1-2. (1) Tiheeni alamuleli eelapo anahaalaaya olokoha moohilekela? (2) Makoho taani anaphwanela waakhuliwa?

NKAANYIHERYANI wi alamuleli a elapo aamala opaka yoolokoha yeeyo enawehereryiwa ya “murechele ni ohúkhuwa.” Awo akhweya anamuloca mwawiirumiha wi chiryene aaheeriha elapo okhala nipuro nookhapeleleya. Nave awo anamuchuna wi achu yuupuweleke wi mukhalelo wa elapo ori woovareryeleya. Nyenya alamuleli a elapo hiyaano owerya woothene wa ovareryela ichu sinahaala weereya voocharela. Ntakhara heeni? Mwawiiwanana ni yooloherya ya Piipiliya, “mootutusha anamutoloshiwa, . . . awo hekophola.”—1 Tes. 5:3, NN.

² Aakhalavo makoho ookhweleya anachuneya maakhulo: Tiheeni enahaala weereya variyari va “ekoi etokotoko?” Tiheeni Yehova onahaaleiye ochuna wi nipake variyari va elukuluku yeeyo? Nave nni niirehererye hai hiihaano wi ntitelele okhala oororomeleya variyari va ekoi etokotoko?—Mat. 24:21, BNM.

3. Mwawiiwanana ni Wupulula 17:5, 15-18, Muluku onahaala omutoloxa hai “Paapulu Mutokotoko”?

³ Mwaalakhanye Wupulula 17:5, 15-18. “Paapulu Mutokotoko” onahaala otoloxiwa! Ntoko elociwaaya muculi, alamuleli a maloko hanahaala owerya ovareryela echu enahaala weereya mu elukuluku yeeyo. Ntakhara heeni? Nthowa nawi “Muluku [onahaala] okuhavo vamurimani vaya okhwela wa weerano muupuwelo awe.” Muupuwelo taani? Otoloxiwa mukhalelo ori woothene wa malapelo atheru, ophitaanyerya yaale Aniiseera Akristu. * Muluku onahaala ohela muupuwelo awe mmurimani mwa “manyaka  khumi” a “mwaashinama oophilivila.” “Mwaashinama” oneemelela Maloko Awiiwanana, nave manyaka khumi aneemelela olamulelo woothene weelapo onakhaviherya. (Wup. 17:3, 11-13; 18:8) Vaavaa alamuleli eelapo eneeraaya ehiphele malapelo atheru, vano nnahaala osuwela wi ekoi etokotoko yoopacerya. Eyo enahaala okhala elukuluku yootutuxa enahaala waavolowela achu a veelaponi yoothene.

4. (1) Mathowa taani akhweya anahaala oweeriha alamuleli ohiphela malapelo atheru? (2) Woonaru tiheeni asinthamwene a malapelo atheru anahaalaaya opaka?

⁴ Hiyo hannasuwela mathowa anahaala oweeriha alamuleli omutoloxa Papulu Mutokotoko. Awo akhweya anahaala oloca wi malapelo annaakanyerya murecele mweelaponi nave wi awo anniivoliiherya vancipale mu epoliitika. Naari ananwerya oloca wi malapelo ahiithukumanyerya muhakhu ni mapuro mancipale. (Wup. 18:3, 7) Mwawooneya, ohipheliwa wa Papulu Mutokotoko henataphulela wi achu a malapelo atheru anahaala otoloxiwa. Mweeparipari, echu eri yawooneya tiyawi ahooleli a maloko anahaala okhala ootaphuwa ni marehereryo a malapelo. Vaavaa malapelo oothene atheru eneeraaya ecakanele, yaawo yaapaka makupa mwemmo anahaala wiiwexexa wi ahooleli a malapelo aapwata. Woonaru awo anahaala oloca wi hiyaanono muteko ni malapelo yaawo.

