1. Mu iyaakha vakhaani muculi ophiyerya olelo, matorokelo taani anapakeya mu ilapo ikina?

VARIYARI va iyaakha macikhwi muculi, achu mu elapo yoothene yaahikhalano malapelo aya. Nyenya, mu iyaakha vakhaani ivirale ophiyerya olelo, mukhalelo ti woohiyana vancipale. Waaca wa yaale analoca wi hanayawo okerexa onamvira waaceereryeyaka. Mu ilapo ikina, achu awaaca analoca wi hanayawo okerexa. *—Mat. 24:12.

2. Mathowa taani akhweya anaweeriha achu ohiyawo ekerexa?

² Ntakhara heeni achu analoca wi hanayawo okerexa ananvira yaacaka? * Akhweya akina anaweiwa ni soohakalaliha naari sawuukhula sa ekumi. (Luka 8:14) Akina hanamweemererya Muluku. Nto akina annamweemererya Muluku, nyenya anuupuwela wi ekerexa yoovireliwa, nave henaruuha mphurelo, nave wi henavarihana ni siyensiya. Akhweya ahiiwa ni asinthamwene aya, ahusiha naari achu awaaca elocaka wi othatuwa mwaha weeparipari, nyenya hatonko wiiwa mathowa oophwanelela a omuroromela Muluku. Opwaha yeeyo, aakhalavo achu ahinachunaru wiiwa vooloca sa ekerexa nthowa nawi ahooleli a ikerexa annapaka soothene anaweryaaya wi yiiphwanyerye ikhorowa ni owerya. Navetho aakhalavo achu yaawo anakhala mu ilapo seiyo alamuleli anatikitheryaaya malamulo yaawo anawatiiha miteko sa malapelo.

3. Tiheeni nnahaalaahu ohuserya mmwaha yoola?

³ Yesu oonilamulela oya ‘wa achu a maloko oothene wi naapakeke ohuserya.’ (Mat. 28:19) Nni naakhaviherye hai achu ahirino malapelo omusuwela ni omusivele Muluku, nave okhala oohuserya  a Kristu? Nnaphwanela osuwela wi nipuro muchu ophwiiweiyewo nnanwerya ovolowela mukhalelo oneereiye aakhulele michaka sahu. Ntoko yootakiherya, muchu ophwiiwale mu elapo yo Europa onamwaakhulela mmukhalelo woohiyana ni muchu onakhuma mu elapo yo Asiya. Ntakhara heeni? Mu elapo yo Europa, achu aasuwela echu vooloca sa Piipiliya nave ahiiwa wi Muluku topatunse ichu soothene. Nyenya o Asiya, achu ancipale asuwenle vakhaani vooloca sa Piipiliya naari hasuwenle nave akhweya haneemererya tho wi Mpatusa ookhala. Mwa yeeyo, mmwaha yoola nnahaala ohuserya mukhalelo wa otannya murima wa oothene yaale nnaalaleeryaahu, moohipwacha ti woowi anakhumaayawo ni ichu aneemereryaaya.

4. Ntakhara heeni ninnaphwanela okhalano moonelo woophwanelela?

⁴ Mukhaleno moonelo woophwanelela. Mu eyaakha eri yoothene, achu yaawo yahaarino malapelo annakhala Anamoona a Yehova. Ancipale a yaawo yaahikhalano meecelo aphaama nave yaanakhala awuukhuwa ni sawootha sa malapelo yatheru. Akina yaahikhalano meecelo yeemererya soothene nave yaanaphwanela ohiya muculi sookhovelela soonanara. Nnikhaviheryo na Yehova, ninnaroromela wi nnamwaaphwanya yaale “yaalakhanyeriwe waakhela okumi woohimala.”—Saw. 13:48; 1 Tim. 2:3, 4.

