1. Nthowa taani nimoha nneeriha emusi ya Yehova okhala yawiiwanana?

NINNAHAKALALA opaka makupa mu emusi ya Yehova. Ntakhara heeni emusi ahu eryaaya ya murecele ni yawiiwanana? Nthowa nimoha ti nawi oothene ahu, ninniilipiserya waacicimiha yaale Yehova aavanheiye owerya. Mweeparipari, vaavaa nniiwexexaahu ntakhara heeni Yehova aavanheiye akina mirici, ninnannuwiha wiiwanana.

2. Makoho taani nnahaalaahu othokororya mmwaha yoola?

² Mmwaha yoola, nnahaala waathokororya yaawo arino owerya mmulokoni. Nave tho, nnahaala waakhula makoho ala anacharela: Murici taani arokora aryaayano? Apwanne eparipari wi munna ori oothene, muru wa murokora vyakala? Apwanne owerya yoowo atokweene mmulokoni aryaayano wa anna ni arokora, omohamoha ni owerya yoowo miru sa ichoko iryaayano wa asaaraya ni anaaya? Voopacerya, hankooni nthokororye mukhalelo nnaphwanelaahu owoonaka arokora.

3. Nni niwerye hai wunnuwiha othamalela wahu ntakhara miteko seiyo arokora anaakhwaniheryaaya?

³ Ninnaathamalela arokora ahu yaawo analapa mwakuru wi ekhapelele ichoko saya, olaleerya michaka saphaama, ni waakhaviherya akina mmulokoni. Nnanwerya wunnuwiha othamalela wahu ntakhara arokora, wakhala wi nohuupuwela mukhalelo Yehova ni Yesu anawoonaaya. Nnahaala tho ohuserya ti mwawiihai nnaphwanelaahu owoonaka athiyana, moorweela wa othokororya mukhalelo Paulo aakhaliheiye yaawo.

4. Piipiliya onooniherya hai wi Yehova onnaavaha esisapo athiyana hiiha ntoko alopwana?

⁴ Piipiliya onnooniherya wi Yehova onnaavaha esisapo athiyana hiiha ntoko alopwana. Ntoko yootakiherya, Piipiliya onnooniherya  wi mu nsana noopacerya, Yehova aahaavaha munepa waweela athiyana vamoha ni alopwana, nave aahaavaha owerya wa opaka sootikhiniha ntoko, oloca mu ilocelo soohiyanahiyana. (Saw. 2:1-4, 15-18) Makhuuru oomeeli, alopwana ni athiyana, yaahithanliwa ni munepa waweela ni ovahiwa ewehereryo ya olamulela vamoha ni Kristu. (Gal. 3:26-29) Athiyana vamoha ni alopwana, oothene anahaala waakhela nchuwelo na ekumi yoohimala, veelaponi yavathi. (Wup. 7:9, 10, 13-15) Nave oothene, alopwana ni athiyana aavahiwa murici wa olaleerya ni ohusiha michaka saphaama. (Mat. 28:19, 20) Ntoko yootakiherya, liivuru a Saweriwa Tarummwa, onnaloca sa muthiyana mmoha awiichaniwa Priska. Owo vamoha ni iyawe, Akila, yaahithariha moopwacha iparipari, wa mulopwana mmoha iichaniwa Apolu yoowo aari oohuseryaxa.—Saw. 18:24-26.

5. Luka 10:38, 39, 42 onooniherya hai wi Yesu aanaacicimiha athiyana?

⁵ Yesu aanaavaha athiyana ncicimiho. Yesu haatakiherya Afarisi yaawo yaawoona athiyana ntoko achu ahirino esisapo. Afarisi hiyaaloca ni athiyana variyari va achu nave hiyaahusiha Soorempwa. Moohiyana, Yesu aanaahusiha athiyana iparipari soochuneya hiiha ntoko eereleiye ni alopwana. * (Mwaalakhanye Luka 10:38, 39, 42.) Nave tho Yesu aanaweemererya athiyana weeca vamoha ni yoowo mmikwaha sawe, vaavaa aayeiye mmuteko woolaleerya. (Luka 8:1-3) Yesu aahaavaha tho athiyana ekari ya waaleela arummwa awe, wi owo ooviihiwa mookhwani.—Yoh. 20:16-18.

