1. Tavite oona hai vooloca sa Yehova, nave eyo yaamweerinhe opaka eheeni?

MWENE Tavite oorepa: “Apwiya [Yehova] ti mutokweene oophwanela ocicimihiwa.” (Sal. 145:3) Owo aanamusivela Yehova, nave osivela iwo waahimuceenyerya omucicimiha Muluku “veeri va muloko.” (Sal. 22:22; 40:5) Moohikhwa minikwa, nyuwo munnamusivela Yehova nave munneemererya masu a Tavite: “Ecicimihiwe mahiku oothene, Apwiya, Muluku a nikholo nahu Yaakopo.”—1 Math. 29:10-13.

2. (1) Nni nimucicimihe hai Yehova? (2) Makacamiho taani akina anahoolelaaya, nave tiheeni nnahaalaahu ohuserya?

² Olelo, mukhalelo mmoha nnamucicimihaahu Yehova ori ovaha maakhulo mmithukumano sahu Seekristu. Mwawiihiiha, anna ni arokora ancipale annahoolela chiryene nikacamiho. Awo annachuna waakhula mmithukumano, nyenya woova onnahiiha. Vano eni evoothe hai woova yoowo? Nave mikhalelo taani savameekhaaya sini sinikhaviherye oothene ahu ovaha maakhulo oolipiha? Nihaakumve waakhula makoho yaala, hankooni nthokororye mathowa masese oochuneya ananeeriha ovahererya maakhulo mmithukumano.

3-5. (1) Ntoko etharihiwaaya mu Ahebri 13:15, ntakhara heeni ninnavaha maakhulo mmithukumano? (2) Apwanne ninnaphwanela ovaha maakhulo mmukhalelo woolikana? Mutharihe.

³ Yehova onnanivaha oothene ahu ekari ya omucicimiha. (Sal. 119:108) Maakhulo ahu mmithukumano annapaka makupa a “mukucho woomucicimiha” Muluku nave haavo ani aveleele mukucho yoola ntakhara hiyo. (Mwaalakhanye Ahebri 13:15.) Apwanne Yehova onaweherya wa muchu ti muchu a hiyo mukhalelo mmohamoha wa mukucho, naari naakhulo? Hooye owo haneerano yeeyo!

 ⁴ Yehova oosuwela wi nrino mavyakelo ni mikhalelo soohiyana, nave owo onnathamalela mwawiiseela mikucho seiyo nnaweryaahu oveleela wa yoowo. Nkuupuwelani mikucho seiyo eemereryeiye wa Aisarayeli. Aisarayeli akina yaanawerya ovaha epucepuche naa epuri. Nyenya Aisarayeli oohaawa yaaphwanela oveleela “masiya meeli naari ipompa piili.” Nave wakhala wi Muisarayeli haawerya ovaha ipompa naari ikakaiya piili, Yehova aanaakhela “ikiilu piili sa ephepa ya phaama.” (Onam. 5:7, 11) Ephepa yaari ya esisapo vakhaani, nyenya Yehova nlelo aanathamalela mukucho yoowo, yakhala wi “ephepa ya phaama.”

⁵ Muluku ahu ooreera murima onoona mmukhalelo woolikana olelo. Vaavaa nnavahaahu maakhulo, owo hanaweherya wi oothene ahu nsuwele oloca phaama ntoko Apolu naari oolekecha ntoko Paulo. (Saw. 18:24; 26:28) Yehova onachuna wi oothene ahu nivaheke maakhulo ophiyerya nnaweryelaahuvo mwawiiwanana ni okotakota wahu. Mmuupuwele naamukhweli yoowo aavanhe ikhorowa piili. Owo aari ookhweleya wa Yehova nthowa nawi aahivaha yaphaama ophiyerya aawereleiyevo.—Luka 21:1-4.

6. (1) Mwawiiwanana ni Ahebri 10:24, 25 nnavoloweliwa hai ni maakhulo nniiwaahu? (2) Muni mooniherye hai othamalela wanyu maakhulo yaawo oolipinheeni?

⁶ Ninnaceenyeryana mukina ni mukhwaawe moorweela wa maakhulo ahu. (Mwaalakhanye Ahebri 10:24, 25.) Oothene ahu ninnasiveliwa owiriyana maakhulo oohiyanahiyana mmithukumano sahu. Ninnapuha maakhulo ookhweya, a masu eeparipari a anamwane. Ninnalipiheya orweela wa masu a muchu yoowo ovanhe naakhulo vooloca sa eparipari yeeyo owo ohusenryeiye. Nave ninnatikhiniheya ni yaale anavaha maakhulo aya “moohoovelela,” naamwi awo yuuliwaka muru naari erikimpacerya ohuserya elocelo ahu. (1 Tes. 2:2) Nni nooniherye hai othamalela wiilipiserya waya? Nnaphwanela waathamalela yaawo ntakhara maakhulo aya oolipiha imanle mithukumano. Mukhalelo mukina ori ovaha maakhulo ahu. Weerano hiiha tahi wi pahiru nnaakhela nlipiho mmithukumano sahu nyenya tho hiyo ninnavaha nlo.—Aro. 1:11, 12.

