TORENI hawerya weemererya wi iyawe, Wesli, pahiru ni iyaakha 54, aaphwanyiwano ereca yawoopiha eniichaniwa câncer. * Matotore yaamuleela wi orino miyeeri vakhaani sa okumi. Toreni onnaloca: “Nkaawerya weemererya yeeyo naaleeliwaahu. Kaakhala oohaleeliheya. Aninko yamoothiwa nave nkiireherenrye.”

Moohiciha, yaweereya ya Toreni ti yawunlaana. Ereca yawoopiha enanwerya oniphanya oothene ahu mu elukuluku nahaaweheryaahu. Moohakalaliha, ancipale anniivaha ni murima woothene wi emukhapelele ni omukhaviherya mmoha a veemusini yoowo onahooxeya ni ereca yawoopiha. Naamwi orivo hiiha, annakhumelela makacamiho. Vano, tiheeni amusi anaphwanelaaya weera wi emuhakararye ni omukhapelela mmoha a veemusini oniiceliwa? Hanka yaale anavaha nikhaviheryo nlo, eni evoothe hai othanana yoowo onakhumelela variyari va makacamiho? Wakhala wi ereca eyo ennatepa, makacamiho taani anahaala okhumelela? Woopaceryani, hankooni nthokororye ntakhara heeni omukhaviherya muchu yoowo orino ereca yawoopiha oryaaya nikacamiho ntokweene mmahiku ahu yaala.

Vooloca sa oloola, ichu sootepa otorokeya. Mu iyaakha nsana muculi, ophiyerya tho mu ilapo sooreela, ekumi ya achu yaari yookotakota. Nthowa na wiiceliwa naari asitenti, achu yaanaakuvela okhwa. Waari woovila ophwanya oloola woophwanelela, nave achu ancipale yiiceliwa, yakhala owaani ni amusi aya nave yaanakhwa owaani weiwo.

Mmahiku ahu yaala, nthowa na oya vahoolo wa oloola, matotore annakhaviherya omala wa ereca etokweene, nave eyo enneeriha wi elukuluku ya okumi wa muchu waaceereryeye. Ireca seiho khalai siipha mwawaakuveya, olelo sinnawerya omalihiwa yeerihaka wi muchu akhaleno okumi. Naamwi orivo hiiha, ela henataphulela wi muchu onnapenuwa  moomalela. Sookhala inamuhalela muchu yoole iiceliwa, seiho inamweeriha ohiwerya wiikhaviherya mukhateiye. Omukhaviherya muchu mmukhalelo siyoola ti woovilaxa nave onnachuneyavo achu ancipale wi ekhaviheryaneke.

Ntoko yookhumelela, ancipale arino ereca etokotoko anakhala oxipitali ophiyerya okhwa waya, ohiya owaani. Mwawiihiiha, achu ancipale hanasuwela tiheeni eneereya ni muchu yoowo oniiceliwa ahaakumve okhwa nave avakhaani tasuwenle okhwa wa muchu. Vano, wakhala wi mmoha a veemusini ookhalano ereca etokweene, awo hanasuwela echu yaweera. Mmukhalelo yoola, tiheeni enahaala okhaviherya?

Hiiha ntoko yooniheryiwaaya mmukhalelo wa Toreni, achu ancipale annakhala awuukhuwa wakhala wi mmoha a veemusini ookhalano ereca etokweene. Naamwi mukhalaka awuukhuwa, woova ni ohica, tiheeni eni yookhaviheryeeni wiirehererya ntakhara makacamiho a muhoolo? Kapuro oororomeleya a Yehova aavekela: “Munihusihe walikhanya mahiku ahu, wi nikhaleno murima wa miruku.” (Salumu 90:12) Mwawiihiiha, mvekele wa Yehova ni murima woothene, mvekaka miruku wi musuwela ‘walikhanya mahikua anyu’ ni opharihela phaama elukuluku yeeyo oosiveliwaanyu onatepeiye.

Onachuneya wiirehererya phaama. Wakhala wi oosiveliwaanyu oniiceliwa nlelo onnawerya oloca, nave onanwerya ohoolela miyaha vooloca sa ereca awe, ti yaphaama omukoha taani owo onamuchuneiye wi apakeke soolakelela ntakhara yene wakhala wi ereca eyo yoomutepela. Ovaanela weeparipari wi musuwele waakhanle wi onnachuna wi anakhaviheryiwa ari oxipitali, ovareryiwa taani onachuneiye, eyo enahaala okhaviherya wi ohikhalevo ohiiwanana naari okhupanyiwa wa amusi yaawo yaapaka soolakelela. Ovaanela woosiilo enahaala weeriha wi emusi emukhaviherye phaama yoole oniiceliwa. Piipiliya oni: “Wahiveka miruku, onamòtxèla miteko sà.”​—Masiposipo 15:22.

