1-2. Mwawiiwanana ni 1 Pedro 4:7, 8, tiheeni eni enikhaviherye mu yoohoosa etokotoko?

HIYAANO nnakhala waacamela omakuchuwelo wa “mahiku òmaliherya.” Mwa yeeyo, nnamuhoolela makacamiho oovila. (2 Tim. 3:1, BNM) Ntoko yootakiherya, moone yeeyo yeeren’ye mu elapo yo Afrika Oomoko. Evinre elukuluku ya namuthanli, achu yaahimpaceryiha namvutuka nave yaakhalawo achu ancipale a nlala. Wa nthowa na yeeyo, mu miyeeri mithanu nammoha, anna ni arokora ahu yaari va yawoopiha ntakhara namvutuka. Tiheeni yaakhavihenrye ovilela mu elukuluku yeeyo yookacamiha? Anna akina yaachawela mmavaate mwa Anna yaawo yaakhala mmakupa makina weiwo waariwo okhapeleleya. Munna mmoha ooloca: “Kaatepa ohakalala vaavaa kaaryaaka vamoha ni Asinthamwene mu elukuluku ntoko yeele. Hiyaano naahiwerya olipihana mukina ni mukhwaawe.”

² Vaavaa “yohósha etokotoko” eneeraaya epacerye, nnahaala okhalatho oohakalala nthowa na okhalano asinthamwene ananisivela. (Wup. 7:14, Nlakano Nahihano) Mwawiihiiha, oothene ahu nnaphwanela opacerya hiihaano olipiha onthamwenaahu ni annihu. (Mwaalakhanye 1 Pedro 4:7, 8.) Nnanwerya ohuserya sincipale orweela wa yaweereya ya mulipa a miririmu Yeremiya. Pahiru moorweela wa nikhaviheryo na asinthamwene awe, owo aahiwerya okophola mu elukuluku yookacamiha Yerusalemu ahaakumve otoloxiwa. * Nni nimutakiherye hai Yeremiya?

3. (1) Mathowa taani yaahaala omweeriha Yeremiya okhala muchu awiivalaanya ni awuumaanyeya? (2) Tiheeni Yeremiya aamuleeleiye Paruki, nave teevi yaari yookhumelela?

³ Akhweya, mu iyaakha makhumi masese, Yeremiya aakhala ni achu  yaawo yahaari ororomeleya wa Muluku. Variyari va yaawo, yaahikhalavo amwaacamani, ophitaanyerya tho achu a epooma aayariweiyewo, o Anatoti. (Yer. 11:21; 12:6) Naamwi hiiha, Yeremiya haivalannye naari mano okhala muchu awuumaanyeya. Moohiyana, owo aanamuleela Paruki moonelo awe, yoowo aari namarepa awe ororomeleya. Nave oophiyeryatho onleela moonelo awe, orweela wa Piipiliya. (Yer. 8:21; 9:1; 20:14-18; 45:1) Tiyawooneya wi vaavaa Paruki aarepeiye saweereya soothene sa okumi wa Yeremiya, oopiili yaahihuserya osivelana ni ocicimihana.—Yer. 20:1, 2; 26:7-11.

4. Muteko taani Yehova amvanheiye Yeremiya, nave mmukhalelo taani muteko owo waalipinhaaya onthamwene wa Yeremiya ni Parukhi?

⁴ Mu iyaakha sincipale, Yeremiya ni Parukhi yaahilapa vamoha wi ekhwaaniherye orummwa yoowo yaakhenlaaya wa Muluku. Variyari va elukuluku yeele, Yeremiya aahaalopola moolipa murima Aisarayeli vooloca sa yeeyo yaahaala weereya ni Yerusalemu. (Yer. 25:3) Mwa yeeyo, Yehova aahilakelela waavaha achu awe ekari yookuchula wi echaruwe. Yehova aamuruma Yeremiya wi arepe mu eroolo soolopola soothene owo aavaherenryeiye wa achu awe. (Yer. 36:1-4) Vaavaa Yeremiya ni Parukhi yaalapaaya vamoha mmuteko yoola, yoowo akhweya waamalinhe miyeeri sawaaca, moohikhwa minikwa awo yaanaloca miyaha seiyo saalipiha nroromelo na mukina ni mukhweiye.