7. Nnaphura hai vaavaa nnavahaahu naakhulo?

⁷ Ninnaphura mukhatiihu vaavaa nnavahaahu naakhulo. (Isa. 48:17) Mwawiihai? Yoopacerya, wakhala wi nookhalano yoolakelela ya ovaha naakhulo, ninnaceenyeryeya wiirehererya phaama ntakhara mithukumano.  Vaavaa nniirehereryaahu phaama, ninniiwexexa mwawiiseela Masu a Muluku. Nave vaavaa nnakhalaahuno wiiwexexa wa wiiseela, nnanwerya opharihela phaama ichu nnahuseryaahu. Yanawiili, nnahaala opuha mithukumano woona wi ninnapaka makupa mu othokororya. Yaneeraru, woona wi onnachuneya wiilipiserya wi nivahe naakhulo, nnahaala wuupuwela miyaha naakhunlaahu imanle mithukumano.

8, 9. (1) Ntoko elociwaaya mu Malakiya. 3:16 Yehova onoona hai vooloca sa maakhulo ahu? (2) Makacamiho taani nlelo akina anahoolelaaya?

⁸ Ninnamucicimiha Yehova vaavaa nnalocaahu nroromelo nahu. Nnanwerya ororomela wi Yehova onnaniwiriyana nave onnathamalela wiilipiserya nnapakaahu wi naakhule mmithukumano. (Mwaalakhanye Malakiya 3:16.) Owo onnooniherya othamalela wawe moorweela wa onireeliha vaavaa nneereryaahu moowetha omuhakalaliha yoowo.—Malak. 3:10.

⁹ Mwawooneya, nookhalano mathowa aphaama a ovahererya maakhulo mmithukumano. Nlelo, akina akhweya annoovelela oviiha ntata naya. Wakhala wi munoona mmukhalelo yoola, muhiceecheye. Hankooni nthokororye malakiheryo makina a Piipiliya, sootakiherya sa vakhaani, ni mikhalelo mikina seiyo sini sinikhaviherye oothene ahu weererya ovaha maakhulo mancipale mmithukumano.

10. (1) Woova taani ancipale a hiyo nryaahuno? (2) Ntakhara heeni woova ovaha naakhulo eryaaya eneneeryo yaphaama?

¹⁰ Apwanne murima onnoomalammoni elukuluku munuupuwelaanyu oviiha ntata wi mwaakhule? Waakhanle wi ti hiiha, hamuri meekhinyu. Eparipari ti yawi ancipale a hiyo ninnakhalano woova vaavaa nnavahaahu naakhulo. Wi mvoothe woova yoowo onaweerihaani ohivaha naakhulo, munaphwanela osuwela mathowa a woova wanyu. Apwanne munoova wi munahaala ocuwala yeeyo mwaahaalaanyu oloca naari wi munahaala oloca echu yooheseya? Apwanne munuukhuwa nthowa nawi naakhulo nanyu hinni nikhale naphaama ntoko naakhulo na akina? Mweeparipari, woova ntoko yoowo onanwerya okhala eneneeryo yaphaama. Eyo enooniherya wi mwa muchu awiiyeviha nave wi munawoona akina okhala a woopwahaani. Yehova onnasivela mukhalelo yoola. (Sal.  138:6; Fil. 2:3) Nyenya Yehova onachuna wi mmucicimihe yoowo nave wi mwaalipihe anna ni arokora anyu mmithukumano. (1 Tes. 5:11) Owo onnoosivelaani nave onamoovahaani olipa murima yoowo munachunaanyu.

11. Sawuupuxerya taani sa Soorempwa sini sinikhaviherye?

¹¹ Muthokororye sawuupuxerya ikina sa Soorempwa. Piipiliya onaloca wi oothene ahu ninnahesa wa yeeyo nnalocaahu ni mukhalelo nnalocaahu. (Tiy. 3:2) Yehova hanaweherya wi hiyo naari anna ni arokora nikhale oophaameya. (Sal. 103:12-14) Awo amusi ahu nave annanisivela. (Mar. 10:29, 30; Yoh. 13:35) Awo anniiwexexa wi ilukuluku ikina hinni nloce yeeyo naachunaahu oloca.

12, 13. Tiheeni nnahuseryaahu orweela wa sootakiherya sa Nehemiya ni Yona?

