1-2. Mwawiiwanana ni 1 Timóteo 6:20, tiheeni Timoteo annyereryiweiye?

WIILIWIILI ninnakhapelela ichu sasisapo wa akina. Ntoko yootakiherya, ninnakhapelela ikhorowa sahu opanku. Vaavaa nneeraahuno yeela ninnaroromela wi ikhorowa sahu inahaala okhapeleleya nave wi hinni n’yeleele naari wiiyiwa. Mwawiihiiha, ninniiwexexa yootaphulela ya omunnya muchu mukina echu yasisapo wi akhapelele.

² Mwaalakhanye 1 Timóteo 6:20. Murummwa Paulo aahimuupuserya Timoteo wi aahaakhela echu yasisapo—masuwelelo awaakhwanela vooloca sa yookhwela ya Muluku ntakhara achu. Yehova aahimunnyererya Timoteo ekari ya ‘olaleerya masu’ ni “muteko woolaleerya michaka yaphaama.” (2 Tim. 4:2, 5) Paulo aahimuceenyerya Timoteo okhapelela yeeyo aannyereryiweiye. Moolikana ni Timoteo, noonnyereryiwa ichu sasisapo. Ichu taani? Nave ntakhara heeni nnaphwanelaahu okhalela ichu seiyo Yehova oninnyerenryeiye?

3-4. Mathowa taani makina aneeriha iparipari sa Mpiipiliyani okhala soochuneyaxa?

³ Mooreera murima Yehova oonivahererya masuwelelo awaakhwanela vooloca sa iparipari soochuneya inaphwanyeya Mmasu awe, Piipiliya. Iparipari seiha ti soochuneya nthowa nawi sinnanihusiha mukhalelo wa okhalano onthamwene waphaama ni Yehova, nave tho, sinnathariha echu yeeyo enaruuha ohakalala weeparipari mookumini. Vaavaa nneemereryaahu ni okhala mwawiiwanana ni iparipari seiya, ninnakhala ootaphuwa mu okapuro wa mahusiheryo oowoka, ni meerelo oocapaheya.—1 Kor. 6:9-11.

⁴ Echu ekina eneeriha iparipari sa Mpiipiliyani okhala soochuneya, tiyawi Yehova onuupulula pahiru wa achu awiiyeviha  yaawo “yaalakhanyeriwe waakhela okumi woohimala.” (Saw. 13:48) Achu awiiyeviha anneemererya wi namuteko oororomeleya ni amiruku, tonanihusiha vooloca sa Piipiliya mmahiku ahu. (Mat. 11:25; 24:45) Hinaahaala owerya omwiiwexexa Piipiliya nihirivo nikhaviheryo nawe, nave hiyaavo echu yoochuneyaxa opwaha omwiiwexexa Piipiliya.—Masi. 3:13, 15.

5. Ekari taani ekina Yehova onivanheiye?

⁵ Yehova oonivaha tho ekari ya waahusiha akina eparipari vooloca sa yookhwela awe. (Mat. 24:14) Michaka saphaama nnanlaleeryaahu ti soochuneya nthowa nawi sinnaakhaviherya achu opaka makupa mu emusi ya Yehova, nave sinnaavaha ekari ya ophwanya okumi woohimala. (1 Tim. 4:16) Moohipwacha waakhanle wi ninnalaleerya vancipale naari vakhaani, ninnakhaviherya muteko woochuneyaxa yoowo oneeriwano mmahiku ahu. (1 Tim. 2:3, 4) Ncicimiho ntokweene olapa vamoha ni Muluku!—1 Kor. 3:9.

6. Echu taani yeeren’ye ni achu yahaakhapelenle ichu seiyo yaavahiwaaya?

⁶ Achu akina a mmahiku a Timoteo, hiyaathamalenle ekari yaaryaayano ya olapa vamoha ni Muluku. Nthowa nawi Tema aasiveliwa ni ichu sa elapo yeela, aahiya orumeela vamoha ni murummwa Paulo. (2 Tim. 4:10) Fuxeri ni Hermoxeni woonaru yaahi’ye olaleerya nthowa na woova wiikariwa, hiiha ntoko yeeren’yaaya ni murummwa Paulo. (2 Tim. 1:15) Himeneyo, Alexantre ni Filetu yaahikhala achu oomwareya nave yaahiya omurumeela Yehova. (1 Tim. 1:19, 20; 2 Tim. 2:16-18) Woonaru, achu oothene yaala yaahikhalano nroromelo noolipa, nave yaahiya wuupuwela wi ichu seiyo Yehova aavanheiye saari soochuneyaxa.

