akhweya elocelo naari yookhovelela evyaani. Apwanne mwanwerya waawopa wi mwaavahe yoolya naari oya nipuro vyakala? Eyo enahaala waakhaviherya waapaka asinthamwene avyaani ni otoroka mikhalelo saya.

12. Yaweereya taani enooniherya wi tahi woochuneya orehererya ichu sincipale wi mwaahayihe aleco?

¹² Tahi woochuneya orehererya ichu sincipale wi mwaahayihe aleco. (Mwaalakhanye Luka 10:41, 42.) Munna mmoha onnuupuwela echu yeeyo yeeren’ye vaavaa owo ni mwaariye ekwaha emoha yaakhanlaaya mamisiyonaariyo. Owo ooloca: “Naari amiravo, hinaarino mavyakelo nave naari oothanana. Ohiyu omoha mwaaraka aari oothananaxa, nave wiilipiserya waka omukhaviherya hiwaaphara muteko. Voocharela, ewora ya 19:30, naahiwa omaniwa wa mukhora. Aari  namahuserya a Piipiliya amwaamuthiyana yoowo aaruuha mararase mararu wi anivahe. Owo aarweenle wi anaakhele ntoko mamisiyonaariyo mavyaani. Naahinwopa wi avolowe mpa nave naahimvaha maahi. Voocharela naahimpaka chaaya ni iphaawu. Hinaasuwenle oloca Esuwayili, nave owo haasuwenle oloca Enklesi.” Munna ooloca wi yaweereya yeeyo yaahaakhaviherya opacerya waapaka asinthamwene ni anna a vanipuroni ni okhala oohakalala.

13. Waahayiha aleco onookhaviheryaani hai?

¹³ Apwanne mohintoko woovelela waahayiha aleco? Yaari hiiha, mwaahiyeleela ekari ya opuha elukuluku yoohakalaliha ni waapaka asinthamwene munahaalaanyu okhalano okhala wookhala. Owaakhela aleco mukhalelo mmoha wa ohoona okhala omeekha. Vano ntakhara heeni muchu aahaaleiye woovelela waahayiha aleco? Aakhalavo mathowa vakhaani.

14. Tiheeni nnaphwanelaahu weera wakhala wi hinaano elukuluku yoophwanelela ni ikuru wi nooniherye owaakhela aleco?

¹⁴ Elukuluku ni ikuru: Achu a Yehova ari ooweiwaxa nave aakhalano mirici mincipale. Akina anuupuwela wi haano elukuluku yawaakhwanela naari ikuru wi yaahayihe aleco. Yaakhanle wi munuupuwela mmukhalelo yoowo, onamuchuneya otoroka marehereryo anyu wi nwerye wooniherya owaakhela aleco. Eyo ti yookhweleya ntakhara wi Piipiliya onnanceenyerya owaakhela aleco. (Ahebri 13:2) Chiryene owaakhela aleco echu yaphaama ya weera. Nyenya wi mooniherye waahayiha aleco, munaphwanela omaliha elukuluku vakhaani mpakaka ichu seiho ihiri soochuneyaxa.

15. Ntakhara heeni akina annuupuwela wi hewerya owaakhela aleco?

¹⁵ Munoona hai sa nyuwo mukhatiinyu: Apwanne mohintoko ochuna waahayiha aleco nyenya munoona wi hamuri oophwanela weerano? Akhweya munnuuliwa muru ni woova wi aleco anyu anahaala osokonyeryeya. Akhweya himwaano ikhorowa sawaakhwanela nave munnoova wi himuwerya waavaha aleco anyu echu anna ni arokora akina anaweryaaya waavaha. Nyenya muupuwele wi tahi woochuneyaxa empa okhala yooreeraxa. Aleco anyu anahaala ohakalala wakhala wi empaanyu ti yooreheryeya ni yoophwaneliwa nave wakhala wi nyuwaano munnooniherya onthamwene.

