1. Alapeli a Yehova anooniherya hai wi annasivelana mukina ni mukhwaawe?

ALAPELI oothene a Yehova orukurerya elapo makupa a emusi. Awo ari anna ni arokora anasivelana mukina mukhwaawe. (1 Yohani 4:16, 21) Ilukuluku ikina awo annapaka ichu itokotoko ntakhara annaya, nyenya ilukuluku sincipale annooniherya osivela waya orweela wa ichu ikhaani anapakaaya ntakhara yaawo. Ntoko yootakiherya, awo anamuloca echu yaphaama wa annaya naari waakhaliha yaawo mweepewe. Vaavaa nnaathokororyaahu akina, ninnamutakiherya Tiithiihu a wirimu.—Éfeso 5:1.

2. Yesu aatakihenrye hai osivela wa Tiithi awe?

² Yesu oomutakiherya Tiithi awe moophaameya. Ilukuluku soothene aanaakhaliha akina mweepewe. Owo aahiloca: “Rwani wa miyo othene nyuwo muri òvelavela ni ònyokoliwa, wona wi miyo kinan’witxhuwihani.” (Mateu 11:28, 29) Vaavaa nnamutakiheryaahu Yesu ni ‘wathokororya óháwa,’ nnammweeriha Yehova okhala oohakalala, nave hiyotho nnamukhala oohakalala. (Salumu  41:1, NN) Mmwaha yoola, nnahaala woona mukhalelo nneeraahu naathokororye achu aveemusini vahu, anna ni arokora ahu, ni yaale nnaaphwanyaahu mmuteko woolaleerya.

3. Mulopwana othenle oni amuthokororye hai mwaariye? (Moone eruku yoopacerya.)

³ Alopwana athenle anaphwanela otikitherya yootakiherya nave yooniherye ophiyerya mweeryo taani awo anathokororyaaya emusi aya. (Éfeso 5:25; 6:4) Piipiliya onnaloca wi alopwana anaphwanela waathokororya ni owiiwexexa asaaraya. (1 Pedro 3:7) Mulopwana othenle oniiwexexa onnasuwela wi naamwi ari oohiyana ni mwaariye mmikhalelo mincipale, yene tahi oophwanelela ompwaha mwaariye. (Maphatxuwelo 2:18) Owo onnathokororya miyoonelo sa mwaariye nave onnamukhaliha mwa ncicimiho. Muthiyana o Kanata oothariha vooloca sa iyawe: “Iyaka hatonko okwatelela moonelo aka naari oloca wi, ‘we honaphwanela woona mmukhalelo yoowo.’ Owo namawiriyana aphaama. Elukuluku onakikhaviheryeiye otoroka moonelo aka vooloca sa mwaha, owo oneerano mweepewe.”

4. Mulopwana othenle onooniherya hai wi onnapwacha miyoonelo sa mwaariye orweela wa mukhalelo onaakhaliheiye athiyana akina?

⁴ Mulopwana othenle onapwacha miyoonelo sa mwaariye hanawooseelela athiyana akina naari wooniherya nchuno noohiphwanelela wa yaawo, moohipwacha mwawooneya, mu isaiti sa makhuuru, naari mu interneti. (Yobi 31:1) Owo hanapharihela isaiti sa makhuuru wi ooseele, nave hanoona isaiti soohiphwanelela. Aai, owo onnatitelela okhala oororomeleya wa mwaariye nthowa nawi onnamusivela yene navetho onnamusivela Yehova nave onniica yoonanara.—Mwaalakhanye Salumu 19:14; 97:10.

