1, 2. (1) Mmukhalelo taani matorokelo awaakuveya mookumini ananivolowelaaya? (2) Mwawiiwanana ni Salumu 131, tiheeni eni enikhaviherye okhalano murecele wa mmuupuweloni?

EMANLE orumeela o Peteli mu iyaakha opwaha makhumi meeli nathanu, Loyiti ni Alexantra, yaahithanliwa oya mmuteko woolaleerya. Wuupaceryani, yaari oothanana. Loyiti onnaloca: “Epeteli ni muteko kaathanleliwaaka koona okhala mukhalelo aka wa okumi. Mmuupuweloni mwaka kaanathamalela mathowa a matorokelo, nyenya mu isumana ni miyeeri ohoolo waya, kaanahoolela miyoonelo soohichuniya.” Mu elukuluku ekina Loyiti aanoona matorokelo okhala ophwanelela, nyenya mu elukuluku yoocharela owo aanakhala awuukhuwa mmuupuweloni.

² Mu ilukuluku soothene, anamukhalavo matorokelo oohiwehereryeya mu okumi ahu, nave matorokelo awo anamuneeriha okhala awuukhuwa vancipale mmuupuweloni. (Masiposipo 12:25) Vaavaa matorokelo anakhalaaya oovila weemererya  ni wiikhoveleliha, tiheeni nnahaalaahu opaka wi ntitelele okhala oomaaleleya. (Mwaalakhanye Salumu 131:1-3.) Hankooni noone ti mwawiihai akapuro a Yehova, a mmahiku akhalai ni mmahiku ahu, yaawenryaaya okhalano murecele wa mmuupuweloni naamwi okumi aya waatoroken’ye mwawaakuveya.

3. Mmukhalelo taani okumi wa Yosefe waatoroken’yaaya mwawaakuveya?

³ Ntoko yootakiherya, muupuwele vooloca sa Yosefe. Mwa anamwane oothene a Yakopo, Yosefe taari mwaana ookhweleyaxa. Ela yaahiweeriha annawe omukhalela nrima. Elukuluku Yosefe aareiyeno iyaakha khumi nathanu napiili, awo yaahimutumiha ntoko kapuro. (Maphatxuwelo 37:2-4, 23-28) Mu iyaakha waacamela khumi nararu, owo aahihooseya o Yikuputu, woopaceryani ntoko kapuro nave voocharela ntoko mulipa oowaleliwa. Yosefe aari ocaiwene ni tiithi awe, yoowo aamusivela vancipale. Mukhalelo awe wammweeriha okhala oophweeleya ni oonyeenyeya, nyenya eyo hiyeeren’ye. Tiheeni yaamukhavihenrye?

4. (1) Tiheeni Yosefe aapankeiye elukuluku aareiye mukalaposo? (2) Yehova aakhunle hai mavekelo a Yosefe?

⁴ Elukuluku Yosefe aahooseyeiye mukalaposo, akhweya owo aanuupuwelela mukhalelo Yehova aamukhaviheryeiye. (Maphatxuwelo 39:21; Salumu 105:17-19) Akhweya aanuupuwelatho vooloca sa sooloha sa miririmu seiyo aalonheiye elukuluku aareiye ponkwe nave aanasuwela wi Yehova aari ni yoowo. (Maphatxuwelo 37:5-11) Akhweya owo aanavekela wiiliwiili nave aanamuleela Yehova echu eri yoothene yaari mmurimani mwawe. (Salumu 145:18) Nave Yehova aahaakhula mavekelo a Yosefe orweela mwa omuroromeliha wi Owo “ari ni yowo” moohipwacha echu yi yeereye.—Saweriwa T’arummwa 7:9, 10. * (Moone masu avathi.)

5. “Muretxele wa Muluku” oni oneerihe hai okhala oolakelela omurumeela Yehova?

⁵ Moohipwacha wunnuwa wa makacamiho ahu, nnanwerya okhalano “muretxele wa Muluku” yoowo onakhapelela “miruku sothene,” nave onaneeriha okhala oomaaleleya. (Mwaalakhanye Filipi 4:6, 7.) Vaavaa nnakhalaahu awuukhuwa mmuupuweloni, “muretxele wa Muluku” onamunilipiha wi ntitelele omurumeela Yehova ni okhala oohivelavela. Hankooni nihuserye vooloca sa sootakiherya sa anna ni arokora a mmahiku ahu yaawo ahoolenle mikhalelo seiya.

