MWAHA WOOHUSERYA 5
Nnahaala Oya Weiwo ni Nyuwano
“Nnatxhuna oya weiwo ni nyuwano, ntakhara nosuwela wi Muluku ori ni nyuwano.”—ZAK. 8:23, BNM.
NCIPO 26 “Mukerenle Miyo”
YEEYO NNAHAALAAHU OHUSERYA *
Ipucepuche ikina (“amalapo khumi”) sinnacicimiheya vaavaa inamulapelaaya Yehova vamoha ni oothanliwa (“mutxhu o Yudeya”) (Moone iparakrafo 1-2)
1. Tiheeni Yehova aalonceiye wi yaahaala weereya mmahiku ahu?
YEHOVA aahiloherya vooloca sa elukuluku ahu: “Mutxhu o Yudeya oni anàmphariwa oniveruni wa ekuwo awe t’amalapo khumi a ilotxelo sòhiyana-hiyana eriki: ‘Nnatxhuna oya weiwo ni nyuwano, ntakhara nosuwela wi Muluku ori ni nyuwano.’” (Zak. 8:23) Vaava “mutxhu o Yudeya” onaweemelela yaale Muluku aathanlileiye ni Munepa waweela. Awotho aniichaniwa “muloko wa Muluku, [eyo tiwi] aIsarayeli.” (Gal. 6:16) “Amalapo khumi” anaweemelela yaale arino ewehereryo ya okhala ni ekumi okhala wookhala veelaponi yavathi. Awo annasuwela wi Muluku ooreeliha nikhuuru na oothanliwa ni munepa waweela, navetho wi aakhalano ncicimiho omulapela Yehova vamoha ni yaawo.
2. Mmukhalelo taani “amalapo khumi” anaacharaaya oothanliwa ni munepa waweela?
2 Naamwi ohiri wooweryeya osuwela nsina na oothanliwa ori oothene olelo, * yaale arino ewehereryo ya okhala veelaponi yavathi ananwerya “oya weiwo” ni oothanliwa. Mwawiihai? Piipiliya onaloca wi “amalapo khumi” yaahaala ‘ophara oniveruni wa ekuwo ya muchu o Yuteya eriki: ‘Nnatxhuna oya weiwo ni nyuwano, ntakhara nosuwela wi Muluku ori ni nyuwano.’’ Eversikulu ela ya Piipiliya enamuloca muchu o Yuteya mmoha. Nyenya masu awi “nyuwano” anooniherya wi tahi muchu mmoharu. Ela enataphulela wi mchu o Yuteya hanaahiwa muchu mmoha pahiru, nyenya oneemelela nikhuuru noothene na Akristu oothanliwa ni munepa waweela. Yaale ahithanliwe ni munepa waweela annamurumeela Yehova vamoha ni oothanliwa. Mwawiihiiha, awo haanawoona oothanliwa ni munepa waweela ntoko ahooleli aya, nthowa nawi anniiwexexa wi Yesu tori Muhooleli aya.—Mat. 23:10.
3. Makoho taani anahaala waakhuliwa mmwaha yoola?
3 Woona wi nlelo oothanliwa ari veeri va achu a Muluku olelo, akina anamphiyerya wiikoha: (1) Oothanliwa ni munepa waweela anuupuwela hai vooloca sa yaawo meekhaaya? (2) Anaphwanela okhalihiwa hai yaale analya ephaawu ni owurya eviinyu va Mukonelo? (3) Apwanne ninnaphwanela wuukhuwa waakhanle wi annaaceereryeya yaale analya ephaawu ni owurya eviinyu va Mukonelo? Mwaha ola onahaala waakhula makoho yaala.
OOTHANLIWA ANAPHWANELA WIISOONAKA MWAWIIHAI?
4. Olopola taani onaphwanyeya mu 1 Korinto 11:27-29 yoowo oothanliwa ni munepa waweela anaphwanelaaya wuupuwelela mwawiiseela, nave ntakhara heeni?