7. Miraakho taani Satana onaphariheleiye wi anihuwelihe?

⁷ Satana oneererya hai onihiiha ichu sasisapo seiho Yehova oninnyereryeiye? Moone miraakho mikina sa Satana. Owo onnapharihela mathatelo, isaiti TV, ixilema, iyornali, aliivuru ni irevista sa mulaponi seiho sinahaala oneeriha ohiya omurumeela Yehova. Owo onneererya oniceecheiha moorweela wa wiikariwa wi nihiye omurumeela Yehova. Satana onneererya onlekecha wi niwiriyane “masu aweeriwa miruku ihiri miruku” sa alipa oomwaryeya wi nihiye eparipari.—1 Tim. 6:20, 21.

8. Tiheeni muhusenryaanyu moorweela wa yaweereya ya munna oniichaniwa Taniyeli?

⁸ Wakhala wi hanniikasoopa nnahaala ohiya eparipari. Muthokororye yaweereya ya Taniyeli, * yoowo aasiveliwa ni axooku a nviitiyuni.  Owo oothariha: “Kaapacenrye waavonya axooku a nviitiyuni kirino iyaakha khumi. Voopacerya kaavonya axooku yaawo yaari oophwanelela. Nyenya vakhaani-vakhaani kaahipacerya waavonya axooku yaawo yaavuwiha nlala ni onamulosiwe.” Taniyeli ooloca: “Mweeparipari kaanasuwela wi axooku kaavonyaaka ni elukuluku kaamalihaaka, hiyaakaacameliha wa Yehova. Nyenya kaanaroromela wi yeeyo kaapakaaka tahi yeeyo Piipiliya onaloceiye.” Taniyeli aanamaliha iwora 15 nihiku ti nihiku aavonyaka axooku a nvitiyuni. Naahiikasoopa, mathatelo ananwerya oneeriha ohiiya eparipari. Wakhala wi ela yoheereya nnahaala oyeleela ichu sasisapo seiyo Yehova onivanheiye.

9. Mwawiiwanana ni 1 Timóteo 1:18, 19, Paulo aamulikanyinhe Timoteo naani?

⁹ Mwaalakhanye 1 Timóteo 1:18, 19. Paulo aahimulikanyiha Timoteo ni mukhoco nave aahimuceenyerya wi ‘awane ekhoco yaphaama.’ Ekhoco yeela yaphaama, hiyaari yoomwiilini nyenya yoomunepani. Mmikhalelo taani Akristu analikanaaya ni akhoco yaawo anawaniha? Makhalelo taani nnaphwanelaahu wunnuwiha ntoko akhoco Eekristu? Nnahaala othokororya ichu thanu seiho nneeraahu nihuserye orweela wa niphwanaphwaniho na Paulo. Ichu seiha sinahaala onikhaviherya okhapelela phaama eparipari.

10. Omuroromela Muluku tiheeni nave ntakhara heeni oryaaya woochuneyaxa?

¹⁰ Munnuwihe omuroromela wanyu Muluku. Mukhoco aphaama toororomeleya. Owo onnawaniha mwakuru wi amukhapelele yoowo onamusiveleiye naari echu yasisapo. Paulo aahimuceenyerya Timoteo wunnuwiha omuroromela wawe Muluku. (1 Tim. 4:7) Vaavaa osivela ni omuroromela wahu Muluku onannuwaaya, nchuno nahu na okhapelela eparipari ninnannuwa.—1 Tim. 4:8-10; 6:6.