5. Tiheeni enaweeriha achu waakhulela phaama michaka sahu?

⁵ Mukhale Ooreera Murima ni Oocicimiha. Wiiliwiili achu annaakhulela phaama michaka sahu ohiya nthowa na yeeyo nnalocaahu, nyenya nthowa na mukhalelo nnalocaahu. Awo annasiveliwa vaava nnakhalaahu ooreera murima, ni ancicimiho ni vaavaa nnaathokororyaahu. Hiyo hinnaakhinyererya achu weemererya moonelo ahu. Ohiya yeeyo, ninneererya wiiwexexa moonelo aya vooloca sa yeeyo anuupuwelaaya sa ekerexa nave ntakhara heeni anuupuwelaaya hiiha. Ntoko yootakiherya, akina hanasiveliwa oloca sa malapelo ni achu ahaasuwenlaaya. Akina anoona wi ohikhala miruku omukoha mukina moonelo awe vooloca sa Muluku. Nave aakhalavo akina anuuliwa muru wooniwa emwaalakhanyaka Piipiliya, xaxaxa ni Namoona a Yehova. Moohipwacha mukhalelo ene, nnaphwanela othokororya moonelo wa achu.—2 Tim. 2:24.

6. Paulo oonihenrye hai wi haalekela otoroka mwaha, nave nni nimutakiherye hai?

⁶ Achu akina akhweya heni esiveliwe vaavaa nnapharihelaahu masu ntoko “Piipiliya” “opatusiwa” “Muluku” ni “ekerexa”. Tiheeni nnaphwanelaahu weera? Mmutakiherye murummwa Paulo nave musuweleke otoroka mapaceryiho anyu. Vaavaa owo aaloceiye ni Ayuta, Paulo aanavaanela ni yaawo apharihelaka Soorempwa. Nyenya vaavaa owo aalonceiye ni mafiloosofo o Kreko o Areyoopako, owo aahilakelela ohipharihela Masu a Muluku mooluluwanya. (Saw. 17:2, 3, 22-31) Vano nni nimutakiherye hai Paulo? Wakhala wi munavaanela ni muchu yoowo ohinamweemererya Piipiliya, enamukhala yamiruku ohimuromola Piipiliya mooluluwanya. Vano wakhala wi moosuwela wi muchu hanakhala otaphuwa wooniwa amwaalakhanyaka Piipiliya ni nyuwo, mweererye omooniha soorepa mmukhalelo oni ohisuwanyeye— ntoko yootakiherya, mu telefone.

7. Wi ncharihe yootakiherya ya Paulo, yeeyo naalakhanyaahu mu 1 Korinto 9:20-23, tiheeni akhweya nnaphwanelaahu opaka?

⁷ Mukhale Awiiwexexa Nave Nwiriyane. Nnaphwanela wiilipiserya wi niiwexexe ntakhara heeni achu yaawo nnaalaleeryaahu annoona naari annuupuwela mmukhalelo wammoori. (Masi. 20:5) Muupuwele wanaawiili yootakiherya ya Paulo. Owo unnunwe variyari va Ayuta. Wi awerye olaleerya wa achu a maloko makina, yaawo yaasuwenle vakhaani naari yahaasuwenleru echu vooloca sa Yehova ni Soorempwa, moohikhwa minikwa owo aaphwanela otoroka mukhalelo wa olaleerya. Mmukhalelo woolikana, wi niiwexexe phaama moonelo naari muupuwelo  wa achu a ekulucu ahu, akhweya onamuchuneya opaka otholathola naari waakoha alaleeryi akina yaawo arino mavyakelo.— Mwaalakhanye 1 Korinto 9:20-23.

8. Tuuvi ori mukhalelo mmoha wa opaceryiha ovaanela vooloca sa Piipiliya?

⁸ Yoolakelelaahu enaphwanela okhala waaphwanya achu ‘anaphwanelela.’ (Mat. 10:11) Wi nikhumelele phaama, nnaphwanela waakoha achu moonelo aya ni waawiriyana moopwacha yeeyo analocaaya. Munna mmoha o Inklatera onnaakoha achu moonelo aryaayano vooloca sa mukhalelo wa okhalano othela woohakalala, mukhalelo wa waaphuwa anamwane ni mukhalelo wa ohoolela ohookololowa. Amala wiiwa naakhulo naya, owo onnaloca, “Munoona hai malakiheryo ala yaawo arempwe iyaakha macikhwi meeli muculi?” Voocharela, ahilonce masu awi “Piipiliya”, owo onnawooniha yoorepa yoochuneya mu telefone awe.

