1. Ichu taani saphaama amiravo ancipale yaakhwanihenryaaya?

 IYAAKHA soothene, amiravo Eekristu macikhwi macikhweene annapatisiwa. Apwanne mwa mmoha a yaawo? Waakhanle wi ti hiiha, anna ni arokora anyu oomunepani annahakalala ni nyuwaano nave tho Yehova onnahakalala! (Masi. 27:11) Muupuwele ichu sincipale saphaama seiho mwaakhwanihenryaanyu. Ntoko yootakiherya, nyuwaano moomuhuserya Piipiliya mwawiiseela, akhweya mu iyaakha sincipale. Mu yoohuserya anyu mwaalekecheya wi Piipiliya Masu a Muluku. Nyenya opwaha soothene nyuwaano mwaaphiyerya omusuwela ni omusivela Mwaneene a Piipiliya. Osivela wanyu ntakhara Yehova waahinnuwa ophiyerya wi mwaalakelela wiiveleela wa yoowo ni opatisiwa. Chiryene nyuwaano moopaka yoolakelela yaphaamaxa!

2. Tiheeni nnahaalaahu othokororya mmwaha yoola?

 ² Muhaakumve opatisiwa, nyuwaano mwaahikhalano makacamiho yaawo yaaweerinheeni okhala woovila ororomeleya wa Yehova. Nyenya vaavaa muninnuwaanyu, munahaala ohoolela saweeha ivyaani. Satana onahaala weererya woohiihaani omusivela ni omurumeela Yehova. (Éfe. 4:14) Nyuwaano himunaphwanela weemererya wi eyo yeereye. Tiheeni enahaala wookhaviheryaani otitelela okhala oororomeleya wa Yehova ni waakhwaniherya nlakano nanyu na omurumeela yoowo? Munaphwanela otitelela oya vahoolo ni wiilipixerya wi mukhale Mukristu awiichwelavo. (Ahe. 6:1) Ti mwawiihai muneeraanyu nwerye weerano yeeyo?

3. Tiheeni Akristu oothene anaphwanelaaya weera emanle opatisiwa?

³ Nimanle opatisiwa, oothene ahu nnaphwanela opharihela ekano murummwa Paulo aavanheiye Akristu akhwaawe o Efeso. Owo aahaaceenyerya okhala Akristu “awaakhwanela.” (Éfe. 4:13) Ela enataphulela wi awo yaaphwanela ‘otitelela oya vahoolo.’ Hiyaano nnanwerya wiiwexexa yeeyo Paulo aataphuleleiye  vaavaa aalikanyinheiye wunnuwa omunepani wa alapeli a Yehova ni mukhalelo mwaana oninnuweiye. Asitiithi a mwaana annamusivela ni wiirumiha ni yoowo. Nyenya owo hanatitelela okhala mwaana. Moovira wa elukuluku, owo onahaala ohiya “mukhalelo wonamwane.” (1 Kor. 13:11, BNM.) Emohamoha enneereya ni Akristu. Nimanle opatisiwa, nnaphwanela otitelela oya vahoolo omunepani. Hankooni nthokororye sooleeliherya ikina seiho inahaala onikhaviherya weerano yeeyo.

4. Mukhalelo taani onahaala onikhaviherya oya vahoolo omunepani? Mutharihe. (Filipi 1:9)

⁴ Munnuwihe osivela wanyu ntakhara Yehova. Nyuwaano munnamusivela vancipale Yehova. Nyenya osivela wanyu ntakhara yoowo onanwerya otitelela winnuwa. Mwawiihai? Murummwa Paulo oothariha mukhalelo mmoha mu Filipi 1:9. (Mwaalakhanye.) Paulo aavekela wi osivela wa Afilipi “otepeke wiinnuwa.” Mwawiihiiha nnanwerya winnuwiha osivela wahu ntakhara Yehova. Nnanwerya weerano yeela moorweela wa ‘okhalano miruku ni osuwela othanla.’ Vaavaa nnamusuwelaahu phaama Yehova, osivela wahu ntakhara yoowo onnaaceereryeya nave ninnamuthamalela yoowo ni mukhalelo awe wa weera ichu. Nchuno nahu na omuhakalaliha yoowo ninnalipa nave hinrwaru nichuna omuhiciha yoowo. Hiyaano ninnapaka owetha wahu wi niiwexexe yeeyo owo onachuneiye wi nipake ni mukhalelo nneeraahu neereno.