5. Parukhi oonihenrye hai wi aari nthamwene aphaama a Yeremiya?

⁵ Vaavaa eroolo yaamanlaaya orempwa, Yeremiya aaheeriha wi Parukhi aalakhanye muchaka owo wa achu. (Yer. 36:5, 6) Muteko owo waari wawoopiha, nyenya Parukhi aahikhwaaniherya moolipa murima. Mano, munnawerya waanyiherya mukhalelo Yeremiya aahakalanleiye vaavaa Parukhi aaphin’yeiye vaate va empa ya Muluku wi aalakhanye eroolo wa achu? (Yer. 36:8-10) Ahooleli o Yuteya yaahisuwela yeeyo Parukhi enreiye. Voocharela, awo yaamwiichana Parukhi wi aalakhanye eroolo eyo moovuwa ohoolo waya. (Yer. 36:14, 15) Ahooleli yaalakelela omuleela mwene Yowakimi masu a Yeremiya. Yooniheryaka opwacha, ahooleli yaaloca wa Parukhi: “Hawe,  weyo ni Yeremiya, mwiipithe. Ahikhale anii asuwele muraanyuwo.” (Yer. 36:16-19) Ola waari olopola waphaama!

6. Mmukhalelo taani Yeremiya vamoha ni Parukhi yaahoolenlaaya ovaanya wa mwene Yehoyakimu?

⁶ Mwene Yowakimi aasarasareya ni masu a Yeremiya yaawo yaarempwe mu eroolo. Owo aaheeyela eroolo nave aahilamulela wi Yeremiya ni Parukhi ewaleliwe. Nyenya Yeremiya heemerenrye wi woova omvoothe. Owo aahikusa eroolo ekina nave amunnya Parukhi. Vaavaa Yeremiya aaloceiye michaka sa Yehova, Parukhi aanarepa “masu oothene Yeremiya aaloceiye, yaawo yaari mu liivuru ole Yehoyakimu, mwene a Yuuta, aamweeyenleiye.”—Yer. 36:26-28, 32.

7. Tiheeni akhweya yeeren’ye vaavaa Yeremiya ni Parukhi yaalapaaya vamoha?

⁷ Achu yaawo anahoolela makacamiho oowalamela vamoha, wiiliwiili awo annakhala asinthamwene eparipari. Yeremiya ni Parukhi yaaphwanela olapa vamoha, wi erepe wanawiili eroolo yeeyo yeeyeliwe ni mwene oonanara murima Yehoyakimu. Tiyawooneya wi, elukuluku ya muteko yoole, awo yaahuserya ovaha esisapo mikhalelo sa mukina ni mukhwaawe. Tiheeni nnahuseryaahu orweela wa yootakiherya ya alopwana yaala ororomeleya?

8. Ntakhara heeni onamunivila okhala ootaphuwa ni akina, nave ntakhara heeni hannaphwanela ovolola?

⁸ Apwanne onnoovilaani okhala ootaphuwa ni akina? Akhweya eyo enamweereya nthowa nawi muchu mukina aahookhalihaani moonanara khalai. (Masi. 18:19, 24) Naari munoona wi himwaano elukuluku ni ikuru wi muteke onthamwene woolipa ni akina. Nyenya muhivolole. Wakhala wi ninnachuna wi asinnihu ekhale mmakupa ahu vaavaa enakhumelelaaya yaweeha, nnaphwanela ohuserya hiihaano waaroromela anna ni waaleela echu nnuupuwelaahu ni moonelo ahu. Owo mukhalelo woochuneya wi nikhaleno asinthamwene eeparipari.—1 Ped. 1:22.

9. (1) Yesu oonihenrye hai wi aanaroromela asinthamwene awe? (2) Olocihana waphaama onahaala wookhaviheryaani hai okhaleno onthamwene woolipa? Mvahe yootakiherya.

