Asitiithi aka yaahusenrye eparipari emanle ovira eyaakha ya 1920, nyenya ehaakumve othelana. Kiyariwe omapacereryo wa eyaakha ya 1939. Elukuluku kaaryaaka mwaana, naakhala o Inklatera nave kaanaya mmithukumano vamoha ni asitiithi aka, nave ohoolo waya kaanahakalala opaka makupa mu Exikola ya Orummwa Woomuluku. Nlelo kinnuupuwela mukhalelo koonnaaka, vaavaa kaawelaka otripuna wi kaperekhe mwaha aka mu ekwaha yoopacerya. Kaarino iyaakha thanu nammoha nave kaari awuukhuwaxa vaavaa kaawehaaka achu atokweene yaawo yaakiwiriyana.

Vaavaa naayaahu mmuteko woolaleerya, apapa yaanarepela masu vakhaani va kartau wi kiwerye opharihela. Kaarino iyaakha thanu nararu vaavaa kaakelaaka olaleerya mu empa ekina kiri meekhaaka. Kaahakalala vancipale vaavaa mwaneene a vaate aamwaalakhannyeiye kartau aka nave mwawaakuveya eemererya omukuxa liivuru “Let God Be True”! (Muluku Akhaleke Eeparipari.) Kaahichimaka kiyaaka waaleela apapa. Muteko woolaleerya ni muthukumano saahikiruuhela ohakalala, nave saahikikhaviherya wunnuwiha nchuno naka na omurumeela Yehova mmuteko wa elukuluku yoothene.

Kaanasiveliwa ni iparipari sa Mpiipiliyani moopwahaxa, vaavaa apapa yaapacenryaaya omukuxa Mulipeleli ntakhara miyo. Mwawaakuveya kaanapacerya omwaalakhanya Mulipeleli vaavaa kamwaakhelaaka. Nroromelo naka mwa Yehova naanannuwa nave naahikiceenyerya wiiveleela wa yoowo.

Ntoko emusi, mu 1950 naaya Omuthukumano wa Ekulucu waarino muru “Wunnuwa wa Marehereryo a Muluku” o Nova York. Naneexexe 3 a Akostu, muru wa nihiku nenle na muthukumano waari “Nihiku na Misiyonaario.” Mu nihiku nenle, Munna Carey Barber, yoowo ohoolo waya aarumenle mu Nikhuuru Noolamulela, aahiperekha mwaha wa opatiso.  Amanle opaka makoho meeli a alipa awiiveleela, omakuchuwelo wa mwaha awe, kaaheemela kiloca kiriki, “Aai!” Kaarino iyaakha 11, nave kaahisuwela wi echu kaapankaaka yaari yoochuneyaxa. Naamwi hiiha, kaanoova oya mmaahini nthowa nawi nkaasuwelano weekha. Nave atitiyu munnaya apapa, yaahikihoola vanchiyani nave yaahikiroromeliha wi hiyaavo echu yoonanara yaahaala weereya. Mweeparipari, eyo yeeren’ye mwawaakuveya ophiyerya wi mkaaphiyale makupa awiixeela a nchiya nlo. Kaaphareliwe ni anna eeli mmoha aakipatisa nave mukina aakiviihavo vanchiyani. Ovinyerya mu nihiku nenle noochuneya, Yehova onnatitelela oluluwanya iphiro saka.

Vaavaa kaakwanxaaka esikola, kaachuna okhala piyoneero, nyenya ahusiha aka yaakikhinyererya ovolowa mu esikola yavasulu. Nthowa na okhinyererya waya, kaaheemererya ovolowa mu esikola yavasulu; mwawiihiiha, kaahisuwela wi nkaahaala otitelela okhala oolipa munroromeloni nave mu elukuluku emohamoha kitikitheryeye mu mahusiheryo aka, nthowa na yeeyo kaahilakelela ohiya. Kaahivekela wa Yehova vooloca sa mwaha yoole, nave kaahaarepela ekaarata ahusihaaka kaatharihelaka mooreera murima wi kaahaala ohiya esikola omakuchuwelo wa eyaakha. Kimuroromelaka Yehova ni murima woothene, mwawaakuveya kaahipacerya opiyoneero.