Ilukuluku sincipale, yoole onakhaviherya, muteko awe woochuneya ori omuhakararya yoole oniiceliwa. Mulipa awiiceliwa onaphwanela osuwela wi ninnamusivela nave wi hari meekheiye. Nni neereno hai? Waalakhanya ni wiipa. Nyenya muthanle waalakhanya mwaha yoowo onalipiha ni othanla macipo anahaala omuhakararya. Achu ancipale annaahakararya amusi aya aniiceliwa moorweela wa opharela ntata naya ni olocano mmukhalelo waphaama.

Ohiya yeeyoru, mmuleeleke muchu owo oniiceliwa taani oruule wi amuxekurye. Xornalista mmoha  aaloca: “Muchu oniiceliwa, echu yookuchula oyeleela ori wiiwa. Naamwi muchu owo akhalaka ntoko wi onamukona, owo nlelo onniiwa. Wa nthowa na yeela, muhiloce echu yeeyo mwahihaalaanyu oloca waakhanle wi onnawoonaani.”

Wakhala wooweryeya, mvekeleke vamoha. Piipiliya onnaloca wi saahikhala ilukuluku seiho murummwa Paulo ni asinthamwene awe yaahoolelaaya makacamiho oovila. Nikhaviheryo taani awo yaakhenlaaya? Paulo aaveka wa Akristu akhweiye o Korinto ariki: “Nave nyuwo munnawerya onikhaviherya ni onivekelela.” (2 Korinto 1:8-11) Ovekela ni murima woothene variyari va makacamiho naari ereca yawoopiha nikhaviheryo ntokotoko.

Pahiru wuupuwela wi nnahaala omuyeleela oosiveliwa ahu, ninnakhala oothananaxa. Eyo eneereya nthowa na wi okhwa tahi echu yoohakalalano. Hiyaano hinipatuxiwe wi nikhweeke. (Aroma 5:12) Ti nthowa nene Masu a Muluku analocaaya wi okhwa ti “mwitxana.” (1 Korinto 15:26) Mwawiihiiha, makacamiho anakhumelela mu wuupuwela wi oosiveliwa ahu onahaala okhwa, echu eneereya.

Naamwi orivo hiiha, wuupuwelela woosiilo yeeyo enahaala weereya ennakhaviherya emusi okhala yoomaaleleya ni omukhapelela phaama muchu yoole oniiceliwa. Wi musuwele ichu savakhaani ineereya ni yoole oniiceliwa, moone ekaaxa “Wakhala wi Masooso Annatepa.” Eparipari wi ichu ilociwe va ekaaxa yeela, hasineereya ni muchu ori oothene oniiceliwa. Nyenya ancipale a yaawo aniiceliwa annakumana ni otorokeya wuuwu.

Amanle okhwa muchu yoole naamusivelaahu, ti yaphaama omwaavya nthamwene yoole aanikhaviherya. Mu elukuluku yeeyo ya makacamiho, amusi ni yaale yaamukhaviherya mmusi yoole okhwile, anaphwanela osuwela wi muchu yoole okhwile hanahooxeya tho. Moosivela, mpatuxa ahu onnanilipiha wi yaale “akhwile hanasuwelaru etxhu.”​—Eklesiyaste 9:5.

Waavya nikhaviheryo na Yehova ti woochuneya—ohiya pahiru vaavale mmusi ahu oniiceliweiye, nyenya tho mu ilukuluku sookacamiha sa muhoolo amanle oosiveliwa ahu okhwa. Muluku onanwerya wookhaviheryaani moorweela wa masu ni saweera sa achu akina. Toreni ooloca: “Koohuserya weemererya nikhaviheryo nri noothene kinavahiwaka. Hiyaano naanakhala ootikhiniheya noonaka waaca wa nikhaviheryo naakhelaahu. Miyaano ni aiyaka naanasuwela wi aari Yehova aaloca ni hiyo ariki: ‘Yeereye eni yeereye, kiri ni nyuwaano.’ Nkirwa kichuwala yeela.”

Mweeparipari, pahiru Yehova tori oophwanelela wi anikhaviherye. Ntoko mpatuxa ahu owo onniiwexexa ohooxeya ni wiicela nnoonaahu. Owo onnachuna nave onahaala woovahaani nikhaviheryo munachunaanyu ni nihakaryaryiho. Echu ekina yaphaama, owo oolaiherya wi moohilekela onahaala omalihavo okhwa nave onahaala waaviha mookhwani achu ancipale ari mmuupuwelo mwawe. (Yohani 5:28, 29; Wupulula 21:3, 4) Nave voocharela, oothene ahu nnahaala opharihela masu ala a murummwa Paulo: “Okhwa we, ori wowi vano ovotha wà? Okhwa we, ori wowi mpùla wà?”​—1 Korinto 15:55.