5-6. Nni ninnuwihe hai omusivela wahu Yehova? Mutharihe.

⁵ Nnanwerya wunnuwiha omusivela wahu Yehova, moorweela wa omusuwela phaama Mwanawe, yoowo onooniherya moophaameya mikhalelo sa Atiithi awe. (Ahe. 1:3) Mukhalelo waphaama wa omusuwela Yesu ori ohuserya saweereya sa mu Aliivuru asese a Michaka. Waakhanle wi hamunamwaalakhanya Piipiliya mahiku oothene, munanwerya opacerya hiihaano moorweela wa waalakhanya saweereya seiha vooloca sa Yesu. Vaavaa munaalakhanyaanyu saweereya vooloca sa Yesu mutikitheryeye mmikhalelo sawe. Achu yaanasiveliwa okhala ni yoowo ni oloca ni yoowo nave owo aanasiveliwa ni anamwane. (Mar. 10:13-16) Oohuserya awe yaanakhala ootaphuwa oloca miyoonelo saya wa yoowo. (Mat. 16:22) Mmukhalelo yoola, Yesu aamutakiherya Tiithi awe a wirimu. Yehova tho tawaacameleya. Nnanwerya omwaacamela orweela mu nivekelo. Vaavaa nnavekelaahu wa yoowo, nnanwerya omuleela ichu soothene nnuupuwelaahu naari mukhalelo nniisoonaahu. Nri oolekecheya wi hanithoriha. Owo onnanisivela nave onnanikhapelela.—1 Ped. 5:7.

⁶ Yesu aanamoriwa ikharari ni achu. Murummwa Mateu ooloca: “Oonneiye mucici wa achu, aamoriwano ikharari, vawi waahaleela ni ohipwachiwa, ntoko ipucepuche ihirino mukukhula.” (Mat. 9:36) Hanka Yehova onoona hai? Yesu ooloca: “Hiihaa tho atiithinyu a wirimu hanakhwela wi arimeele nari mmoha a asikhaani yaala.” (Mat. 18:14) Masu yaala annanihakalaliha nthowa nawi enooniherya wi Yehova onnanisivela vancipale! Vaavaa nnamusuwelaahu phaama Yesu, osivela wahu ntakhara Yehova onnannuwa.

7. Ti mwawiihai okhala vamoha ni Akristu awiichwelavo oneeraaya wookhaviheryeeni?

⁷ Nyuwaano munanwerya tho ohuserya wooniherya osivela ni okhala Akristu awiichwelavo, vaavaa munamalihaanyu elukuluku vamoha ni anna ni arokora anyu awiichwelavo a mmulokoni. Moone mukhalelo awo anahakalalaaya. Awo haanono ekeerelani vooloca sa yoolakelelaaya ya omurumeela Yehova. Mwaaveke awo wi yooleeleeni saweereya saya ikina seiho yaaraayano mu omurumeela waya Yehova. Vaavaa munachunaanyu opaka yoolakelela yoochuneya, mwaaveke yaawo miruku. Muupuwele wi  muchu “onnoopowa ni alipa miruku ancipale.”—Masi. 11:14.

8. Tiheeni munaphwanelaanyu weera wakhala wi mookhalano minikwa vooloca sa yeeyo Piipiliya onaloceiye?

⁸ Mmalihe minikwa sanyu. Ntoko etharihiwaaya mu  eparakrafo 2, Satana onahaala weererya woohiihaani wunnuwa omunepani. Mukhalelo mmoha oneereiye eereno yeela ori moorweela wa wooruuhelaani minikwa vooloca sa mahusiheryo makina a Mpiipiliyani. Ntoko yootakiherya, achu akina ananwerya weererya woolekechaani wi tahi Muluku onipatunxe nyenya nrimuthatuwa. Vaavaa mwaaryaanyu mwaana akhweya himuupuwela vooloca sa yeeyo, nyenya akhweya vano munnahuserya sa yeela oxikola. Yeeyo mapurusore anyu anahusihaaya wi ekhaviherye nihusiheryo nawi nrimuthatuwa, munanwerya woonaka wi ti yeeparipari ni woolekechaani. Nyenya awo hantonko weererya ophwanya sooleeliherya sawi ookhalawo Mpatuxa. Muupuwele nlakiheryo nnaphwanyeya mu Masiposipo 18:17: “Oopacerya oloca vamulacuni onakhala wi haano nthowa, ophiyerya alonce mukhweiye oomvaanya.” Ohiya ororomela ichu soothene munahuseryaanyu oxikola, munaphwanela ohuserya mwawiixeela yeeyo Masu a Muluku, Piipiliya anahusihaaya. Mpake otholathola mu soolaleeryiwa sahu. Muloce ni anna ni arokora yaawo khalai yaaroromela nihusiheryo na othatuwa. Mwaakohe yaawo yeeyo yaalekenche wi ookhalawo Mpatuxa yoowo onanisivela. Ochekula wuuwu onanwerya wookhaviheryaani waalikhela sawooniherya sawi ookhalawo Mpatuxa.

