1. Tiheeni Yehova oweemerenryeiye alapeli oororomeleya opaka mmuloko awe?

MOOSIVELA Yehova oowemererya alapeli awe oothene oororomeleya opaka makupa mmuloko awe. Naamwi nrino mirici soohiyana, oothene ahu naachu asisapo nave ninnachuna nikhaviheryo na mukina ni mukhwaawe. Murummwa Paulo oonikhaviherya wiiwexexa nihusiheryo nenla noochuneya. Mwawiihai?

2. Mwawiiwanana ni Éfeso 4:16, ntakhara heeni ninnaphwanela ocicimihana mukina ni mukhwaawe ni olapaka vamoha?

² Hiiha ntoko yoorepa ya mwaha eloncaaya, Paulo ooceenyerya wi ahikhale muchu onahaala oloca wa mulapeli mukina a Yehova wi: “Honakipharela muteko!” (1 Kor. 12:21) Naariki nikhaleno murecele mmulokoni, nnaphwanela ocicimihana mukina ni mukhwaawe ni olapa vamoha. (Mwaalakhanye Éfeso 4:16.) Vaavaa nnalapaahu vamoha mwawiiwanana, mmoha ti mmoha onahaala woona wi onnasiveliwa nave muloko onamukhala woolipa.

3. Tiheeni nnahaalaahu othokororya mmwaha yoola?

³ Mmikhalelo taani nneeraahu nooniherye ncicimiho wa Akristu mmulokoni? Mmwaha yoola, nnahaala othokororya ti mwawiihai atokweene a mmulokoni eneeraaya yooniherye ncicimiho wa atokweene akhwaaya. Voocharela nnahaala ohuserya mukhalelo nneeraahu nooniherye ncicimiho wa anna ni arokora yaawo ari aciye. Vookuchula, nnahaala ohuserya mukhalelo nneeraahu nooniherye othamalela wa yaale ahinawerya oloca phaama elocelo ahu.

4. Ekano taani ya Paulo enaphwanyeya mu Aroma 12:10, yeeyo atokweene anaphwanelaaya ochariha?

⁴ Atokweene oothene a mmulokoni athanliwe ni munepa waweela wa Yehova. Mwawiihiiha, muchu ti muchu ookhalano samahala ni mavyakelo oohiyana. (1 Kor. 12:17, 18) Akhweya akina athanliwe hiihaanoru nave hiyaanono mavyakelo mancipale ntoko atokweene akina. Akina aakhalano okotakota nthowa na wuuluvala naari makacamiho a okumi. Naamwi hiihaa, haavo mutokweene onaphwanela oloca wa mutokweene mukina ariki: “Honakipharela muteko.” Ohiya yeeyo, mutokweene ori oothene onaphwanela ochariha ekano ya Paulo enaphwanyeya mu Aroma 12:10.—Mwaalakhanye.

5. Atokweene eni yooniherye hai wi annaacicimiha atokweene akhwaaya, nave ntakhara heeni eryaaya yoochuneya weerano yeela?

⁵ Atokweene annooniherya wi annaacicimiha atokweene akhwaaya moorweela wa waawiriyana moopwacha. Ela ti yoochuneya, xaxaxa vaavaa atokweene anathukumanaaya ntoko nikhuuru wi epake soolakelela soochuneya. Ntakhara heeni? Moone yeeyo Mulipeleli 1 a Otupuru a 1988 olonceiye: “Atokweene anaphwanela osuwela wi Yesu onanwerya opharihela munepa waweela wi amukhaviherye mutokweene a mmulokoni ori oothene wi uupuwele nlakiheryo na Piipiliya nenlo nnahaala okhaviherya nikhuuru na atokweene opaka yoolakelela yoochuneya. (Saw. 15:6-15) Munepa waweela onnaahoolela atokweene oothene mmulokoni, ohiya pahiru mmoha a yaawo.”

