Wakhala wi munnachuna omusuwela muchu, woopaceryani munamukoha muriki, “Nsina nanyu taani?” Waakhanle wi moompakela Muluku nikoho nenla, owo aahaala waakhula hai?

“Miyaano ka Yehova. Nla ti nsina naka.”—Isaiya 42:8, Tradução do Novo Mundo.

Nsina nla ti noochuneya wa yoowo mwaneene. Haavo omuchunwe, owo othanlile mukhateiye. Yehova aaloca: “Nla nsina naka noohimala, hiiha nkanuupuweleliwa okhala wookhala.” (Mukwaha 3:15) Mpiipiliyani, nsina na Muluku ninnaphwanyeya ikwaha sincipale opwaha wiichana wa ncicimiho, ntoko Aikuru Soothene, Tiithi, Apwiya, naari Muluku, naari tho opwaha masina a achu ntoko, Aparahamu, Mose, Tavite, naari Yesu. Navetho, yoochuna ya Yehova ori wi nsina nawe nsuweliwe. Piipiliya onnaloca: “Wi esuwele wi Nyenyuru, nsina nanyu mwa Yehova, Mwa Awirimurimu velaponi yothene ya vathi.”—Salumu 83:18, Nlakano Nahihano.

Nsina nla ti noochuneya wa Yesu. Mu Nivekelo na Apwiya naari Atiithi Muri wirimu, Yesu aahaahusiha oomuchara awe ovekela wa Muluku ni masu ala: “Nsina nanyu neelihiwe.” (Mateu 6:9) Yesu aavekela wa Muluku ni masu ala: “Atiithi, cicimihani nsina nanyu.” (Yohani 12:28) Wa Yesu, weeliha nsina na Muluku yaari echu yoopacerya mu okumi awe, nave wa nthowa na yeela owo aaloca mu nivekelo: “Miyo kihaasuweliha nsina nanyu, nave nlelo kinnaasuweliha yaawo.”—Yohani 17:26.

Nsina nla ti noochuneya wa yaale amusuwenle Muluku. Achu a Muluku mmahiku a khalai, yaanasuwela wi okhapeleleya ni ovuluxiwa waya waarweela wa nsina navameekhaaya na Muluku. Piipiliya oni: “Muconco woolipihiwa, nsina na Apwiya [Yehova], awookololowa murima onnachawelamo, ahinoovaru.” (Masiposipo 18:10) “Nave yoole oni iichane nsina na Yehova onahaala ovuluxiwa.” (Yoweli 2:32, TNM.) Piipiliya onnooniherya wi nsina na Muluku naahaala waahiyaniha yaale anamurumeela ni  yaale ahinamurumeela. “Nnaamwi achu oothene a maloko makina mmoha ni mmoha onammuchara muluku awe, nto hiyo nnarwa neeca mu nsina na [Yehova] Apwiya Muluku ahu mahiku oothene.”—Mikeya 4:5; Saweriwa T’arummwa 15:14.

Nsina nla ninnooniherya omuchu wa Muluku. Alipa ootholathola ancipale a Piipiliya analoca wi nsina Yehova nnataphulela wi “Owo Onneeriha Okhala.” Yehova Muluku aahuupulula yootaphulela ya nsina nawe vaavaa aalonceiye ni Mose ariki: “Miyo ka Yoowo Kiri.” (Mukwaha 3:14) Mwawiihiiha, nsina na Muluku ninnataphulela ichu sincipale ohiya pahiru okhala Mpatuxa a ichu soothene. Nsina nawe ninnooniherya owerya wawe wa wiipaka mukhateiye naari soopatuxiwa sawe wi sikhale echu yeeyo enachuneya wi yoochuna awe yaakhwanele. Wiichana wa ncicimiho onooniherya owerya wa Muluku, ikuru, nyenya nsina nawe Yehova, nnooniherya ichu soothene owo onaweryeiye okhala.

Nsina nla ninnooniherya onipwacha wawe. Nsina na Muluku ninnooniherya tho osivela naari niphwanya Muluku oreiyeno wa soopatuxiwa sawe, ophitaanyerya hiyaano. Navetho nthowa na Muluku onileela nsina nawe, ennooniherya wi owo onachuna wi nimusuwele. Opwaha soothene, owo tolakelenle mukhateiye onleela nsina nawe naamwi naahisuwenle naari mano owerya okoha. Ti yawooneya wi Muluku onachuna nimooneke owo, ohiya ntoko echu ehikhanle naari echu eri ocai, nyenya ntoko Muchu okhanle chiryene yoowo nnaweryaahu omwaacamela.—Salumu 73:28.

Opharihela nsina na Muluku onooniherya wi ninnachuna okhala asinthamwene awe. Wi nlikanyihe, nyuwaano akhweya munnamuleela nsina nanyu muchu yoowo munachunaanyu wi akhale nthamwene anyu. Apwanne mwaahaala osiveliwa waakhanle wi muchu owo onnakhooca owiichanelaani nsina nenlo? Akhweya, mwaahaala okhwa minikwa waakhanle wi chiryene muchu owo onnachuna okhala nthamwene anyu. Emohamohatho ni Muluku. Yehova ohaaleela achu nsina nawe, nave onnanceenyerya opharihela. Wakhala wi ninneerano, ninnooniherya wi ninnachuna okhala asinthamwene awe. Nthowa nawi owo onnawoona yaale ‘anacicimiha’ nsina nawe!—Malakiya 3:16.

Osuwela nsina na Muluku echu yoochuneya nave meerelo oopacerya a omusuwela yoowo. Nyenya hannaphwanela omaala vaavaa. Nnaphwanela wiiwexexa meerelo Awe. Nnaphwanela tho ohuserya mukhalelo awe.