11. Ntakhara heeni ninnaphwanela wiivyakiha?

¹¹ Mwiivyakihe wi mpake yeeyo eri yawookololowa. Mukhoco onaphwanela wiivyakiha wi akhale oorehereya owaniha. Timoteo aahititelela owaniha omunepani nthowa nawi aahichariha ekano yooveereliwa ya Paulo ya ochawa minkhela soonanara, wunnuwiha makhalelo oomuluku, ni opaka onthamwene ni Akristu akhwaawe. (2 Tim. 2:22) Wi Timoteo awerye weerano yeela, aaphwanela wiivyakiha. Nnaphwanela wiivyakiha wi nivoothe ekhoco ya minkhela sa mwiili. (Aro. 7:21-25) Mwawaaceererya, nnaphwanela wiivyakiha wi ntoroke omuchu wakhalai ni wunnuwiha makhalelo aphaama. (Éfe. 4:22, 24) Nave vaavaa nnakhalaahu oovelavela omakuchuwelo wa nihiku, onamuchuneya wiilipixerya wi niphiye mmithukumano.—Ahe. 10:24, 25.

12. Mikhalelo taani nneeraahu ninnuwihe mavyakelo a ompharihela Piipiliya?

¹² Mukhoco onaphwanela wiikhoveleliha opharihela mavaka awe. Wi akhale a mavyakelo onaphwanela opharihelaka mavaka awe moohihiyererya. Moolikana, nnaphwanela okhala a mavyakelo vaavaa nnapharihelaahu Masu a Muluku. (2 Tim. 2:15) Nnanwerya ohuserya makina a mavyakelo yaala orweela mmithukumano sahu. Nyenya wakhala wi ninnachuna waalekecha akina ni iparipari sa Mpiipiliyani, hiyaano tho nnaphwanela omuhuserya Piipiliya moohihiyererya. Nnaphwanela ompharihela Piipiliya wi nlipihe nroromelo nahu. Eyo ennavolowela sincipale ohiya pahiru omwaalakhanya Piipiliya. Eyo enavolowela wuupuwelela yeeyo naalakhannyaahu, nave tho otholathola mu soolaleeryiwa sahu wi niwerye wiiwexexa ni opharihela Soorempwa. (1 Tim. 4:13-15) Voocharela nnahaala  owerya opharihela Masu a Muluku wi naahusihe akina. Eyo enataphulela wi, honaakhwana pahiru owaalakhanyerya akina Masu a Mpiipiliyani. Nnaphwanela waakhaviherya oowiriyana ahu wiiwexexa yoorepa ni mukhalelo enaphariheleyaaya wa yaawo. Moorweela wa omuhuserya Piipiliya moohihiyererya, nnahaala wunnuwiha mavyakelo a opharihela Masu ooveereliwa a Muluku wi naahusihe akina.—2 Tim. 3:16, 17.

13. Mwawiiwanana ni Ahebri 5:14, ntakhara heeni nnaphwanelaahu okhalano masuwelelo?

¹³ Mukhaleno masuwelelo. Mukhoco onaphwanela osuwela yawoopiha enoorwa ni osepa. Hiyaano tho nnaphwanela ohuserya osuwela ichu seiho sinahaala onipahula ni osepa. (Masi. 22:3; mwaalakhanye Ahebri 5:14.) Ntoko yootakiherya, nnaphwanela othanlela mwa miruku mathatelo ni asinthamwene ahu. TV ni ixilema wiiliwiili sinnooniherya meecelo oocapaheya. Meecelo ntoko yaawo annamuhiciha Muluku nave anahaala oniruuhela epahu yeeyo nihinahaalaahu owerya osepa. Ninnasepa mathatelo ntoko yaawo nthowa nawi vakhaani-vakhaani annaceecheiha osivela wahu ntakhara Yehova.—Éfe. 5:5, 6.

14. Masuwelelo yaamukhavihenrye hai Taniyeli?

¹⁴ Taniyeli, yoowo oromoliwe woopaceryani, aahipacerya osuwela wi waavonya axooku anvitiyuni yaawo yaavuwiha nlala ni onamulosiwe naari nikacamiho. Aahipacerya otholathola mu Watchtower Library miyaha seiho saahaala omukhaviherya ovootha nikacamiho nawe. Teevi yaari yookhumelela? Owo aahiya waavonya axooku oohiphwanelela. Nave aamaliha onthamwene ni achu yaawo aavonyeiyeno. Taniyeli ooloca: “Ohiya omaliha elukuluku kaavonyaka axooku anvitiyuni, kaamaliha elukuluku ni asinthamwene a mmulokoni.” Vano, Taniyeli piyoneero ni mutokweene a mmulokoni.

