1. Tiheeni mwaahusihiwaanyu vooloca sa Mpatuxa?

WAAKHANLE wi muphwiiwale mu emusi ya Anamoona a Yehova, nyuwaano akhweya muhusenrye vooloca sa Yehova opacerya muri mukhaani. Nyuwaano mwaahusihiwa wi owo Mpatuxa, ookhalano mikhalelo sootikhiniha nave tho wi onachuna weeriha elapo yoothene okhala parataiso.—Map. 1:1; Saw. 17:24-27.

2. Tiheeni achu akina anuupuwelaaya vooloca sa yaale anamuroromela Mpatuxa?

² Achu ancipale, hanaroromela wi Muluku ookhala, naari wi owo Mpatuxa a ichu soothene. Ohiya yeeyo, awo anaroromela wi okumi waarimoona ophacuwa nave voocharela othatuwa, ovinyerya o mikhalelo sookhweya sa okumi, ophiyerya o mikhalelo soovilaxa sa okumi. Akina a achu yaawo anaroromela yeela aahusihiwa mahusiheryo avasulu. Awo ananwerya oloca wi siyensiya onnooniherya wi Piipiliya hanaloca eparipari nave achu yaawo arino nroromelo mwa Mpatuxa toohihuserya, haanono miruku naari tookhweya owokiwa.

3. Ntakhara heeni ti woochuneya olipiha nroromelo nahu?

³ Apwanne yeeyo achu yaawo ahusihiwe mahusiheryo avasulu analocaaya enanwerya oneeriha okhwa minikwa wi Yehova Mpatuxa ahu oosivela? Ela enahaala wooniheryeya moorweela wa mathowa yaawo ananeeriha ororomela wi Yehova Mpatuxa. Apwanne ti nthowa nawi nrimuleeliwa wi nroromeleke yeela naari nthowa nawi noomaliha elukuluku nihuseryaka sawooniherya mukhatiihu? (1 Kor. 3:12-15) Moohipwacha elukuluku nimalinhaahu nri mmoha a Anamoona a Yehova, nnaphwanela otitelela olipiha nroromelo nahu. Neerano hiihaa, hinnahaala owokiwa ni “osuwela wa miruku sowoka” onahusihiwa ni achu yaawo anaakaaha Masu a Muluku. (Kol. 2:8, BNM; Ahe. 11:6) Wi onikhaviherye, mwaha yoola onahaala othokorororya (1) ntakhara heeni achu ancipale hanamuroromela Mpatuxa, (2) ti mwawiihai muneeraanyu mulipihe nroromelo nanyu mwa Yehova, Mpatuxa anyu, ni (3) ti mwawiihai  muneeraanyu mutitelele okhalano nroromelo noolipa.

4. Mwawiiwanana ni Ahebri 11:1, nroromelo neeparipari nnathipeleya mu eheeni?

⁴ Achu akina anuupuwela wi okhalano nroromelo onataphulela ororomela echu yeeyo ehirino mathipelo. Nyenya mwawiiwanana ni Piipiliya, nla tahi nroromelo neeparipari. (Mwaalakhanye Ahebri 11:1.) Piipiliya onnathariha wi nroromelo nnathipeleya mu sawooniherya. Mwawiihiiha, naamwi nihimoonaka Yehova, Yesu ni Omwene, ninnaroromela wi chiryene iho sookhala. (Ahe. 11:3) Namoona mmoha yoowo aari siyentista ooloca: “Anamoona a Yehova aakhalano mathipelo wa ichu seiho awo anaroromelaaya. Awo hanaakaaha sawooniherya sa siyensiya.”

