Wakhala wi munachuna omusuwela phaama muchu, munaphwanela osuwela ichu eenreiye ni makacamiho ovoontheiye. Moolikana, wakhala wi munachuna omusuwela phaama Muluku, munaphwanela ohuserya ichu eenreiye. Wakhala wi moheerano, munahaala otikhina osuwela ichu sincipale eenreiyeno khalai seiho sinanikhaviherya hiihaano ophitaanyerya omwaahiyu.

Yehova Muluku Mpatuxa Mutokotoko, nave “makhalelo oohooneya a Muluku, ikuru sawe soohimala ni oMuluku awe, annooneya mookwakwaleya” mu ichu opatunxeiye. (Aroma 1:20) Apwiya Yehova “Tapanke elapo ya vathi ni owerya waya, etikitherya elapo yoothene ni miruku aya, nave mu osuwela waya yaatelela erimu.” (Yeremiya 10:12) Otikhiniha wa soopatuxiwa onooniherya tho wi Muluku onnanipwacha.

Muupuwele mukhalelo Yehova opatunxeiye ekumi ahu mmukhalelo wavameekhaaya moorweela wa onipatuxa “oolikana ni” yoowo. (Maphatxuwelo 1:27) Eyo enataphulela wi owo onipanke wi niweryeke wooniherya mikhalelo sawe savameekhaaya naamwi ori mmukhalelo wookotakota. Owo oonivaha owerya woomunepani, ela tiwi, owerya wiiwexexa moonelo awe ni muupuwelo awe. Vaavaa nnacharihaahu makhalelo yaawo, ninnakhalano murecele wawaaca ni ekumi yaphaama. Opwaha soothene, owo oonivaha owerya wa opaka onthamwene ni yoowo.

Wakhala wi ninnavareryela ichu Muluku opatunxeiye veelaponi, nnahaala woona mukhalelo owo onanipwacheiye. Masu a murummwa Paulo annooniherya wi Muluku hahin’ye ‘wiiseerela onamoona; anooniha oreera wawe murima, anrupihelaka epula ya wirimu, anivahaka ilukuluku sa sawiima, anivonihaka ni soolya wi ahakalalihe murima ahu.’ (Saweriwa T’arummwa 14:17) Owo onnanivaha ichu sincipale opwaha nnachunaahu wi nikhale akumi. Owo onnanivaha ichu sincipale saphaama wi nipuhe okumi ahu. Soothene iha sinnooniherya yeeyo Muluku aachuneiye wa hiyaano.

Yehova oopatuxa elapo wi achu ekhaleke mummo okhala wookhala. Piipiliya onnaloca:“Elapo ya vathi taveleenlaaya wa achu,” nave ‘otikithenrye wi ehikhale etheru nto wi omakiwemo.’ (Salumu 115:16;  Isaiya 45:18) Omakiwemo naani nave ophiyerya liini? “Muluku onarwa aavaha awookololowa murima elapo ya vathi, yiikhaleleru mummo okhala wookhala.”—Salumu 37:29.

Mweeparipari, Yehova aampatuxa mulopwana ni muthiyana oopacerya, Atamu ni Eva, nave aakuha mu parataiso veelaponi yavathi “wi alapeke mwemmwe ni okhapelela.” (Maphatxuwelo 2:8, 15) Muluku aahaavaha muteko woohakalaliha ariki: “Murelanesha, musareye elapo ya vathi nave muhooleleke.” (Maphatxuwelo 1:28) Mwawiihiiha, Atamu ni Eva yaavahiwa mmatani mwaya ekari ya opuha ekumi Mparataiso veelaponi yavathi okhala wookhala. Moohiciha, awo yaathanla ohimwiiwelela Muluku, nave va nthowa na yeela, awo aayeleela okhala variyari va achu ‘awookololowa murima’ yaawo anahaala waakhela “elapo ya vathi.” Nyenya, voocharela nnahaala woona wi ohiiwelela waya hiwaatoronke yoochuna ya Muluku ni elapo yavathi. Nave nihaakumve, nipacerye woona echu ekina Muluku eenreiye.

Piipiliya onniichaniwa tho ntoko Masu a Muluku. Vano, ntakhara heeni Muluku onivanheiye Piipiliya? Echu yoopacerya, owo onachuna wi niwerye ohuserya sa yoowo. (Masiposipo 2:1-5) Eparipari wi Piipiliya hanaakhula makoho oothene nnakhalaahuno vooloca sa Muluku, haavovo liivuru onawerya. (Eklesiyaste 3:11) Nyenya, echu eri yoothene Piipiliya onaloceiye ennanikhaviherya omusuwela Muluku. Ninnamusuwela owo moorweela wa mukhalelo onaakhaliheiye achu. Ninnaasuwela achu a mukhalelo taani onasiveliweiyeno ni ohinasiveliweiyeno. (Salumu 15:1-5) Ninnahuserya moonelo awe vooloca sa malapelo, meecelo, ni sookhalano. Nave Piipiliya onnanleela mookwakwaleya omuchu wa Yehova moorweela wa masu ni saweera sa Mwanawe, Yesu Kristu.—Yohani 14:9.

Nthowa nikina nimweerinhe Yehova onivaha Masu awe, Piipiliya, tiwi owo onachuna wi nsuwele mukhalelo wa okhalano ekumi yaphaama ni yoohakalaliha. Moorweela wa Piipiliya, Yehova onnanihusiha mukhalelo wa okhalano murecele, mukhalelo wa okhala oohakalala, ni mukhalelo wa ovootha makacamiho. Nave ntoko elociwaaya woopaceryani wa erevista yeela, Piipiliya onnavaha maakhulo a makoho matokotoko a ekumi, ntoko: Ntakhara heeni aakhalavo makacamiho mancipale? Tiheeni eni yeereye omwaahiyu? Nave tho onnaloca ichu Muluku eenreiye seiho sinooniherya wi yoochuna awe yoopacerya enahaala waakhwanela.