16, 17. Tiheeni munaphwanelaanyu opaka wakhala wi munnakhala awuukhuwa vooloca sa waahayiha aleco?

¹⁶ Yaakhala wi munnuukhuwa vooloca sa okhalano aleco, hamuri mukhatiinyu. Mutokweene mmoha o Krapretanya onnaloca: “Enamukhala yawuukhula orehererya ichu ntakhara aleco. Nyenya echu vyakala eniiwanana ni omurumeela Yehova, miphurelo ni ohakalala onakhumelela onnavirelela wuukhuwa woothene. Kaahihakalala okiraathi vamoha ni aleco ninwuryaka chaaya nave nchekulaka.” Ilukuluku soothene ti yaphaama wooniherya waapwacha aleco anyu. (Filipi 2:4) Achu ancipale annasiveliwa oloca saweereya sa muukumini mwaya. Akhweya nnahaala wiiwa saweereya saya pahiru wakhala wi nri vamoha ni yaawo. Mutokweene mukina oorepa: “Okhalano asinthamwene a mmulokoni owannyaka yaakikhaviherya owiiwexexa phaama nave yaakivaha elukuluku wi kaasuwele, xaxaxa mukhalelo ahusenryaaya eparipari.” Waakhala wi munnooniherya waapwacha aleco anyu, nyuwaano vamoha ni yaawo munahaala ohakalala.

 ¹⁷ Murokora ori piyoneera ikwaha ikina aawaakhela anamahuserya yaarweela mu ixikola soohiyanahiyana soomuluku onnaloca: “Wuupaceryani kaari awoovelela nthowa nawi empaaka yaari ekhaanixa nave kaarino ichu soophariheliwa seiyo sahaari sa esisapo. Mwaara a muhusiha mmoha aahikeeriha ohikhala awuukhuwaxa. Owo aahiloca wi vaavaa yene ni iyawe anarumeelaaya mmuteko wa weeceeca, isumana saya saphaama ti seiye anamalihaaya ekhalaka ni muchu onamusivela Yehova yoowo akhweya ohirino ichu sincipale soomwiilini nyenya orino soolakelela imohamoha ni yaawo—omurumeela Yehova ni otitelela okhweiha okumi. Eyo ennakuupuserya yeeyo amamaka yaalocaaya nri anamwane: ‘Ti yaphama olya ntikwa orivo okhwelana.’” (Masiposipo 15:17) Hannaphwanela okhala awoova, ntakhara wi echu eri yookhweleya ori waasivela aleco ahu.

18, 19. Waahayiha aleco oni onikhaviherye hai ovootha miyoonelo soonanara vooloca sa akina?

¹⁸ Munawoona hai akina: Apwanne ookhala muchu a mmulokoni mwanyu oophunceeni? Wakhala wi hamweerenrye ovootha miyoonelo seiyo soonanara, iho hasitorokeya meekhaaya. Hamuni muchune onwopa muchu wi aphiye owannyu wakhala wi hamunasiveliwano omuchu awe. Naari akhweya ookhala muchu oophunceeni khalai, nave enakhala yoovila wa nyuwo ocuwala.

¹⁹ Piipiliya onaloca wi munanwerya orehererya onthamwene anyu ni akina, ophiyeryatho ni amwiicani anyu, wakhala wi munnaahayiha aleco. (Mwaalakhanye Masiposipo 25:21, 22.) Wakhala wi moonwopa muchu wi aphiye owannyu, munanwerya  ovootha miyoonelo soonanara ni wunnuwiha onthamwene ni opaka murecele ni yoowo. Munahaala opacerya woona mikhalelo saphaama seiyo Yehova oonneiye vaavaa Owo aamuthanlileiye ovolowa mu eparipari. (Yohani 6:44) Vaavaa osivela onooceenyeryayani onwopa muchu yoowo mwahiweheryaanyu, eyo enahaala okhala mapacereryo a onthamwene waphaama. Muni musuwele hai wi chiryene osivela tonooceenyeryani? Mukhalelo mmoha ori opharihela ekano enaphwanyeya mu Filipi 2:3, yeeyo enaloca: “Ni wiyeviha ni n’wonaka akhwinyu ntoko atokwene anopwahani nyuwo.” Nnaphwanela wuupuwela mikhalelo sinooniherya wi anna ni arokorahu annanipwaha. Akhweya munanwerya ohuserya orweela wa nroromelo naya, ovilela, naari mikhalelo mikina Seekristu. Osivela onamuneeriha wuupuwela mikhalelo saya saphaama nave onamukhala wookhweya waahayiha aleco.