9. Tiheeni muhusenryaanyu orweela wa yaweereya ya Melissa?

⁹ Murokora awiichaniwa Melissa aaphuravo vancipale orweela wa ohuserya miyaha vooloca sa soopatuxiwa nave eyo yaamukhaviherya ovootha minikwa sawe. * Owo ooloca: “Oxikola, ahusiha annathariha vooloca sa othatuwa mmukhalelo yoowo onaweeriha achu wuupuwela wi eyo eparipari. Woopaceryani, nkaachuna opaka otholathola nthowa nawi kaanoova wi kaahaala woona wi nihusiheryo na othatuwa ti neeparipari. Nyenya kaahoona wi Yehova hanachuna wi nimurumeeleke yoowo nrino minikwa. Mwawiihiiha kaapacerya otholathola. Kaamwaalakhanya liivuru Existe um Criador Que Se Importa com Você? ni iproxura A Vida—Teve um Criador? ni A origem da vida—Cinco perguntas que merecem resposta. Ela yaari yeeyo ene kaachunaaka. Kaanachuna keenreno yeeyo khalai.”

10-11. Tiheeni enahaala wookhaviheryaani otitelela okhala aweela mmeecelo? (1 Tesalónika 4:3, 4)

 ¹⁰ Mukhooce meecelo oonanara. Variyari va omiravo, nchuno na okonihana nnanwerya okhala noolipa nave achu akina ananwerya weererya wookhinyereryaani opaka mararuwo. Ela ti yeeyo Satana onachuneiye wi mpake. Tiheeni enahaala wookhaviheryaani okhalano meecelo aweela? (Mwaalakhanye 1 Tesalónika 4:3, 4.) Mmavekelo anyu, mmuleele Yehova mukhalelo muniisoonaanyu. Mmuleele owo mukhalelo muniisoonaanyu chiryene nave mumveke wi oolipiheeni. (Mat. 6:13) Muupuwele wi Yehova onachuna wookhaviheryaani, ohiya woothorihaani. (Sal. 103:13, 14) Piipiliya tho onanwerya wookhaviheryaani. Melissa olociwe woopaceryani, aahiwaniha wi avoothe muupuwelo woocapaheya. Owo ooloca: “Omwaalakhanya Piipiliya mahiku oothene waakikhaviherya otitelela owaniha ni minkhela saka soonanara. Eyo yaanakuupuxerya wi mi ka a Yehova nave wi kinachuna omurumeela yoowo.”—Sal. 119:9.

¹¹ Muheererye orehererya makacamiho anyu meekhiinyu. Muloce ni asitiithi anyu vooloca sa okhinyereryiwa wanyu. Tahi wookhweya oloca sa makacamiho a muchu mukhateiye, nyenya mweeparipari ti woochuneya weerano yeeyo. Melissa ooloca: “Kaahivekela kivekaka olipa murima nave voocharela kaaloca ni apapa sa nikacamiho naka. Kimanle weerano yeela, kaahikhala ootaphuwa. Kaasuwela wi Yehova aahiirumiha ni miyaano.”

