1, 2. (1) Echu taani eri yasisapo muukumini mwanyu? (2) Iparipari taani nnavahaahu esisapo, nave ntakhara heeni? (Moone iruku soopacerya.)

ECHU taani eri yasisapo muukumini mwanyu? Ntoko achu a Yehova, echu yasisapo nryaahuno ori onthamwene ahu ni yoowo. Hannaphwanela otoroka ni echu ekina. Ninnavaha tho esisapo eparipari ya Mpiipiliya, nthowa nawi eyo enneeriha okhala wooweryeya wa hiyo okhala asinthamwene a Yehova.—Kolosi 1:9, 10.

² Yehova tori Muhusiha ahu Mutokotoko, yoowo onanihusiha iparipari sincipale sookhweleya mu Masu awe, Piipiliya. Owo onnanihusiha ochuneya wa nsina nawe nave onnanleela vooloca sa mikhalelo sawe saphaama. Owo onnanleela wi onnatepa onisivela vancipale ophiyerya ovaha ekumi ya mwanawe ookhweleya ntakhara hiyo. Yehova onnanihusiha vooloca sa Omwene wa Mesiya. Owo onnanivaha ewehereryo ya omwaahiyu, moohipwacha waakhanle wirimu wa oothanliwa naari veelaponi ya vathi wa “iputxeputxhe ikina.” (Yohani 10:16) Yehova onnanihusiha mukhalelo nnaphwanelaahu okhala. Nnoona iparipari seiya  ntoko muhakhu nthowa nawi sinnanikhaviherya omwaacamela Mpatusa ahu nave sinnanivaha yoolakelela mu okumi.

3. Apwanne Yehova onnaniveka oliva ikhorowa wi nihuserye eparipari?

³ Yehova, Muluku oovaha. Owo tamahala awaaca ophiyerya omvaha Mwanawe ntakhara hiyo. Vaavaa Yehova onooneiye wi muchu onnaavya eparipari, owo onnamukhaviherya muchu ene yoowo ophwanya eparipari. Owo hananiveka ikhorowa wi nihuserye eparipari. Mu ekwaha emoha, mulopwana iichaniwa Simoni, aahimvaha ikhorowa murummwa Petro wi amvahe owerya wa waavaha akina munepa waweela. Petro aahithariha wi moonelo wa mulopwana owo waari wooheseya nave aahiloca: “Ikhorowa sà ikhwe vamoha ni weyano, wona wi weyano òhemererya wi onnawerya okula ni ikhorowa mahala a Muluku.” (Saweriwa T’arummwa 8:18-20) Vano, enataphulela eheeni ‘othuma eparipari’?

4. Mmwaha yoola, tiheeni nnahaalaahu ohuserya vooloca sa eparipari?

⁴ Mwaalakhanye Masiposipo 23:23. Onnachuneya wiilipixerya wi muchu ahuserye eparipari yoorweela Mpiipiliyani. Nnaphwanela ohiya ichu ikina ntakhara eparipari. Nave nimanle ‘othuma eparipari,’ eyo ti wi, ohuserya eparipari, nnaphwanela okhalano ekaasoope wi ‘nihitumihe,’ eyo ti wi, ohiya eparipari. Mmukhalelo taani ‘nnathumaahu’ eparipari ya Piipiliya? Enathummwa ikhorowa kavi? Maakhulo a makoho yaala anamunikhaviherya ovaha esisapo eparipari opwaha khalai nave anamunikhaviherya olakelela moopwaha wi nihihiye eparipari. Nnahaala wiiwexexa ntakhara heeni eparipari enarweela wa Yehova eryaaya yoophwanelela opwaha echu vyakala.

5, 6. (1) Nni nthume hai eparipari nihirino ikhorowa? Mutharihe. (2) Nnaphura hai orweela wa eparipari?

