Mmwaha yoole, noohuserya wi mweeparipari erivo pahiru echu emoha yoochuneya enaavolowela achu oothene ni ankeelo: Weelihiwa wa nsina na Yehova. Mwaha wa ophwanelela olamulela—ela tiwi, waakhanle wi olamulelo wa Yehova ti waphaama—echu yeeyo eniiwanana ni weelihiwa wa nsina na Yehova. Mmukhalelo mmohamoha, mwaha wa ororomeleya wa achu, echu ekina eniiwanana ni weelihiwa wa nsina na Yehova.

Ntakhara heeni vano nnavuwihaahu mwaha mutokweene onavolowela nsina na Yehova ni weelihiwa waya? Hankooni nthokororye mathowa mararu.

Noopacerya, Satana aanyemula nsina na Yehova, naari wi omuchu wa Yehova, mu emaca ya Eteni. Nikoho Satana aampakenleiye Eva, niiwexexiha ntoko wi Yehova haari Muluku oovaha nave aanatikitherya malamulo moohiphimelela. Satana aahivuhanya moomalela yeeyo Yehova aalonceiye. Waari ntoko wi owo aamwiichana Muluku ntoko mulipa awootha. Owo aahinanariha nsina na Yehova, naari wi omuchu awe. Mwawiihiiha, owo aahikhala “Musaserya,” enataphulela “nawoothe.” (Yoh. 8:44) Nthowa na Eva weemererya yawootha ya Satana, haamwiiwelenle Muluku nave aahimwareela olamulelo awe. (Map. 3:1-6) Ophiyerya olelo, Satana onnatitelela oloca sawootha vooloca sa nsina na Muluku, ni omwaramwaxa sawootha vooloca sa omuchu wa Yehova. Ti yawooneya wi yaawo aneemererya sawootha seiho, hanamwiiwelela Yehova. Mwawiihiiha, wa achu a Muluku, sawootha ntakhara nsina naweela na Yehova echu etokweene yoohookololowa. Awo mathipelo a makacamiho ni ohooxeya woothene nnahoolelaahu olelo mweelaponi.

Nanaawiili, ntakhara ophaama wa soopatuxiwa sawe soothene, Yehova ori oolakelela weeliha nsina nawe wa sawootha soothene. Eyo echu yoochuneyaxa wa Yehova. Ti nthowa nene owo olonceiye: ‘Kinarwa keeliha nsina naka ntokotoko.’ (Ese. 36:23, PMM) Nave Yesu oohiya mookwakwaleya echu yeeyo yaaphwanela okhala yoochuneya mmavekelo a alapeli oothene oororomeleya a Yehova, vaavaa owo aalonceiye: “Nsina nanyu neelihiwe.” (Mat. 6:9) Piipiliya onnacicimiherya wiiliwiili ochuneya waya ocicimiha nsina na Yehova. Muthokororye sootakiherya sa vakhaani: “Mumvahe Yehova ncicimiho ntakhara nsina nawe.” (1 Math. 16:29; Sal. 96:8) “Ipelani ncicimiho na nsina nawe.” (Sal. 66:2, PMM) ‘Kinarwa kicicimiha nsina nanyu mahiku oothene.’ (Sal. 86:12, NN) Mu ekwaha emoha Yehova aalonceiye ovinyerya wirimu waari vaavaa owo aamwaakhunleiye Yesu mu empa ya Muluku o Yerusalemu, weiwo Yesu aalonceiye ariki: “Tiithi mucicimihe nsina nanyu.” Voocharela, Yehova aahaakhula: “Koocicimiha nenlo nave kinarwa kicicimiha tho.”—Yoh. 12:28. a

Naneeraru, yookhwela ya Yehova ilukuluku soothene enahaala wiiwananaka ni nsina nawe, naari omuchu awe. Muupuwele ela: Tiheeni enahaala weereya emanle yaweeha yookuchula omakuchuwelo wa Iyaakha Ncikhwi wa Olamulelo wa Kristu? Ti mwawiihai ankeelo oothene ni achu anahaalaaya wiisoonaka vooloca sa nsina na Yehova mu elukuluku yeeyo? Wi niwerye waakhula makoho yaala, hankooni nuupuwelele  ichu piili iniiwanana—ororomeleya wa achu ni ophwanelela wa olamulela wa Yehova. Imanle iyaakha ncikhwi, apwanne achu anahaala ochuna wooniherya wi toororomeleya? Hooye. Awo eni yeereke yeehiwe moomalela. Enahaala okhala oophaameya nave enahaala waakhela ekumi yoohimala. Yaphiya elukuluku yeeyo, apwanne ophwanelela wa olamulela wa Yehova onahaala okhala mwaha, ophiyerya otannya okawanyeya? Hooye. Oothene wirimu ni veelaponi yavathi anahaala okhala awiiwanana ni oolekecheya wi mukhalelo wa olamulela wa Yehova ti waphaamaxa ni wawookololowa. Apwanne nsina na Yehova nlelo nnahaala okhala echu yoochuneyaxa wa achu awe?

Omanle olamulelo wa iyaakha ncikhwi oothene anahaala osuwela eparipari vooloca sa Yehova nave nsina nawe nnahaala weelihiwa moomalela. Nsina na Yehova nnahaala otitelela okhala noochuneyaxa wa alapeli awe oothene a wirimu ni a veelaponi yavathi. Ntakhara heeni? Nthowa nawi awo anahaala woona wi Yehova onahaala otitelela opaka ichu sootikhiniha. Muupuwele ela: Yesu amanle omukookiherya Yehova omwene mwawiiyeviha, Muluku onahaala okhala “soothene wa oothene.” (1 Ako. 15:28) Voocharela, achu veelaponi yavathi anahaala opuha “otaphuwa woocicimiheya wa anamwene a Muluku.” (Aro. 8:21) Nave wookuchulani, Yehova onahaala waakhwaniherya yoolakelela awe etokweene, ya ophitaanya soopatuxiwa sawe soothene sa wirimu ni sa veelaponi yavathi ntoko emusi etokweene ni yawiiwanana.—Aef. 1:10.

Ichu soothene simanle weereya, ti mwawiihai emusi ya Yehova wirimu ni veelaponi ya vathi enahaalaaya okhala? Moohikhwa minikwa oothene anahaala okhalano nchuno noolipa na otitelela omucicimiha Yehova. Mulipa oomurepa salmu Tavite aahiveereliwa orepa: “Acicimihiwe Muluku . . . Ncicimihiwe nsina nawe ni otokweene awe okhala wookhala.” (Sal. 72:18, 19, PMM) Mu okumi ahu woothene, nnahaala okhalakano mathowa mavyaani ni ootikhiniha a otitelela omuthamalela Yehova.

Nsina na Yehova ninnooniherya mookwakwaleya omuchu awe. Nave vaavaa nnuupuwelelaahu nsina nawe, mu elukuluku ene yeeyo ninnuupuwelela sa osivela wawe. (1 Yoh. 4:8) Ilukuluku soothene nnahaala wuupuwelaka wi Yehova onipatunxe wa nthowa na osivela, ni wi owo oonoopola nthowa na onisivela, nave wi onalamulela mmukhalelo wawookololowa ni woosivela. Nnahaala otitelela woonaka osivela wa Yehova yoowo onooniheryeiye wa soopatuxiwa sawe. Mu ekumi ahu oothene, nnahaala okhalano mathowa mancipale a omwaacamela Yehova ni omwiipela macipo oomucicimiha ni ovuwiha nsina nawe.—Sal. 73:28.