12. Tiheeni enahaala wookhaviheryaani opaka soolakelela saphaama?

¹² Muhooleliweke ni malakiheryo a Mpiipiliyani. Vaavaa muninnuwaanyu, asitiithi anyu anahaala weemererya wi mpakeke soolakelela sanyu. Nyenya naamwi hiihaa, sookhalavo ichu sincipale muhisuwenlaanyu. Ti mwawiihai muneeraanyu musepe opaka soohesa seiho sinahaala onanariha onthamwene anyu ni Yehova? (Masi. 22:3) Murokora awiichaniwa Kari onnathariha yeeyo yaamukhavihenrye opaka soolakelela saphaama. Owo aahiiwexexa wi wakhala wi mwa Mukristu awiichwelavo, tahi woochuneya okhalano malamulo wa echu eri yoothene mu okumi anyu. Owo ooloca: “Miyaano kaanachuna wiiwexexa phaama malakiheryo a Mpiipiliyani ohiya malamulo.” Vaavaa munamwaalakhanyaanyu Piipiliya mwiikohe: ‘Tiheeni yoorepa ela enakihusihaaya vooloca sa muupuwelo wa Yehova? Apwanne aakhalavo malakiheryo yaawo kineeraaka kipharihele wi ehoolele meecelo aka? Waakhanle wi ti hiihaa, ti mwawiihai kineeraaka kiphure vaavaa kinapharihelaaka yaawo?’ (Sal. 19:7; Isa. 48:17, 18) Moorweela wa omwaalakhanya Piipiliya ni wuupuwelela malakiheryo awe, onahaala okhala wookhweya wa nyuwo opaka soolakelela seiho inahaala omuhakalaliha Yehova. Vaavaa munatitelelaanyu oya vahoolo, munahaala woona wi hamunaphwanela okhalano malamulo wa echu eri yoothene nthowa nawi munahaala wiiwexexa muupuwelo wa Yehova wa mwaha ti mwaha.

13. Ti mwawiihai asinthamwene aphaama aneeraaya yookhaviheryeeni? (Masiposipo 13:20)

¹³ Mwaathanle asinthamwene yaawo anamusivela Yehova. Asinthamwene munaathanlaanyu ananwerya wookhaviheryaani okhala Mukristu awiichwelavo. (Mwaalakhanye Masiposipo 13:20.) Murokora awiichaniwa Sara aayeleela ohakalala wawe. Voocharela yaaheereya echu yeeyo yaamukhavihenrye okookela okhala oohakalala. Sara ooloca: “Kaakhalano asinthamwene aphaama mu elukuluku yoophwanelela. Miyaano ni murokora yoowo ori mwali esumana ti esumana naanamurehererya vamoha Mulipeleli. Nthamwene aka mukina aakikhaviherya opacerya ovaha maakhulo mmithukumano. Nthowa na nikhaviheryo na asinthamwene aka, kaapacerya opaka yoohuserya ya muchu mukhateiye ni ovekela ni  murima woothene. Kaapacerya olipiha onthamwene aka ni Yehova ni okhala oohakalala wanaawiili.”

14. Ti mwawiihai Julien aapankeiye asinthamwene aphaama?

¹⁴ Ti mwawiihai muneeraanyu mpake onthamwene ni achu yaawo anahaala wookhaviheryaani? Julien, yoowo vano onarumeela ntoko mutokweene a muloko, ooloca: “Vaavaa Kaaryaaka mmiravo, Kaahikhalano asinthamwene aphaama yaawo naalaleeryaahu vamoha. Asinthamwene yaala yaari amvai nave awo yaakikhaviherya woona mukhalelo muteko woolaleerya onaruuhaaya ohakalala. Kaapacerya okhalano yoolakelela ya ovolowa mmuteko wa elukuluku yoothene. Kaahiiwexexa tho wi Kaanaayeleela asinthamwene aphaama vaavaa kaatikitheryeyaaka pahiru wa asinthamwene yaawo yaarino iyaakha imohamoha ni miyo. Ohoolo waya, Kaahaapaka asinthamwene aphaama o Peteli. Yootakiherya aya yaakikhaviherya othanla mathatelo aphaama nave eyo yaakikhaviherya omwaacamela Yehova.”

15. Olopola taani Paulo aamvanheiye Timotiyu vooloca sa opaka onthamwene? (2 Timóteo 2:20-22)

¹⁵ Tiheeni munaphwanelaanyu weera wakhala wi mohoona wi munnamaliha elukuluku ni muchu a mmulokoni yoowo onahaala onanariha onthamwene anyu ni Yehova? Paulo aanasuwela wi achu akina mmulokoni hiyuupuwela naari weera ichu ntoko Akristu nave owo aamuleela Timotiyu wi ahiye waataana ni yaawo. (Mwaalakhanye 2 Timóteo 2:20-22.) Onthamwene ahu ni Yehova ti woochuneyaxa. Nohiilipixerya vancipale wi nimwaacamele Yehova, mwawiihiiha hannaphwanela opaka onthamwene yoowo waahaala onanariha onthamwene ahu ni Tiithiihu a wirimu.—Sal. 26:4.

