1. Mukhalelo taani waphaama achu a Yehova aryaayano?

 PIIPILIYA aaloherya wi achu a Muluku yaahaala ‘wiiperekha aneene meekhaaya’ wi emurumeele Yehova ehooleliwaka ni Yesu. (Sal. 110:3) Yooloherya yeela chiryene ennaakhwanela mmahiku ahu. Eyaakha ti eyaakha, alapeli amvai a Yehova annamaliha iwora amilyawu mmuteko woolaleerya. Awo anneerano yeela mwa wiiperekha nave hanaliviwa echu. Awo tho annaavya elukuluku wi yaakhaviherye akhwaaya a munroromeloni mmukhalelo woomwiilini, wa mmuupuweloni, ni woomunepani. Atokweene a mmulokoni ni arummwa oorumeela annamaliha iwora sincipale erehereryaka makupa a mithukumano ni waaxekurya anna ni arokora aya wi yaalipihe. Tiheeni enaweeriha achu a Yehova ophara miteko soothene seiha? Osivela—omusivela Yehova ni achu.—Mat. 22:37-39.

2. Ntoko enatharihiwaaya mu Aroma 15:1-3, yootakiherya taani Yesu otikithenryeiye?

² Yesu aahooniherya wi aanathokororya soochuna sa akina opwaha sawawe. Hiyaano ninnapaka owetha wahu wi nikhale ntoko yoowo. (Mwaalakhanye Aroma 15:1-3.) Wakhala wi ninneerano yeela, ninnakhalano sookhumelela saphaama. Yesu ooloca: “Wookhalavo ohakalala wawaaca mu ovaha, opwaha mu waakhela.”—Saw. 20:35, TNM.

3. Tiheeni nnahaalaahu othokororya mmwaha yoola?

³ Mmwaha yoola, nnahaala othokororya ichu seiho Yesu aapankeiye wi aakhaviherye akina ni mukhalelo nneeraahu niwerye ochariha yootakiherya awe. Nnahaala tho othokororya mukhalelo nneeraahu ninnuwihe nchuno nahu na waarumeela akina.

4. Ti mwawiihai Yesu aahenleiye soochuna sa akina mu nipuro noopacerya opwaha sawawe?

⁴ Yesu aaniivaha naamwi akomme. Muupuwele yeeyo Yesu enreiye vaavaa achu ancipale yaaruulaaya wa yoowo omwaako, mwawooneya waacamela o Kafarnawu. Yesu iiha amalinhe ohiyu woothene arikimvekela. Ti yawooneya wi owo aakoma vancipale, nyenya vaavaa onneiye muloko aamoriwano ikharari ni achu oohaawa ni awiiceliwa yaawo yaari vaavale. Tahi pahiru owo aarimoona waapenuxa, nyenya tho owo aaloca mwaha woolipiha onasuweliwa ntoko Mwaha wa Vamwaakoni.—Luka 6:12-20.

5. Ti mwawiihai miru sa ichoko inacharihaaya mukhalelo wa wiivaha wa Yesu vaavaa anakhalaaya oovelavela?

⁵ Ti mwawiihai miru sa ichoko sineeraaya simutakiherye Yesu? Muupuwele yootakiherya ela: Omakuchuwelo wa nihiku amanle olapa mwakuru, tiithi onnaphiya owaani ari oovelela. Akhweya owo onamuupuwela wi aheecihe malapelo a echoko ohiyu yoole, nyenya onnavekela wa Yehova avekaka wi amvahe ikuru wi awerye weerano. Yehova onnaakhula nivekelo nawe, nave tiithi onnahuserya ni emusi awe hiihaa ntoko aneeraaya esumana ti esumana. Anamwane annahuseryavo nihusiheryo noochuneya mu ohiyu yoole, nawi, asitiithi aya, annakuha ichu soomunepani mu nipuro noopacerya opwaha echu vyakala.