⁵ Mweeparipari echu ohitumihiwa henataphulela wi muchu hanaphwanela weeravo echu. Nsu na Ehepiri ntaphuleliwe ‘othuma’ mu Masiposipo 23:23 nnanwerya otaphulela “okhalano.” Masu oomeeli yaala annooniherya wi muchu onaphwanela wiilipiserya naari ohiya echu vyakala wi aphwanye echu yeeyo onooneiye okhala yasisapo. Wi nikhaviheryeye wiiwexexa mukhalelo nneeraahu nthume eparipari, mwaanyiherye wi omusika achu annavaha enka mahaleene. Apwanne nnaweherya wi enka enahaala orwa veechokoni vahu meekhaaya? Hooye, nlelo nnaphwanela oya omusika wi nakuse enka wi nikerihe veechokoni vahu. Naamwi enka ehitumihiwaka, nnaphwanela wiilipiserya ophwanya yeeyo. Mmukhalelo woolikana, hannaphwanela oliva ikhorowa wi nihuserye eparipari, nyenya onnachuneya wiilipixerya ni ohiya ichu muculi.

⁶ Mwaalakhanye Isaiya 55:1-3. Yeeyo olonceiye Yehova ennanikhaviherya wiiwexexa yootaphulela ya othuma eparipari. Mu iciciri iha, Yehova oolikanyiha masu awe eeparipari ni maahi, mukaka, ni eviinyu. Hiiha ntoko maahi ooriirya anamvahaaya ikuru muchu orino nchanana, eparipari ennanivaha ikuru. Navetho hiiha ntoko mukaka onamweerihaaya mwaana wunnuwa arino ikuru, eparipari ya Mpiipiliya enneeriha onthamwene ahu ni Yehova okhala woolipa. Yehova oolikanyiha masu awe ni eviinyu. Ntakhara heeni? Piipiliya ooloca wi eviinyu ennahakalaliha murima wa muchu. (Salumu 104:15) Mwawiihiiha vaavaa Yehova onanleeleiye “othuma evinyu,” owo onanileela wi nsuwele wi  vaavaa nnacharihaahu ohoolela wawe muukumini, nnamukhala oohakalala. (Salumu 19:8) Yehova onnapharihela malikanyiho yaala wi anikhaviherye wiiwexexa mukhalelo nnaphuraahu vaavaa nnahuseryaahu ni opharihela eparipari. Vano hankooni nthokororye ichu thanu saahaala oneeriha ohiya othuma eparipari.

7, 8. (1) Ntakhara heeni ennachuneya elukuluku yincipale wi muchu ahuserye eparipari? (2) Wiilipiserya taani oohuserya mmoha aapankeiye, nave tiivi yaari yookhumelela?

⁷ Elukuluku. Ennachuneya elukuluku wi muchu awiriyane muchaka wa Omwene, omwaalakhanya Piipiliya ni soolaleeryiwa sa Piipiliya, omuhuserya Piipiliya ni Anamoona a Yehova, wiirehererya ntakhara mithukumano sahu, ni oya mmithukumano seiyo. Wi neereno ichu seiya, nnaphwanela opharihela elukuluku yeeyo naahaalaahu opharihela ntakhara ichu ikina, ichu ihirino esisapo. (Mwaalakhanye Éfeso 5:15, 16.) Muchu onamaliha ilukuluku taani wi ahuserye iparipari iri mathipelo a Piipiliya? Enakhala yoohiyana wa muchu ti muchu. Hiyaavovo makuchuwelo a ohuserya vooloca sa miruku sa Yehova, iphiro sawe, ni ichu seiyo opankeiye. (Aroma 11:33) Mulipeleli oopacerya a Enklesi aahilikanyiha eparipari ni “ethutu emoha yoophwanelela” nave aahiloca: “Muheeliwe murima ni ethutu emoha ya eparipari. Waakhanle wi emoha ennaakhwanela heki ekhalevo ekinatho. Muthukumanye vamoha, mwaavyeke ekina.” Mwawiihiiha nnaphwanela wiikoha, ‘Ophiyerya mweeryo taani kihusenryaaka vooloca sa Yehova?’ Ophiyerya elukuluku nneeraahu nikhale okhala wookhala, nnahaala ohuseryaka sincipale vooloca sa Yehova. Olelo, ti yoochuneya opharihela elukuluku nryaahuno wi nihuserye sincipale vooloca sa Yehova ophiyerya nnaweryelaahuvo. Yookhalavo yootakiherya emoha ya muchu yoowo eenreno yeela.

