Pela * aakerihiwa o Europa nthowa na ororomelihiwa wi ahaala ophwanya muteko wa omaka naari oluwa miihi. Nyenya yaavira mahiku khumi amaniwaka nave emusi awe yaahanle owaani ehooxiwaka. Owo aakhinyeereryiwa olapa muteko wa ocapaheya.

Waanachuneya wi Pela aphwanyeke ikhorowa sawaakhwana 200 naari 300 sa euro mu ohiyu omoha wi awerye oliva evaale aareiyeno ni pwiyawe yawaakhwana 40.000 sa euro. * Pela onnaloca: “Kaanaachuna ochawa, nyenya kaanoova yeeyo emusi aka yaahaalaaya weereliwa, woona wi kaari oochawihiwa.” Yaweereya yeela ennooniherya echu eneereya ni macikhwi maxexe a achu aphariwe wi ekhale acapaheya a empresa enapaka ixilema sa epwitikiri.

Iyaakha 4.000 sivirale muculi, mmiravo awiichaniwa Yosefe aakulihiwa ni asinnawe. Owo aahikhala kapuro vaate va mulopwana oovuwa a Oyikuputu. Moohiyana ni Pela, woopaceryani Yosefe heereliwe yoonanara ni mutokweene awe. Nyenya vaavaa aakhonceiye okona ni mwaara a pwiyawe, owo aahootheriwa wi amphara mwaara a pwiyawe. Owo aawaleliwa mukariposo amakiwe ni onyooro.—Maphatxuwelo 39:1-20; Salumu 105:17, 18.

Yosefe aari kapuro a mahiku akhalai, nyenya Pela kapuro a mahiku ahu yaala nsana na 21. Nyenya oothene ala aahooxeya ni meerelo oonanara ni okulihiwa, meerelo yaala anneeriha wi achu enooniwa ntoko nakoso ni othokororyiwa pahiru ikhorowa.

Ekhoco yaaheeriha wi alamuleli yoone okhweya okhalano akapuro. Mwene a Oyikuputu Thutmose III aaloca wi aawerya waaphara achu awaakhwana 90.000 amanle owaniha ekhoco o Kanata. Mwene ola a Oyikuputu aahaapaka achu yaala okhala akapuro awe mmuteko wa oteka, omaca, ni sikina.

Variyari va olamulelo wa o Roma, ikhoco saaheeriha wi ekhalevo akapuro ancipale, nave elukuluku  yoothene yachuneyaaya akapuro awo yaanaroxa ekhoco. Soolokoha sinnooniherya wi mu nsana noopacerya, waaca wa akapuro yaanaakhwana emeya ya achu oothene a elapo ya o Roma. Akapuro ancipale a Oyikuputu ni o Roma yaahooxiwa vancipale. Ntoko yootakiherya, ekumi aya yaanakukuceya ekotelaka iyaakha 30 pahiru.

Naamwi elukuluku yaavinre, okapuro hiwaamanle. Variyari va nsana 16 ophiyerya nsana 19, nakoso apakiwa variyari va Afrika ni Amerika waari waakuliha achu ntoko akapuro, nave aari nakoso aruuha ikhorowa sincipale veelaponi. Mwawiiwanana ni yoolokoha ya UNESCO, ‘yohooniwa wi variyari va achu awaakhwana amilyao 25 naari 30 alopwana, athiyana, ni anamwane annachawihiwa ni okulihiwa.’ Ennalociwa wi macikhwi macikhweene a achu aakhwa va olapuwa eniya Atalantiku. Olaudah Equiano kapuro yoowo aakophonle, onnaloca: “Winla wa athiyana ni othanana wa alopwana waari wawunlaana nthowa na woopopihiwa otokweene.”

Moohiciha, okapuro tahi echu yeereya pahiru khalai. Achu awaakhwana macikhwi 21 alopwana, athiyana, ni anamwane nlelo analapa ntoko akapuro, variyari va ohooxiwa ehiliviwaka naari eliviwaka vakhaani, mwawiiwanana ni malamulo a anamalapa a elapo yoothene. Mmahiku ahu yaala akapuro annalapa mu okaca maluku, mfaprika, faprika a itixolu, naari mmavaate mwa achu. Naamwi ehiri yaweemereryiwa, mukhalelo ola wa okapuro onanvira waacaka.