6. Mvahe yootakiherya vooloca sa mukhalelo Yesu aavanheiye elukuluku awe wi aakhaviherye akina.

⁶ Yesu aanamaliha elukuluku ni akina naamwi vaavaa aachuneiye okhala mukhateiye. Apwanne munnawerya waanyiherya mukhalelo Yesu oonneiye vaavaa iiwaleiye wi nthamwene awe Yohani Mpatisi ohiiphiwa? Yesu aatepa othanana. Piipiliya oni: “Iiwaleiye [vooloca sa okhwa wa Yohani], Yesu aavinyawo, alapuwa ni mwaaceya ayaaka otakhwani wi akhalewo meekheiye.” (Mat. 14:10-13) Hiyaano ninniiwexexa ntakhara heeni owo aachuneiye okhala meekheiye. Ancipale a hiyo ninnathanla winla mu nipuro nawiipitheya. Nyenya Yesu haawenrye okhala meekheiye. Mucici muncipale wa achu waaphiya nipuro nenle noomaaleleya owo ahaakumve ophiya. Yesu oonne hai? Owo aahuupuwelela vooloca sa soothowa sa achu yaale,  nave ‘aahaamorela ikharari.’ Yesu aahoona wi awo yaanachuna nikhaviheryo ni olipihiwa orweela wa Muluku, mwawiihiiha, mwawaakuveya owo aahaakhaviherya. Owo “àpatxerya wahusiha [ohiya ichu vakhaani, nyenya] itxhu sintxipale.”—Mar. 6:31-34; Luka 9:10, 11, BNM.

7-8. Mvahe yootakiherya yeeyo enooniherya wi atokweene a mmulokoni ennamutakiherya Yesu vaavaa muchu onachuneiye nikhaviheryo.

⁷ Ti mwawiihai atokweene oosivela anamutakiheryaaya Yesu? Ninnathamalela vancipale muteko yoowo atokweene ahu awiiveleela anapakaaya ntakhara hiyo! Ancipale a anna ni arokora mmulokoni hanasuwela muteko woothene awo anapakaaya. Ntoko yootakiherya, yakhumelela ereca yootutuxa, anna a Nikhuuru Nawiiwanana ni Exipitali anneeravo echu mwawaakuveya wi yaakhaviherye annaya. Wiiliwiili ireca seiha sootutuxa sineereya ohiyu! Nyenya eceenyeryiwaka nniphwanya ntakhara munna naari murokora aya yoowo oniiceliwa, atokweene yaala oosiveliwa, vamoha ni imusi saya, annakuha soochuna sa annaya mu nipuro noopacerya ohiya sawaya.

⁸ Atokweene tho annakhaviherya mu otekiwa wa Ipa sa Omwene ni miteko mikina sa oteka naari vaavaa eneereyaaya epahu ya maphacuwelo. Awo tho ennamaliha elukuluku aya enihusihaka ni onilipiha. Anna oothene yaala vamoha ni imusi saya annaphwanela othamaleliwa. Nave tho Yehova onnathamalela ntakhara wiiveleela waya! Mweeparipari, hiihaa ntoko muchu vyakala, atokweene anaphwanela okhala oophimelela. Awo hanaphwanela omaliha elukuluku aya yoothene epakaka ichu sa mmulokoni ophiyerya ohikhalano elukuluku ya okhapelela soothowa sa imusi saya.

9. Mwawiiwanana ni Filipi 2:4, 5, mukhalelo taani Akristu oothene anaphwanelaaya winnuwiha?

⁹ Mwaalakhanye Filipi 2:4, 5. Eparipari wi oothene ahu tahi na atokweene, nyenya oothene ahu nnanwerya ohuserya otakiherya mukhalelo wa wiiveleela wa Yesu. Piipiliya onnaloca wi owo ‘aakusha makhalelo ookapuro.’ (Fil. 2:7) Muupuwele yeeyo nnahuseryaahu orweela mu eversikulu yeela. Kapuro naari mulapeli oochuneya, onnaavya ikari sa omuhakalaliha pwiyawe. Woona wi na akapuro a Yehova nave nnaarumeela annihu, hiyaano ninnachuna ophariheliwa vancipale ni Yehova vamoha ni annihu. Hiyaano nnanwerya weerano yeela moorweela wa othokororya sooleeliherya inacharela.