5. Muthiyana otheliwe oni awerye hai omuthokororya iyawe?

⁵ Vaavaa mulopwana othenle onachariheiye yootakiherya ya osivela wa muru awe, Yesu Kristu, enahaala okhala yookhweya wa mwaariye ‘omutxitximihaka’ mwawiiseela. (Éfeso 5:22-25, 33) Nave vaavaa muthiyana onamucicimiheiye iyawe, owo onahaala weererya wiiwexexa miyoonelo sa iyawe ni omukhalihaka mweepewe vaavaa owo onakhaleiye ooweiwa ni miyaha sa muloko naari vaavaa iyawe onahooleleiye makacamiho. Mulopwana othenle o Krapretanya ooloca: “Veelukuluku aya, mwaaraka onamusuwela orweela wa otorokeya wa mukhalelo aka wi yookhala enakuukhula. Ohoolo waya onahaala opharihela nlakiheryo nnaphwanyeya mu Masiposipo 20:5, naamwi ela etaphulelaka oweherya elukuluku yoophwanelela wi ‘arike’ muupuwelo aka wakhala wi owo mwaha kiryaaka ootaphuwa othokororya ni yoowo.”

6. Ti mwawiihai oothene ahu nneeraahu naaceenyerye anamwane wuupuwela vooloca sa akina ni okhala eepewe, nave eyo enahaala waakhaviherya mmukhalelo taani?

⁶ Vaavaa asitiithi anakhalihanaaya mmukhalelo woothokororya, awo annatikitherya yootakiherya yaphaama wa anaaya. Awo anaphwanelatho waahusiha anaaya owuupuwelela akina ni okhala eepewe. Ntoko yootakiherya, asitiithi  ananwerya waahusiha anaaya wi ehichimakeke mu Empa ya Omwene. Naari vaavaa anakhalaaya va nikhuuru, asitiithi ananwerya waaleela anamwanaaya wi yaaweherye awuuluvala wi epacerye okusa yoolya aya. Nyenya muchu ti muchu mmulokoni onanwerya waakhaviherya asitiithi. Mwawiihiiha nnaphwanela omuthamalela mwaana vaavaa onapakeiye echu yoochuneya, ntoko yootakiherya, vaavaa onahuleiye mukhora ntakhara hiyo. Eyo enahaala omukhaviherya mwaana woona phaama nave enahaala omukhaviherya ohuserya wi “wookhalavo ohakalala wawaaca mu ovaha opwaha mu waakhela.”—Saweriwa T’arummwa 20:35, Tradução do Novo Mundo.

7. Yesu aamuthokoronrye hai mulopwana oohoona, nave tiheeni nnahuseryaahu orweela wa yootakiherya ya Yesu?

⁷ Nihiku nimoha, Yesu aari o Tekapole, weiwo achu “yàmuruhela mutxhu òhiwa ni òkukuma.” (Marko 7:31-35) Yesu aahimpenusa, nyenya ocai wa akina. Ntakhara heeni? Nthowa nawi mulopwana aari oohoona, akhweya owo aari awuukhuwa variyari va muloko wa achu. Yesu aahiiwexexa miyoonelo sawe, nave owo “àmukusa àyano okhwipi,” weiwo wahaariwo muchu nave aahimpenusa. Nyenya hiyo hannawerya opaka sootikhiniha, nyenya nnaphwanela wuupuwela vooloca sa soochuna ni miyoonelo sa annihu nave niwooniherye epewe. Murummwa Paulo aahirepa: “Nlipihaneke mokhwelani ni mwa miteko saphama.” (Ahebri 10:24) Yesu aahiiwexexa moonelo wa mulopwana oohoona nave aahimukhaliha mweepewe. Ela yootakiherya yaphaama wa hiyo!

8, 9. Nni nooniherye hai wi ninnaathokororya yaale ari awuuluvala ni yaale arino makacamiho eekumi? (Mvahe sootakiherya.)