⁹ Yesu aanaaroromela asinthamwene awe. Owo aahooniherya eyo moorweela wa oloca mootaphuwa ni mweeparipari. (Yoh. 15:15) Nyuwaano muni mucharihe hai yootakiherya awe? Muhuserye oloca ni akina ichu sinoohakalalihani, ichu sinawiinihani murima, ni soothowa sanyu. Muwiriyane moopwacha vaavaa akina analocaaya ni nyuwo. Akhweya munahaala osuwela miyuupuwelo, miyoonelo, ni soolakelela soolikana. Moone yootakiherya ya Sindy, murokora a iyaakha makhumi meeli ni thanu naxexe. Owo aahikhala nthamwene a Mariya Luwisa, piyoneera a iyaakha makhumi mathanu nammoha ni iyaakha thanu napiili. Oopiili annalapa vamoha mmuteko woolaleerya Naneesese oothene elukuluku ya woosiiselo, nave annavaanela mmiyaha soothene. Sindy ooloca: “Miyaano kinnasiveliwa ovaanela ni  asinthamwene aka vooloca sa miyaha sookhweleyaxa, ntakhara wi eyo ennakikhaviherya waasuwela ni owiiwexexa phaama.” Wi onthamwene wunnuwe, onaphwanela oheliwaka maahi moorweela wa olocihana mmukhalelo waphaama. Hiiha ntoko Sindy, wakhala wi moopaceryiha ovaanela ni akina okhumela vathi vamurima, munahaala woona wi onthamwene anyu onamunnuwa nave onamukhala woolipa vatokovene.—Masi. 27:9.

10. Mwawiiwanana ni Masiposipo 27:17, tiheeni enahaala weereya vaavaa nnalapaahu vamoha ni anna ni arokora ahu?

¹⁰ Yeremiya ni Parukhi yaahikhala asinthamwene eeparipari vaavaa yaalampaaya vamoha. Moolikana, vaavaa nnalapaahu vamoha ni anna ni arokora ahu ni woona mikhalelo saya saphaama, nnanwerya ohuserya sincipale ni yaawo nave tho nnamwaasivelaka moopwaha. (Mwaalakhanye Masiposipo 27:17.) Muupuwele yeeyo eneereya vaavaa munakhalaanyu mmuteko woolaleerya ni nthamwene anyu. Mulaleeryaka, munnawerya omoona nthamwene anyu alocaka moolipa murima soororomela sahu naari alocaka moolekecha vooloca sa Yehova ni soororomeliha sawe. Munoona hai? Mwawooneya onthamwene anyu ni munna naari murokora owo onamwaaceereryeya.

11 Mvahe yootakiherya emoha enooniherya mukhalelo olapa vamoha mmuteko woolaleerya onalipihaaya onthamwene.

¹¹ Moone sootakiherya piili sinooniherya mukhalelo muteko woolaleerya onalipihaaya onthamwene. Atelina murokora yoowo orino iyaakha makhumi meeli nararu, aahimveka murokora mmoha awiichaniwa Kamila, wi yalaleerye vamoha mu ekulucu yeeyo yaalampwe vakhaani. Atelina ooloca: “Hiyaano naachuna nceenyeryo nawaaca wi nlaleerye nave nsivele muteko woolaleerya. Oopiili ahu naanachuna nceenyeryo noomunepani.” Apwanne olapa vamoha yaari yaphaama wa yaawo? Atelina ooloca: “Omakuchuwelo wa nihiku ti nihiku, naanachekulela vooloca sa miyoonelo sahu, mukhalelo naalipihen’yaahu ni ovaanela yoowo naaryaahuno mmuteko woolaleerya, ni mukhalelo noonaahu Yehova ahoolelaka muteko ahu woolaleerya. Ochekula yoole wawiiseela waari waphaamaxa wa hiyaano oopiili nave woonikhaviherya osuwelana phaama.”

