• “Waakhala ntoko wi iyaka aahikimwaareela ikwaha sincipale.”

• “Kiisoona okhala awuuliheya muru, oonanara ni oohikhalano esisapo.”

• “Miyaano nkaaphwanela oloca ni muchu mukina sa yeela. Kaahooxeya mpuwapuwa.”

• “Kiisoona ntoko wi Yehova haakipwacha.”

Masu yaala, annooniherya mukhalelo muthiyana onahooxeyeiye vaavaa iyawe onooneiye epwitikiri. Nave wakhala wi owo oneerano eyo moovitheya, akhweya variyari va miyeeri naari iyaakha, mwaariye onanwerya wuupuwela wi hanaphwanela omuroromela yoowo. Muthiyana mmoha ooloca ariki: “Miyaano kaaniikoha: ‘Taani chiryene mulopwana ola okithenle? Apwanne owo haniipithiha ichu ikina wa miyo?’”

Mwaha ola orehereryiwe yuupuweliwaka athiyana yaawo arino asiiyaya arino yookhovelela ya woona epwitikiri. a Nnahaala othokororya malakiheryo avakhaani a Mpiipiliyani yaawo anahaala ovahererya nihakararyo, waaroromeliha nikhaviheryo na Yehova ni waakhaviherya okhala a murecele mmuupuweloni ni omunepani. b

Eparipari wi nyuwaano hanwerya ovareryela ichu soothene aiyanyu anapakaaya, nyenya sookhalavo ichu savakhaani munaphwanelaanyu weera wi mukhaleno murecele wawaaca wa mmuupuweloni. Moone sootakiherya savakhaani.

Muhiikuherye mathowa. Muthiyana otheliwe akhweya onanwerya wuupuwela wi wakhala wi iyawe onnoona epwitikiri nthowa ti na mwaariye. Alice c oona wi haari ooreera wa aiyawe. Owo aaniikoha: ‘Ntakhara heeni aiyaka anasiveliwaaya waaweha athiyana akina ohiya okiweha mi?’ Athiyana akina anniiphwanyerya mathowa nthowa na mukhalelo anaakhulelaaya, yuupuwelaka wi annatepiha mwaha. Taniyela ooloca: “Kaahikhala ooyeenyeyaxa nave kaahiikuherya mathowa. Kaaniisoona ntoko wi kaanatepiha mwaha.”

Wakhala wi munniisoona hiiha, musuwele wi Yehova hanoona wi nyuwaano mookhalano mathowa ntakhara saweera sa iyanyu. Tiyaku 1:14 ooloca: “Muchu ti muchu oneehiwa moorweela wa ohuwelihiwa ni owokiwa ni soochunachuna sawe.” (Aro. 14:12; Afi.  2:12) Ohiya wookuheryaani mathowa, Yehova onnavaha esisapo ororomeleya wanyu wa yoowo.—2 Math. 16:9.

Ti yookhaviherya tho osuwela wi wakhala wi mulopwana onnoona epwitikiri, eyo henataphulela wi mwaariye toonanara. Alipa ootholathola mwaha yoowo alonce wi epwitikiri ennannuwiha nchuno na okonihana yoowo muthiyana vyakala ohinaweryeiye waakhwaniherya.

Musepe okhala awuukhuwaxa. Catarina olonce wi pahiru aawerya owaanyiherya aiyawe yoonaka epwitikiri . Franse ooloca: “Miyaano kinnakhala awuukhuwaxa vaavaa kihinasuwelaaka nipuro aiyaka aryaayawo. Kinakhala awuukhuwa mahiku oothene.” Athiyana akina alonce wi annuuliheya muru vaavaa anakhalaaya ni anna naari ni arokora yaawo asuwenle nikacamiho na aiyaya. Akina alonce wi anniisoona omeekha, enakhala ntoko wi haavo oniiwexexa nikacamiho naya.

Miyoonelo seiyo ti sawunlaana. Nyenya wuupuwela ilukuluku soothene nikacamiho nenlo onahaala oweerihaani okhala awuukhuwaxa. Ohiya yeeyo, mweererye otikitheryeya mu onthamwene anyu ni Yehova. Weerano yeeyo onahaala wookhaviheryaani ovilela.—Sal. 62:2; Aef. 6:10.