16. Soolakelela taani munaphwanelaanyu othanla?

¹⁶ Mutikitherye soolakelela samphurelo. Muthanle soolakelela seiho sinahaala olipiha nroromelo nanyu nave sinahaala wookhaviheryaani okhala Mukristu awiichwelavo. (Éfe. 3:16) Ntoko yootakiherya, nyuwaano munanwerya olakelela ohuserya ni omwaalakhanya Piipiliya moohihiyererya. (Sal. 1:2, 3) Naari munanwerya weererya ovekelaka wiiliwiili orweela vathi va murima. Akhweya nyuwaano munaphwanela okhalano ekaasoope vooloca sa othanla mathatelo naari mukhalelo wa opharihela elukuluku anyu. (Éfe. 5:15, 16) Vaavaa Yehova onooneiye  wiilipixerya wanyu wi muye vahoolo, owo onahaala ohakalala.

17. Muni mukhaviheryeye hai wakhala wi munnaakhaviherya akina?

¹⁷ Munahaala okhala Mukristu awiichwelavo vaavaa munaakhaviheryaanyu akina. Yesu ooloca: “Wookhalavo ohakalala wawaaca mu ovaha, opwaha mu waakhela.” (Saw. 20:35, TNM.) Munahaala ophuravo vancipale wakhala wi munnapharihela elukuluku ni ikuru sanyu soomiravo wi mwaakhaviherye akina. Ntoko yootakiherya, munanwerya otikitherya yoolakelela ya waakhaviherya awunnuwelavo ni awiiceliwa mmuloko anyu. Akhweya munanwerya waakhaviherya yaawo moorweela wa othuma ichu saya naari waakhaviherya osuwela mukhalelo wa opharihela ikhankoonya. Waakhanle wi mwa munna, mutikitherye yoolakelela ya okhala murummwa oorumeela, wi mwaakhaviherye vancipale anna ni arokora anyu. (Fil. 2:4) Munnooniherya tho osivela wa yaale ahiri a mmulokoni moorweela wa olaleerya michaka saphaama sa Omwene wa yaawo. (Mat. 9:36, 37) Wakhala wooweryeya, mutikitherye yoolakelela ya omurumeela Yehova mmuteko wa elukuluku yoothene.

18. Ti mwawiihai orumeela mmuteko wa elukuluku yoothene oneeraaya wookhaviheryeeni wunnuwa omunepani?

¹⁸ Muteko wa elukuluku yoothene onanwerya woovahaani ikari sincipale sa wunnuwa omunepani. Orumeela ntoko piyoneero onanwerya woovahaani ekari ya ovolowa mu Exikola ya Alaleeryi a Omwene. Nyuwo munanwerya orumeela o Peteli naari mmuteko wa oteka ipa sa malapelo. Mwali mmoha yoowo ori piyoneera awiichaniwa Kaitlyn ooloca: “Okhuma vamoha ni anna ni arokora a mavyakelo wookikhaviherya vancipale wunnuwa omunepani kimanle opatisiwa. Yootakiherya aya yookiceenyerya omuhuserya Piipiliya mwawiiseela ni wunnuwiha mavyakelo aka a ohusiha.”

19. Mareeliho taani munahaalaanyu opuha vaavaa munatitelelaanyu wunnuwa omunepani?

¹⁹ Vaavaa munatitelelaanyu wunnuwa omunepani, munahaala opuha mareeliho mancipale. Nyuwaano munahaala osepa omaliha ikuru sa omiravo anyu ni soolakelela sihinaphuriha echu. (1 Yoh. 2:17) Munahaala tho osepa sookhumelela soowaawa seiho sinarwa nthowa na opaka soolakelela soonanara. Ohiya yeeyo, munahaala okhumelela phaama mookumini ni okhalano ohakalala. (Masi. 16:3) Yootakiherya anyu yaphaama enahaala waalipiha anna ni arokora anyu, amiravo ni awunnuwelavo. (1 Tim. 4:12) Nave echu yoochuneyaxa, nyuwaano munahaala opuha murecele ni ohakalala yoowo onarweela mu omuhakalaliha Yehova ni okhalano onthamwene wawaacameleya ni yoowo.—Masi. 23:15, 16.