⁸ Mariko, * (moone masu avathi) mwali o Xapau, aathaamenle o Estatu Unitu ntakhara esikola Epooma yo Nova York. Nihiku nimoha, murokora mmoha yoowo ori piyoneera aahuuka michaka saphaama ni yoowo owannyawe. Mariko iiha apakaka makupa a malapelo, nyenya owo aahipacerya omuhuserya Piipiliya ni murokora. Owo aahitepa osiveliwa ni seiyo aahuseryeiye, ophiyerya wi aahiveka wi ahuseryeke ikwaha piili va esumana. Naamwi mwali owo aari ooweiwa ni esikola navetho ni muteko awe wa elukuluku tonto, owo aahipacerya oya mmithukumano sa muloko. Owo aanamaliha elukuluku vakhaani mmathatelo wi aweryeke okhalano elukuluku yincipale ya ohuserya eparipari. Moorweela wa wiilipiserya mmukhalelo yoola, Mariko aahitepa omwaacamela Yehova, nyenya mu miyeeri vakhaani ohoolo waya, owo aahipatisiwa. Mu miyeeri mithanu nammoha ohoolo waya mu 2006, aahikhala piyoneera, nave owo nlelo onarumeela ntoko piyoneera.

9, 10. (1) Ohuserya eparipari enatoroka hai moonelo ahu vooloca sa ichu soomwiilini? (2) Echu taani mwali mmoha aawenryeiye ohiya, nave owo onoona hai vooloca sa yeeyo?

 ⁹ Ichu soomwiilini. Mmukhalelo mukina wi nihuserye eparipari, nnaphwanela ohiya muculi muteko waphaama naari yoowo onaliva ikhorowa sincipale mu elapo yeela. Ntoko yootakiherya, Petro ni Antreya yaari alipa oototha ihopa, nyenya mu elukuluku Yesu aahaawopa wi ekhale oohuseryaawe, awo yaamuhiya nakoso aya a ototha ihopa. (Mateu 4:18-20) Ela henataphulela wi vaavaa munahuseryaanyu eparipari, munaphwanela ohiya muteko anyu. Muchu onaphwanela olapa wi akhapelela echoko awe. (1 Timóteo 5:8) Nyenya vaavaa munahuseryaanyu eparipari, mukhalelo munuupuwelaanyu vooloca sa ichu soomwiilini onnatorokeya. Nyuwo munnasuwela echu yeeyo eri yookhweleyaxa muukumini. Yesu aahiloca: “Muhithukumanyeke muhakhu vathiva.” Ohiya yeeyo owo ooniceenyerya: “Muthukumanyeke muhakhu wirimu.” (Mateu 6:19, 20) Ela ti yeeyo mwali oniichaniwa Mariya eenreiye.

¹⁰ Mariya aanasiveliwa omvonya mphirya ovinyerya elukuluku aareiye nahano. Variyari va ohuserya wawe, owo aanakhumelela phaama ikwaha soothene. Owo aahikhala oophwanelela mu omvonya mphirya ophiyerya wi aahivahiwa nchuwelo na ohuserya esikola ya vasulu ahilivenle. Yoolakelela ya Mariya yaari okhala mulipa omvonya mphirya oovuwa nave ophwanya ikhorowa sincipale. Ohoolo waya owo aahipacerya omuhuserya Piipiliya. Mariya aahisiveliwa ni yeeyo aahusenryeiye nave aahipacerya opharihela muukumini mwawe. Owo ooloca: “Elukuluku kaatorokaaka muupuwelo ni mukhalelo aka wa okumi wi kiiwananihe ni malakiheryo a Piipiliya, kaanakhala oohakalala.” Mariya aahisuwela wi waahaala okhala woovila otikitheryeya mu ichu soopiili, onthamwene awe ni Yehova ni muteko awe wa omvonya mphirya. (Mateu 6:24) Mwawiihiiha owo aahilakelela ohiya yoolakelela awe ya okhala mulipa omvonya mphirya oovuwa ntakhara echu yoophwanelela. Olelo, Mariya onarumeela ntoko piyoneera nave olonce wi ookhalano “ohakalala wawaaca ni ekumi yeeyo erino yootaphulela yeeparipari.”