Echu enahaala wookhaviheryaani ori waalakhanya ni wuupuwelela sootakiherya sa Mpiipiliyani sa athiyana akina yaawo yaari awuukhuwaxa nyenya nthowa na ovekela wa Yehova, yaahihakararyiwa. Tahi wi ilukuluku soothene Yehova aahirehererya makacamiho aya oothene, nto owo aahaavaha murecele yoowo yaachunaaya. Ntoko yootakiherya, Ana aatepa “osoosiwa murima” nnikacamiho nawe. Nyenya amanle ‘omaliha elukuluku yincipale avekelaka wa Apwiya,’ owo aahikhalano murecele, naamwi ahisuwenle mukhalelo nikacamiho nawe naahaalaaya orehereryiwa.—1 Sam. 1:10, 12, 18, PMM; 2 Ako. 1:3, 4.

Mwaavye nikhaviheryo na atokweene a mmulokoni. Awo ananwerya okhala “voochawelavo echeku yoopaka naari nipuro nawiipithavo epula yoowali.” (Yes. 32:2, PMM) Akhweya atokweene ananwerya omuloca murokora mmoha yoowo nyuwaano munahaalaanyu okhala ootaphuwa olocano ni ophwanya nihakararyo.—Mas. 17:17.

Apwanne yookhalavo echu ekina yeeyo nyuwaano munaphwanelaanyu weera wi mwaakhaviherye aiyanyu ovootha yookhovelela ya woona epwitikiri? Akhweya. Piipiliya onnaloca wi orehererya nikacamiho noovila naari omvootha mwiicani oowerya, ‘ti waphaama okhala eeli opwaha okhala muchu meekheiye.’ (Ekl. 4:9-12, PMM) Otholathola onnooniherya wi chiryene, vaavaa mulopwana ni mwaariye  aniilipixeryaaya vamoha ti wooweryeya ovootha yookhovelela ya woona epwitikiri ni okookiherya ororomelana mu othela waya.

Mweeparipari, eyo enahaala oweryeya wakhala wi aiyanyu ari ooreheryeya ohiya woona epwitikiri. Apwanne awo annavekela moohihiyererya wa Yehova evekaka ikuru ni waavya nikhaviheryo wa atokweene? (2 Ako. 4:7; Tiy. 5:14, 15) Apwanne awo aakhalano mphimo wi ekhale ocai wa yaweeha ya woona epwitikiri? Ntoko yootakiherya, apwanne awo aakhalano mphimo vaavaa awo anapharihelaaya ikhankoonya naari annasepa mikhalelo saweeha? (Mas. 27:12) Apwanne awo ari ooreherya weemererya nikhaviheryo nanyu ni okhala oororomeleya wa nyuwo? Wakhala wi awo aheerano ichu seiha munanwerya waakhaviherya.

Mwawiihai? Moone yootakiherya emoha. Felicia aatheliwe ni Ethan, yoowo aarino yookhovelela ya woona epwitikiri ovinyerya ari mwaana. Felicia onnamuhiya iyawe ootaphuwa wi echekule vamoha ikwaha soothene owo onakhaleiyeno nchuno na woona epwitikiri. Ethan ooloca: “Miyaano kinnaloca iparipari soothene wa mwaaraka. Moosivela owo onnakikhaviherya osepa yaweeha nave ilukuluku soothene onnakikoha mukhalelo kinakhumelelaaka. Owo onnakikhaviherya ohela mphimo mmukhalelo kinampharihelaaka interneti.” Eparipari wi tahi wookhweya wa Felicia owoona aiyawe Ethan ewanihaka ni yookhovelela ya woona epwitikiri. Owo ooloca: “Okhala oosarasareya ni oonyeenyeya hemukhaviherya iyaka ovootha yookhovelela yeeyo. Ikwaha soothene nnachekulelaahu vooloca sa nikacamiho naya, awo annakhala oolakelela okikhaviherya ovilela ni wiicela waka.”

Ovaanela ntoko yoola onanwerya omukhaviherya mulopwana osepa woona epwitikiri nave muthiyana okookela omuroromela yoowo. Mweeparipari, vaavaa mulopwana onakhaleiye ooreheryeya oloca sooceecheiha wa mwaariye, oloca nipuro onayeiyewo nave echu onayeiye opaka, enanwerya omukhaviherya mwaariye omuroromela yoowo woona wi oosuwela wi iyawe hanamukhuwa echu.