6, 7. Mavekelo ahu eni enikhaviherye hai okhalano wanawiili murecele wa mmuupuweloni? Mvahe yootakiherya.

⁶ Vaavaa Riyani ni Xuliyeta yiiwalaaya wi muteko aya ntoko mapiyoneero avameekhaaya wa elukuluku vakhaani waahimala, awo yaahikhala ooceecheya. Riyani onnaloca: “Naaveleela mwaha yoola mmatani mwa Yehova. Naahisuwela wi naahikhalano ekari yavameekhaaya ya wooniherya nroromelo nahu mwa yoowo. Anna ancipale mmulokoni mwahu yaari avyaani mu eparipari, mwawiihiiha naahimveka Yehova wi anikhaviherye otikitherya yootakiherya yaphaama ya nroromelo.”

⁷ Yehova aakhunle hai nivekelo naya? Riyani onnaloca: “Mwawaakuveya nimanle ovekela, moonelo wooheseya ni wuukhuwa yoowo  naaryaahuno woopaceryani waahicakanela. Murecele wa Muluku waahikhapelela mirima ni muupuwelo ahu. Naahisuwela wi naanwerya otitelela ophariheliwa ni Yehova wakhala wi nootitelela okhalano moonelo woophwanelela.”

8-10. (1) Munepa wa Muluku onanikhaviherya hai elukuluku nnakhalaahu awuukhuwa? (2) Yehova onanikhaviherya hai vaavaa nnatitelelaahu omurumeela yoowo?

⁸ Munepa wa Muluku onamuneeriha okhala oomaaleleya, nave owo onamunihoolela mu iciciri sa Mpiipiliyani seiyo sinahaala onikhaviherya wiiwexexa yeeyo eri yookhweleyaxa mookumini. (Mwaalakhanye Yohani 14:26, 27.) Muthokororye yeeyo yaamweerenle Filipi ni Mariya, mutheli yoowo aakhanle o Peteli waacamela iyaakha makhumi meeli nathanu. Mu miyeeri misese, asimai aya oopiili ni amusi aya akina yaahikhwa, nave yaaphwanela waakhapelelaka apapa a Mariya yaawo arino ereca etokotoko ya mmuupuweloni.

⁹ Filipi ooloca: “Kuupuwela wi kaanavilela phaama mmukhalelo wammoori, nave echu emoha yaanahala. Kaahimwaalakhanya Kolosi 1:11 mu mwaha wa Mulipeleli oomuhuserya. Mweeparipari, kaanavilela, nyenya ohiya moophwanelela. Kaaphwanela okhalano ‘ovilela wothene ni ohakalala.’ Eciciri ela yaakuupuxerya wi ohakalala muukumini, honarweela mu mikhalelo saka, nyenya nthowa nawi munepa waweela wa Muluku ori mu okumi aka.”

¹⁰ Woona wi Filipi ni Mariya yaahititelela omurumeela Yehova, owo aahaareeliha mmikhalelo mincipale. Moohilekela emanle okhuma o Peteli, oopiili yaahaaphwanya oohuserya a Piipiliya yaapanke matorokelo aphaama nave yaachuna ohuserya opwaha ekwaha emoha va esumana. Mariya ooloca: “Awo yaari nihakalaliho nahu nave waari mukhalelo mmoha Yehova onileela wi ichu soothene saaneeca phaama.”

11, 12. (1) Tiheeni Yosefe aapankeiye yeeyo yaamweerinhe Yehova omureeliha? (2) Yehova aamureelinhe hai Yosefe?

¹¹ Elukuluku ekumi enatorokeyaaya mwawaakuveya, nnakhala awuukhuwa ophiyerya wi ichu nnapakaahu, nnuupuwela inakhala makacamiho. Ela yaahaala weereya ni Yosefe. Ohiya yeeyo, owo aahipaka owetha wawe ophiyerya aawereleiyevo mmukhalelo awe. Hiiha ntoko Yosefe aalampeiye mwakuru ntakhara Potifare, aahilapa tho mwakuru mukalaposo wa echu vyakala yeeyo mutokweene a mukalaposo aamuleeleiye opaka.—Maphatxuwelo 39:21-23.