Sookhalavo ichu ikina sinooniherya wi mwaneene a Piipiliya ti Muluku pahiru. Tiwi, sooviravo iyaakha 1.600 arempwaka Piipiliya, nave orempwale ti alopwana awaakhwana 40, naamwi hiiha owo onaloca mwaha mmoharu nthowa nawi Muluku tari Mwaneene. (2 Timóteo 3:16) Moohiyana ni aliivuru akina akhalai, Masu a Muluku piipiliya aakhapeleleya mwawaakhwanela mu iyaakha sincipale, ela ennooneya wakhala wi oolikanyihiwa ni soorepa sincipale sakhalai. Echu ekina eri yoochuneya, tiyawi Piipiliya oowerya okophola mu wiilipixerya wa achu omuhiiha otaphuleliwa wawe, okaiwa ni waalakhanyiwa. Olelo, ola liivuru onakaiwa vancipale ni otaphuleliwa. Okhalavo wa Piipiliya yawooniherya yawi “masu a Muluku ahu tookhala wookhala.”—Isaiya 40:8.

Yawooniherya etokotoko ya opwacha wa Muluku ori marehereryo avameekhaaya opankeiye wi alipiherye yoochuna awe wa hiyaano. Ntoko noonnaahu, Muluku aachuna wi nikhaleke mweelaponi yavathi okhala wookhala. Nyenya, vaavaa Atamu aamuchekenleiye Muluku, owo aayeleela ekari yeela ya okhalano ekumi yoohimala ohiya pahiru wa yene mukhateiye, nyenyatho wa anamwane awe. Piipiliya oni: “Tiwi ocheka woovolowa mweelaponi ya vathi mwa muchu mmoha, nave okhwa woovolowa mwa ocheka wu. Hiiha okhwa, ohaaphwanya achu oothene vawi oothene aacheka.” (Aroma 5:12) Yoocheka yeela yaahivirikanya yoochuna ya Muluku. Nyenya tiheeni Yehova eenreiye?

Meerelo a Yehova ilukuluku soothene anakhala mwawiiwanana ni mikhalelo sawe. Owo aamuthoriha Atamu ni Eva mwawiiwanana ni saweera saya, nyenya moosivela aapaka marehereryo ntakhara omwaahiyu wa anamwane aya. Apharihelaka miruku sawe aalakelela mukhalelo wa ovootha nikacamiho nenla, nave moohilekela aaloca mukhalelo wa ovootha. (Maphatxuwelo 3:15) Otaphuliwa wa yoocheka  ni okhwa waahaala orweela wa Mwaana a Muluku, Yesu Kristu. Eyo yaahaala ovolowela eheeni?

Wi aavuluxe achu mu sookhumelela sa ohiiwelela wa Atamu, Yehova aamurumiha Mwanawe veelaponi yavathi wi aahusihe achu ephiro ya ekumi ni “ovaha okumi awe wi awoopole ancipale.” a (Mateu 20:28; Yohani 14:6) Yesu taahaala owerya ovaha woopola, woona wi aari muchu oophaameya ntoko Atamu aakhanleiye. Nyenya moohiyana ni Atamu, Yesu aatitelela okhala awiiwelela, ophiyerya okhwa. Woona wi Yesu haaphwanela okhwa, Yehova aamviiha mookhwani amukookiherya ekumi awe wirimu. Mwawiihiiha, Yesu oheerano yeeyo Atamu ooceenleiye weera—waavaha achu awiiwelela ekari ya okhalano ekumi yoohimala. Piipiliya oni: “Vawi achu ancipale teeriwaaya oocheka mwa ohiiwelela wa muchu mmoharu, hiihaa tho ancipale anamweeriwa awookololowa murima mwa wiiwelela wa muchu mmoharu.” (Aroma 5:19) Moorweela wa mukucho wawoopola wa Yesu, Muluku onahaala waakhwaniherya yoolakelela awe wi achu ekhaleke veelaponi yavathi okhala wookhala.

Ninnahuserya sincipale vooloca sa Yehova moorweela wa mukhalelo ovoontheiye nikacamiho na ohiiwelela wa Atamu. Ninnahuserya wi hiyaavo enahaala omuhiiha Yehova waakhwaniherya yoochuna awe; chiryene masu awe ‘anankhwaanela.’ (Isaiya 55:11) Hiyaano tho ninnathamalela osivela otokweene Yehova oreiyeno ni hiyaano. Piipiliya oni: “Muluku ohooniha okhwela wawe mwa hiyo, mwawiihiihaa: Aamuruma mwanawe mmoharu veelaponi ya vathi wi hiyaano nikhaleno okumi mwa yoowo. Osivela wene ti wu: Tahi wi hiyo naamukhwenle Muluku, nto yoowo tonikhwenle, anrumihela mwanawe okhala mukucho wooshipihano soocheka sahu.”—1 Yohani 4:9, 10.

Vawi ti “Muluku yoowo ohiniimanne mwanawe-mwanawe, nto amveleela wi akhwe wa nthowa na hiyo oothene,” mwawiihiiha ninnaroromela wi Muluku onahaala “onivaha . . . ichu soothene” ororomelinheiye. (Aroma 8:32) Tiheeni Muluku ororomelinheiye wi onahaala oneerela? Noone mmwaha onacharela.