5. Ntakhara heeni achu ancipale annaroromela wi okumi horimpatuxiwa?

⁵ Nnanwerya wiikoha, ‘Ntakhara heeni achu ancipale hanaroromela wi Muluku topatunxe ichu soothene sikhanle iniiha irivo sawooniherya sincipale?’ Akina hiyintonko othokororya sawooniherya mukhataaya. Robert, yoowo vano ori mmoha a Anamoona a Yehova, ooloca: “Woona wi opatuxiwa wa ichu hiwantonko olociwa oxikola, kaanaroromela wi ela tahi eparipari. Kaanaroromela yeela ophiyerya kirino iyaakha 20 vaavaa kaachekunlaaka ni Anamoona a Yehova nave kihuserya wi Piipiliya onnavahererya mathowa aphaama a ororomela wi Muluku topatunxe ichu soothene.” *—Moone ekaaxa “ Muchaka Woochuneya wa Asitiithi.”

6. Ntakhara heeni akina annakhooca omuroromela Mpatuxa?

⁶ Akina hanamuroromela Mpatuxa nthowa nawi awo analoca wi anaroromela pahiru ichu  seiho anaweryaaya woona. Nyenya mweeparipari awo annaroromela ichu sincipale seiho ahinaweryaaya woona. Ntoko yootakiherya, lei da gravidade [nlamulo na omora.] Mukhalelo wa nroromelo onalociwa Mpiipiliyani onaphitaanyerya sawooniherya sawi “ichu seiho nihinoonaahu sookhala.” (Ahebri 11:1) Onnachuneya elukuluku yincipale ni wiilipixerya wi nihuserye sawooniherya mukhatiihu, nyenya achu ancipale hanachuna opaka wiilipixerya yoola. Muchu yoowo ohinachuna otholathola sawooniherya mukhateiye onanwerya ophiyerya makuchuwelo wi Muluku haawowo.

7. Apwanne achu oothene yaawo ahusihiwe mahusiheryo a vasulu annavaanya wi Muluku topatunxe ichu soothene? Mutharihe.

⁷ Emanle ohuserya sawooniherya, masiyentista akina aalekecheya wi Muluku topatunxe ichu soothene. * Moolikana ni Robert, akina yaaroromela  wi haawo Mpatuxa nthowa nawi opatuxiwa wa ichu hiwintonko olociwa mu ixikola sa vasulu. Naamwi hiihaa, masiyentista ancipale aamusuwela nave annamusivela Yehova. Hiihaa ntoko masiyentista yaala, oothene ahu nnaphwanela olipiha nroromelo nahu mwa Muluku, moohipwacha mahusiheryo taani naakhenlaahu. Haavo muchu onahaala weera yeela wa hiyaano.

8-9. (1) Nikoho taani nnahaalaahu othokororya hiihaano? (2) Ti mwawiihai ohuserya vooloca sa soopatuxiwa oneeraaya wookhaviheryeeni?

⁸ Muni mulipihe hai nroromelo nanyu mwa Mpatuxa? Hankooni nthokororye mikhalelo mixexe.

⁹ Muhuserye soopatuxiwa. Munanwerya olipiha nroromelo nanyu mwa Mpatuxa moorweela wa waavarerya axinama, miri, ni itheneeri. (Sal. 19:1; Isa. 40:26) Vaavaa munahuseryaanyu mwawiiseela ichu seiha, munahaala olekecheya wi chiryene Yehova Mpatuxa. Soolaleeryiwa sahu sinnakhalano miyaha seiho inathariha sooleeliherya sincipale vooloca sa soopatuxiwa. Nyuwaano hamunaphwanela ocupha miyaha seiha naamwi muhiiwexexaka phaama. Muhuserye ophiyerya munaweryelaanyuvo. Nave muhicuwale wuuluulela woona mu esaiti ahu jw.org, ixilema sooreera vooloca sa soopatuxiwa seiho soonihiwe hiihaanoru mmithukumano sahu sa muceche.