¹² Nihiku nimoha, Yosefe aahithanliwa wi  aakhapelele alipa oowaleliwa eeli yaawo yaalapa mu nikhuuru noothoriha na Farawo. Yosefe aari ooreera murima wa yaawo, nave alopwana yaahiisoona okhala ookhapeleleya mwawaakhwanela ophiyerya wi yaahimuleela sawuukhula saya ni sooloha seiyo yaalonhaaya mu ohiyu waavinre. (Maphatxuwelo 40:5-8) Yosefe haasuwela wi ovaanela iwe waahaala ohoolela otaphuliwa wawe. Iyaakha piili ohoolo waya, owo aahitaphuliwa mukalaposo nave aahikhala mulamuleli oowerya o Yikuputu. Pahiru Farawo taarino owerya ompwaha Yosefe!—Maphatxuwelo 41:1, 14-16, 39-41.

13. Nni neereno hai ichu mmukhalelo Yehova oneereiye anreelihe, moohipwacha mukhalelo ahu?

¹³ Moolikana ni Yosefe, akhweya nnamukhala mmukhalelo yoowo nihinaweryaahu ovareryela mukhatiihu. Nyenya wakhala wi noopisa murima ni opaka owetha wahu ophiyerya nnaweryelaahuvo, Yehova onamunireeliha. (Salumu 37:5) Vaavaa nnakhalaahu oohaleeliheya ni awuukhuwa, hannakhala ‘óhaléla’ yaweera naari oyeleela ewehereryo. (2 Korinto 4:8, NN) Yehova onamukhala ni hiyo, xaxaxa wakhala wi nootikitheryeya mu orummwa wahu.

14-16. Filipi aatikitheryen’ye hai mmuteko awe woolaleerya naamwi okumi awe waatoroken’ye?

¹⁴ Namalaleya Filipi aari yootakiherya yaphaama aatikitheryen’ye mu orummwa awe moohipwacha matorokelo a ekumi awe. Mu elukuluku ekina, owo aahikhalano murici muvyaani o Yerusalemu. (Saweriwa T’arummwa 6:1-6) Voocharela echu eri yoothene yaahitorokeya. Stefano amanle wiiphiwa waahikhalavo wiikariwa wawoopiha ntakhara Akristu, nave awo yaahichawela o Yerusalemu. Woona wi Filipi aahichuna okhala ooweiwa amurumeelaka Yehova, owo aahiya o epooma yo Samariya, weiwo achu yaachunaaya wiiwa michaka saphaama.—Mateu 10:5; Saweriwa T’arummwa 8:1, 5.

¹⁵ Filipi aari ooreheryeya oya nipuro nri noothene weiwo munepa wa Muluku waamuhoolelaayawo. Mwawiihiiha Yehova aahimpharihela olaleerya mmapuro mummo achu yahintonkwaaya wiiwa michaka saphaama. Ayuta ancipale hiyaawoona Asamariya okhala echweenevo nave yaanaakhaliha moonanara. Nyenya Filipi haarino nthalu, nave owo aahuuka muchaka waphaama ni yaawo. Nave Asamariya yaahinwiriyana yoowo “ni murima mmoha”!—Saweriwa T’arummwa 8:6-8.

¹⁶ Voocharela, Munepa wa Muluku waahimuhoolela Filipi wi alaleerye o ipooma so Asitoti ni Kaisareya, weiwo yaariwo Aheleni ancipale. (Saweriwa T’arummwa 8:39, 40) Ohoolo waya, okumi wa Filipi waahitorokeya wanawiili. Owo aahimaka weiwo nave aahikhalano emusi. Nave moohipwacha otorokeya wa okumi wa Filipi, nlelo owo aahititelela okhala ooweiwa ni muteko awe woolaleerya,  nave Yehova aahititelela omureeliha vamoha ni emusi awe.—Saweriwa T’arummwa 21:8, 9.

17, 18. Okhala ootikitheryeya mmuteko ahu woolaleerya oni onikhaviherye hai vaavaa okumi ahu onatorokeyaaya?

