ANNA ni arokora ancipale yaawo yaathaamenle mu ilapo sooreela sa makupa onaneelawo nsuwa, yaahikookela mu ilapo saya. Eceenyeryeyaka ni osivela ntakhara Yehova ni achu, yaahithaamela mu ilapo seiho waariwo othowa otokweene wa alaleeryi a Omwene. (Mat. 22:37-39) Wiilipiserya taani apankaaya, nave mareeliho taani yaakhenlaaya? Wi nsuwele, hankooni nthokororye sootakiherya sa anna ni arokora akina o Cameroon elapo emoha yo Afrika makupa onaneelawo nsuwa.

Mu 1998 munna mmoha oniichaniwa Onésime aahithaama mu elapo awe o Cameroon. Saahivira iyaakha 14 amanle ovinyawo o Cameroon. Nihiku nimoha, o mithukumano, aahiiwa niphwanaphwaniho naaloca sa muteko woolaleerya. Munna aaperekha mwaha aariye, “Waakhanle wi asinthamwene eeli anamesa mmapuro oohiyana nave mukina onnamesa ihopa sincipale ompwaha mukhweiye, apwanne ole onamesa ihopa savakhaani haahaala othaamela mpuro mukina weiwo aahaaleiye omesawo ihopa sincipale?”

Niphwanaphwaniho nenla naahimweeriha Onésime wuupuwela sa okookela o Cameroon, weiwo yaariwo achu ancipale yaachuna omuhuserya Piipiliya. Nyenya owo aari a wuukhuwa. Apwanne Onésime anwerya okhalaka mu elapo awe naamwi saavinrevo iyaakha sincipale ari ilapo sookhopela? Wi oone aahaalaka owerya, Onésime aahilakelela okhala o Cameroon mu miyeeri mithanu nammoha. Voocharela mu 2012, owo aahilakelela othaama moomalela.

Onésime ooloca: “Miyaano kaaphwanela ovilela ni oviha nave tho mikhalelo soovila sa elapo aka. Mu Empa ya Omwene, kaaphwanela okookela okiraathela mipaco sawiiceliha makhucu. Vaavaa kaatikithereyaaka mmithukumano kaanacuwala mipaco sa soofa.”

Mu 2013 Onésime aahipaka othela ni Géraldine, yoowo aakookenle o Cameroon amanle okhala o Fransa iyaakha thanu naxexe. Mareeliho taani mutheli ola aakhenleiye vaavaa aatikitheren’yeiye mmuteko wa Muluku? Onésime oriye: “Ntoko mutheli, naahiwompwa mu Exikola ya Alaleeryi a Omwene nave naahiwompwa wi narumeele o Peteli. Mu eyaakha evirale, oohuserya a Piipiliya awaakhwana 20 a mmulokoni mwahu yaahipatisiwa. Kaahoona wi kiri mu nipuro noophwanelela ‘ototha.’” (Mar. 1:17, 18) Géraldine ohaaceererya: “Kohaakhela mareeliho mancipale yaawo kahaanyiheryaaka.”

Judith aahithaamela o Estatu Unitu nave aanachuna opaka sincipale mmuteko wa Yehova. Judith oriye, “Ekwaha ti ekwaha kaayaaka waaxekurya amusi aka o Cameroon, kaarowaka kaaninla nthowa nawi waakhala woovila ohiya soohuserya sa Piipiliya seiho kaapacerinhaaka.” Naamwi hiiha Judith aanoovelela othaamela o Cameroon. Owo aahikhalano muteko waphaama yoowo waamuliva  ikhorowa sincipale sawaakhwana olivano murece wa apapa awe yaawo yiiceliwa o Cameroon. Nyenya, amuroromelaka Yehova, Judith aahithaama. Judith onneemererya wi aahiyeleela ichu saphaama seiho aapuheiye o Estatu Unitu. Owo aahivekela wa Yehova wi amukhaviherye wiikhoveleliha mu elapo yeele nave aahaakhela nlipiho orweela wa ooweherya ekulucu vamoha ni mwaariye.