10. Mvahe yootakiherya enooniherya wi ookhalavo Mpatuxa. (Aroma 1:20)

¹⁰ Vaavaa munahuseryaanyu soopatuxiwa, muthokororye phaamasene mikhalelo seiho sinamuupulula Mpatuxa ahu. (Mwaalakhanye Aroma 1:20.) Ntoko yootakiherya, nsuwa ninnavahererya oviha ni waarya seiho siri soochuneya wa okumi veelaponi. Nyenya oviha okina wa nsuwa onanwerya okhala woopahula. Hiyaano achu onnachuneya okhapeleleya orweela wa oviha yoola. Nave chiryene nri ookhapeleleya! Mwawiihai? Elapo ahu yookhalano eyaakiho aya—echu ya mwiixi eniichaniwa osooniyu yeeyo enavukula oviha yoola wawoopiha. Vaavaa oviha yoola onatepaaya, mwiixi yoola wa eyaakiho onnaaceereryeya tho. Hamuneemererya wi ookhalavo muchu yoowo opanke eyaakiho yeela nave wi owo chiryene Mpatuxa oosuwelaxa ni oosivela?

11. Nnahaala ophwanya woowi sooleeliherya soolipiha nroromelo vooloca sa soopatuxiwa? (Moone ekaaxa “ Ikaruma Ikina Seiho Inahaala Olipiha Nroromelo Nahu.”)

¹¹ Munanwerya ophwanya sooleeliherya sinalipiha nroromelo vooloca sa soopatuxiwa moorweela wa otholathola mu Índice de Publicações da Torre de Vigia ni mu jw.org. Akhweya nyuwaano munanwerya opacerya ni miyaha naari ixilema sinaphwanyeya mmakupa ani: “Teve um projecto?” Iho ti sookhuveya nave sinnooniherya sooleeliherya sootikhiniha vooloca sa axinama ni soopatuxiwa ikina. Iho tho sookhalano sootakiherya vooloca sa mukhalelo masiyentista aneereryaaya otakiherya yeeyo anoonaaya mu soopatuxiwa.

12. Vaavaa nnamuhuseryaahu Piipiliya, ichu taani nnaphwanelaahu othokororya moopwacha?

¹² Mmuhuserye Piipiliya. Siyentista yoowo oromoliwe woopaceryani aanavaanya wi ookhalawo Mpatuxa. Moovira wa elukuluku, owo aapacerya olekecheya wi ookhalavo Mpatuxa. Owo ooloca: “Nroromelo naka hinaathipelen’ye pahiru wa yeeyo kaahusenryaaka vooloca sa siyensiya. Nlo tho naathipeleya mwa yeeyo kaahusenryaaka moopwacha orweela Mpiipiliyani.” Nyuwaano akhweya moosuwela phaama yeeyo Piipiliya onahusiheiye. Naamwi hiihaa, wi mulipihe nroromelo wa Mpatuxa anyu, munaphwanela otitelela ohuserya Masu a Muluku. (Yos. 1:8; Sal. 119:97) Ntoko yootakiherya, muupuwele mukhalelo Piipiliya onathariheiye mookwakwaleya ichu seiho seeren’ye mu elukuluku yakhalai. Nave tho muupuwele vooloca sa ichu soothene Piipiliya aalohenryeiye seiho saakhwanenle ni mukhalelo  anamarepa oohiyanahiyana a Piipiliya yiiwanannaaya mukina ni mukhwaawe. Weerano hiihaa onanwerya olipiha nroromelo nanyu nawi ookhalavo Mpatuxa a miruku, oosivela ni wi owo tomveerenle Piipiliya. *—2 Tim. 3:14; 2 Ped. 1:21.