6. Murummwa Paulo oonihenrye hai wi aanaacicimiha athiyana?

⁶ Murummwa Paulo aahimuupuxerya Timoteo wi aacicimiheke athiyana. Paulo aahimuleela Timoteo wi aakhaliheke ‘athiyana atokweene ntoko amayi awe’ nave athiyana akhaani ‘ntoko arokora awe.’ (1 Tim. 5:1, 2) Paulo aahipaka sincipale wi amukhaviherye Timoteo okhala Mukristu awiichwelavo, nyenya Paulo aanasuwela wi woopaceryani, amannya ni amunna awe Timoteo ti ‘yaawo yaamuhusinhe soorempwa.’ (2 Tim. 1:5; 3:14, 15) Vaavaa aathamaleleiye arokora, Paulo aahiromola masina aya mooluluwanya mu ekaarata aarepenleiye o Roma. Ohiya pahiru woona muteko yoowo arokora yaapakaaya, Paulo aahooniherya othamalela wawe ntakhara muteko aya.—Aro. 16:1-4, 6, 12; Fil. 4:3.

7. Makoho taani nnahaalaahu othokororya hiihaano?

⁷ Ntoko yooniheryiwaaya mu iparakrafo sa muculi, Piipiliya hanaloca wi arokora haanono esisapo wa anna. Arokora ahu oosivela ni oovaha, annakhaviherya vancipale mmulokoni, nave atokweene annaroromela nikhaviheryo na arokora, wi ekhapelele murecele ni wiiwanana mmulokoni. Nyenya nlelo ninnachuna waakhula makoho anacharela: Ntakhara heeni Yehova onavekeiye wi arokora ehuruweleke muru vaavaa onakhalaaya woochuneya? Woona wi pahiru anna tanathanliwa wi ekhale atokweene ni arummwa oorumeela, ela enataphulela wi munna ori oothene, muru wa murokora vyakala mmulokoni?

8. Mwawiiwanana ni Éfeso 5:23, apwanne munna ori oothene, muru wa murokora vyakala mmulokoni? Mutharihe.

⁸ Naakhulo nookhuveya, ti nawi hooye! Munna tahi muru wa murokora ori oothene mmulokoni, pahiru Kristu. (Mwaalakhanye Éfeso 5:23.) Veechokoni, mulopwana othenle ookhalano owerya wa mwaariye. Mwaana mwaamulopwana yoowo opatisiwe tahi muru wa amannya. (Éfe. 6:1, 2) Nave tho mmulokoni, owerya  wa atokweene wookhalano mphimo wa anna ni arokora aya. (1 Tes. 5:12; Ahe. 13:17) Athiyana yaawo ari aciye ahinakhala vamoha ni asitiithi aya, annatitelela waacicimiha asitiithi aya vamoha ni atokweene mmulokoni. Nyenya moolikana ni alopwana oothene mmulokoni, athiyana yaawo ari aciye muru aya mmoharu pahi, Yesu.