Uupuwelaka sa muculi, Judith oriye: “Mu iyaakha raru kaahaakhaviherya achu axexe ophiyerya opatisiwa.” Judith aahipacerya orumeela ntoko piyoneera avameekheiye. Olelo, Judith onamukhaviherya iyawe, Sam-Castel, mmuteko wa weeceeca. Vano tiheeni yeeren’ye ni apapa awe Judith? Exipitali ya elapo ekina yaahiivaha wi yaahaala olivaka ikhorowa sa operasau yaapakiwaaya. Moohakalaliha, operasau aya aahikhumelela phaama.

Munna oniichaniwa Victor aahithaamela o Kanata. Amanle waalakhanya mwaha mu Mulipeleli yoowo waaloca sa muteko wa vasulu, aahuupuwelela vooloca sa mahusiheryo awe. Owo aahiya mahusiheryo awe a vasulu nave apacerya exikola yeeyo yaahaala omukhaviherya ophwanya muteko mukina. Owo oriye: “Eyo yaakeeriha wi kiphwanye muteko mukina mwawaakuveya, kiniiha kipakaka yeeyo kaachunaaka—opiyoneero.” Voocharela, Victor aahipaka othela ni Caroline, nave ntoko mutheli yaahixekurya o Cameroon. Vaavaa yaaxekunryaaya efiliyale ya o Cameroon anna akina yahaaceenyerya wi yuupuwelele vooloca sa orumeela o Cameroon. Victor ooloca: “Hinaarino nthowa na okhooca nave ovinyerya vaavaa naakhweihalaahu okumi ahu naaheemererya nwopelo.” Naamwi Caroline aarino makacamiho a okumi awo yaahilakelela othaama.

Victor ni Caroline yaahipacerya orumeela ntoko mapiyoneero ookilaatheya, wi yaakhaviherye achu yaawo yaarino nchuno ntokweene vooloca sa Piipiliya mu ekulucu aya. Awo yaahikhapelela ikhorowa sawaakhwanela ophiyerya wi omapacereryo hiyaaphwanela olapa wi ephwanye ya wiikhaviheryano. Nyenya wi etitelele mmuteko aya wa opiyoneero yaaphwanela oya o Kanata wi yalape miyeeri vakhaani, wi ephwanye ya wiikhaviheryano o Cameroon. Mareeliho taani awo yaakhenlaaya? Awo yaahivolowa mu Exikola ya Alaleeryi a Omwene, erumeela ntoko mapiyoneero avameekhaaya, nave vano ari mmuteko wa oteka. Victor ooloca: “Nthowa nawi nookhweiha okumi ahu eyo yoheeriha wi noone nikhaviheryo na Yehova.”

Mu 2002, Alain, yoowo aahuserya mu exikola ya vasulu o Alemanya, aahaalakhanya efolyetu eni Jovens,—Como Usarão Sua Vida? Sooleeliherya sa efolyetu ele saahimukhaviherya otikitherya soolakelela ivyaani. Mu 2006, Alain aahivolowa mu Exikola ya Arummwa nave voocharela aahirumihiwa o Cameroon, elapo aayariweiyewo.

O Cameroon, Alain aahiphwanya muteko wa elukuluku vakhaani. Voocharela, Alain aahiphwanya muteko yoowo waaliva ikhorowa sincipale, nyenya aari a wuukhuwa nthowa nawi haahaala olapaka iwora sincipale mmuteko woolaleerya. Mwawiihiiha, vaavaa aawompweiye wi arumeele ntoko piyoneero avameekheiye, owo aaheemererya mwawaakuveya. Patarawu awe aahimwaaceererya ikhorowa sincipale nyenya Alain haakookenle muculi ni yoolakelela awe. Voocharela, Alain aahipaka othela ni Stéphanie, yoowo aakhanle o Fransa mu iyaakha sincipale. Makacamiho taani yaakumannaayano emanle othaamela o Cameroon?