6. Atokweene eni elape hai vamoha mwawiiwanana, nave muloko oni ophure hai vaavaa awo aneeraayano yeela?

⁶ Mutokweene a mmulokoni yoowo onaacicimiha atokweene akhwaawe, hanakhala awaapwaha akina vaavaa anavaanelaaya mwaha vyakala. Nave tho hanuupuwela wi moonelo awe ilukuluku soothene ti woophwanelela. Ohiya yeeyo, onnaloca moonelo awe mwawiiyeviha. Owo onnawiriyana moopwacha moonelo wa akina. Nave echu yoochuneyaxa, owo onakhala ooreheryeya oloca malakiheryo a mu Soorempwa nave onnachariha ohoolela wa “Namuteko oororomeleya ni a miruku.” (Mat. 24:45-47)  Vaavaa atokweene anooniheryaaya osivela ni ncicimiho elukuluku anathokororyaaya mwaha, munepa waweela onamukhala ni yaawo, nave anahaala opaka yoolakelela yeeyo enahaala olipiha muloko.—Tiy. 3:17, 18.

7. Yesu aawoona hai aciye?

⁷ Olelo muloko onaphitaanyerya atheli ni yaale arino anamwane. Naamwiihiiha, mmulokoni tho aakhalamo anna ni arokora yaawo ari aciye. Nnaphwanela owoonaka hai aciye? Nnaphwanela omutakiherya Yesu mmukhalelo aawooneiye aciye. Variyari va muteko awe veelaponi yavathi, Yesu haathenle. Owo aatitelela okhala muciye apharihelaka elukuluku ni ikuru sawe wi aakhwaniherye orummwa awe. Yesu hantonko wuupuwela wi waari woochuneya wa Mukristu ori oothene othela naari okhala muciye. Mwawiihiiha, owo aahiloca wi Akristu akina yaanwerya olakelela okhala aciye. (Mat. 19:11, 12) Yesu aanaacicimiha aciye. Owo hatonko owoona aciye ntoko achu ahirino esisapo naari ntoko achu ayelenle echu mookumini.

8. Mwawiiwanana ni 1 Korinto 7:7-9, tiheeni Paulo aaceenyenreiye Akristu othokororya?

⁸ Moolikana ni Yesu, murummwa Paulo aahititelela okhala muciye variyari va orummwa awe. Paulo hatonko wuupuwela wi yaari echu yooheseya Mukristu othela. Owo aahisuwela wi eyo yaari yoolakelela ya muchu mukhateiye. Naamwiihiiha, Paulo aahaaceenyerya Akristu wi ethokororye waakhanle wi yaahaala owerya omurumeela Yehova ntoko aciye. (Mwaalakhanye 1 Korinto 7:7-9.) Mwawooneya, Paulo aanaacicimiha Akristu yaawo yaari aciye. Mweeparipari, owo aahimuthanla mmiravo Timoteo, munna yoowo aari muciye wi apake ichu soochuneya mmuteko wa Yehova. * (Fil. 2:19-22) Mwawooneya, enamukhala yooheseya wuupuwela wi munna toophwanelela naari oohiphwanelela pahiru nthowa na okhala muciye naari mutheli.—1 Kor. 7:32-35, 38.

9. Tiheeni nnaphwanelaahu oloca sa atheli ni aciye?

⁹ Yesu naari Paulo hatonko wuupuwela wi Akristu oothene anaphwanela othela naari otitelela okhala aciye. Vano tiheeni nnaphwanelaahu oloca sa othela ni okhala muciye? Mulipeleli 1 a Otupuru a 2012, oovaha naakhulo nookwakwaleya. Owo oriye: “Oloca mweeparipari, makupa oomeeli [atheli ni aciye] ananwerya wooniwa ntoko samahala soorweela wa Muluku. . . Yehova hanuupuwela wi aciye anamukhala awuuliwa muru naari awuukhuwa nthowa nawi hathenle.” Ni yeeyo mmuupuweloni,  nnaphwanela waacicimiha anna ni arokora yaawo ari aciye mmulokoni.