⁸ Mwaathokororye awuuluvala ni yaale arino makacamiho eekumi. Echu yookhweleyaxa enooniherya muloko Weekristu ori osivela, ohiya mavyakelo. (Yohani 13:34, 35) Osivela onnaneeriha opaka soothene nnaweryaahu wi naakhaviherye anna ni arokora yaawo ari awuuluvala naari arino makacamiho eekumi wi ewerye oya mmithukumano ni olaleerya. Ninnaakhaviherya naamwi ohiri woophwanelela wa hiyo naari naamwi ehiweryaka opaka sincipale. (Mateu 13:23) Mikeli, yoowo onapharihela ekarinya, onnatepa othamalela nikhaviheryo onapakeliweiye ni emusi awe ni anna a mmulokoni mwawe. Owo oriye: “Nthowa na nikhaviheryo oothene anakivahaaya, kinnawerya ophiya mmithukumano ni olaleerya moohihiyererya. Kinnasiveliwa xaxaxa ni olaleerya wa vanlakani.”

⁹ Mu Ipeteli sincipale, aakhalamo anna ni arokora yaawo ari awuuluvala naari arino makacamiho eekumi. Atokweene oothokororya annawooniherya osivela moorweela wa opaka marehereryo ntakhara yaawo wi elaleerye orweela wa orepa ikaarata ni ompharihela telefone. Pili, yoowo orino iyaakha makhumi mathanu namararu ni iyaakha thanu nammoha sa oyariwa nave onarepa ikaarata wa achu oorakamela, ooloca: “Ninnathamalela ekari ya orepa ikaarata.” Nansi yoowo orino iyaakha waacamela makhumi mathanu namasese, ooloca: “Wa miyaano, onamoona wa orepa ikaarata tahi  pahi ohela ipapeli mpuwa mwa imvelope. Owo muteko woolaleerya. Achu annachuna osuwela eparipari!” Etel, yoowo oyariwe mu 1921, ooloca: “Woona wiiceliwa makupa a okumi aka. Mahiku makina kinnakhalano ilukuluku soovila ophiyerya ohiwerye owara ikuwo.” Naamwi hiiha, murokora ola onnapuha olaleerya ampharihelaka telefone nave ookhalano osekurya waphaama. Parpara, yoowo orino iyaakha makhumi mathanu namararu ni iyaakha thanu, onnathariha: “Nthowa na okotakota wa okumi aka, nkinawerya olaleerya moohihiyererya. Nyenya ompharihela telefone ennakikhaviherya oloca ni akina. Kinnoothamalelaani, Yehova!” Waacamela eyaakha, nikhuuru nasisapo na awuuluvala noomaliha iwora 1.228 mmuteko woolaleerya, aarepa ikaarata 6.265, aapaka olaleerya empharihelaka telefone ikwaha 2.000, nave aakawa soolaleeryiwa 6.315! Ninnaroromela wi wiilipiserya waya woomuhakalaliha vancipale Yehova!—Masiposipo 27:11.

10. Nni naakhaviherye hai annihu okumiha mphurelo wawaaca mithukumano wakhala wooweryeya?

¹⁰ Mukhale oothokororya mmithukumano Seekristu. Vaavaa nnakhalaahu oothokororya, ninnaakhaviherya annihu ophura vancipale mithukumano. Mwawihai? Mukhalelo mmoha ori ophiya mu elukuluku yoophwanelela wi nihiwuukhule. Ilukuluku ikina, ichu soohiwehereryeya sinamunilekeliha ophiya. Nyenya wakhala wi wiiliwiili ninnalekela ophiya, nnaphwanela wuupuwela mukhalelo eyo enaavolowelaaya annihu ni matorokelo nnaphwanelaahu opaka wi nooniherye wi ninnaathokororya. Muupuwele wi ti Yehova ni Mwanawe ananiwopa wi n’ye mmithukumano. (Mateu 18:20) Chiryene nnaphwanela wooniherya ncicimiho nahu ntakhara yaawo moorweela wa ophiya mu elukuluku yoophwanelela!