12. Mvahe yootakiherya ekina mmukhalelo olapa vamoha mmuteko woolaleerya onanikhaviheryaaya olipiha onthamwene ahu?

 ¹² Layala ni Mariyana, arokora eeli ari aciye o Fransa, yaahimaliha isumana thanu elaleeryaka o Pankhi, epooma oriwo achu ancipale o Repuplika a Afrika a Veeri. Layala onnuupuwela: “Miyaano ni Mariyana naahihoolela makacamiho. Nyenya ovaanela waphaama ni osivela Weekristu waahilipiha onthamwene ahu. Miyaano kaahoona wi Mariyana aari muchu awaakuveyasa. Owo aanaasivela achu a ekulucu yeele nave aari amvai mmuteko woolaleerya. Eyo yaaheeriha wi omusivela waka waaceereryeye moopwaha.” Muhiweherye oya elapo ekina wi mukhaleno yaweereya ntoko yeela. Mpharihele ekari ya olapa ni anna ni arokora a muloko anyu. Eyo enamookhaviheryani waasuwela phaama ni okhalano onthamwene wawaacameleya ni yaawo.

13. Nikacamiho taani nnahaala okhumelela vaavaa nnalapaahu ni asinthamwene ahu?

¹³ Ikwaha ikina, vaavaa nnalapaahu vamoha ni asinthamwene ahu, ninnawerya woona ohiiya pahiru mikhalelo saya saphaama, nyenyatho okotakota waya. Tiheeni enahaala onikhaviherya ovilela nnikacamiho nenla? Muupuwele wanawiili yootakiherya ya Yeremiya. Tiheeni yaamukhavihenrye mulipa a miririmo yoola woona makhalelo aphaama a akina nave ohipwacha soohesa saya?

14. Tiheeni Yeremiya aahusenryeiye vooloca sa Yehova, nave eyo yaamukhavihenrye hai?

¹⁴ Ohiya liivuru a Piipiliya orino nsina nawe, akhweyatho Yeremiya tomurempe liivuru Oopacerya ni Anaawiili a Mamwene. Moohikhwa minikwa, muteko yoola waamweeriha Yeremiya woona mukhalelo Yehova onaamoreleiye ikharari achu ohiphaameya. Ntoko yootakiherya, Yeremiya aahisuwela yaweereya sa mwene Akape. Naamwi aapanke ichu sincipale soohookololowa, Akape aahicharuwa, nave Yehova aahimoopola mu okhwa wa wuuliha muru. (1 Mam. 21:27-29) Yeremiya aahisuwelatho yaweereya ya mwene Manasi, yoowo aatempe omphuca Yehova ompwaha Akape. Naamwi hiiha, vaavaa Manasi aacharunweiye, Yehova aamukhurumuwela. (2 Mam. 21:16, 17; 2 Math. 33:10-13) Osuwela saweereya seiya, yaahimukhaviherya Yeremiya omutakiherya Yehova, okhala oopisa murima, ni aikharari wa asinthamwene awe.—Sal. 103:8, 9.

15. Yeremiya aatakihenrye hai ovilela wa Yehova elukuluku Parukhi aareiye awaakanyeryeya mu orummwa awe?

¹⁵ Muupuwele mukhalelo Yeremiya aamukhalinheiye Parukhi. Mu ekwaha emoha, Parukhi aahikhala awaakanyeryeya mu orummwa awe. Nyenya Yeremiya haamuhin’ye mwawaakuveya nthamwene awe. Ohiya yeeyo, aahimukhaviherya Parukhi olokoha muchaka waphaama, nyenya wooluluwanya, yoowo Muluku aachuneiye omuleela yene. (Yer. 45:1-5) Tiheeni nnahuseryaahu orweela wa yaweereya yeela?

16. Mwawiiwanana ni Masiposipo 17:9, tiheeni nnaphwanelaahu opaka wi onthamwene ahu otitelele okhala?

¹⁶ Hannaphwanela oweherya wi anna ni arokora ahu ekhale oophaameya. Mwawiihiiha, nimanle opaka onthamwene ni yaawo, nnaphwanela wiilipiserya vancipale wi onthamwene ahu otitelele okhala. Wakhala wi nthamwene ahu oohesa, hiyaano akhweya nnamuchuna omvaha nikhaviheryo nnathipeleya Mpiipiliyani, mmukhalelo woosivela ni wooluluwanya. (Sal. 141:5) Wakhala wi nthamwene ahu oonichekela, nnaphwanela omulevelela. Nave nimanle omulevelela, nnaphwanela osepa oloca wanaawiili yoocheka yeeyo aapankeiye. (Mwaalakhanye Masiposipo 17:9.) Mmahiku yaala oovila nnakhalaahu, ti yaphaama woonaka ichu saphaama wa annihu ni ohipwacha soohesa saya. Weerano hiiha ennalipiha onthamwene orivovo variyari vahu. Nave vaavaa eneeraaya ephiye yoohoosa etokotoko, nnahaala ochuna nikhaviheryo wa mukina ni mukhwaawe.