4 Oothanliwa anaphwanela wuupuwelela mwawiiseela vooloca sa olopola yoowo onaphwanyeya mu 1 Korinto 11:27-29. (Mwaalakhanye.) Mmukhalelo taani oothanliwa ni munepa waweela oneereiye alye ephaawu ni owurya eviinyu “moohiphwanelela”? Owo onahaala weerano eyo wakhala wi onnalya ephaawu ni owurya eviinyu aniiha ahikhalaka mwawiiwanana ni malamulo awookololowa a Yehova. (Ahe. 6:4-6; 10:26-29) Oothanliwa annasuwela wi anaphwanela otitelela okhala ororomeleya yaariki yaakhele “yoochuwela ene wiichaniwa wirimu onarweela wa Muluku mwa Yesu ori Kristu.”—Fil. 3:13-16.
5. Akristu oothanliwa ni munepa waweela anaphwanela woonaka hai vooloca sa yaawo?
5 Munepa waweela wa Yehova onnaakhaviherya alapeli awe okhala awiiyeviha, ohiya awiirumiha. (Éfe. 4:1-3; Kol. 3:10, 12) Mwawiihiiha oothanliwa hanuupuwela wi tookhweleyaxa wapwaha akina. Oothanliwa annasuwela wi Yehova hanaavaha munepa waweela wawaaca waapwaha alapeli awe akina. Awo haniisoona wi aakhalano wiiwexexa wawiiseela vooloca sa iparipari sa Piipiliya waapwaha akina. Nave hanamuleela muchu mukina wi oothanliwa ni munepa waweela nave wi onaphwanela opacerya olya ephaawu ni owurya eviinyu va Mukonelo. Ohiya yeeyo, mwawiiyeviha awo annasuwela wi pahiru Yehova tonaawopa achu wi eye wirimu.
6. Mwawiiwanana ni 1 Korinto 4:7, 8, Akristu oothanliwa anaphwanela okhala a mukhalelo taani?
6 Naamwi esuwelaka wi aakhalano ncicimiho nthowa na wiichaniwa wi eye wirimu, awo hanaweherya wi akina yaakhaliheke mmukhalelo wavameekhaaya. (Fil. 2:2, 3) Awotho annasuwela wi vaavaa Yehova aathanlileiye haamuleenle muchu mukina wi asuwele vooloca sa yeeyo. Mwawiihiiha, oothanliwa hanatikhiniheya wakhala wi muchu mukina haneemererya wi awo aathanliwa ni munepa waweela. Oothanliwa oosuwela wi Piipiliya onnaleela wi hannaphwanela waakuvela weemererya wi Muluku oomvaha muchu murici wavameekhaaya. (Wup. 2:2) Ahichunaka wi acicimihiweke, Mukristu othanliwe ni munepa waweela hanamuleela muchu ti muchu onakumaneiyeno mu ekhwa yoopacerya wi oothanliwa ni munepa waweela. Nave owo haahaala wiirumiha wa akina nthowa na othanliwa wawe.—Mwaalakhanye 1 Korinto 4:7, 8.
7. Tiheeni oothanliwa anaphwanelaaya osepa opaka, nave ntakhara heeni?
7 Akristu oothanliwa hanaphwanela wuupuwela wi pahiru anaphwanela omalihaka elukuluku ni oothanliwa akhwaaya, ekhalaka ntoko achu anikhuuru navameekhaaya. Awo hanawaavya oothanliwa akina, echunaka ovaanela miyaha vooloca sa othanliwa waya, naari opaka makhuuru mwawiipitheya wi emuhuseryeke Piipiliya. (Gal. 1:15-17) Muloko honahaala okhala wawiiwanana wakhala wi oothanliwa annapaka ichu ntoko seiya. Awo yaahaala olapaka moovaanyihana ni munepa waweela, yoowo onaakhaviherya alapeli a Muluku okhala a murecele ni awiiwanana.—Aro. 16:17, 18.
OTHANLIWA ANAPHWANELA OKHALIHIWAKA HAI?