Mu Yulyu a 1957 muteko aka wa elukuluku yoothene waapacenrye mu epooma yo Wellingborough. Kaahaaveka anna a Opeteli yo Lonton wi ekirumihele piyoneero mmoha a mavyakelo wi nikhale vamoha. Munna Bert Vaisey aahikihusiha ichu sincipale, owo aari a mvai mmuteko woolaleerya. Nave aakikhaviherya opaka marehereryo aphaama a oya mmuteko woolaleerya. Muloko woothene pahiru waarino arokora thanu nammoha awunnuwelavo, Munna Vaisey ni miyaano. Wiirehererya ni opaka makupa mmithukumano soothene waanakivaha ekari ya olipiha nroromelo naka mwa Yehova ni wooniherya wa akina.

Mu elukuluku vakhaani kimanle okhuma mukariposo nthowa na okhooca okhala mukhoco, kaahimusuwela Barbara murokora yoowo aari piyoneera avameekheiye. Naapanke othela mu 1959, nave naari oorehereya oya muceche ori woothene naahaalaahu orumihiwawo. Voopacerya naarumihiwe o Lancashire makupa onaneelawo nsuwa o Inklatera. Voocharela mu Yaneru a 1961, kaahiwompwa wi kavolowe mu Esikola ya Orummwa wa Omwene o Peteli yo Lonton yeeyo yaahaala weereya mpuwa wa mweeri mmoha. Mootutuxa, omakuchuwelo wa esikola, kaahithanliwa wi karumeele mmuteko wa weeceeca. Mu isumana piili kaahivyakihiwa ni ooweherya a ekulucu amavyakelo, mu epooma yo Birmingham, nave Barbara aaheemereryiwa okhala vamoha ni miyo. Nimanle waakhela ovyakiha yoola, naahirumihiwa wanaawiili mu epooma yo Lancashire ni Cheshire.

Vaavaa naakhummaahu iferiya mu Akostu a 1962, naahaakhela ekaarata yaarweela ofiliyale. Ekaarata eyo yaaphitaanyiwe vamoha ni eformulaariyu ya Exikola yo Kiliyati! Nimanle ovekela wa Yehova vooloca sa mwaha owo, miyaano ni Barbara naahikwaaxa orepela eformulaariyu eyo, nave mwawaakuveya naahirumiha wanaawiili ofiliyale ntoko yaachuneliwaaya. Mu miyeeri mithanu ohoolo waya, naahipacerya mukwaha ahu wa oya o Brooklyn, Nov York,  wi navolowe mu eturma numero 38 ya Kiliyati, nave naamaliha miyeeri khumi naakhelaka mahusiheryo a Piipiliya.

Mahusiheryo a Esikola ya Okiliyati tahi wi pahiru yaanihusinhe Masu a Muluku ni marehereryo awe, nyenya yaanihusiha tho vooloca sa onnaahu wa elapo yoothene. Mu elukuluku yeele kaaryaakano iyaakha 24, nave Barbara 23, naahihuserya sincipale orweela wa alipa oohuserya akina a eturma ahu. Kaahikhalano ekari ya olapa vamoha ni munna Fred Rusk, mmoha a ahusiha ahu. Nihusiheryo nimoha owo aaceenyeryeiye naari nawi, ilukuluku soothene nnaphwanela ovaha ekano yoophwanelela, eyo tiwi, ororomela wi ekano nnavahaahu, enathipeleya mu Soorempwa. Anna yaaperekha miyaha variyari va esikola ahu, yaari a mavyakelo, ntoko munna Nathan Knorr, Frederick Franz ni Karl Klein. Nave anasikola oothene yaahihuserya sincipale, orweela wa munna Alexander Hugh Macmillan, yoowo aari awiiyeviha, aanihusinhe vooloca sa mukhalelo Yehova aakhavihenryeiye achu awe variyari va ilukuluku sookacamiha seiho anna yaahoolenlaaya mmarehereryo ovinyerya mu eyaakha ya 1914 ophiyerya 1919!