¹² Nkuupuwelani vooloca sa sootakiherya ikina sinahaala wookhaviheryaani ovootha woova wanyu. Mmuupuwele Nehemiya. Owo aarumeela mu nikhuuru noothoriha na mwene oowerya. Nehemiya aari awuukhuwa nthowa nawi aahiwa wi ixiri ni mikhora o Yerusalemu saahikurumuliwa. (Neh. 1:1-4) Nkaanyiheryani othanana ni woova aareiyeno vaavaa mwene aamvenkeiye wi atharihe ntakhara heeni aareiye oohihakalala! Nehemiya mwawaakuveya aahivekela nave voocharela aahivaha naakhulo. Ntoko yookhumelela, mwene aahipaka sincipale wi aakhaviherye achu a Muluku. (Neh. 2:1-8) Mmuupuwele tho Yona. Vaavaa Yehova amvekeiye wi aloce ni achu o Ninive, Yona aahikhala awoova nave aahichawela mu makupa makina. (Yona 1:1-3) Nyenya nnikhaviheryo na Yehova, Yona aayawo nave aahilaleerya o Ninive. Nave masu aalonceiye yaahiweeriha achu o Ninive opaka matorokelo. (Yona 3:5-10) Orweela wa Nehemiya ninnahuserya wi nnaphwanela ovekela nihaakumve waakhula. Nave orweela wa Yona ninnahuserya wi Yehova onamunikhaviherya omurumeela moohipwacha wunnuwa wa woova wahu. Nkuupuwelani, apwanne muloko onanwerya okhala wa woopopiha hiiha ntoko achu o Ninive?

¹³ Mikhalelo taani soophara muteko sini sookhaviheryeeni ovaha maakhulo oolipiha mmithukumano? Hankooni nthokororye sooleeliherya savakhaani.

14. Ntakhara heeni ninnaphwanela wiirehererya phaama ntakhara mithukumano sahu, nave ti liini nnaphwanelaahu weerano yeeyo?

¹⁴ Mwiirehererye ntakhara mithukumano soothene. Vaavaa munapakaanyu marehereryo woosiilo ni wiirehererya phaama, hamuni muukhuwe vooloca sa yeeyo munahaalaanyu waakhula. (Masi. 21:5) Mweeparipari, oothene ahu nookhalano marehereryo oohiyana vooloca sa wiirehererya ntakhara mithukumano. Eloise, naamukhweli yoowo orino iyaakha makhumi mathanu namararu, onapacerya omurehererya Mulipeleli omapacereryo wa esumana. Owo ooloca, “kinnapuha vancipale mithukumano wakhala wi koohuserya woosiilo.” Xoyi, murokora yoowo onalapa mmuteko wa mulaponi elukuluku yoothene, onniivaha elukuluku mu nihiku Naneeraru wi amuhuserye Mulipeleli awe nihiphin’ye nihiku na muthukumano. Owo ooloca:  “Enakhala yookhweya wuupuwelela wakhala wi koohuserya ohaakumve muthukumano.” Ike, mutokweene yoowo onakhala ooweiwa nave ori piyoneero, ooloca: “Kinnoona wi ti yoophwanelela wa miyo ohuserya mu elukuluku vakhaani vakhaani variyari va esumana opwaha ohuserya mu ekwaha emoha.”

15. Muni mwiireherye hai ntakhara muthukumano?

¹⁵ Tiheeni enavolowela wiirehererya phaama ntakhara mithukumano? Ilukuluku soothene, mvekele ntakhara munepa waweela muhaakumve opacerya oohuserya. (Luka 11:13; 1 Yoh. 5:14) Voocharela mmalihe aminutu vakhaani mvareryaka muru wa mwaha, miru mikhaani, maphwanaphwaniho, ni sooleeliherya sawaaceererya. Vano vaavaa munahuseryaanyu eparakrafo ti eparakrafo, mwaalakhanye soorepa sincipale sinaphwanyeya mpuwa mwa iparakrafo ntoko munaweryelaanyuvo. Muupuwelele sooleeliherya, nave mpwache phaama makupa yaawo munachunaanyu waakhulavo. Wakhala wi mohiirehererya phaama, munahaala okumiha mphurelo wawaaca nave enamukhala yookhweya wa nyuwo waakhula.—2 Kor. 9:6.

16. Ikaruma taani sinaphwanyeya wa nyuwo, nave munapharihela hai iho?

¹⁶ Wakhala wooweryeya mpharihele ikaruma ivahereryiwe mu elocelo musuwenlaanyu. Yehova, moorweela wa marehereryo awe, onnanivaha ikaruma mu ikhankoonya wi sinikhaviherye orehererya phaama mithukumano. Ni JW Library^® app nnanwerya okumiha soolaleeryiwa soohuserya mu ekhankoonya ahu. Voocharela nnanwerya ohuserya—naari akhweya waalakhanya naari owiriyana ekaruma—elukuluku nnachunaahu ni mu mpuro vyakala. Ancipale annampharihela JW Library app wi ehuserye variyari va elukuluku yawiichuuwa omutekoni naari osikola ni vaavaa anapakaaya mukwaha. Watchtower Library ni Watchtower ONLINE LIBRARY^™ onneeriha okhala wookhweya otholathola miyaha seiyo nnachunaahu ohuserya mwawiiseela.