Stéphanie ooloca: “Kaahikhalano makacamiho makina a okumi ophitaanyerya ereca ya oneeniwa mwiili, nyenya kaahaakhela nikhaviheryo kipenuwa.” Mutheli aahireelihiwa nthowa na ovilela waya.  Alain oriye: “Vaavaa naakelaahu olaleerya mu evilivili ekina eniichaniwa Katé, naahaaphwanya achu ancipale yaawo yaachuna omuhuserya Piipiliya. Voocharela, naanaahusiha akina a yaawo orweela mu telefoni. Apiili a oohuserya yaala a Piipiliya yaahipatisiwa, nave naahikhalawo nikhuuru nikhaani na alaleeryi.” Stéphanie ohaaceererya: “Hiyaavovo echu enaruuha ohakalala otokweene opwahana waakhaviherya achu wi yiiveleele wa Yehova. Nthowa na orumeela wenno nookhalano ohakalala yoola mu elukuluku yincipale.” Vano Alain ni Stéphanie anarumeela mmuteko wa weeceeca.

Gisèle aapatisiwe vaavaa aahuseryeiye mu exikola ya alipa a murece o Italiya. Owo aahitannyeya murima ni mutheli yoowo aari Piyoneero aamuhusiha Piipiliya yoowo aakhweihale okumi awe, nave Gisèle aahichuna opaka sincipale mmuteko wa Yehova. Mwawiihiiha, Gisèle aahipacerya orumeela ntoko piyoneera ookilaatheya vaavaa aakuchunleiye exikola.

Gisèle aahikhalano nchuno na opaka sincipale mmuteko wa Yehova vaavaa eereiye akookele o Cameroon, nyenya owo aahikhala awuukhuwa. Gisèle oriye, “Kaaphwanela ohiya ophwanelela waka wa okhala o Italiya vamoha ni asinthamwene ni amusi yaawo yaakhala weiwo.” Naamwi hiiha, mu Maiyu a 2016, Gisèle aahikookela o Cameroon.

Voocharela, Gisèle aahipaka othela ni Léonce, nave efiliyale yo Cameroon yaahaaveka wi eye o Ayos, epooma yeeyo yaarino othowa otokweene wa alaleeryi a Omwene.

Okumi aya waari wa mukhalelo taani o Ayos? Gisèle ooloca: “Wiiliwiili mu isumana ikina hinaakhalano makeesi, nave atelefone ahu hiyaawerya okhalano ekaareka. Mu ilukuluku sincipale hinaawerya waapharihela atelefone. Nave kaahihuserya waapeya kipharihelaka mawuuni, nave tho naarika maahi weehimeni weiwo waahiya waaciwawo, wi nirike maahi naayawo ohiyu nikunxe ekarinya naapacinhe alanterna.” Mutheli ola aavilenle hai? Gisèle ooloca: “Munepa waweela wa Yehova, vamoha ni nlipiho nnikhaviheryo na asinthamwene ni amusi naahinikhaviherya ovilela ntoko mutheli.”

Apwanne Gisèle aahihakalala nthowa na okookela mu elapo awe? Gisèle ohaakhula: “Chiryene moohikhwa minikwa! Wuupaceryani yaahikhalavo makacamiho nave kaanakhala awuukhuwa, nyenya vaavaa naavoothaahu makacamiho miyaano vamoha ni iyaka naanoona wi nipanke yeeyo naaphwanelaahu opaka. Ninnamuroromela Yehova nave ninniisona okhala awaacameleya wa yoowo.” Léonce ni Gisèle yaahivolowa mu Exikola ya Alaleeryi a Omwene, nave vano anarumeela ntoko mapiyoneero avameekhaaya a elukuluku vakhaani.

Moolikana ni mulipa ototha ihopa yoowo onooniherya olipa murima, naamwi akumanaka ni makacamiho wi atothe ihopa sincipale, yaale anathaamela mu elapo aya anniilipiserya vancipale wi yaakhaviherye yaale anaakhulela phaama muchaka wa Omwene. Moohikhwa minikwa, Yehova harwa acuwala wiilipiserya wa alaleeryi yaawo oonihenrye osivela ntakhara nsina nawe. (Neh. 5:19; Ahe. 6:10) Waakhanle wi muri mu elapo yookhopela nyenya mu elapo anyu wookhalamo othowa wa alaleeryi a Omwene apwanne munanwerya okookelawo? Wakhala wi moheerano, munamwaakhela mareeliho awaaca.—Masi. 10:22.