9. Ntakhara heeni mu ilukuluku ikina arokora anaphwanelaaya ohuruwela muru aya?

⁹ Eparipari wi Yehova ohaathanla alopwana wi ehooleleke mu ohusiha ni mmalapelo ahu mmulokoni, nave owo haavanhe athiyana murici woolikana. (1 Tim. 2:12) Ntakhara heeni? Mmukhalelo woolikana, Yehova oomuthanla Yesu wi akhale muru wa mulopwana—wi muloko otitelele okhala wooreheryeya. Wakhala wi aakhalavo mathowa yaawo anahaala weeriha wi murokora aakhwaniherye murici yoowo pahiru onaphwanela waakhwaniheryiwa ni munna, Yehova onaveka wi murokora owo ahuruwele muru awe. * (1 Kor. 11:4-7) Yehova onnaaveka arokora weerano yeela, ohiya wi awuulihe muru, nyenya wi arokora yooniherye ncicimiho wa yaale Yehova aavanheiye owerya. Ni yeela mmuupuweloni, nnahaala waakhula nikoho nla: Owerya taani miru sa ichoko ni atokweene mmulokoni aryaayano?

10. Ntakhara heeni mu ilukuluku ikina mutokweene onamuchuna opaka malamulo mmulokoni?

¹⁰ Atokweene annamusivela Kristu, nave aanasivela “ipucepuche” seiho Yehova ni Yesu yaavenkaaya wi ekhapelele. (Yoh. 21:15-17) Ni mathowa aphaama akhweya mutokweene onanwerya wuupuwela wi, woona wi onakhapelela muloko, owo tori muru wa achu oothene mmulokoni. Owo tho onanwerya wuupuwela wi woona wi muru wa echoko onnatikitherya malamulo  yaawo anakhapelela echoko awe, mutokweene tho onanwerya otikitherya malamulo yaawo onuupuweleiye wi anahaala waakhapelela achu a Muluku. Nave anna ni arokora akina ananwerya waaceenyerya atokweene weerano yeela, moorweela wa waaveka atokweene wi epake soolakelela ntakhara yaawo. Nyenya apwanne atokweene mmulokoni ni miru sa ichoko, arino murici mmohamoha?

11. Mmukhalelo taani mirici sa miru sa ichoko inalikanaaya mi mirici sa atokweene?

¹¹ Murummwa Paulo ohooniherya wi wookhalavo olikanela variyari va murici wa muru wa echoko ni murici wa mutokweene mmulokoni. (1 Tim. 3:4, 5) Ntoko yootakiherya, Yehova onachuna wi achu a veechokoni yiiweleleke muru wa echoko. (Kol. 3:20) Nave tho Yehova onachuna wi achu mmulokoni, ewiiweleleke atokweene. Yehova onaweherya tho wi miru sa ichoko ni atokweene mmulokoni, eroromele wi yaale anaakhapelelaaya annamusivela Yehova. Miru sa ichoko ni atokweene mmulokoni, annaroromela wi yaale anaahoolelaaya, anniisoona okhala oosiveliwa. Moolikana ni miru sa ichoko saphaama, atokweene annaroromela wi yaale anaakhapelelaaya, annaakhela nikhaviheryo nenlo anachunaaya vaavaa anakumanaaya ni makacamiho. (Tiy. 2:15-17) Mwawaaceererya, Yehova onaweherya wi atokweene ni miru sa ichoko, yaakhaviherye akina wiiwelela malamulo awe. Owo tho onaweherya wi awo ‘ehipwahe yeeyo erempwe’ Mpiipiliyani.—1 Kor. 4:6.

12-13. Ntoko yooniheryiwaaya mu Aroma 7:2, mmukhalelo taani mirici sa miru sa ichoko inahiyanaaya ni mirici sa atokweene?

 ¹² Naamwiihiiha, wookhalavo ohiyana otokotoko variyari va murici wa mutokweene a muloko ni murici wa muru wa echoko. Ntoko yootakiherya, Yehova ohaaveka atokweene, ohiya miru sa ichoko, wi erumeele ntoko alipa oothoriha. Owo ohaavaha atokweene murici wa owiikara mmulokoni alipa oocheka yaawo ahinacharuwa.—1 Kor. 5:11-13.