17. (1) Ntakhara heeni ti yaphaama orehererya maakhulo mancipale? (2) Tiheeni munahuseryaanyu orweela wa exilema Torne-se Amigo de Jeová—Prepare seu comentário?

¹⁷ Wakhala wooweryeya murehererye maakhulo awaaca wa mwaha ti mwaha. Ntakhara heeni? Nthowa nawi akhweya hamuni muthanliwe elukuluku yoothene muneeraanyu mviihe moono. Akina anamviiha moono mu elukuluku emohamoha, nave mulipa aweeciha nikupa onammuthanla mmoha a yaawo. Wi mithukumano simale mu elukuluku yoophwanelela, muhooleli a nikupa onahaala okwatelela maakhulo mmakupa makina a yoohuserya. Mwawiihiiha muhikhale oonyeenyeya naari ooceecheya wakhala wi hoothanlileeni omapacereryo wa yoohuserya. Wakhala wi moorehererya maakhulo mancipale, munamukhalano ikari sincipale wi mwaakhule mu yoohuserya. Maakhulo munahaalaanyu orehererya munaphwanela ophitaanyerya waalakhanya yoorepa. Nyenya wakhala  wi munnawerya, murehererye tho naakhulo wi mperekhe mmasu anyu. *

18. Ntakhara heeni ti woochuneya ovaha maakhulo ookhuveya?

¹⁸ Mvahererye naakhulo nookhuveya. Wiiliwiili, maakhulo oolipiha anakhala ookhuveya nave ookhweya. Mwawiihiiha yoolakelelaanyu ekhale ovaha maakhulo ookhuveya. Mweererye okotela mu asekuntu makhumi mararu. (Masi. 10:19; 15:23) Waakhanle wi munnaakhula mmithukumano mu iyaakha sincipale, ti yookhweleya wa nyuwo ovaha ntakiheryo naphaama na operekha maakhulo ookhuveya. Wakhala wi munnaloca mu elukuluku yincipale, akina anamoopopiheya, yuupuwelaka wi heni ewerye ovaha naakhulo hiiha ntoko nyuwo muneerelaanyu. Navetho, maakhulo ookhuveya enneeriha wi achu ancipale epake makupa mmuthukumano. Xaxaxa wakhala wi moothanliwa wuupaceryani, mvahe naakhulo nookhweya ni nooluluwanya. Muheererye oloca mwaha woothene mu eparakrafo. Mwaha wooluluwanya wa eparakrafo omanle othokororyiwa, nyuwo munanwerya waakhula makupa anahalela.—Moone ekaaxa “ Tiheeni Kinaphwanelaaka Waakhula?”

19. Mulipa aweeciha nikupa oni ookhaviheryeeni hai, nave tiheeni munaphwanelaanyu opaka?

¹⁹ Mmuleele mulipa aweeciha nikupa wi munnachuna waakhula va eparakrafo yooluluwanya. Wakhala wi moothanla weerano yeela, munaphwanela omwaacamela mulipa aweeciha nikupa mithukumano ihaakumve opacerya. Vaavaa enaphiyaaya elukuluku ya waakhula mu eparakrafo yeeyo, mviihe ntata nanyu mwawaakuveya nave mucukhulele musuluxa wi mulipa aweeciha nikupa awerye owoonaani.

20. Mmukhalelo taani muthukumano wa muloko onalikanaaya ni yoolya enuukiwa ni asinthamwene?

²⁰ Moone mithukumano sa muloko ntoko yoolya yeeyo enuukiwa ni asinthamwene aphaama. Waakhanle wi moowompwa wi mulye ni akina a mmulokoni nave mvekiwa orehererya ichu sookhweya sa yoolya, mwaahaala waakhulela hai? Nyuwo mwaamukhala awuukhuwa vakhaani, nyenya mwaahaala wiilipiserya wi muruuhe echu yeeyo muchu ti muchu aahaaleiye osiveliwano. Yehova, Mulipa oowaakhela aleco ahu, onnanivahererya meesa yaawo osaren’yevo ichu saphaama mmithukumano. (Sal. 23:5; Mat. 24:45) Nave owo onnahakalala vaavaa nnaruuhaahu yoovaha yookhweya, yoophwanelela yeeyo nnaweryaahu ovaha. Mwawiihiiha mwiirehererye phaama nave mvahe maakhulo ophiyerya munaweryelaanyuvo. Mweerano hiiha hamuni pahiru mulye va meesa a Yehova nyenyatho munamuruuha yoovaha wi muuke ni muloko.