5. Tiheeni Yehova ororomelinheiye vooloca sa makacamiho matokotoko, nave ntakhara heeni?

⁵ Piipiliya hanaloca elukuluku enahaala oviravo mu otoloxiwa wa Papulu Mutokotoko. Echu nsuwenlaahu tiyawi enahaala okhala elukuluku yavakhaani. (Wup. 18:10, 21) Yehova oolaiherya wi onahaala ‘ovukula mahiku’ a yoohooxa wi “oothanliwa” ni munepa waweela ni malapelo eeparipari evuluwe. (Mar. 13:19, 20) Nyenya variyari va elukuluku yeeyo— omapacereryo wa makacamiho matokotoko ni omakuchuwelo wa Armaketo —tiheeni Yehova onahaaleiye ochuna wi nipake?

6. Echu taani ekina enavolowela wiivalaanya ni malapelo atheru?

⁶ Ntoko nonnaahu mmwaha ovirale, Yehova onachuna wi alapeli awe yiivalaanye moomalela ni Papulu Mutokotoko. Opaka yeeyo enavolowela, ohiya pahiru okwatelela meerelo oothene  a malapelo atheru. Nnaphwanela oolakelela otitelela opaka malapelo eeparipari— malapelo aweela a Yehova. Hankooni noone mikhalelo miili sa weerano yeeyo.

7. (1) Nni nikhaviherye hai moolipa murima yeeyo Yehova onaloceiye wi tiwawookololowa mmukhalelo wa meecelo? (2) Mwawiiwanana ni Ahebri 10:24, 25 ntakhara heeni mithukumano siryaaya soochuneya xaxaxa hiihaano?

⁷ Echu yoopacerya, nnaphwanela okhaviherya moolipa murima yeeyo Yehova onaloceiye wi ti yawookololowa mmukhalelo wa meecelo. Hannaphwanela weemererya meerelo ni meecelo a elapo yeela. Ntoko yootakiherya, hanneemererya mukhalelo ori woothene wa ocapaheya. Eyo enaphitaanyerya othelana wa achu a mwiikho woolikana ni meerelo makina a okonihana wa achu oolikana mwiikho. (Mat. 19:4, 5; Aro. 1:26, 27) Yanawiili, nnaphwanela otitelela omulapela Yehova ni annihu Eekristu. Nnahaala opakaka eyo, mmapuro oothene, mu Empa ya Omwene, mu ipa sa anna naari ophiyerya mmukhalelo woovitheya. Moohipwacha yeeyo enahaala weereya, hanirwa nihiya othukumana wi nimulapele Yehova. Mweeparipari, nnaphwanela othukumana xaxaxa vaavaa ‘nnaacamelaaya nihiku nookuchula.’—Mwaalakhanye Ahebri 10:24, 25.

8. Matorokelo taani akhweya anahaala weereya muhoolo ni muchaka nnalaleeryaahu?

⁸ Akhweya, variyari va ekoi etokotoko, michaka nneeraahu nlaleerye inamutorokeya. Olelo nnalaleerya michaka saphaama sa Omwene nave ninniilipiserya waapaka oohuserya. Nyenya mu ekoi etokotoko, muchaka ahu onamukhala woolipa, ntoko maluku a maralala oolimelasa. (Wup. 16:21) Akhweya nnahaala olaleerya wi elapo ya Satana moohilekela enamutolosiwa. Yaphiya elukuluku, nnahaala osuwela phaameene tuuvi onahaala okhala muchaka nave mukhalelo nnahaalaahu olaleerya. Apwanne nnahaala olaleerya hiihaa ntoko nlalenryaahu mu iyaakha nsana muculi? Naari nnahaala opharihela meerelo mavyaani? Pahiru nnahaala osuwela elukuluku yaphiya. Mmukhalelo ori woothene, enooneya wi nnahaala okhalano ekari ya olokoha moolipa murima muchaka woothoriha wa Yehova!—Ezek. 2:3-5.