Apwanne mwaanwerya omukhaviherya iyanyu mmukhalelo yoowo? Akhweya nyuwaano mwanwerya waalakhanya vamoha mwaha yoola nave mvaanele vooloca sa yoola. Soolakelela saya onaphwanela okhala ohiya woona epwitikiri ni okookela ororomeliwa ni nyuwaano. Ohiya okhala oonyeenyeya wakhala wi nyuwaano munnachuna oloca ni yaawo vooloca sa nikacamiho awo anaphwanela weererya wiiwexexa mukhalelo nikacamiho nno nnoovolowelaayaani. Yoolakelela anyu ori okhaviherya wiilipixerya waya ni waavaha ekari wi awo yoolekecheeni wi nyuwaano mwaaroromeleke. Oopiili anyu munaphwanela wiiwexexa echu enamweeriha muchu ochuna woona epwitikiri ni mukhalelo wa ovootha nikacamiho nenlo. d

 Wakhala wi mohoona wi ochekula munahaalaanyu okhalano ni iyanyu onanwerya okumiherya waakhulana, akhweya nyuwaano munanwerya omwiichana mutokweene yoowo munakhalaanyuno ootaphuwa wi apake makupa mu ochekula yoowo. Muupuwele wi naamwi iyanyu avoonthe yookhovelela ya woona epwitikiri, enamviravo elukuluku yincipale wi mukookele omuroromela yoowo. Muhivelavele. Mvareryeleke oya wanyu vahoolo mu onthamwene anyu. Nweherye wi veelukuluku aya ni moopisa murima, othela wanyu onahaala okhala woolipa wanaawiili.—Ekl. 7:8; 1 Ako. 13:4.

Hanka wakhala wi moovira wa elukuluku aiyanyu aakookela woona epwitikiri? Apwanne eyo enataphulela wi awo hecharunwe naari wi hewerya ovootha? Ikwaha ikina hooye. Xaxaxa wakhala wi aiyanyu aakhalano yookhovelela ya woona epwitikiri akhweya awo anahaala owaniha ni yookhovelela yeeyo mu ekumi aya woothene. Naamwi emalinhe iyaakha sincipale ehonne epwitikiri, awo ananwerya woona. Wi eyo eheereye awo anaphwanela opaka makupa aya wi yiikhapelele. Akhweya weerano yeeyo naamwi yoonaka wi aavootha nikacamiho. (Mas. 28:14; Mat. 5:29; 1 Ako. 10:12) Awo anaphwanela “orehererya mukhalelo [aya] wa wuupuwela” ni ohuserya ‘wiica yoonanara,’ enaphitaanyerya woona epwitikiri, hiihaa ntoko ichu ikina sooriipiheya, ntoko oceha. (Aef. 4:23; Sal. 97:10, PMM; Aro. 12:9) Apwanne awo eri ooreheryeya wiilipiherya mmukhalelo yoola? Yaari hiiha, ananwerya ovootha moomalela yookhovelela yeela. e

Hanka wakhala wi oothelananyu hanooniherya nchuno na owaniha nnikacamiho nawe? Ti yawooneya wi nyuwaano munahaala okhala oothanana, oonyeenyeya ni oomwareeliwa. Mwaavye okhalano murecele wa mmuupuweloni moorweela wa ohiya mwaha owo mmatani mwa Yehova. (1 Pet. 5:7) Mutitelele omwaacamela Yehova moorweela wa ohuserya, ovekela ni wuupuwelela. Vaavaa muneeraanyuno yeela, muroromele wi Yehova tho onanwaacamelaani. Ntoko onaloceiye Yesaya 57:15, PMM, Yehova onakhala ni “oohooshiwa ni a murima wa wiiyeviha.” Mweererye okhala Mukristu aphaama ophiyerya munaweryelaanyuvo. Mwaavye nikhaviheryo na atokweene. Nave muhiyeleele ewehereryo wi nihiku nimoha iyanyu onampaka matorokelo oochuneya.—Aro. 2:4; 2 Pet. 3:9.