10. Nni nooniherye hai ncicimiho wa anna ni arokora yaawo ari aciye?

¹⁰ Nni nooniherye hai wi ninnacicimiha moonelo ni mikhalelo sa anna ni arokora ahu yaawo ari aciye? Nnaphwanela wuupuwela wi Akristu akina yaawo ari aciye aapaka yoolakelela ya otitelela okhala aciye. Nave aciye akina annachuna othela naari otheliwa, nyenya hanamphwanya muchu oophwanelela othelanano. Eniiha akina aamuyeleela oothelana aya mookhwani. Moohipwacha mathowa ene, apwanne yaamukhala ya miruku wa oothene mmulokoni waakoha Akristu yaale ari aciye ntakhara heeni ahithenlaaya naari ahitheliwaaya ni waakhaviherya omphwanya oothelanano? Mweeparipari, aciye akina annachuna nikhaviheryo ntoko nenla. Nyenya wakhala wi awo havenke nikhaviheryo nlo, munna naari murokora ori muciye, oni oone hai vaavaa muchu oniivaheiye wi amukhaviherye omphwanya oothelanano? (1 Tes. 4:11; 1 Tim. 5:13) Hankooni nthokororye yeeyo anna ni arokora akina oororomeleya yaawo ari aciye aloncaaya.

11-12. Naahikhalano ekaasoope, ti mwawiihai nneeraahu naaceecheihe aciye?

¹¹ Ooweherya ekulucu mmoha yoowo onakhumelela phaama mmuteko awe ohoona wi wookhalavo mphurelo mutokweene wa otitelela okhala muciye. Nyenya owo olonce wi, enakhala yawuukhula vaavaa anna ni arokora anamukohaaya eriki: “Ntakhara heni muhithenlaanyu?” Munna mmoha yoowo ori muciye nave onarumeela ofiliyale ooloca: “Mu ilukuluku ikina, kinnoona wi anna ni arokora akina annaathananela aciye. Eyo enneeriha wi ociye wooniweke okhala nikacamiho ohiya yamahala.”

¹² Murokora mmoha yoowo ori muciye nave onarumeela Opeteli ooloca: “Anna ni arokora akina anuupuwela wi muciye ori oothene onnamwaavya oothelanano, naari wi vaavaa muciye onayeiye mmithukumano soohiyanahiyana onaavya ekari ya omphwanya oothelanano. Vaavaa kaakelaaka mmuceche mukina ntakhara muteko aka wa Opeteli, kaaphin’ye ohiyu mu nihiku na mithukumano. Murokora yoowo aakaakhenle aahikileela wi mmuloko awe aakhalamo anna eeli oophwanelela wa miyaano. Nave murokora owo aahikileela wi, tahi wi eererya okaavyerya munna. Nyenya vaavaa naavolonwaahu mu Empa ya Omwene, murokora owo aakikeriha weiwo anna ale eeli yaaraayawo. Mweeparipari, eyo yaari yawuuliha muru wa miyaano navetho wa anna ale.”

13. Sootakiherya taani saamulipinhe murokora mmoha yoowo ori muciye?

¹³ Murokora yoowo ori muciye nave onarumeela Opeteli ooloca: “Kohaasuwela anna ni arokora akina yaawo ari mapiyoneero nave atitelenle okhala aciye mu iyaakha sincipale yaawo ari oophimelela, awiiveleela, ni oohakalala navetho annakhaviherya vancipale mmulokoni. Awo aakhalano moonelo woophwanelela vooloca sa okhala aciye, nave hanuupuwela wi toophwanelela waapwaha akina naari okhala awuukhuwa nthowa na okhala aciye ni ohikhalano anamwane.” Wa nthowa na yeela, ti yaphaama anna ni arokora mmulokoni omucicimihaka muchu ti muchu. Neerano hiihaa, haavo onahaala wiisoona okhala oohiphwanelela ni a wuuliheya muru. Nave haavo onahaala wiisoona okhala oophwanelela waapwaha akina. Muchu ti muchu onahaala wiisoona okhala oochuneya.