9. Maloko aachu akhweya anahaala waakhulela hai muchaka ahu, nave mu eheeni nihiraahuno minikwa?

⁹ Enooneya wi muchaka ahu onahaala waanyeenyeiha maloko a achu. Voocharela, enakhala yawooneya wi awo anahaala weererya onimaaliha moomalela. Mwa yeeyo, onahaala ochuneya omuroromela Yehova. Olelo owo onnanivaha nikhaviheryo noothene nnachunaahu wi nilaleerye michaka saphaama. Hinnakhwa minikwa wi, muhoolo, Muluku onahaala tho onivaha owerya wi nipake yeeyo oneereiye anrume.—Mik. 3:8.

10. Mwawiiwanana ni yooloherya enaphwanyeya mu Luka 21:25-28, achu ancipale anahaala waakhulela hai variyari va ekoi etokotoko?

¹⁰ Mwaalakhanye Luka 21:25-28. Variyari va ekoi etokotoko, achu anahaala okhala oohaleeliheya. Soothene awo yoonaaya okhala sookhapeleleya mu elapo yeela sinahaala ocakanela. Awo “anamuukhuwa,” anahaala woova oyeleela ekumi aya variyari va elukuluku yookacamiha mmiyaha saachu. (Sof. 1:14, 15) Mu elukuluku yeeyo, akhweya ekumi enahaala okhala yoowalamelaxa ophiyerya tho wa achu a Yehova. Woona wi hannapaka makupa a elapo, ti wooweryeya ohoolela makacamiho. Akhweya nnahaala othoiwa ichu ikina soochuneya mookumini.

11. (1) Malapelo atheru emanle otolosiwa, ntakhara heeni maloko, ni alamuleli a elapo anahaala onyeenyeya ni Anamoona a Yehova? (2) Ntakhara heeni hannaphwanela woova ekoi etokotoko?

¹¹ Mu elukuluku yeeyo, achu yaawo yaakhala mu malapelo atheru anahaala woona wi Anamoona a Yehova nlelo annatitelela weerano  malapelo aya. Eyo enanweeriha achu awo okhala oonyeenyeya vancipale. Mwaanyiherye namvutuka onahaala okhalavo, ophitaanyerya mu isaiti sa makhuuru. Ophiyerya wi maloko, alamuleli a elapo ni Satana, awo anahaala oniica nthowa na okhala malapelo mamoharu ahanle. Mweeparipari, awo heni ewerya okhwaaniherya yoolakelela aya ya omaliha malapelo oothene veelaponi yavathi. Wa nthowa na yeeyo, anahaala onirukunuwela. Enahaala okhala elukuluku yeeyo maloko anahaalaaya okhwaaniherya murici wa Koki a Makoki. * Awo anahaala othukumana wi yaahiphele moomalela achu a Yehova. (Ezek. 38:2, 14-16) Osuwela yeela akhweya enamuneeriha okhala awuukhuwa, xaxaxa vaavaa nihinasuwelaahu mookwakwaleya mukhalelo ohiphela owo onahaalaaya weereya. Nyenya nnaphwanela ororomela mu echu emoha: hanaphwanela woova ekoi etokotoko. Yehova onahaala onivahererya malakiheryo yaawo anahaala ovuluxa ekumi ahu. (Sal. 34:19) Nnaphwanela, ‘ovinya ni oviiha muru ahu,’ ntakhara noosuwela wi ‘woopoliwa wahu ori vakhiviru.’ *

12. Tiheeni “mulapeli òroromeleya ni awisuwela” onapakeiye wi anirehererye vooloca sa muhoolo?

¹² “Mulapeli òroromeleya ni awisuwela” onnanirehererya ovinyerya khalai wi ntitelele okhala oororomeleya variyari va ekoi etokotoko. (Mat. 24:45, BNM) Owo onnapaka yeeyo mmikhalelo soohiyanahiyana, nyenya muupuwele yootakiherya ela: mithukumano sahu sa miceche sa iyaakha 2016 ophiyerya 2018. Muthukumano ti muthukumano woothokororya mukhalelo nnaphwanelaahu okhalano wi nivuluwe mu nihiku na Yehova. Hankooni nuupuwele mwawaakuveya mikhalelo seiho.