17. Yeremiya oonihenrye hai wi aari nthamwene eparipari mu ilukuluku sookacamiha?

¹⁷ Yeremiya aahooniherya okhala nthamwene eeparipari mu ilukuluku sookacamiha. Epete-Meleki muhooleli a nipuro na othoriha heemerenrye wi Yeremiya akhwe munlicini nenlo waarimo matope. Wa  nthowa na yeeyo, Epete-Meleki aanoova wiiphiwa ni asitokweene. Vaavaa aasuwenleiye yeeyo yahaala weereya, Yeremiya haamaanle, uupuwelaka wi nthamwene awe aahaala owerya okophola meekheiye mu nikacamiho nenle. Naamwi aawaleliwe, Yeremiya aahipaka yeeyo aawenryeiye. Owo aahimuleela nthamwene awe Epete-Meleki yoolaiherya yoohakalaliha yeeyo Yehova aavahereryeiye ntakhara yene.—Yer. 38:7-13; 39:15-18.

18. Mwawiiwanana ni Masiposipo 17:17, tiheeni nnaphwanelaahu opaka vaavaa nthamwene ahu onakumaneiyeno makacamiho?

¹⁸ Olelo anna ni arokora ahu annahoolela makacamiho oohiyanahiyana. Akina annahoolela ipahu sa maphacuwelo, ntoko mwaacikinye ni osareya wa maahi. Akina annahoolela ipahu seiyo inatannyiwa taachu, ntoko ikhoco, ni nlala. Vaavaa eyo eneereyaaya, akhweya akina a hiyaano nnamukhalano owerya wa owaakhela asinthamwene yaawo mmavaate mwahu. Nave akina annakhalano owerya wa waakhaviherya moorweela wa ikhorowa. Nyenya echu emoha oothene ahu nnaphwanelaahu opaka, ori ovekela wa Yehova wi aakhaviherye annihu. Vaavaa nniiwaahu wi munna naari murokora ahu ori awuukhuwa, akhweya nnamukhala oohaleeliheya ohisuwela echu yaweera naari yooloca. Nyenya oothene ahu nookhalano ichu sincipale sa ovaha. Ntoko yootakiherya, nnanwerya wiivaha elukuluku wi nikhale vamoha ni nthamwene ahu. Nnanwerya onwiriyana moomaaleleya vaavaa owo onaloceiye. Nave nnanwerya waalakhanya ni yoowo yoorepa ya Mpiipiliyani yoohakararya yeeyo enansivela. (Isa. 50:4) Echu eri yoochuneya ori okhala vakhiviru ni asinthamwene ahu elukuluku anachunaaya nikhaviheryo nahu.—Mwaalakhanye Masiposipo 17:17.

19. Ntakhara heeni onthamwene waphaama nryaahuno hiihaano onahaala okhala wookhweleya omwaahiyu?

¹⁹ Nnaphwanela olakelela hiihaano okhaleno ni okhapelela onthamwene woolipa ni annihu. Ntakhara heeni? Nthowa nawi amwiicani ahu anahaala opharihela masu awootha ni soolokoha satheru wi enivalaanye. Awo anahaala weererya oniicaniha ni annihu. Nyenya owetha waya onaya okhala wasiiyo. Amwiicani ahu herwa emaliha osivela yoowo orivo variyari vahu. Hiyaavo echu eni ewerye omaliha onthamwene ahu. Nnahaala otitelela okhala asinthamwene ohiiya pahiru omakuchuwelo wa mukhalelo yoola wa ichu, nyenya okhala wookhala!