14. Nni nooniherye hai wi ninnaacicimiha aciye?

¹⁴ Anna ni arokora ahu anahaala othamalela wakhala wi ninnaathamalela orweela mu makhalelo aya aphaama ohiya owuukhula nthowa na okhala aciye. Ohiya waathananela yaawo, enamukhala yaphaama waathamalela nthowa na ororomeleya waya. Ntoko yookhumelela, anna ni arokora yaawo ari aciye herwa yiisoona ntoko wi nnaaleela yaawo nriki:  “Honakipharela muteko.” (1 Kor. 12:21) Ohiya yeeyo, ninnacicimiha ni ovaha esisapo makupa aya mmulokoni.

15. Matorokelo taani akina apankaaya wi yaaceererye orummwa aya?

¹⁵ Mu iyaakha sa hiihaanoru anna ni arokora akina aapaka yoolakelela ya ohuserya elocelo evyaani wi yaaceererye orummwa aya. Wi yeereno yeela, awo yaahitoroka ichu ikina mookumini mwaya. Anna ni arokora yaala aahiya muloko yoowo onapharihela elocelo aya yooyariwano ni yoolakelela ya orumeela mmuloko onapharihela elocelo ekina, weiwo oriwo othowa wa alaleeryi a Omwene. (Saw. 16:9) Ela yoolakelela ya muchu mukhateiye Akristu yaala apankaaya ni yoolakelela ya omurumeela Yehova moopwahaxa. Naamwi emalihaka elukuluku yincipale wi ehuserye elocelo ya muloko muvyaani, awo annakhaviherya muloko mmikhalelo mincipale. Makhalelo aya aphaama ni saweereya saya sinnaalipiha anna ni arokora. Ninnaavaha esisapo anna ni arokora yaala awiiveleela!

16. Malakiheryo taani atokweene anaphwanelaaya opharihela wi elakelele, waakhanle wi munna onnaphwanelela okhala mutokweene naari murummwa oorumeela?

¹⁶ Nikhuuru na atokweene hannaphwanela olakelela wi munna ahirumeele ntoko mutokweene a muloko naari murummwa oorumeela pahiru nthowa na ohiloca phaama elocelo ya vamulokoni. Atokweene anaphwanela omvareryela munna mwawiiwanana ni malakiheryo anathipeleya mu Soorempwa, vooloca sa yeeyo enaweheryiwa wa atokweene ni arummwa oorumeela. Nyenya atokweene hanaphwanela omvareryela munna mwawiiwanana ni mukhalelo onaloceiye elocelo ya vamulokoni.—1 Tim. 3:1-10, 12, 13; Tito 1:5-9.

17. Makoho taani imusi seiho sinathaamela mu elapo ekina inaphwanelaaya othokororya?

¹⁷ Imusi ikina Seekristu sinnathaamela mu elapo ekina nthowa na mikhalelo soovila sa elapo aya naari waavya muteko. Ntoko yookhumelela, anaaya annahuserya mu elocelo ya elapo yeeyo athaamenlaayawo. Akhweya asitiithi anaphwanela ohuseryatho elocelo ya elapo yeeyo wi ephwanye muteko. Vano hanka wakhala wi mmukuma aryaayawo wookhalawo muloko naari nikhuuru na elocelo aya? Muloko taani emusi enaphwanelaaya othukumanakawo? Apwanne anaphwanela othukumanaka mmuloko wa elocelo ya elapo aryaayawo, naari mmuloko wa elocelo aya yooyariwano?