13. Tiheeni enahaala onikhaviherya olipiha ororomeleya wahu wa Yehova, nave ntakhara heeni ninnaphwanela weerano eyo hiihaano?

¹³ Ororomeleya: Muru wa muthukumano wa muceche wa 2016 waari “Titelelani Okhala Oororomeleya wa Yehova!” Muthukumano yoola wa muceche woonihusiha wi, naariki ntitelele okhala oororomeleya wa Yehova, nnaphwanela okhalano onthamwene woolipa ni yene. Miyaha saahithokororya wi nnanwerya olipiha onthamwene ahu ni Yehova moorweela wa opaka mavekelo ookhumela vathi va murima ni omuhuserya Piipiliya mwawiixeela. Nivekelo ni ohuserya sinnanivaha ikuru nnachunaahu wi nivoothe makacamiho oovilaxa. Vaavaa mukhalelo ola wa Satana onaphiyaaya omakuchuwelo, nnamuhoolela saweeha sincipale sa ororomeleya wahu wa Yehova ni Omwene awe. Akhweya nnahaala ophuciwa vancipale, xaxaxa woona wi ororomeleya wahu onahaala weehiwa mwawaacereryeya. (2 Ped. 3:3, 4) Naariki ntitelele okhala oororomeleya wa Yehova mu ekoi etokotoko, nnaphwanela olipiha ororomeleya wahu hiihaano.

14. (1) Matorokelo taani anahaala weereya ni annihu yaawo anaakhapelela achu a Yehova veelaponi ya vathi? (2) Ntakhara heeni onamuchuneya okhala oororomeleya vaavaa eyo enahaalaaya weereya?

¹⁴ Mmahiku ahu, Nikhuuru Noolamulela tinnaakhapelela achu a Yehova veelaponi yavathi. Nyenya, variyari va ekoi etokotoko, awo heni ekhale veelaponi yavathi. Oothanliwa ni munepa waweela oothene anahaala othukumanyiwa wirimu wi epake makupa mu ekhoco ya Armaketo. (Mat. 24:31; Wup. 2:26, 27) Nyenya mucichi mutokotoko onahaala otitelela  okhala wooreheryeya. Anna a mavyakelo yaawo anapaka makupa a ipucepuche ikina anahaala waakhapelela achu a Muluku. Nnahaala ochuna wooniherya ororomeleya wahu moorweela wa waakhaviherya anna yaawo ni ochariha ohoolela avahiwaaya ni Muluku. Woopowa wahu onahaala orweela wa yeeyo!

15. Tiheeni enahaala onikhaviherya olipiha ororomeleya wahu, nave ntakhara heeni nnaphwanelaahu weerano eyo hiihaano?

¹⁵ Ovilela: Muru wa muthukumano wa muceche wa 2017 waari “Muhivelavele!” Muthukumano owo wa muceche woolipiha mavyakelo ahu a ovilela saweeha. Noohuserya wi ovilela honarweela mu mikhalelo saphaama. Nnanwerya olipiha ovilela wahu moorweela wa omuroromela Yehova. (Aro. 12:12) Hannaphwanela ocuwala yoororomeliha ya Yesu: “Yoole oni avilele ophiyerya omakuchuwelo, onamvulushiwa.” (Mat. 24:13) Yoororomeliha ela enooniherya wi nnaphwanela otitelela okhala oororomeleya moohipwacha makacamiho nnahoolelaahu. Wakhala wi ninnahoolela nikacamiho ti nikacamiho ni ovilela, nnahaala okhala oolipa wi nihivelavele vaavaa ekoi etokotoko enahaalaaya ochoowa.