Omakuchuwelo wa esikola, munna Knorr amuleela Barbara ni miyaano wi nahaala oya orumeela o Purunti o Afrika. Mwawaakuveya naaya mu Epipiliyoteka ya Opeteli, wi namwaalakhanye Anuwaariyu nichunaka osuwela alaleeryi akavi yaari o Purunti mu elukuluku yeele. Naahitikhiniheya woona wi hinaaphwannye makupa waarempwevo waaca wa alaleeryi a elapo yeele! Chiryene naaya mu ekulucu yeeyo ehintonko olaleeryiwawo, makupa o Afrika weiwo nahaasuwenlaahuwo phaama. Naahitepa okhala awuukhuwa! Nivekelo nookhumela vathi va murima naanikhaviherya okhala oomaaleleya.

Mu orummwa ahu echu eri yoothene yaakhala evyaani—elapo, sookhovelela, ni elocelo. Vano naaphwanela ohuserya Efaransa. Nave tho naahihoolela nikacamiho na ophwanya mpuro nahaalaahu okhalakavo. Evinrevo mahiku meeli, nimanle ophiya o Purunti, nthamwene ahu naaryaahuno o esikola ya Okiliyati, Harry Arnott, aahinixekurya elukuluku aakookeleiye mu elapo aarumihiweiyewo o Sampiya. Owo aanikhaviherya ophwanya empa yeeyo yaakhanle empa ahu yoopacerya ya mamisiyonariyu. Moohilekela, naahipacerya waakaahiwa ni alamuleli a vanipuroni, yaawo yahaasuwenle echu vooloca sa Anamoona a Yehova. Mu elukuluku vakhaani nrikimpaceryaru ohakalala ni muteko wa orummwa ahu, alamuleli yaanileela wi hinaahaala otitelela nihirino ipapeli sooniherya wi muteko ahu woheemereryiwa. Moothananiha, naahithaama niya mu elapo ekina, o Ukanta.

 Omuroromela wahu Yehova waahivukula woova wahu vooloca sa ophiya o Ukanta nihirino etukumentu yaaneemererya ophiya weiwo. Munna mmoha awiivelela aarumeela weiwo waariwo othowa otokweene wa alaleeryi, aahithariha mukhalelo ahu wa mutokweene mmoha a mapilisa nave mutokweene owo aahineemererya okhala mu elapo yeele mu miyeeri sammoori, eniiha nrehereryaka etukumentu yaahaala oneemererya okhala weiwo. Eyo yaahooniherya wi Yehova aananikhaviherya.

Mikhalelo naahoolelaahu mu orummwa ahu ovyaani, saari soohiyana ni o Purunti. Muteko woolaleerya waaheeriwano o Ukanta, nyenya naamwi hiiha, mu elapo yoothene yaariwo Anamoona 28. Mu ekulucu ahu, naahaaphwanya achu ancipale yaawo yaaloca Enklesi. Mwawaakuveya naahisuwela wi naariki naakhaviherye yaale arino nchuno oya vahoolo, naaphwanela ohuserya ilocelo savakhaani mwa ilocelo sincipale sa achu a maloko makina. Naapacenrye olaleerya o Kampala mmuceche achu ancipale yaalocaayawo elocelo Lukanta, nave naahilakelela ohuserya elocelo yeele. Yaahiviravo elukuluku yincipale wi nisuwele oloca phaama, nyenya ohuserya elocelo Lukanta waahinikhaviherya okhumelela phaama mmuteko woolaleerya! Naahipacerya wiiwexexa phaama soothowa soomunepani sa oohuserya ahu a Piipiliya. Vaavaa oohuserya ahu a Piipiliya yoonaaya mukhalelo noonihenryaahu opwacha ntakhara yaawo awo tho yaananiroromela ni onileela mukhalelo yoonaaya vooloca sa seiho yaahuseryaaya.