11. Vaavaa nnahuseryaahu eparipari, tiheeni eneereya ni asinthamwene ahu akina?

¹¹ Onthamwene ni akina. Elukuluku nnapaceryaahu opharihela yeeyo nnahuseryaahu Mpiipiliya, onthamwene ahu ni amusi vamoha ni asinthamwene ahu onnatorokeya. Yesu oonikhaviherya wiiwexexa nthowa nene ntakhara yeela vaavaa aavekenleiye vooloca sa oomuchara awe: “Elihani yawo mwiparipari; masu anyu ti eparipari.” (Yohani 17:17, NN) ‘Weliha’ onanwerya otaphulela “okakhela okhwipi.” Vaavaa nnapaceryaahu opharihela eparipari mu okumi ahu, ninnakhala okhwipi wa elapo nthowa nawi nnachariha malakiheryo a Piipiliya. Naamwi hiiha ninniilipiserya okhapelela onthamwene waphaama ni amusi vamoha ni asinthamwene ahu, akina heni esiveliwe ni hiyo hiiha ntoko yeerelaaya  navetho ophiyerya wi anamwaakaaha soororomela sahu ivyaani. Ela henantikhiniha. Yesu ooloca: “Nave amwitxana a mutxhu eni ekhale atxhu a vate [vawe].” (Mateu 10:36) Navetho Yesu ooniroromeliha wi moohipwacha ichu sincipale nnahiyaahu muculi ntakhara eparipari, nnahaala waakhela sincipale opwaha seiyo!—Mwaalakhanye Marko 10:28-30.

12. Echu taani Muyuta mmoha aawenryeiye ohiya muculi ntakhara eparipari?

¹² Mu okumi awe woothene, Muyuta mmoha nsina nawe Aroni aaroromela wi ti yoonanara oromola nsina na Muluku. Nave owo aahichuna osuwela chiryene vooloca sa Muluku. Nihiku nimoha, Namoona mmoha aahimooniherya wi wakhala wi ohaaceererya ivokaali ni ikonsonanti sese sa Ehepiri sa nsina na Muluku, iho saahaala oromoliwa “Yehova.” Aroni aahitepa ohakalala ohuserya yeela nave aaya o sinakooka wi aaleele ahusiha! Owo uupuwela wi awo yaahaala ohakalala ohuserya eparipari vooloca sa nsina na Muluku, nyenya awo hiyaahakalanle. Ohiya yeeyo, yaahimutaphera mara nave emwiikarela vaate. Emusi ya Aroni yaahinyeenyeya ni yoowo. Nyenya ela hiyaamweerinhe omaala ohuserya sincipale vooloca sa Yehova. Aroni aahikhala Namoona a Yehova nave aahimurumeela Yehova moororomeleya mu okumi awe woothene. Hiyaanotho nnaphwanela oweherya wi elukuluku nnahuseryaahu eparipari onthamwene ahu ni akina onamutorokeya.

13, 14. Nnatoroka hai mukhalelo wa okumi ahu vaavaa nnahuseryaahu ni opharihela eparipari? Mvahe yootakiherya.

¹³ Muupuwelo ni meerelo ooriipiheya. Vaavaa nnahuseryaahu eparipari ni opacerya okhala mwawiiwanana ni malakiheryo a Piipiliya, nnaphwanela wiilipiserya otoroka mukhalelo nnuupuwelaahu ni nnapakaahu ichu. Murummwa Petro aahirepa: “Ntoko anamwane awiwelela muhitxhareke minkhela sanyu sonanara sa khalai, mwaryanyu òhisuwela.” Avinyaka aahaaceererya: “Nto mukhale awela mwa sothene muneranyu.” (1 Pedro 1:14, 15) Mu epooma yakhalai yo Korinto, achu ancipale yaari acapaheya. Oothene yaawo yaakhala weiwo yaaphwanela apaka matorokelo matokweene wi ekhale aweela vamiithoni va Yehova. (1 Korinto 6:9-11) Olelo, ancipale annapaka matorokelo oolikana vaavaa anahuseryaaya eparipari. Petro aahithariha yeela elukuluku aarempeiye: “Watxa mahiku nvinranyu mutxharaka sotxhuna sa amalapo, mwetxelaka otxapaheya, minkhela sonanara, ohapaliwa, wipeliwa, owuryasa ni owepesa a muluku awotha!”—1 Pedro 4:3.