13. Yootakiherya taani emoha ya miruku enaphwanyeya Mmasu a Muluku?

¹³ Vaavaa munahuseryaanyu Masu a Muluku, moone mukhalelo miruku sawe sinanikhaviheryaaya. Ntoko yootakiherya, mu iyaakha sa muculi Piipiliya aaloherya wi osivelaxa ikhorowa, onnapahula nave onnakumiherya “soohoosha sincipale.” (1 Tim. 6:9, 10; Masi. 28:20; Mat. 6:24) Apwanne olopola yoola ti wa mphurelo olelo? Liivuru a Narcissism Epidemic ooloca: “Mweeparipari, achu awiithukumanyerya hanahakalala nave anakhala oothanana vancipale. Ophiyerya tho wi achu yaawo anachuna okhalano ikhorowa sincipale hanahakalala nave annakhalano makacamiho mancipale mookumini.” Mwawiihiiha olopola wa Piipiliya wawi hannaphwanela osivelaxa ikhorowa ti weeparipari! Apwanne munnuupuwela malakiheryo makina a Mpiipiliyani anahaala wookhaviheryaani? Vaavaa nnuupuwelelaahu vooloca sa miruku saphaama seiho siri Mpiipiliyani, nnahaala woona wi Mpatuxa ahu oosivela oosuwela yeeyo eri yaphaama wa hiyo nave wi onachuna wi niroromeleke seiho. (Tiy. 1:5) Ntoko yookhumelela, okumi ahu onahaala okhala woohakalaliha.—Isa. 48:17, 18.

14. Tiheeni yoohuserya ya Piipiliya enahaalaaya onihusiha vooloca sa Yehova?

¹⁴ Mmuhuserye Piipiliya ni yoolakelela ya omusuwela phaama Yehova. (Yoh. 17:3) Vaavaa munahuseryaanyu Soorepa, munahaala osuwela omuchu wa Yehova ni mikhalelo sawe. Mikhalelo seiha imohamoha ni seiho nnahuseryaahu vaavaa nnavareryaahu soopatuxiwa. Ohuserya mikhalelo seiha onnanlekecha wi Yehova ookhala. (Muk. 34:6, 7; Sal. 145:8, 9) Vaavaa munamusuwelaanyu phaameene Yehova, nroromelo nanyu mwa yoowo nnahaala wunnuwa, osivela wanyu onahaala waaceereryeya, nave onthamwene anyu ni yoowo onahaala okhala woolipa.

15. Ti mwawiihai munahaalaanyu ophura moorweela wa oloca sa nroromelo nanyu?

¹⁵ Mwaaleele akina vooloca sa nroromelo nanyu mwa Muluku. Vaavaa muneeraanyuno yeela, nroromelo nanyu nnahaala okhala noolipa. Nyenya hanka wakhala wi muchu yoowo munamulaleeryaanyu onnakhwa minikwa wi Muluku ookhala nave nyuwaano hamunasuwela mukhalelo wa omwaakhula? Mweererye ophwanya Soorepa seiho sinaphwanyeya mu soolaleeryiwa sahu nave voocharela muthokororye ni yoowo. (1 Ped. 3:15) Nyuwaano tho munanwerya omveka munna naari murokora yoowo orino mavyakelo wi ookhaviheryeeni. Naamwi muchu owo eemerenrye maakhulo orweela Mpiipiliyani naari hooye, nyuwaano munanwerya ophuravo moorweela wa opaka otholathola. Nroromelo nanyu nnahaala olipa. Nyuwaano hamunahaala waaroromelaka achu yaawo aniisoona wi tamiruku naari oosuwelaxa nave analoca wi haawowo Mpatuxa.

16. Tiheeni enahaala weereya wakhala wi hantitelenle olipiha ni okhapelela nroromelo nahu?

¹⁶ Moohipwacha elukuluku nimalinhaahu nimurumeelaka Yehova, nnaphwanela otitelela olipiha nroromelo nahu mwa yoowo. Ntakhara heeni? Nthowa nawi naahikhalano ekaasoope, nroromelo nahu nnanwerya oceecheya. Hiihaa ntoko nthokoronryaahu, nroromelo nnathipeleya wa ichu seiho nihinaweryaahu woona. Ichu seiho nihinaweryaahu woona, ti wookhweya ocuwala. Ti nthowa nene Paulo aalonceiye wi oyeleela nroromelo ori ntoko “yocheka yeyo enanivirela.” (Ahe. 12:1, NN) Mwawiihiiha, tiheeni nnaphwanelaahu weera wi nihuuwele mmuraakho yoola?—2 Tes. 1:3.