Naanatepa ohakalala vaavaa naakhaviheryaahu achu ancipale ohuserya eparipari. Nyenya ohakalala wahu waahaaceereryeya vaavaa naavekiwaahu wi nrumeele mmuteko wa weeceeca. Nihooleliwaka ni efiliyale ya o Keniya naahipaka mikwaha soohiyanahiyana orukurerya elapo naavyavyaka mapuro yaawo mapiyoneero avameekhaaya yaachuneyaayawo. Mu ikwaha sincipale, naanahoolela saweereya soohakalaliha orweela wa achu yaawo yahintonko waasuwela Anamoona nyenya yaanaakhela phaama. Awo yaananaakhela phaama ophiyerya wi yaanarehererya soolya ntakhara hiyo.

Ohoolo waya kaaheeca mukwaha woorakama. Okhuma o Kampala, kaaheeca mukwaha wa mahiku meeli kiyaaka mu epooma yo Mombasa o Keniya, nave voocharela kaahinwela pophoro kiyaaka o Seychelles, mu evilivili emoha ya oseyano Intiku. Voocharela, mu 1965 ophiyerya mu 1972, Barbara aanakhala vamoha ni miyo mu oxekurya naapakaahu moohihiyererya o Seychelles. Woopaceryani pahiru yaariwo alaleeryi apiili mu ekulucu yeele, nyenya ohoolo waya yaahipaka nikhuuru voocharela okhala muloko. Mikwaha mikina saanakeeriha waxekurya anna o Eritrea, Etiyopiya ni o Sutan.

Mukhalelo wa epoliitika o Ukanta waahitorokeya vaavaa nikhuuru na akhoco naapacenryaaya olamulela mu elapo yeele. Variyari va iyaakha seihe sawoopiha, yaari elukuluku yoovila nave kaahihuserya wi, ti yaphaama ochariha malakiheryo a Piipiliya a owiiwelela yaale anlamula. (Mar. 12:17) Mu elukuluku ekina, anamarwa oothene yaakhala o Ukanta, yaanavekiwa wi yarepihe masina aya mu nipuro na mapilisa yaacamenlaayaawo. Mwawaakuveya naaheemererya. Mu mahiku vakhaani ohoolo waya, vaavaa kaakhumaaka o Kampala, mutokweene mmoha a mapilisa aahimwaacamela misiyonaariyo mukina vamoha ni miyaano. Naahitepa okhala awoova! Awo yaanisomela wi naari anamahocela nave yaanikuxa enikeriha o nipuro ntokweene na mapilisa weiwo naatharinhaahu wi naari mamisiyonaariyo a murecele. Naahaaleela wi naarepiha masina ahu woosiilo ni mpilisa mukina, nyenya awo hiyaaniwiriyanne. Yaanimaka nave enikeriha o nipuro nikina na mapilisa waacamela waariwo empa ya mamisiyonaariyo. Naahihakalala vancipale vaavaa naakumannaahu ni mpilisa mmoha, yoowo aasuwenle  wi noorepiha masina ahu woosiilo, nave vaavaa aanuupuwenleiye, aamulamulela mulipeleli mmoha wi anitaphule!

Mmahiku yaale, naanahoolela saweereya soovila vaavaa naaviraahu mmapuro yaawo waakhalamo akhoco xaxaxa wakhala wi, nohaaphwanya akhoco yaawo yaahapaliwa. Elukuluku eri yoothene, naanavekela nave naakhala oomaaleleya vaavaa neemereryiwaahu ovira mwa murecele. Moothananiha, mu 1973 mamisiyonaariyo oothene a ilapo ikina yaahilamuleliwa wi epwahewo o Ukanta.