16. Olipa murima weeparipari onarweela woowi, nave nni nilipihe hai olipa wahu murima hiihaano?

¹⁶ Olipa Murima: Muru wa muthukumano wa muceche wa 2018 waari “Mulipe Murima!” Muthukumano owo wa muceche woonuupuxerya wi olipa murima honarweela mu mavyakelo ahu. Hiiha ntoko ovilela, olipa murima weeparipari onarweela mu omuroromela wahu Yehova. Nni nlipihe hai omuroromela wahu? Nnaphwanela omwaalakhanya Piipiliya mahiku oothene ni wuupuwelela mukhalelo Yehova aavulunxeiye achu awe khalai. (Sal. 68:20; 2 Ped. 2:9) Vaavaa maloko anahaalaaya onihiphela variyari va ekoi etokotoko, nnahaala ochuna olipa murima ni omuroromela Yehova opwaha khalai. (Sal. 112:7, 8; Ahe. 13:6) Wakhala wi ninnamuroromela Yehova hiihaano, nnamukhalano olipa murima woochuneya wi nihoolele ohiphela wa Koki a Makoki. *

17. Ntakhara heeni hannaphwanela woova ekhoco ya Armaketo? (Moone eruku ya ekaapa.)

¹⁷ Hiiha ntoko elociwaaya mmwaha ovirale, ancipale a hiyo nikhanle variyari va mahiku ookuchula. Nyenya hiyo tho nookhalano ewehereryo  ya ovira nri akumi mu ekoi etokotoko. Ekhoco ya Armaketo enahaala okhala yaweereya yookuchula ya mukhalelo yoola wa ichu. Nyenya hannaphwanela okhala awoova. Ntakhara heeni? Woona wi eyo ekhoco ya Muluku. (Masi. 1:33; Ezek. 38:18-20; Zak. 14:3) Vaavaa Yehova onahaaleiye ovahererya eneneeryo, Yesu Kristu onahaala waahoolela akhoco a Muluku mu owaniha. Vamoha ni yoowo, anahaala okhalavo macikhwi a oothanliwa ni munepa waweela yaawo eni eniiha eviihiwe mookhwani ni amilyawu a ankeelo. Oothene yaawo anahaala owana ni Satana, masololo awe ni anakhoco awe a veelaponi yavathi.—Dan. 12:1; Wup. 6:2; 17:14.

18. (1) Tiheeni Yehova ororomelinheiye? (2) Mmukhalelo taani Wupulula 7:9, 13-17 onalipiheiye yoororomeleya anyu vooloca sa muhoolo?

¹⁸ Yehova oororomeliha: “Hinavo nivaka nni nophoreihe.” (Isa. 54:17, BNM) “Mucici muncipale” wa alapeli oororomeleya a Yehova anahaala ‘ovira mu ekoi etokotoko’ erino ekumi! Nave oothene yaawo anahaala otitelela opaka miteko saweela ntakhara Muluku. (Mwaalakhanye Wupulula 7:9, 13-17.) Echu yaphaama osuwela wi Piipiliya onnalipiha ororomela wahu vooloca sa muhoolo! Hiyo noosuwela wi “Apwiya [Yehova] annaakhapelela yaawo ari oororomeleya.” (Sal. 31:23) Oothene anamusivela ni anamucicimiha Yehova, anahaala oohakalala woona nsina nawe neelihiwaka wa sawootha soothene.—Ezek. 38:23.

19. Ewehereryo taani yootikhiniha nryaahuno muhoolo?

¹⁹ Muupuwele mukhalelo yaahaalaaya okhala masu ari mu 2 Timóteo 3:2-5 waakhanle wi yoorepa ela enaloca sa elapo evyaani, mwemmo achu ahinahaalaaya ovoloweliwa ni Satana. (Moone ekaaxa “ Mukhalelo Achu Anahaalaaya Okhala.”) Munna George Gangas, * yoowo aari mu Nikhuuru Noolamulela, ooloca: “Elapo enahaala okhala yooreeraxa vaavaa achu oothene eneereyaaya ekhale anna ni arokora! Moohilekela munahaala okhalano ekari ya okhala mu elapo yahiihaano. Nyuwaano munahaala okhala hiiha ntoko Yehova. Nnahaala okhala mu elukuluku yoothene.” Moohikhwa minikwa, ela ewehereryo yoohakalalihaxa!