15. Ntakhara heeni miyaha sawootha iryaaya sawoopiha?

¹⁵ Hiiha ntoko Timoteo, nnaphwanela osuwela yawoopiha ya miyaha sawootha seiho inarweela wa alipa oomwaryeya. (1 Tim. 4:1, 7; 2 Tim. 2:16) Ntoko yootakiherya, alipa oomwaryeya anneererya omwaryamwasa miyaha sawootha vooloca annihu naari oniruuhela minikwa vooloca sa marehereryo a Yehova. Sooleeliherya ntoko seiha sinanwerya oceecheiha nroromelo nahu.  Nnaphwanela osepa owokiwa ni sawootha seiha. Ntakhara heeni? Nthowa nawi miyaha ntoko seiha inamwaramwaxiwa ni “atxhu òpahuwa miruku, ni ahirino eparipari.” Yoolakelela aya ori ‘ovaanyihana mmasu.’ (1 Tim. 6:4, 5, BNM.) Awo anachuna wi nroromeleke sawootha saya nave naakweeke minikwa annihu.

16. Tiheeni nnaphwanelaahu osepa?

¹⁶ Mukhale ootikitheryeya. “Ntoko mukhoco aphaama a Kristu Yeesu,” Timoteo aatikitheryen’ye mmuteko woolaleerya ohiya mu waavyaavya muhakhu woomwiilini. (2 Tim. 2:3, 4) Hiiha ntoko Timoteo, hannalapa moowetha naavyavyaka muhakhu woomwiilini. “Owoka wa muhakhu” onanwerya oniyeleeliha osivela wahu ntakhara Yehova, othamalela wahu ntakhara Masu a Muluku, ni nchuno nahu na olaleerya wa akina. (Mat. 13:22) Nnaphwanela otitelela okhweiha okumi ahu nipharihelaka elukuluku ni ikuru sahu wi ‘nipacerye waavya Omwene wa Muluku.’—Mat. 6:22-25, 33.

17-18. Tiheeni nnaphwanelaahu weera wi nsepe epahu yoomunepani?

¹⁷ Mukhale ooreheryeya wi mweerevo echu mwawaakuveya. Mukhoco onniirehererya woosiilo ni osuwela echu yaweera wi iikhapelele. Wi niwerye okhapelela phaama ichu seiho Yehova oninnyereryeiye, nnaphwanela weeravo echu mwawaakuveya vaavaa nnoonaahu yawoopiha. Tiheeni enahaala onikhaviherya weerano yeeyo? Nnaphwanela wiirehererya woosiilo wi niwerye osepa yawoopiha.

¹⁸ Ntoko yootakiherya, mu saweereya ikina achu annaleeliwa vachu eneeraaya ekhumevo mwawaakuveya vaavaa enakhumelelaaya yawoopiha. Ntakhara heeni? Wi ewerye ochawa mwawaakuveya vaavaa enakhumelelaaya echu yoohiwehereryeya. Mmukhalelo woolikana, nnaphwanela wiirehererya woosiilo wi nsuwele echu yaweera vaavaa enakhumelelaaya mootutuxa eruku yeeyo enavuwiha ocapaheya, nlala, miyaha sa alipa oomwaryeya seiho sinavuwihiwa mu inteerneti, vaavaa nnoonaaha exilema naari TV. Wakhala wi nohiirehererya woosiilo ntakhara echu enahaala weererya, nnanwerya weeravo echu mwawaakuveya wi niwerye okophola mu epahu yoomunepani, nave ntitelele okhala aweela vamiithoni va Yehova.—Sal. 101:3; 1 Tim. 4:12.

19. Mareeliho taani nnahaalaahu waakhela wakhala wi nookhapelela ichu sasisapo seiho Yehova oninnyerenryeiye?

¹⁹ Nnaphwanela okhapelela ichu sasisapo seiho Yehova oninnyerenryeiye—Iparipari soochuneya sa Mpiipiliyani ni ekari ya waahusiha akina. Mu weerano hiiha nnahaala okhalano yawuupuserya ya murima yaphaama, ekumi erino yootaphulela yaphaama, ni ohakalala yoowo onarweela mu waakhaviherya akina omusuwela Yehova. Nnikhaviheryo na Yehova, nnahaala owerya okhapelela yeeyo oninnyerenryeiye.—1 Tim. 6:12, 19.