Hannaphwanela waakhaliha oothanliwa naari achu akina yaawo anahoolela ntoko oocicimiheyasa waapwaha akina (Moone eparakrafo 8) *
8. Ntakhara heeni munaphwanelaanyu okhalano ekaasoope vooloca sa mukhalelo munaakhalihaanyu yaale analya ephaawu ni owurya eviinyu va Mukonelo? (Moone tho masu avathi.)
8 Nnaphwanela waakhalihaka hai anna ni arokora oothanliwa ni munepa waweela? Yaahaala okhala yoonanara omukhalihaka mmukhalelo wavameekhaaya muchu, naamwi okhalaka wi munna naari murokora oothanliwa a Kristu. (Mat. 23:8-12) Vaavaa Piipiliya onaloceiye sa atokweene, owo onanceenyerya wi nnaphwanela ‘otakiherya nroromelo naya,’ nyenya owo hananleela wi nnaphwanela omweera muchu vyakala okhala muhooleli ahu. (Ahe. 13:7) Eparipari wi Piipiliya onnaloca wi akina “annaphwanela ocicimihiwa wiili.” Nyenya eri hiiha nthowa nawi ti yaawo “anuukhuwa mmasu ni mmahusiheryo,” ohiya nthowa nawi awo toothanliwa ni munepa waweela. (1 Tim. 5:17) Wakhala wi ninnavaha ncicimiho noopwahererya oothanliwa, nnahaala owuuliha muru. * Yoothananihaxa, naahaala oweeriha yaawo okhala awiirumiha. (Aro. 12:3) Haavovo mmoha a hiyo onachuna opaka echu vyakala yeeyo enahaala oweeriha anna oothanliwa a Kristu opaka yoocheka yeela etokotoko!—Luka 17:2.
9. Nni nooniherye hai wi ninnaacicimiha Akristu oothanliwa?
9 Nni nooniherye hai wi ninnaacicimiha yaale athanliwe ni Yehova? Hannaphwanela waakoha mukhalelo athanliwaaya ni munepa waweela. Ola mwaha wa muchu ti muchu, yoowo nihinaphwanelaahu ovolowela. (1 Tes. 4:11; 2 Tes. 3:11) Nyenya hannaphwanela wuupuwela wi asiiyaya, asaaraya, asitiithi aya, naari achu akina aveemusini toothanliwa ni munepa waweela. Muchu hanarava ewehereryo ya wirimu ni mmusi awe. Owo onaakhela orweela wa Muluku. (1 Tes. 2:12) Nnaphwanelatho osepa opaka makoho yaawo anahaala waasoosiha murima akina. Ntoko yootakiherya, hannaphwanela omukoha mwaara a munna yoole othanliwe ni munepa waweela vooloca sa mukhalelo onooneiye okhala ni ekumi yoohimala veelaponi ahiri ni iyawe. Opwaha soothene, nnaphwanela ororomela moomalela wi mu elapo evyaani, Yehova onahaala ‘ohakalaliha soopatushiwa soothene.’—Sal. 145:16.
10. Nni niikhapelele hai wakhala wi ninnasepa waacicimiha akina moopwahaxa?
10 Wakhala wi hannaakhaliha oothanliwa ntoko achu oochuneyaxa, nnahaala wiikhapelela mukhatiihu. Mwawihai? Piipiliya ooloca wi oothanliwa akina heni etitelele okhala oororomeleya. (Mat. 25:10-12; 2 Pet. 2:20, 21) Nyenya wakhala wi noosepa waacicimiha akina moopwahaxa, hanirwa naachara akina, ophiyerya yaale ari oothanliwa naari yaale anasuweliwa phaama, naari yaale amurumeenle Yehova mu elukuluku yincipale. (Yuda 16) Voocharela, wakhala wi aahiya okhala oororomeleya naari aahiya muloko, hinni niyeleele nroromelo nahu mwa Yehova naari ohiya omurumeela.
APWANNE NINNAPHWANELA WUUKHUWA NI WAACA WA YAALE ANALYA EPHAAWU NI OWURYA EVIINYU VA MUKONELO?