18. Mwawiiwanana ni Galasya 6:5, nni nooniherye hai wi ninnacicimiha yoolakelela ya muru wa echoko?

¹⁸ Muru wa echoko onaphwanela olakelela muloko taani anaphwanelaaya othukumanakawo. Woona wi ola mwaha wa muchu mukhateiye, owo onahaala othokororya teevi eri yoophwanelela wa echoko awe. (Mwaalakhanye Galasya 6:5.) Nnaphwanela ocicimiha yoolakelela ya muru wa echoko. Moohipwacha yeeyo onahaaleiye olakelela, hankooni neemererye yoolakelela awe moorweela wa owaakhela ni waasivela ntoko echoko.—Aro. 15:7.

19. Echu taani muru wa echoko onaphwanela oveka mu nivekelo ohaakumve opaka yoolakelela?

 ¹⁹ Mmakupa makina ichoko ikina inarumeela mmuloko wa elocelo ya asitiithi, nyenya akhweya anamwane hanaloca phaama elocelo ya asitiithi aya. Wakhala wi muloko wa echoko ori mmukuma yoowo onalociwawo elocelo ya elapo yeeyo, onamukhala woovila wa anamwane wiiwexexa yootaphulela ya masu vyakala ni wunnuwa omunepani. Ntakhara heeni? Nthowa nawi anamwane anahaala ohuseryaka mu exikola yeeyo enapharihela elocelo ya elapo aryaayawo nave ohiya elocelo ya asitiithi aya. Mmikhalelo ntoko seiha, muru wa echoko onaphwanela ovekela ni wuupuwelela mwawiiseela wi olakelele yeeyo enahaala waakhaviherya anaaya omwaacamela Yehova ni achu awe. Asitiithi anaphwanela waahusiha anaaya oloca elocelo aya naari othaamela mmuloko yoowo onapharihela elocelo yeeyo anaaya aniiwexexaaya phaama. Moohipwacha yoolakelela ya muru wa echoko, anna ni arokora a muloko yoowo anarumeelaayawo, anaphwanela ocicimiha ni ovaha esisapo echoko eyo.

20. Nni nooniherye hai ncicimiho wa anna ni arokora yaawo anahuserya elocelo evyaani?

²⁰ Mu mathowa oothene yaala nimanlaahu othokororya, mmiloko mincipale, anamukhalamo anna ni arokora yaawo anawaniha wi ehuserye elocelo evyaani. Ela enamweeriha okhala woovila wa yaawo oloca yeeyo anuupuwelaaya. Mwa yeela, wakhala wi hinnavarerya pahiru mukhalelo analocaaya elocelo evyaani, nnahaala woona osivela waya ntakhara Yehova ni nchuno naya na omurumeela yoowo. Wakhala wi ninnoona makhalelo yaala aphaama, nnahaala waacicimihika mwawiiseela anna ni arokora yaala. Hinni nloce wi, “honakipharela muteko” pahiru nthowa nawi hanaloca phaama elocelo ahu.

21-22. Ekari taani yavameekhaaya Yehova onivanheiye?

²¹ Yehova oonivaha ekari yavameekhaaya ya opaka makupa mmulokoni. Moohipwacha waakhanle wi na mulopwana naari muthiyana, muciye naari mutheli, mmiravo ni mwali naari awunnuwelavo, ninnaloca phaama elocelo yammoori naari hooye, oothene ahu naachu oochuneya wa Yehova navetho wa mukina ni mukhwaawe.—Aro. 12:4, 5; Kol. 3:10, 11.

²² Nnaphwanela otitelela opharihela mahusiheryo mancipale aphaama yaawo nihusenryaahu orweela wa niphwanaphwaniho na Paulo, vooloca sa mwiili wa muchu. Ela enamunikhaviherya opaka yeeyo enahaala waalipiha anna ni arokora mmulokoni, navetho enamunikhaviherya waasivela ni waacicimihaka yaawo.