9. Nni nimukhaviherye hai muchu yoowo ohinasiveliwa oloca sa Muluku?

⁹ Wakhala wi nomphwanya muchu yoowo ohinasiveliwa oloca sa Muluku, nnanwerya otannya murima awe moorweela wa oloca mwaha onapaka makupa a okumi awe wa nihiku ti nihiku. Ntoko yootakiherya, achu anceene annoona wi soopatuxiwa ti sootikhiniha. Vano, akhweya munanwerya oloca echu ntoko ela: “Nyuwaano munaphwanela osuwela wi ichu sincipale ikhanlevo, irivovo nthowa nawi achu atakihenrye soopatusiwa seiyo sikhanle. Ntoko yootakiherya, achu anapaka mikrofoni awo anahuserya mukhalelo wa iwaru, nave achu anapaka ikaamera awo anahuserya niitho. Vano munoona hai vooloca sa soopatuxiwa?” Munoona ntoko owerya wootikiniha, akhweya muchu naari echu ekina? Mmanle onwiriyana moopwacha, munanwerya waaceererya: “Nto nookhalavo nikoho: ‘Vano achu yaawo anapaka mikrofoni ni ikaamera, anahuserya orweela wawani vaavaa anahuseryaaya mukhalelo ewaru ni niitho inalapaaya?’ Miyaano kinnoona okhala yaphaama yeeyo namaloca mmoha akhalai orempeiye: ‘Akhweya yoowo opanke naaru haniiwa? Yoowo opanke niitho hanoona? Ti yoowo onavaha osuwela!’ masiyentista akina aaphiyerya makuchuwelo yaala.” (Sal. 94:9, 10) Nave voocharela mwaahaala ovolowa mu site jw. org^® muye va “Entrevistas e Casos Reais” nave mmoonihe emoha ya ixilema sinaloca “A Origem da Vida: Teorias e Fatos”. (Muye va PUBLICAÇÕES > VÍDEOS.) Naari nyuwaano mwaahaala omvaha eproxura A Vida —Teve um Criador? naari eproxura A Origem da Vida—Cinco Perguntas Que Merecem Resposta.

10. Nni nipacerye hai ovaanela ni muchu yoowo ohinachuna oloca sa Muluku?

¹⁰ Achu ancipale annaweherya omwaahiyu waphaama. Nyenya akina anoova wi Elapo enahaala  otoloxiwa naari wi honi okhale wooweryeya okhala mwemmo. Ooweherya ekulucu mmoha o Noruweka olonce wi achu yaawo ahinachuna oloca sa Muluku ilukuluku sincipale awo annasiveliwa oloca mukhalelo wa elapo. Amanle waaxeliha achu, owo onnaloca: “Taani nyuwaano munamupuwelaanyu wi onahaala onivaha omwaahiyu waphaama? Apwanne alamuleli, masiyentista naari muchu mukina?” Amanle owiriyana phaama, onnaalakhanya naari oloca yoorepa ya Piipiliya yeeyo enaloca sa omwaahiyu waphaama. Akina annasiveliwa osuwela wi Piipiliya onnaroromeliha wi elapo herwa etoloxiwa nave wi achu awookololowa murima anamukhala mweelaponi okhala wookhala.—Sal. 37:29; Ekle. 1:4.

11. Ntakhara heeni nnaphwanelaahu opharihela meerelo oohiyanahiyana elukuluku nnalaleeryaahu, nave nni ncharihe hai yootakiherya ya Paulo enaphwanyeya mu Aroma 1:14-16?