¹⁷ Ancipale ari mmuteko wa elukuluku yoothene alonce wi otikitheryeya mmuteko aya woolaleerya yohaakhaviherya otitelela okhala oohakalala ni aweemeleleya naamwi mikhalelo saya sitorokeyaka. Ntoko yootakiherya, mutheli o Afrika Oohico oniichaniwa Osporne ni Polite yaakhummaya o Peteli, awo yuupuwela wi waahaala okhala wookhweya ophwanya muteko wa elukuluku vakhaani ni mpuro wookhalavo. Nyenya Osporne ooloca: “Moothananiha, hinaawenrye ophwanya muteko mwawaakuveya ntoko naaweheryaahu.” Polite ooloca: “Mu miyeeri miraru hinaaphwannye muteko, nave hinaarino echu. Nla naari nikacamiho ntokotoko.”

¹⁸ Tiheeni yaamukhavihenrye Osporne ni Polite mmukhalelo yoola wawuukhula? Osporne ooloca: “Olaleerya vamoha ni muloko waahinikhaviherya vancipale okhapelela muupuwelo ahu ni okhala aweemeleleya.” Ohiya okilaathi owaani yiikhupanyeryaka, awo yaahilakelela otitelela okhala ooweiwa mu orummwa aya. Weerano yeela yaahaaruuhela ohakalala otokotoko! Nave Osporne onnaaceererya: “Naahaavya muteko mmapuro oothene, nave wookuchulani naahiphwanya.”

19-21. (1) Tiheeni eni enikhaviherye okhapelela murecele wa mmuupuweloni? (2) Nni niphure hai vaavaa nniikhovelelihaahu matorokelo vyakala oohiwehereryeya?

¹⁹ Ntoko noonnaahu, wakhala wi noopaka owetha wahu mmikhalelo sahu nave nimuroromela Yehova moomalela, nnanwerya okhapelela murecele ahu wa mmuupuweloni moohipwacha echu eni yeereye. (Mwaalakhanye Mikeya 7:7.) Moovira wa elukuluku, nnamusuwela wi mukhalelo niikhovelelinhaahu matorokelo ahiihaano yoolipiha onthamwene ahu ni Yehova. Polite oothariha wi okhuma o Peteli woomuhusiha yootaphulela ya omuroromela Yehova naamwi okumi okhalaka woovila. Owo ooloca: “Onthamwene aka ni yoowo woothipeleya.”

 ²⁰ Mariya yoowo olociwe omapacereryo, nlelo piyoneera nave onaakhapelela atiithi awe awuuluvala. Owo ooloca: “Koohuserya wi vaavaa kinakhalaaka awuukhuwa, kinaphwanela omaala, ovekela, nave voocharela kiichuuwe. Ohiya ichu mmatani mwa Yehova nihusiheryo ntokotoko nenlo kihusenryaaka, navetho ela enamukhala yoochuneya moopwahaxa omwaahiyu.”

²¹ Loyiti ni Alexantra, anneemererya wi matorokelo mu okumi aya aheeha nroromelo naya mmikhalelo yahiweheryaaya. Nyenya awo annawerya woona mukhalelo saweeha seiya saakhavihenryaaya hiihaano. Vano aasuwela wi nroromelo naya noolipiheya mwawaakhwanela ophiyerya wi ninnaaruuhela nihakararyo vaavaa anakhalaayano makacamiho, nave awo anniisoona okhala achu oophwanelela.

22. Wakhala wi noopaka owetha wahu tiheeni nnaphwanelaahu ororomela?

²² Mu elapo yeela, ikumi sahu inamutorokeya mwawaakuveya. Akhweya murici woohiyana mmuteko wa Yehova, okhalano makacamiho eekumi, naari ochuna waakhapelela amusi ahu mmukhalelo wammoori. Nyenya moohipwacha echu eni yeereye, muroromele wi Yehova onnoopwachaani nave onamookhaviheryaani mu elukuluku yoophwanelela. (Ahebri 4:16; 1 Pedro 5:6, 7) Nave hiihaano, mpake owetha wanyu ophiyerya munaweryelaanyuvo mwawiiwanana ni mukhalelo anyu. Mvekele wa Tiithi anyu, Yehova, nave muhuserye omuroromela yoowo moomalela. Mmukhalelo yoowo, moohipwacha otorokeya wa mikhalelo sanyu, ilukuluku soothene munamukhalano murecele wa mmuupuweloni, yoowo onarwa wa Yehova.