10. Makoho taani nnaphwanelaahu wiipakela?

¹⁰ Mvareryele mukhalelo anyu. Mwiipakele makoho ntoko ala: ‘Apwanne kiri oorehereya ovaha elukuluku ni ikuru saka wi kaakhaviherye akina? Ntoko yootakiherya, tiheeni kaahaalaaka weera waakhanle wi koovekiwa wi kimukhapelele munna awuuluvala naari omukuxa murokora awuuluvala wi aphiye mmithukumano? Apwanne kinniivaha mwawaakuveya vaavaa anachuneyaaya alipa awiiveleela wi erehererye nipuro na muthukumano wa muceche ni weeliha Empa ya Omwene?’ Vaavaa niiveleenlaahu wa Yehova, hiyaano naamuroromeliha wi naahaala opharihela soothene nryaahuno wi nimurumeele yoowo. Owo onachuna wi niphariheleke elukuluku ahu, ikuru sahu, ni ichu sahu soomwiilini wi naakhaviherye akina. Mwawiihiiha, owo onnahakalala vaavaa nneeraahuno yeela mwa wiivaha. Wakhala wi nohoona wi yookhalavo echu nnaphwanelaahu orehererya, tiheeni nnaphwanelaahu weera?

11. Ti mwawiihai nivekelo nnanikhaviheryaaya okhala oorehereya waakhaviherya akina?

¹¹ Mvekele ni murima woothene wa Yehova. Mwaanyiherye wi nyuwaano munnachuna wiiveleele mmukhalelo vyakala, nyenya munnoona wi hamuni nwerye weerano yeeyo. Mmukhalelo yoola, mvekele ni murima anyu woothene wa Yehova. Muloce soothene iri mmurimani mwanyu. Mmuleele Yehova mukhalelo muniisoonaanyu nave mumveke wi oovaheeni “nchuno ni owerya wa weerano yeeyo enamuhakalaliha.”—Fil. 2:13, TNM.

12. Ti mwawiihai anna ari amiravo aneeraaya ekhaviherye mmiloko saya?

¹² Waakhanle wi nyuwaano mwa mmiravo oopatisiwa, mumveke Yehova wi ookhaviheryeeni waaceererya nchuno na waarumeela akina mmuloko anyu. Mu ilapo ikina, atokweene a mmulokoni taance waapwaha arummwa oorumeela, nave ancipale a arummwa oorumeela yaala tawuuluvala. Woona wi marehereryo anamvira yaaceereryeyaka, hiyaano ninnaachuna anna yaawo ari amiravo wi yaakhaviheryeke atokweene waakhapelela anna ni arokora aya mmulokoni. Wakhala wi nyuwaano muri ooreheryeya orumeela mmukhalelo ori woothene, munahaala okhala oohakalala. Ntakhara heeni? Nthowa nawi munahaala omuhakalaliha Yehova, munahaala okhalano ovuwa waphaama nave munahaala okhalano ohakalala onarweela mu waakhaviherya akina.

13-14. Tiheeni nnaphwanelaahu weera wi naakhaviherye anna ni arokora ahu? (Moone eruku ya ekaapa.)

¹³ Nvareryeleke soothowa sa akina. Murummwa Paulo aaloca wa Akristu yaakhala o Yuteya: “Muhicuwaleke weera saphaama ni wuuka ni akina, ntakhara mikucho seiho tinnamuhakalaliha Muluku.” (Ahe. 13:16) Ela yaari ekano yoophara muteko! Ehivinre elukuluku yincipale emanle waakhela ekaarata  yeela, Akristu o Yuteya yaaphwanela ohiya ipa saya, anakoso aya, ni amusi aya yahaari Akristu nave ‘echawele omiyaakoni.’ (Mat. 24:16) Mu elukuluku yeele, moohikhwa minikwa waari woochuneyaxa wa yaawo okhaviheryana mukina ni mukhwaawe. Waakhanle wi awo aapharihela ekano ya Paulo ya okawana yeeyo yaaraayano mukina ni mukhwaawe, waahaala okhala wookhweya wa yaawo wiikhoveleliha mukhalelo muvyaani wa okumi.