¹¹ Ti yaphaama opharihela meerelo oohiyanahiyana wi naalaleerye achu. Ntakhara heeni? Nthowa nawi achu toohiyana. Echu yeeyo eri yoochuneya wa muchu mmoha, heni ekhale tho yoochuneya wa mukina. Akina hanuukhuleya oloca sa Muluku naari sa Piipiliya. Nave akina annaakhulela phaama vaavaa nnapaceryaahu oloca miyaha mikina. Mmikhalelo soothene, nnaphwanela ophwanya ekari ya olaleerya wa achu oothene. (Mwaalakhanye Aroma 1:14-16.) Nyenya nihicuwale wi Yehova tonawerya wunnuwiha eparipari mmurimani mwa yaale anachuna opaka yeeyo eri yawookololowa.—1 Kor. 3:6, 7.

12. Tiheeni nnaphwanelaahu opaka wi naakhaviherye achu a elapo yo Asiya ahinasuwela echu vooloca sa Mpatusa?

¹² Mu elapo yoothene, alaleeryi annaaphwanya achu yaawo anakhuma elapo yo Asiya. Akina a yaawo anakhuma mu elapo yeeyo oriwo malamulo anahiiha miteko sa malapelo. Mu ilapo soohiyanahiyana so Asiya, achu ancipale hatonko wuupuwela waakhanle wi chiryene Mpatuxa ookhala. Akina annakhala ootikhiniheya nave anneemererya mwawaakuveya vaavaa nnaavahaahu yoohuserya ya Piipiliya. Nto akina hanakhalano nchuno nawaaca wi ehuserye sooleeliherya ivyaani. Vano nni naalaleerye hai yaawo? Alaleeryi yaawo arino mavyakelo annakhumelela phaama moorweela wa opaceryiha ochekulela woonthamwene, waapwacha achu, nave wakhala woochuneya oloca mukhalelo ekumi aya etoroken’yaaya vaava yaapacenryaaya ochariha malakiheryo a Piipiliya.

13. Tiheeni enahaala omweeriha muchu ochuna owiriyana masu a Piipiliya? (Moone eruku va ekaapa.)

¹³ Echu enaweeriha achu olekecheya ni Piipiliya iri miruku seiyo owo onathariheiye vooloca sa okumi wa nihiku ti nihiku. (Ekle. 7:12) Murokora mmoha o Nova York yoowo onasiveliwa waalaleerya achu yaawo analoca Emantarim oriye: “Miyo kinneererya wooniherya nchuno wa achu ni owiriyana yeeyo analocaaya. Wakhala wi awo anamarwa anamphiyaru, kinnaakoha: ‘Wiikhoveleliha wanyu elapo yeela oneeca hai? Apwanne moophwanya muteko? Apwanne achu a wenno annookhalihaani phaama?’” Ikwaha ikina, eyo ennahula ephiro wi murokora aloce nihusiheryo na Piipiliya. Wakhala wi ti woophwanelela, murokora onnakoha: “Mmoonelo anyu, echu taani eri yoochuneya wi nikhaleke awiiwanana ni achu akina? Munnakeemererya wi kiwooniheeni nsiposipo na Mpiipiliyani? Nno nni: ‘Opacerya waakhulana ori ntoko ocuuwa wa maahi, omalihe mwaha ohaakumve otepa.’ Munoona wi miruku iha inamunikhaviherya okhalihana phaama ni akina?” (Masi. 17:14) Ovaanela mmukhalelo yoola onanwerya onikhaviherya osuwela waakhanle wi muchu owo aamusiveliwa wi nikooke ikwaha soocharela.