11. Tiheeni eneereya ni waaca wa yaale analya ephaawu ni owurya eviinyu va Mukonelo?
11 Mu iyaakha sa muculi, yaale analya ephaawu ni owurya eviinyu va Mukonelo yaamvira evukuwaka. Nyenya mu iyaakha sahiihaanoru, anamvira yaaceereryeyaka. Apwanne ninnaphwanela wuukhuwa nthowa yeela? Hooye. Hankooni nthokororye ntakhara heeni nihinaphwanelaahu.
12. Ntakhara heeni hannaphwanela okhala awuukhuwa ni waaca wa yaale analya ephaawu ni owurya eviinyu va Mukonelo?
12 “Apwiya [Yehova] àhasuwela yale ari awaya.” (2 Tim. 2:19, BNM.) Moohiyana ni Yehova, anna yaawo anawaalakhanyerya yaale analya ephaawu ni owurya eviinyu va Mukonelo hanamusuwela taani chiryene othanliwe ni munepa waweela. Mwawiihiiha waaca onaphitaanyerya yaale anuupuwela wi aathanliwa eniiha ehithanliwe. Ntoko yootakiherya, akina a yaawo yaalya ephaawu ni owurya eviinyu va Mukonelo ohoolo waya aahiya. Akhweya akina aakhalano makacamiho a mmuupuweloni yaawo yaaweerinhe ororomela wi anahaala olamulela ni Kristu wirimu. Mweeparipari, hannaasuwela oothanliwa akavi xaxaxa ahanle veelaponi yavathi.
13. Apwanne Piipiliya onnaloca waaca wa oothanliwa yaawo eni ehale veelaponi yavathi vaavaa yoohooxa etokotoko enahaalaaya opacerya?
13 Anamukhalavo oothanliwa mmapuro oohiyanahiyana veelaponi ya vathi elukuluku Yesu onahaaleiye orwa wi aakuxe yaawo wi ayeno wirimu. (Mat. 24:31) Piipiliya onaloca wi variyari va mahiku okuchula, eni ekhalavo oothanliwa vakhaani yaawo eni ehale veelaponi yavathi. (Wup. 12:17) Nyenya Piipiliya hanaloca waaca wa oothanliwa yaawo eni ehale veelaponi yavathi vaavaa yoohooxa etokotoko enahaalaaya opacerya.
Nnaphwanela waakhulela hai wakhala wi muchu onnalya ephaawu ni owurya eviinyu va Mukonelo (Moone eparakrafo 14)
14. Hiiha ntoko yooniheryiwaaya mu Aroma 9:11, 16, tiheeni nnaphwanelaahu wiiwexexa vooloca sa othanliwa wa yaale anahaala olamulela ni Kristu wirimu?
14 Yehova tonalakelela elukuluku onaathanleiye yaale anahaala olamulela ni Kristu. (Aro. 8:28-30) Yehova opacenrye waathanla yaale anahaala olamulela ni Kristu, Yesu amanle oviihiwa mookhwani. Ela enooniherya wi mu nsana noopacerya, Akristu oothene yaari oothanliwa ni munepa waweela. Mu iyaakha soothene soocharela, ancipale a yaale yaaloca wi yaari Akristu hiyaari oomuchara a Kristu eeparipari. Naamwiihiiha, variyari va iyaakha seiye, Yehova aahaathanla ni munepa waweela achu avakhaani yaawo yaari Akristu eeparipari. Akristu oohiroromeleya ale, yaari ntoko tiriku yoowo Yesu aamulonceiye wi aahaala wunnuwa variyari va ntakataka. (Mat. 13:24-30) Variyari va mahiku ookuchula, Yehova onnatitelela waathanla yaale anahaala opaka makupa mu nikhuuru na 144,000. * Mwawiihiiha waakhala wi Muluku oolakelela waathanla achu ntoko yaawo ehaakumve ophiya makuchuwelo, mweeparipari hannaphwanela waakaaha miruku sawe. (Mwaalakhanye Aroma 9:11, 16.) * Nnaphwanela okhalano ekaasoope wi nihikhale ntoko anamalapa yaawo Yesu aalonceiye mu niphwanaphwaniho nawe nimoha. Awo hiyaasiveliwe ni mukhalelo Pwiyaya aakhalinheiye yaale yaapacenrye olapa mu ewora yookuchula.—Mat. 20:8-15.