Wanaawiili orummwa ahu waahitorokeya, naahirumihiwa wi niye o Côte d’Ivoire, makupa onaneelawo nsuwa o Afrika. Ala yaari matorokelo makina matokweene wa hiyaano. Naaphwanela ohuserya sookhovelela ivyaani, ni opacerya wanaawiili oloca Efaransa nave mu ilukuluku ikina wiikhoveleliha ni mamisiyonariyu a ilapo ikina! Mwawiihiiha, naahoona tho ohoolela wa Yehova vaavaa naawoonaahu achu awiiyeviha ni oororomeleya a ekulucu ahu, yaakhulelaka phaama ntakhara michaka yaphaama. Oothene ahu naahoona ti mwawiihai omuroromela Yehova weerinhaaya oluluwanya iphiro sahu.

Moothananiha Barbara aahiphwanyiwa ni ereca ya kanser. Mu ikwaha sincipale naanaya owaani o Europa wi naakhele nikhaviheryo na okumi, nave mu 1983 naahisuwela wi hinaahaala owerya otitelela orumeela o Afrika. Oopiili ahu naahikhala awuukhuwaxa!

Barbara aahitepa wiiceliwa vaavaa naarumeelaahu Opeteli yo Lonton, nave ohoolo waya akhwa. Emusi ya Opeteli yaahikikhaviherya vancipale. Mutheli mmoha aahikikhaviherya mwa vameekhaaya wiikhoveleliha ni otorokeya wa mikhalelo ni otitelela omuroromela Yehova. Ohoolo waya kaahimusuwela murokora mmoha yoowo aakhaviherya Opeteli nave mahiku a muculi aarumeenle ntoko piyoneera avameekheiye yoowo aamusivela vancipale Yehova. Ann ni miyaano naathelanne mu 1989, nave nnarumeela Opeteli yo Lonton ophiyerya olelo.

Ovinyerya mu 1995 ophiyerya mu 2018, kaanahakalala orumeela ntoko aweemelela a nipuro ntokotoko na Anamoona a Yehova mu elukuluku yeeyo iichaniwa (ooweherya a miceche), nave kaanaxekurya ilapo sawaakhwana 60. Mu oxekurya ori woothene kaanoona wi Yehova onnaakhapelela achu awe moohipwacha echu taani eneereya ni yaawo.

Mu 2017 kaahikookela o Afrika, mmukwaha mmoha wa oxekurya waka. Kaahihakalala omusuweliha Ann o Purunti mu ekwaha yoopacerya, nave oopiili ahu naahitikhiniheya woona wi achu ancipale yaahihuserya eparipari! Mmuceche yoowo kaalaleeryaakawo empa ni empa mu 1964, yootekiwawo Epeteli yooreera yeeyo enaakhaviherya alaleeryi awaakhwana 15.500.

Kaahihakalala vaavaa kaakhenlaaka elista ya oxekurya mu 2018. Emoha ya ilapo seiho saari va elista ele yaari Côte d’Ivoire. Vaavaa naaphin’yaahu mu epooma ya Abidjan, yaakhala ntoko wi nikele owaani. Kaahisuwela orweela wa elista ya atelefone a anna anarumeela Opeteli wi munna yoowo aakhala waacamela ekwartu naaryaahuwo aari munna Sossou yoowo kaamusuwenlaaka. Kaahuupuwela wi munna Sossou aahirumeela ntoko ooweherya a muceche elukuluku kaaryaaka o Abidjan. Nyenya haari munna Sossou. Owo aari Sossou mukina—mwanawe.

Yehova onnaakhwaniherya soororomeliha sawe. Makacamiho mancipale kihoolenlaaka aakihusiha wi, vaavaa nnamuroromelaahu Yehova, ilukuluku soothene owo onnaluluwanya iphiro sahu. Vano kiri oolakelela ochara ephiro enakeriha wookumini woohimala mu elapo evyaani.—Masi. 4:18.