14. Munna a makupa Onakhumawo Nsuwa a Asiya onaakhaviherya hai achu yaawo ahinamweemererya Muluku?

¹⁴ Hanka achu ale analoca wi hanamweemererya Muluku? Munna mmoha, yoowo orino mavyakelo a waalaleerya achu a makupa Onakhumawo Nsuwa a Asiya, onnathariha: “Mu ikwaha sincipale, vaavaa muchu onaloceiye wi: ‘Nkinamweemererya Muluku’, owo onachuna oloca  wi hanaweemererya amuluku yaawo achu a vanipuroni anaalapelaaya. Wiiliwiili kinnaweemererya yaawo nave kinnaloca wi amuluku ancipale tahi eeparipari, navetho wi apakiwe ni achu. Nto, kinnaalakhanya yoorepa ya Yeremiya 16:20: ‘Muchu hanawerya wiipakela amuluku awe! Yeeyo enapakiwa tahi Muluku!’ Voocharela kinnamukoha: Vano nni nsuwele hai waakhanle wi muluku teeparipari naari wi opakiwe ni achu?’, kinnawiriyana moopwacha naakhulo nawe, voocharela, kinnaalakhanya yoorepa ya Isaiya 41:23, BNM: ‘Munlèle sa mmwahiyu; hiha nnamusuwela wi nyuwano muri amuluku.’ Voocharela, kinnamooniha yootakiherya emoha ya yooloherya yeeyo Yehova okhwaanihenryeiye.”

15. Tiheeni nnahuseryaahu orweela wa yootakiherya ya munna a makupa Onakhumawo Nsuwa a Asiya?

¹⁵ Munna mmoha a makupa Onakhumawo Nsuwa a Asiya onnapharihela mukhalelo onacharela vaavaa onapakeiye osekurya. Owo ori: “Miyo kinnawooniha sootakiherya sa miruku sa Piipiliya, okhwaaniheryeya wa sooloherya sa Piipiliya, ni malamulo yaawo anavarerya elapo. Voocharela, kinnawooniherya mukhalelo ichu soothesene seiho inooniheryaaya wi ookhalavo Mpatuxa mukumi ni amiruku. Vaavaa muchu oneemereryeiye wi Muluku ookhala, kinamooniherya yeeyo Piipiliya onaloceiye sa Yehova.”

16. Mwawiiwanana ni Ahebri 11:6, ntakhara heeni oohuserya annaphwanela okhalano nroromelo mwa Muluku ni mu Piipiliya, nave nni naakhaviherye hai wunnuwiha nlo?

¹⁶ Vaava muchu ohirino malapelo oneemereryeiye yoohuserya ya Piipiliya, eyo henataphulela wi mwawaakuveya onneemererya wi Muluku ookhala. Mwa yeeyo, nnaphwanela omukhaviherya vakhaani vakhaani wi awerye olekecheya ni yeeyo. (Mwaalakhanye Ahebri 11:6.) Navetho nnaphwanela omukhaviherya wi amuroromeleke Piipiliya. Mwa yeeyo, akhweya munaphwanela oloca ikwaha sincipale sa mwaha mmohamoha. Variyari va nikupa ti nikupa na yoohuserya, nyuwo munaphwanela omooniha yeeyo enooniherya wi Piipiliya masu a Muluku. Ntoko yootakiherya, sooloherya ikhwaanenle, miyaha sa siyensiya ni saweereya seeparipari naari miruku soophara muteko sa nihiku ti nihiku.

17. Wakhala wi ninnawooniherya osivela achu, teevi eni ekhale yookhumelela?

¹⁷ Wakhala wi ninnooniherya osivela wa achu oothene, nnanwerya waakhaviherya okhala oohuserya a Kristu, naamwi nlelo ehirino malapelo. (1 Kor. 13:1) Yoolakelela ahu ori owooniherya wi Muluku onnanisivela nave wi onachuna wi nimusiveleke. Mu eyaakha yoothene, macikhwi aachu yaawo khalai yaarino nchuno vakhaani naari yahaarino nchuno mu ekerexa, annahuserya omusivela Muluku nave annapatisiwa. Wa nthowa nenla, mukhaleno moonelo woophwanelela. Mooniherye opwacha weeparipari wa achu oothene. Muwiriyane moonelo aya. Mweererye owiiwexexa. Ni yootakiherya anyu yaphaama, mwahusihe achu mukhalelo eneeraaya ekhale oohuserya a Kristu.