Naamwiihiiha, Yehova onachuna wi ninwehereryeke yoowo moopisa murima wi eerevo echu mu elukuluku yoophwanelela wa yene. Ntakhara heeni owo onnawehererya yeeyo wa hiyo? Nave tiheeni enahaala onikhaviherya okhala oohakalala vaavaa nnawehereryaahu?

NTAKHARA HEENI YEHOVA ONNACHUNA WI NIWEHERERYEKE?

Piipiliya oni: “Yehova onnaweherya moopisa murima wi awooniheryeeni oreera murima, nave onamvinya wi oomoreleeni ikharari. Woona wi Yehova ti Muluku awookololowa. Oohakalala ti oothene yaale ananweherya yoowo.” (Yes. 30:18, TNM) Masu yaala a mulipa a miririmu Yesaya woopaceryani yaarepeliwe Ayuta oohiiwelela. (Yes. 30:1) Nyenya, variyari va Ayuta yaawo, yaakhalavo achu akina yaari oororomeleya, nave masu yaala yaahaavaha ewehereryo. Nave alapeli oororomeleya a Yehova olelo ananwerya okhalano ewehereryo emohamoha vaavaa anaalakhanyaaya masu a Yesaya.

Hiyaano nnaphwanela owehererya moopixa murima, woona wi Yehova tho onnaweherya moopisa murima. Owo oolakelela ti liini onahaaleiye oruuha makuchuwelo a elapo yeela yoonanara, nave owo onnaweherya wi niphiye nihiku ni ewora ene. (Mat. 24:36) Mu nihiku nenlo, oothene anahaala osuwela wi sawootha sa Satana ntakhara Yehova ni yaawo anamurumeela Yoowo ti satheru. Voocharela, Yehova onahaala omutoloxa Satana ni oothene yaale eri mmakupa awe, nto Yehova ‘onahaala onimorela ikharari.’

Niweheryaka elukuluku yeeyo, akhweya Yehova hamaliha makacamiho ahu, nyenya owo onnaniroromeliha wi nnanwerya okhala oohakalala vaavaa nnaweheryaahu. Hiihaa ntoko Yesaya olonceiye, ti wooweryeya okhala oohakalala, nave mu elukuluku emohamoha yeeyo niweheryaka weereya echu yaphaama. (Yes. 30:18) a Nto ti mwawiihai ela eryaaya yooweryeya? Hankooni noone ichu xexe inahaala onikhaviherya.

TI MWAWIIHAI NNEERAAHU NIKHALE OOHAKALALA VAAVAA NNAWEHERYAAHU?

Muupuwele vooloca sa ichu saphaama seeren’ye mu okumi anyu. Variyari va okumi awe, Mwene Tavite ohoona ichu sincipale soonanara seereyaka. (Sal. 37:35) Naamwiihiiha, owo oorepa: “Wiichuuwe mwa Apwiya, nave waawehereryeke yaawo. Ohuukhuwe murima ntakhara a yaawo aniiphwanyerya mwa okumi aa,  nari mwa nthowa na achu a makhuce.” (Sal. 37:7, PMM) Tavite aahichariha ekano yeela nave aahitikitheryeya mu ewehereryo ya ovuluxiwa yeeyo Yehova amvanheiye. Owo tho aanathamalela ntakhara ichu soothene saphaama seiho Yehova aapankeiye ntakhara yene. (Sal. 40:5) Wakhala wi noopaka emohamoha ni wuupuwela mu ichu saphaama seeren’ye ni hiyo, ohiya otikitheryeya mu ichu soonanara, onahaala okhala wookhweya onweherya Yehova.

Mutitelele okhala ooweiwa mmucicimihaka Yehova. Mulipa oomurepa Salmu 71, mwawooneya Tavite, ooloca wa Yehova: “Nto miyo kinarwa kiwehererya okhala wookhala, nave kinarwa kaaceererya woocicimihaani.” (Sal. 71:14, PMM) Tavite ii amucicimihe hai Yehova? Owo aahaala olocaka vooloca sa Yehova ni wiipa macipo oomucicimihano yoowo. (Sal. 71:16, 23) Hiihaa ntoko Tavite, hiyaano tho nnanwerya otitelela ohakalala vaavaa nnanweheryaahu Yehova. Ninnamucicimiha yoowo moorweela wa olaleerya, ochekula wahu wa nihiku ti nihiku ni wiipa macipo Oomwene mmalapelo. Mwawiihiiha, mu ekwaha yoocharela munahaalaanyu wiipa nimoha na macipo ahu, munoona hai wuupuwela yeeyo enalocaaya ni wuupuwela mmukhalelo nno nnahakalalihaaya murima anyu?

Mweemererye wi anna ni arokora yoolipiheeni. Vaavaa Tavite aahooleleiye makacamiho, owo aahiloca wa Yehova: ‘Veeri va achu anyu oororomela kinarwa koothamalaani nyuwo okhala wookhala.’ (Sal. 52:9, PMM) Hiyaano tho nnanwerya olipihiwa vaavaa nnakhalaahu vamoha ni anna ni arokora ahu, ohiya pahiru mmithukumano ni mmuteko woolaleerya, nyenya tho vaavaa nnamalihaahu elukuluku ni yaawo mmikhalelo mikina.—Aro. 1:11, 12.

Mulipihe ewehereryo anyu. Salmu 62:5, PMM onnaloca: “Mwa Mulukuru pahi kinaphwanyaaka murecele, vawi owehererya waka onarwa wa yoowo.” Ti woochuneya olipiha ewehereryo ahu, xaxaxa wakhala wi ninnaweherya makuchuwelo mu elukuluku yincipale. Nnaphwanela olekecheya wi soororomeliha soothene sa Yehova sinahaala waakhwanela, moohiphwacha waaca wa elukuluku nnahaalaahu oweherya. Nnanwerya olipiha ewehereryo ahu moorweela wa ohuserya Masu a Muluku, sooloherya, mukhalelo makupa oohiyanahiyana a Piipiliya aniiwananaaya ni sooleeliherya seiho Yehova uupulunleiye vooloca sa mukhalelo awe. (Sal. 1:2, 3) Hiyaano nnaphwanela otitelela ‘ovekela mwa munepa waweela’ wi ntitelele okhalano onthamwene woolipa ni Yehova vaavaa nnaweheryaahu wi owo aakhwaniherye yoororomeliha ya ekumi yoohimala.—Yuta 20, 21.

Hiihaa ntoko Mwene Tavite, muroromele wi Yehova onnanthokororya, onnanikhapelela nave onnooniherya osivela woororomeleya wa oothene yaale ananweherya Yoowo. (Sal. 33:18, 22) Mwawiihiiha, mutitelele onweherya Yehova moopixa murima, moorweela wa otikitheryeya mu ichu saphaama seiho seeren’ye mu okumi anyu, omucicimiha yene, mulipihiwaka ni anna ni arokora ni mulipihaka ewehereryo anyu yootikhiniha.