¹⁴ Tevini ni maariye Yasimine yaari amvona mu iyaakha sincipale. Naamwi Tevini aari mulipa awaalakhanyerya ikhorowa aphaama, owo haawerya ophwanya muteko nthowa na ohapaliwa. Yasimine aahisuweliwa ntoko muchu eesara ni oowali. Nihiku nimoha, vaavaa owo aahapaliweiye, yaahikumana mphironi ni Anamoona eeli yaawo yaari mamisiyonaariyo. Awo yaahimvaha yoohuserya ya Piipiliya. Nyenya elukuluku yaakelaaya veechokoni vaya esumana yoocharela, Yasimine ni Tevini yiiha ehapaliwe. Awo hiyeemererya wi mamisiyonaariyo ale yaahaala waapwacha ophiyerya orwa veechokoni vaya. Mu elukuluku yoocharela mamisiyonaariyo yaaphin’yaaya, ichu saahitorokeya. Yasimine ni Tevini yaaheemererya ohuserya eparipari, nave mwawaakuveya yaahipacerya opharihela yeeyo yaahuseryaaya. Mu miyeeri vakhaani, awo yaahihiya ohapaliwa, nave ohoolo waya yaahiirepiha othela waya. Achu ancipale mu ekulucu aya yaahoona mukhalelo Yasimine ni Tevini yaatoroken’yaaya, nave awo yaahipacerya omuhuserya Piipiliya.

15. Echu taani eni ekhale yoovilaxa otoroka ntakhara eparipari, nave nthowa heeni?

 ¹⁵ Sookhovelela ni meerelo yaawo ahinamuhakalaliha Muluku. Mamoha mwa matorokelo ananivila opaka ori ohiya saweera ni sookhovelela seiho sihinamuhakalaliha Yehova. Naamwi akina emanle ohuserya mukhalelo Yehova onooneiye vooloca sa ichu seiyo, nlelo ennakhala yoovila wa yaawo ohiya. Awo annuukhuwa vooloca sa mukhalelo amusi, asinthamwene oomutekoni, ni asinthamwene aya anahaalaaya waakhulela. Awo aasuwela wi achu aakhalano moonelo woolipa vooloca sa sookhovelela sammoori, ntoko yaale anaacicimiha alipa ookhwa. (Malamulo 14:1) Vano, tiheeni eni enikhaviherye opaka matorokelo anachuneya? Nnaphwanela ohuserya sootakiherya sa yaale yaapanke matorokelo khalai vaavaa yaahusenryaaya eparipari, ntoko Akristu oopacerya o Efeso.

16. Wiilipiserya taani akina o Efeso yaapankaaya?

¹⁶ Mu epooma yo Efeso, meerelo a masica yaari awunlaana. Tiheeni achu yaale yaapaka meerelo a masica yenraaya vaavaa yaakhanlaaya Akristu? Piipiliya onnathariha: “Nave anchipale a yawo yéra sawisachiherya yáthukumanya alivro aya, eweyela va mithoni va othene; nave yáhálakhanya esisapo aya, ephwanya icharama sawéla masanaru makhumi khumi othanu. Wawihihá masu a Apwiya yáhácha yupasha.” (Saweriwa T’arummwa 19:19, 20, NN) Akristu yaale oororomeleya yaari ooreheryeya waahiya aliivuru aya oowalamela, nave Yehova aahaareeliha ntakhara yeela..

17. (1) Ichu taani ikina naahin’yaahu ntakhara eparipari? (2) Makoho taani nnahaalaahu waakhula mmwaha onacharela?

¹⁷ Wiilipiserya taani mpankaanyu wi muhuserye eparipari? Oothene ahu noovaha elukuluku ahu. Akina a hiyo aahiya muculi ekari ya okhala amuhakhu. Nave akina onthamwene ahu ni akina akhweya wootorokeya. Akina a hiyo nootoroka mukhalelo nuupuwelaaya ni neerelaaya nave nookhooca meerelo ni sookhovelela seiyo sihinamuhakalaliha Yehova. Nyenya noolekecheya wi eparipari ya Mpiipiliya ti yasisapo opwaha echu vyakala nihin’yaahu muculi. Eparipari ya Piipiliya yoheeriha okhala wooweryeya okhalano onthamwene wawaacameleya ni Yehova, yeeyo eri echu yasisapo etokweene muukumini mwahu. Vaavaa nnuupuwelaahu vooloca sa mareeliho nryaahuno wa nthowa na eparipari, ti yoovila wiiwexexa ntakhara heeni muchu eereiye ‘atumihe’ eparipari. Ela yaahaala weereya hai? Nave nni nsepe hai opaka yoocheka sintoko yeela? Nnahaala waakhula makoho yaala mmwaha onacharela.