¹³ Mmakupa makina, Yehova ohaavaha owerya yaale ari miru sa ichoko yoowo atokweene ahiryaayano. Yehova oovaha miru sa ichoko owerya wa otikitherya malamulo ntakhara ichoko saya, ni waaceenyerya achu aveechokoni ochariha malamulo yaawo. (Mwaalakhanye Aroma 7:2.) Ntoko yootakiherya, muru wa echoko, wookhalano owerya wa olakelela elukuluku anamwane awe anaphwanelaaya ophiyaka vaate ohiyu. Owo tho ookhalano owerya wa waalaka anamwane awo wakhala wi hanachariha malamulo yaawo. (Éfe. 6:1) Mweeparipari, muru wa echoko woosivela onnapacerya ovaanela ni mwaariye ahaakumve opaka yoolakelela vyakala, woona wi awo “mwiili mmoharu.” *—Mat. 19:6.

14. (1) Mwawiiwanana ni yeeyo elociwe mu Marko 10:45, ntakhara heeni eryaaya yoophwanelela Yehova omuthanla Yesu okhala muru wa muloko? (2) Murici taani Nikhuuru Noolamulela nryaayano? (Moone ekaaxa “ Murici wa Nikhuuru Noolamulela.”)

¹⁴ Moorweela wa mukucho wa woopola, Yehova oothuma okumi wa muchu ti muchu mmulokoni, ni wa oothene yaale anamuroromela Yesu. (Mwaalakhanye Marko 10:45; Saw. 20:28; 1 Kor. 15:21, 22) Nyenya ti yoophwanelela woona  wi Yesu, yoowo ovanhe okumi awe ntoko yawoopola, oothanliwa okhala muru wa muloko. Ntoko muru ahu, Yesu ookhalano owerya wa opaka malamulo yaawo achu, imusi, ni oothene mmulokoni anaphwanelaaya ochariha, ni onceenyerya ochariha malamulo yaawo. (Gal. 6:2) Nyenya Yesu onnapaka sincipale ohiya pahiru otikitherya malamulo. Onnamukhapelela phaama ni omusivela mmoha ti mmoha a hiyo.—Éfe. 5:29.

15-16. Tiheeni muhusenryaanyu moorweela wa masu a murokora Marley ni munna Penxami?

¹⁵ Arokora annooniherya wi annamucicimiha Kristu, moorweela wa ochariha ohoolela yoowo onavahereryiwa ni alopwana yaawo athanliwe, wi yaakhapelele. Arokora ancipale anneemererya moonelo wa murokora Marley yoowo onakhala o Estatu Unitu. Owo oriye: “Mweeparipari, kinnavaha esisapo mirici saka ntoko muthiyana otheliwe, ni murokora mmulokoni. Kinniilipixerya ocicimiherya murici yoowo Yehova omvanheiye iyaka ni atokweene mmulokoni. Nyenya iyaka ni anna mmulokoni, anneeriha eyo okhala yookhweya wa miyaano nthowa nawi annakithamalela ntakhara muteko kinapakaaka.”

¹⁶ Anna annooniherya wi anniiwexexa ntakhara heeni Yehova aavanheiye akina mirici, moorweela wa waacicimiha arokora. Penxami munna yoowo onakhala o Inklatera, ooloca: “Kinnaphura vancipale orweela wa maakhulo a arokora mmithukumano, ni moonelo aya vooloca sa mmukhalelo nneeraahu nikhumelele phaama mmuteko woolaleerya. Kinnasuwela wi muteko anapakaaya, ti wasisapoxa.”

17. Ntakhara heeni nnaphwanelaahu ocicimiherya marehereryo a Yehova a waavaha akina owerya?

¹⁷ Vaavaa oothene mmulokoni—alopwana, athiyana, miru sa ichoko, ni atokweene—anacicimiheryaaya marehereryo yaawo Yehova otikithenryeiye a waavaha akina owerya, mmulokoni onnakhalamo murecele. Nave echu yoochuneyaxa, ninnamuruuhela ncicimiho Tiithi ahu oosivela a wirimu, Yehova.—Sal. 150:6.