Okhalihiwa moonanara waaweeriha akapuro ancipale owaniha wi ekhale ootaphuwa. Mu nsana noopacerya E.E.K., nakhoco awiichaniwa Spartacus vamoha ni akapuro awaakhwana 100.000 yaaheererya owana ni olamulelo wa o Roma nave ehikhumelela phaama. Mu nsana na 18, akapuro a evilivili ya Karipenya o elapo ya Hispaniola yaapacerya waamwareela asipwiyaya. Ohooxiwa woopwahererya akapuro yeereliwaaya mu imaca sa mihali, waatannya ekhoco yaamalinhe iyaakha 13 nave ohoolo waya naaphacuwa nloko nawiiwanana na Haiti mu eyaakha ya 1804.

Mukwaha wa Aisarayeli okhuma Oyikuputu, onnooniherya wi waari otaphuwa wookapuroni waakhumelenle phaama mu saweereya sa achu. Woonaru achu awaakhwana macikhwi mararu—nloko noothene—naavuluxiwa wookapuroni Oyikuputu. Awo chiryene yaanachuna woopoliwa. Piipiliya onnaloca ohooxiwa yeereliwaaya Oyikuputu ni “miteko sòthene sa mmatxani ntoko atxhu awòniwa” naari oohasuliwa. (Mukwaha 1:11- 14) Mulamuleli muvyaani a Oyikuputu aapaka malamulo wi Aisarayeli ehikhale nloko ntokweene.—Mukwaha 1:8-22.

Ovuluxiwa wa Aisarayeli mu okapuro Oyikuputu yaweereya yavameekhaaya nthowa nawi aari Muluku aakhavihenrye. Muluku aaloca ni Mose ariki: “Kohòna epahu y’atxhu a nloko naka,” nave ahaaceererya “kàrwele owopola yawo mokapuroni.” (Mukwaha 3:7, 8) Nihiku nenla, Ayuta moohipwacha nipuro yaakhalaayawo yaanampaka Paskha eyaakha ti eyaakha wi yuupuwelele yaweereya yeele.—Mukwaha 12:14.

Piipiliya oni, “Apwiya Muluku ahu hanavilela sohòkololowa nari sawotha.” Ela ennaniroromeliha wi awo nlelo hatoroken’ye. (2 Matharihelo 19:7; Malakiya 3:6) Muluku aamurumiha Yesu wi aphare muteko wa “olaleya wopola wa alipa òphariwa . . . wataphula akapuro.” (Luka 4:18, 19) Apwanne ela enataphulela otaphuwa wa omwiilini? Tahi yeeyo. Yesu aarumihiwe wi anitaphule mu okapuro wa yoocheka ni okhwa. Yesu aaloca ariki: “Eparipari enan’wopolani.” (Yohani 8:32) Ophiyerya tho mmahiku ahu yaala, eparipari yeeyo Yesu aahusinheiye ennawoopola achu mmikhalelo soohiyanahiyana.—Moone ekaaxa erino muru “ Mutaphuwe mu Mikhalelo Soohiyanahiyana sa Okapuro.”

Mweeparipari, Muluku aamukhaviherya Yosefe ni Pela otaphuwa wookapuroni ohiya pahiru woomwiilini. Munahaala ophwanya yaweereya ya Yosefe mu icima 39 ophiyerya 41 sa liivuru a Maphatxuwelo. Pela wiilipixerya wawe waavya otaphuwa hiwaari wasiiyo.

Amanle wiikariwa elapo ya Europa, Pela aathaamela elapo ya o Espanya. Wiiwo owo aahaasuwela Anamoona a Yehova nave yaapacerya omuhusiha Piipiliya. Ni yoolakelela ya wookolola ekumi awe, owo aahaavya muteko nave aaloca ni pwiyawe amusiyaareiye naari aamukonkonryeiye wi akukuce waaca wa ikhorowa sa oliva mweeri ti mweeri. Nihiku nimoha, pwiyawe aamwiichana ni telefoni. Owo achuna olevelela evaale naari ekonkori ya Pela ni omveka nikhurumuwelo. Tiheeni yeeren’ye? Pwiyawe tho aapacerya omuhuserya Piipiliya ni Anamoona a Yehova! Pela amwaakhula: “Eparipari yoowoopola mmukhalelo wootikhiniha.”

Yehova aasooseya vancipale nthowa na ohooxiwa a Aisarayeli Oyikuputu; moolikana tho owo onnasooseya nthowa na ohooxeya wa achu olelo. Eparipari, wi emale makhalelo oothene a okapuro, onachuneya otorokeya otokweene mu saweera sa achu. Nyenya Muluku oororomeliha wi onamuruuha matorokelo yaawo moohilekela. “Ninnawehererya erimu esya ni elapo esya, oryayamo wokololowa.”—2 Pedro 3:13.