17. Tiheeni enahaala onikhaviherya otitelela olipiha nroromelo nahu?

 ¹⁷ Yoopacerya, ilukuluku soothene mvekeke munepa waweela wa Yehova. Ntakhara heeni? Nthowa nawi nroromelo mukhalelo mmoha wa yawiima ya munepa waweela. (Gal. 5:22, 23) Hiyaano hiniwerya olipiha ni okhapelela nroromelo nahu mwa Mpatuxa ahu nihirivo nikhaviheryo na munepa waweela. Wakhala wi nootitelela omveka Yehova munepa waweela, owo onahaala onivaha. (Luka 11:13) Hiyaano nnanwerya ovekela nriki: “Munaaceererye hiyo nroromelo.”—Luka 17:5.

18. Mwawiiwanana ni Salumu 1:2, 3, ekari taani nnaweryaahu opuha?

¹⁸ Yanaawiili, mutitelele opaka yoohuserya ya muchu mukhateiye ya Masu a Muluku. (Mwaalakhanye Salumu 1:2, 3.) Vaavaa salmu yoola aarempweiye, Aisarayeli akina yaakhalano Nlamulo noothene na Muluku. Nyenya, mamwene ni anamukucho yaaphwanela okhalano iroolu seiha nave eyaakha eri yoothene yaneethanu nawiili, yaanapakiwa marehereryo wi ‘alopwana, athiyana, anamwane, ni anamarwa’ yaawo yaakhala mu Isarayeli ethukumane vamoha wi ewiriyane waalakhanyiwa wa Nlamulo na Muluku. (Malam. 31:10-12) Mmahiku a Yesu, achu a vakhaani pahi tiyaarino iroolu seiha sa Soorempwa. Sincipale saakhala mu sinakooka. Moohiyana, olelo, achu ancipale ananwerya waalakhanya Masu a Muluku. Ela ekari etokweene chiryene. Nni nooniherye hai wi ninnathamalela ekari yeela?

19. Tiheeni nnaphwanelaahu opaka wi ntitelele olipiha nroromelo nahu?

¹⁹ Nnanwerya wooniherya wi ninnathamalela Masu a Muluku moorweela wa waalakhanya yaawo moohihiyererya. Nnaphwanela waavya elukuluku wi nimwaalakhanye ni omuhuserya Piipiliya, hannaphwanela weerano eyo pahiru wakhala wi nookhalano elukuluku. Wakhala wi ninnahuserya moohihiyererya, nnanwerya otitelela olipiha nroromelo nahu.

20. Tiheeni nnaphwanelaahu olakelela opaka?

²⁰ Moohiyana ni “achu a miruku ni oosuwelasha” a mweelapo yeela, nroromelo nahu noolipa nnathipeleya Mmasu a Muluku. (Mat. 11:25, 26) Ntoko yookhumelela ya yoohuserya ahu ya Piipiliya, ninnasuwela ntakhara heeni mikhalelo sa mulaponi sitempaaya onanara ni yeeyo Yehova onahaaleiye weera wi arehererye. Mwawiihiiha hankooni nikhale oolakelela olipiha nroromelo nahu ni waakhaviherya ancipale wakhala wooweryeya okhalano nroromelo mwa Mpatuxa ahu. (1 Tim. 2:3, 4) Nave hankooni ntitelele oweherya elukuluku yeeyo soopatuxiwa soothene sa veelaponi yavathi inahaalaaya omucicimiha Yehova ilocaka masu anaphwanyeya mu Wupulula 4:11: “Nyuwo Apwiya Muluku ahu, munnaphwanela waakhela ncicimiho, ovuwa ni owerya. Ti nyu mpatunxe ichu soothesene.”