11. Ntakhara heeni anna anakhalano makupa mmuthukumano annaphwanela ochariha ohoolela onaphwanyeya mu 1 Korinto 14:40?

¹¹ Wakhala wi ninnaathokororya annihu, nnahaala ochariha ohoolela wa Piipiliya: “Mwereke sothene iho ni ntxitximiho ni orehererya.” (1 Korinto 14:40) Anna arino makupa mmithukumano annachariha ohoolela yoola vaavaa anakuchulaaya nikupa naya mu elukuluku  yaakaweliwaaya. Mmukhalelo yoola, awo annamuthokororya ohiya pahiru namaloca oocharela nyenyatho muloko woothene. Nkuupuwelani mukhalelo akina yaahaalaaya ovoloweliwa waakhanle wi muthukumano woolekela omala. Anna akina anahaala weeciha mukukuca naari ecika elukuluku yincipale wi ephiye veechokoni. Akina annachuna ophwanya ekaaro wi ephiye veechokoni vaya. Nave akina aakhalano oothelana ohiri Mukristu yoowo onaweherya wi ephiye veechokoni mu elukuluku yoophwanelela.

12. Ntakhara heeni atokweene annaphwanela ncicimiho ni osivela wahu? (Moone ekaaxa “ Mwaathokororye Ahooli Anyu.”)

¹² Atokweene annalapa mwakuru mmulokoni ni mmuteko woolaleerya, mwawiihiiha awo annaphwanela ncicimiho ni osivela wahu. (Mwaalakhanye 1 Tesalónika 5:12, 13.) Mweeparipari nyuwo munnathamalela soothene awo anapakaaya ntakhara nyuwo. Munanwerya opaka yeeyo moorweela wa wiilipiserya owiiwelela ni waakhaviherya, “wona wi awo annateteiwa ni minepa sanyu, nave t’arino yawakhula wa nyuwano.”—Ahebri 13:7, 17.

13. Tiheeni nnahuseryaahu orweela wa mukhalelo Yesu aakhaliheiye achu?

¹³ Mu yooloherya vooloca sa Yesu, Isaiya aahiloca: “Harwa intaka muthala wothaleya, nari harwa atxipiha muthiko ohanle vakhani otxipha.” (Isaiya 42:3) Osivela Yesu aareiyeno ntakhara achu waahimweeriha wiihela mu nipuro naya. Owo aaniiwexexa miyoonelo sa yaale yaari oovelavela ni ooceecheya ntoko “muthala wothaleya” naari ntoko “muthiko ohanle vakhani otxipha,” mwawiihiiha owo aanaakhaliha mweepewe ni moovilela. Ophiyerya anamwane yaanachuna okhala ni Yesu. (Marko 10:14) Nyenya, hannawerya owiiwexexa achu naari waahusiha hiiha ntoko Yesu! Naamwi hiiha nnanwerya wooniherya wi ninnaathokororya yaale ari mu ekulucu ahu moorweela wa mukhalelo nnalocaahu ni yaawo, elukuluku nnaasekuryaahu, ni elukuluku nnamalihaahu.

14. Ntakhara heeni ninnaphwanela wuupuwela vooloca sa mukhalelo nnalocaahu ni achu?

¹⁴ Nnaphwanela oloca hai ni achu? Amilyawu aachu olelo anakhala “ómwaryeya ni ómwalamwala” nthowa na mukhalelo woonanara wa epoliitika ni wa maroca, nave ni ahooleli a malapelo a elapo yeela. (Mateu 9:36) Ntoko yookhumelela, ancipale hanamuroromela muchu mukina nave haanono ewehereryo. Ti nthowa neni masu nnapharihelaahu ni malocelo ahu anaphwanela wooniherya wa yaawo wi naachu eepewe nave wi ninnaathokororya! Ancipale annachuna owiriyana muchaka ahu ohiya nthowa nawi ninnampharihela phaama Piipiliya, nyenya nthowa nawi ninnaathokororya yaawo mweeparipari nave ninnooniherya ncicimiho wa yaawo.