¹⁴ Akhweya anna ni arokora ahu ilukuluku soothene heni ewerye onleela yeeyo enaathowa. Ntoko yootakiherya, munna onanwerya omuyeleela mwaariye mookhwani. Apwanne owo onahaala ochuna nikhaviheryo na ovahiwa soolya, ovahiwa poleya, naari okhaviheryiwa ni miteko sa vaate? Akhweya owo hani aveke nikhaviheryo oovaka wi nnahaala ohapaleya. Nyenya owo onahaala othamalela wakhala wi nohiivaha wi nimukhaviherye wa yeeyo enamuthowa. Hannaphwanela wuupuwela wi akhweya muchu mukina onahaala omukhaviherya naari wi ilukuluku soothene onahaala onleela yeeyo onachuneiye. Mwiikohe: ‘Waakhanle wi kiri mmukhalelo mmohamoha, nikhaviheryo taani kaahaalaaka othamalela?’

15. Tiheeni nnaphwanelaahu weera wakhala wi ninnachuna waakhaviherya akina?

¹⁵ Mukhale awaacameleya. Moohikhwa minikwa nyuwaano mohaasuwela anna ni arokora a mmuloko anyu yaawo ilukuluku soothene ari ooreheryeya waakhaviherya akina. Awo hiyintonko oneeriha wiisoona wi nohaahapaliha yaawo. Hiyaano ninnasuwela wi ilukuluku soothene awo ari ooreheryeya wi enikhaviherye, nave hiyaano nahaala osiveliwa okhala ntoko yaawo! Alan, mutokweene yoowo orino iyaakha 40, onnachuna okhala awaacameleya. Uupuwelelaka yootakiherya  ya Yesu, Alan ooloca: “Yesu aari ooweiwa, nyenya achu oothene moohiphwacha iyaakha saya yaanamwaacamela nave yaanakhala ootaphuwa omveka nikhaviheryo. Awo yaanasuwela wi chiryene owo aanaapwacha. Miyaano kinachuna okhala ntoko Yesu ni osuweliwa ntoko muchu awaacameleya, oonthamwene, ni awaapwacha akina.”

16. Ti mwawiihai opharihela yoorepa ya Salumu 119:59, 60 eneeraaya enikhaviherye ochariha yootakiherya ya Yesu vakhiviru-khiviru?

¹⁶ Hannaphwanela okhala ooceecheya wakhala wi hannawerya omutakiherya Yesu moophaameya. (Tiy. 3:2) Nasikola hanawerya omutakiherya moomalela muhusiha awe. Nyenya vaavaa owo onahusereiye orweela wa soohesa sawe ni wiilipixerya omutakiherya muhusiha awe ophiyerya onaweryeleiyevo, naxikola onahaala otitelela winnuwiha mavyakelo awe. Moolikana, wakhala wi ninnapharihela yeeyo nnahuseryaahu orweela Mpiipiliyani ni weererya opaka matorokelo hiyaano nnahaala owerya ochariha yootakiherya ya Yesu vakhiviru-khiviru.—Mwaalakhanye Salumu 119:59, 60.

17-18. Wakhala wi ninnatakiherya mukhalelo wa wiiveleela wa Yesu, miphurelo taani inahaala okhalavo?

¹⁷ Vaavaa nniivelelaahu wi nikhaviherye, nnanwerya waaceenyerya akina weerano emohamoha. Mutokweene mmoha awiichaniwa Tim ooloca: “Anna yaawo ari amiravo annakhala arummwa oorumeela. Nthowa nimoha ti nawi annawoona akina aniiveleela wi ekhaviherye, nave awo annachuna okhala ntoko yaawo. Anna yaala ari amiravo annakhaviherya mmulokoni nave tho annavaha nikhaviheryo ntokweenexa wa atokweene.”

¹⁸ Achu ancipale mu elapo yeela olelo haniivaha ntakhara okhaviherya. Nyenya achu a Yehova toohiyana. Ninnatannyeya murima ni mukhalelo wa wiiveleela wa Yesu nave nri oolakelela ochariha yootakiherya awe. Hiyaano hiniwerya ochariha manaani a Yesu moophaameya, nyenya nnanwerya ‘ocharachara manaani awe.’ (1 Ped. 2:21, NN) Wakhala wi ninnapaka owetha wahu wi ntakiherye mukhalelo wa wiivaha wa Yesu, nnahaala okhala oohakalala nthowa nawi ninnamuhakalaliha Yehova.