20. Ntakhara heeni nave mmukhalelo taani nnaphwanelaahu okhala oororomeleya vaavaa nneemereryaahu nwopelo?

²⁰ Tavite aahikoha: “Tani, Pwiya, onaphwanela okhala mmusakalani mwanyu?” (Salumu 15:1) Voocharela, Tavite aahiloca mikhalelo seiyo Yehova onachuneiye wa aleco awe. Mmoha wa seiyo ori okhala oororomeleya. Owo aarepa: “Ole oni alipela ahinakòkela otxuli,” naamwi eri yoonanara wa yoowo. (Salumu 15:4) Wakhala wi noheemererya nwopelo, hannaphwanela wiiphelela yaahikhalavo mathowa oophwanelela. Akhweya muchu oniwompe ohiirehererya ntakhara oxekurya wahu, nave wakhala wi nohiiphelela, wiilipiserya wawe woothene hokhalano mphurelo. (Mateu 5:37) Achu akina anniiphelela nwopelo wi yeemererye yoole anoonaaya okhala waphaama. Apwanne iwo osivela ni ncicimiho? Nnaphwanela othamalela wa soothene nnavahiwaahu ni muchu oniwompe. (Luka 10:7) Wakhala wi nnachuna wiiphelela, waahaala okhala woosivela nave yamiruku omuleela mwawaakuveya muchu oniwompe.

21. Ocicimiha sookhovelela sa vanipuroni enanikhaviherya hai okhala muleco aphaama?

²¹ Ti wookhweleyatho ocicimiha sookhovelela sa vanipuroni. Mu sookhovelela ikina, muleco oohiwehereryeya onnaakheliwa phaama. Mmapuro makina, ti yaphaama opaka marehereryo nihaakumve oxekurya. Mu ilapo ikina, mulipa oowopa onnaavaha aleco awe yoolya yaphaama oreiyeno, nave amusi awe onaavaha yoolya vyakala. Sookhalavo ilapo sinaakhaliha achu oothene moolikanela. Mu ikulucu ikina, aleco annaruuha echu wi ekhaviherye. Wa achu akina, alipa oowopa anachuna wi aleco aya ehiruuheke echu. Mu sookhovelela ikina, achu annakhooca nwopelo woopacerya naari wanaawiili. Nyenya wa akina ti yoonanara okhooca nwopelo woopacerya. Wiiliwiili nnaphwanela wiilipiserya wi muchu oniwompe akhale oohakalala.

22. Ntakhara heeni oryaaya wookhweleya ‘ohayihana mukina ni mukhwawe’?

²² Petro aaloca: “Ori vakhiviru omala wa itxhu sothene.” (1 Pedro 4:7) Olelo, ninnahoolela ekoi etokweene yeeyo elapo ehinahaalaaya ohoolela. Vaavaa elapo ela enatepaaya onanara, nnahaala ochuna okhalano osivela weeparipari ntakhara anna ni arokorahu. Ekano ya Petro ennaphariheleya hiihaano opwaha khalai: “Muhayihaneke mukina ni mukhwawe.” (1 Pedro 4:9, NN) Chiryene, owaakhela aleco ti woohakalaliha nave ti wookhweleya hiihaano, nave okhala wookhala.