15. Makhalelo taani makina nneeraahu nikhale oothokororya ntakhara achu a ekulucu ahu?

¹⁵ Sookhalavo mikhalelo mincipale nneeraahu nikhale awaathokororya achu mu ekulucu ahu. Nnaphwanela opaka makoho mmukhalelo anooniherya epewe ni ncicimiho. Piyoneero mmoha, onarumeela mu ekulucu weiwo achu ancipale aryaaya eesara, mwawiihiiha owo onnasepa opaka makoho yaawo yaahaala  waanyeenyeiha wakhala wi hasuwenle naakhulo noophwanelela. Owo hanaakoha, “Apwanne moosuwela nsina na Muluku?” naari “Apwanne moosuwela tiheeni Omwene wa Muluku?” Ohiya yeeyo, owo onnaloca echu ntoko, “Koohuserya orweela Mpiipiliya wi Muluku ookhalano nsina nawe. Mwaanachuna wi kiwooniheeni nsina nenlo?” Meerelo yaala hanaphariheleya mmapuro oothene, nthowa nawi achu ni sookhovelela ti soohiyana. Nyenya ilukuluku soothene nnaphwanela waakhaliha achu mu ekulucu ahu, mmukhalelo weepewe ni wa ncicimiho. Wi neereno yeela, nnaphwanela waasuwela awo phaama.

16, 17. Nni nooniherye hai epewe vaavaa nnalakelelaahu (1) elukuluku ya waasekurya achu? (2) elukuluku nneeraahu nimalihe nivaanelaka ni yaawo?

¹⁶ Elukuluku taani nnaphwanelaahu waasekurya achu? Vaavaa nnalaleeryaahu empa ni empa, achu hanasuwela wi nnamphiya woona wi hiyaaniwompe. Ti yookhweleya waasekurya elukuluku eneeraaya ekhale oorehererya ovaanela. (Mateu 7:12) Ntoko yootakiherya, apwanne achu mu ekulucu anyu annasiveliwa okona elukuluku yawaaca omakuchuwelo wa esumana? Wakhala hiiha akhweya munaphwanela opacerya olaleerya muramphani, onamoona wa vanlakani, naari waasekurya achu mwaasuwenlaanyu yaawo anahaala ophwanyeya wi mvaanele.

¹⁷ Nnaphwanela olekelavo hai? Achu ancipale annatepa oweiwa, mwawiihiiha enamukhala yaphaama omaliha elukuluku vakhaani, xaxaxa woopaceryani. Ti yaphaama opaka ovaanela wawaakuveya opwaha omaliha elukuluku yincipale. (1 Korinto 9:20-23) Vaavaa achu anoonaaya wi ninniiwexexa wi awo aatepa oweiwa, anahaala oreheryeya oloca ni hiyo mu ekwaha yoocharela elukuluku nneeraahu naasekurye. Wakhala wi ninnooniherya mikhalelo seiyo sinarweela wa munepa wa Muluku, chiryene nnahaala okhala “amulapeli ni Muluku.” Ophiyerya wi Yehova onamunipharihela wi nimuhusihe muchu eparipari!—1 Korinto 3:6, 7, 9.

18. Vaavaa nnaathokororyaahu akina, mareeliho taani nnaweheryaahu waakhela?

¹⁸ Mwawiihiiha hankooni nipake soothene nnaweryaahu wi nikhale awaathokororya achu aveemusini vahu, anna ni arokora ahu, ni yaale nnaaphwanyaahu mmuteko woolaleerya. Neerano yeela, nnahaala okhalano mareeliho awaaca, hiihaano ni omwaahiyu. Hiiha ntoko Salumu 41:1, 2 onaloceiye: “Òrèriwa [naari oohakala] ti mutxhu onàkhaviherya atxhu òthoiwa nihiku na otakhaliwa wawe Apwiya anammòpola. Apwiya anammulipelela yowo, anammukhaliha vathiva, hemunyanyalà mwa esara ya amwitxana awe.”