15. Apwanne oothanliwa oothene annapaka makupa mu nikhuuru na “mulapeli òroromeleya ni awisuwela” yoowo oromoliwe mu Mateu 24:45-47? Mutharihe.
15 Tahi wi oothene yaale arino ewehereryo ya oya wirimu anapaka makupa mu nikhuuru na “mulapeli òroromeleya ni awisuwela.” (Mwaalakhanye Mateu 24:45-47.) Hiiha ntoko mu nsana noopacerya, Yehova ni Yesu annaapharihela anna avakhaani wi yaalyihe, naari waahusiha achu ancipale. Pahiru Akristu oothanliwa avakhaani mu nsana noopacerya, ti yaaphariheliwe wi erepe Soorempwa sa Ekriki Seekristu. Olelo, pahiru Akristu oothanliwa avakhaani tarino murici wa waavaha achu a Muluku “yolya mwa elukuluku yophwanelela.”
16. Tiheeni muhusenryaanyu mmwaha yoola?
16 Tiheeni mwaha ola onihusinhaaya? Yehova oolakelela waavaha ekumi yoohimala achu awe ancipale veelaponi yavathi, ni ekumi yoohimala wirimu wa achu vakhaani yaawo anahaala olamulela ni Yesu. Yehova onnaareeliha akapuro awe oothene—“mutxhu o Yudeya” hiiha ntoko “amalapo khumi”—nave owo onachuna wi makhuuru oomeeli, yiiweleleke malamulo mamohamoha ni otitelela okhala oororomeleya. Oothene anaphwanela otitelela okhala awiiyeviha. Oothene anaphwanela omurumeela Yehova vamoha nave mwawiiwanana. Nave oothene anaphwanela wunnuwiha murecele mmulokoni. Vaavaa nnaacamelaahu omakuchuwelo, hankooni oothene ntitelele omurumeela Yehova ni omuchara Kristu ntoko “muhuwo mmoha.”—Yoh. 10:16.
^ par. 5 Eyaakha yeela Yawuupuserya ya okhwa wa Apwiya Yesu Kristu enahaala weereya nihiku nanaawiili 7 a Apirili. Nnaphwanela waakhaliha hai yaale eni elye ephaawu ni owurya eviinyu va Mukonelo? Apwanne nnaphwanela wuukhuwa waakhala wi annaaceereryeya yaale analya ephaawu ni owurya eviinyu? Nnahaala ophwanya maakhulo a makoho yaala mmwaha yoola, yoowo onathipeleya mmwaha yoowo onaphwanyeya mu Mulipeleli a Yaneru a 2016.
^ par. 2 Mwawiiwanana ni Salumu 87:5, 6, muhoolo Muluku onahaala wuupulula masina a oothene yaale analamulela ni Yesu wirimu—Aro. 8:19.
^ par. 8 Moone ekaaxa “Osivela ‘Honera Etxhu Yohiphwanelela’” mu Mulipeleli a Yaneru a 2016 epaaxina 27.
^ par. 14 Naamwi Saweriwa T’arummwa 2:33 ooniheryaka wi munepa waweela onnavahereryiwa orweela mwa Yesu, Yehova tonanwopa muchu ti muchu.
^ par. 14 Wa sooleeliherya sawaaceererya, moone “Makoho a Alipa Waalakhanya” mu Mulipeleli 1 a Maiyu, a 2007.
NCIPO 34 Weeca Moororomeleya
^ par. 56 ERUKU VA EPAAXINA: Mwaanyiherye wi munna aweemelela nipuro nahu ntokweene vamoha ni mwaariye aarukureryiwa ni achu va muthukumano wa muceche ekumihaka iruku saya. Hinaahaala okhala ncicimiho!
