1-2. (1) Ntakhara heeni nihinakhalaahu ootikhiniheya vaavaa nnahoolelaahu makacamiho? (2) Tiheeni nnahaalaahu othokororya mmwaha yoola?

 NTOKO achu a Yehova, hannakhala ootikhiniheya vaavaa nnahoolelaahu makacamiho. Piipiliya oni: “Nnaphwanela ovolowa mu Omwene wa Muluku moorweela wa soohooxa sincipale.” (Saw. 14:22) Hiyaano noosuwela wi makacamiho ahu makina hemala moomalela ophiyerya naakhenle elapo evyaani ya Muluku weiwo ohinahaalaaya okhalawo “okhwa, naari hokhalavo tho othanana, naari wunla, naari sawiicela.”—Wup. 21:4.

² Yehova onneemererya wi nihooleleke makacamiho. Naamwi hiihaa, owo onnanikhaviherya ovilela ni yaawo. Moone yeeyo murummwa Paulo olonceiye wa Akristu yaakhala o Roma. Woopaceryani aahithariha makacamiho yaawo owo ni annawe yaahoolelaaya. Voocharela owo aahirepa: “Ninnavootha moorweela wa yoole onisivenle.” (Aro. 8:35-37) Ela enataphulela wi Yehova onanwerya onikhaviherya naamwi nihoolelaka makacamiho. Hankooni noone mukhalelo Yehova aamukhavihenryeiye Yosefe ni mukhalelo oneereiye ookhaviheryeeni.

3. Matorokelo taani yeeren’ye mwawaakuveya mu okumi wa Yosefe?

³ Yakopo ahooniherya mookwakwaleya wi anamusivela vancipale mwanawe Yosefe. (Map. 37:3, 4) Ntoko yookhumelela, anamwane atokweene a Yakopo yakhalano ehace ni munnaya. Vaavaa yaaphwanyaaya ekari, yaahimutumiha Yosefe nnikhuuru na alipa anakoso o Mitiyani. Alipa a nakoso yaala yaamukunxe Yosefe yaaheeca ikiloometru sincipale eyaaka o Yikuputu, weiwo yaamutuminhaayawo wanaawiili—nyenya mu ekwaha ela, wa Potifare mutokweene a alipa oolipelela a Farawo. Okumi wa Yosefe waahitorokeya mwawaakuveya, woona wi aari mwaana oosiveliwa a atiithi awe vano aahikhala kapuro a Muyikuputu mmoha!—Map. 39:1.

4. Mmikhalelo taani nneeraahu nihoolele makacamiho oolikana ni a Yosefe?

 ⁴ Piipiliya olonce wi “ichu soohiwehereryeya [naari soonanara] sinnaaphacuwela oothene.” (Ekl. 9:11, TNM) Hiyaano ikwaha ikina ninnahoolela makacamiho yaawo ari ‘awunlaana wa achu’—ela tiwi, makacamiho yaawo achu oothene anahoolelaaya. (1 Ako. 10:13) Naari wi nnanwerya ohooxeya pahiru nthowa na okhala oomuchara a Yesu. Ntoko yootakiherya, nnanwerya oruwaniwa, wiiciwa, ophiyerya tho wiikariwa nthowa na nroromelo nahu. (2 Tim. 3:12) Moohipwacha nikacamiho nnahoolelaahu, Yehova onanwerya onikhaviherya okhumelela phaama. Ti mwawiihai owo eenreiyeno yeela ni Yosefe?

5. Makuchuwelo taani Potifare aareiyeno vooloca sa okhumelela phaama wa Yosefe? (Mapacereryo 39:2-6)

⁵ Mwaalakhanye Mapacereryo 39:2-6, PMM. Potifare aahoona wi Yosefe aari mmiravo amavyakelo ni namalapa oowetha. Owo tho aanasuwela ntakhara heeni. Potifare aahoona wi Yehova aanamukhaviherya Yosefe mu soothene aaphareiye. b Mwawooneya, Muyikuputu yoole aamweera Yosefe namuteko awe oororomeleya. Owo tho aahimunnyererya Yosefe empa awe yoothene wi akhapeleleke. Ni yookhumelela taani? Potifare aanareela.

6. Ti mwawiihai Yosefe iisonneiye mu nikacamiho nawe?

⁶ Mwaanyiherye mukhalelo Yosefe iisonneiye. Tiheeni owo aachuneiye opwaha soothene? Apwanne aachuna wiisooneiha naari ovahiwa nchuwelo ni Potifare? Mwawooneya, Yosefe aachuna otaphuliwa wi akookele wa atiithi awe. Opwaha soothene, naamwi owo aarino mirici mincipale vaate va Potifare, Yosefe nlelo aari kapuro yoowo pwiya awe ahaamulapela Yehova. Yehova haamweerinhe Potifare omutaphula Yosefe. Nave mukhalelo wa Yosefe waahala vakhaani otepa.

7. Mmukhalelo taani makacamiho a Yosefe yaaviraaya etepaka? (Mapacereryo 39:14, 15)

⁷ Ntoko yooniheryiwaaya mu Mapacereryo 39, mwaara a Potifare aanamuchuna Yosefe nave wiiliwiili aaneererya onwoka yoowo wi akoneno. Elukuluku ti elukuluku, Yosefe aanakhooca. Wookuchulani, mwaara a Potifare aahinyeenyeya ni Yosefe nave aahimootherya wi owo aachuna okona ni yoowo.  (Mwaalakhanye Mapacereryo 39:14, 15, PMM.) Vaavaa Potifare iiwaleiye yeeyo, owo aahimvonyera Yosefe mukariposo weiwo aamalinheiyewo iyaakha. (Map. 39:19, 20) Ekariposo yaalikana ni heeni? Masu a Ehepiri Yosefe opharihenleiye wi aloca sa ‘kariposo’ enanwerya otaphulela “nikhokwe” naari “nlici,” yooniheryaka wi owo aari mu nipuro naasaren’yemo epiiphi nave aaniisoona ohikhalano ewehereryo. (Map. 40:15) Nave tho Piipiliya, onnaloca wi mu elukuluku aya Yosefe aahimakiwa meco ni mikoi nave aahiwarihiwa muxikoni nipisi na muthipo. (Sal. 105:17, 18) Makacamiho a Yosefe yaamvira etepaka. Owo aari kapuro oororomeleya, vano aahikhala mulipa oophariwa.

8. Naamwi nikacamiho ntepaka, tiheeni nnaphwanelaahu ororomela?

⁸ Apwanne munnahoolela mukhalelo woonyeenyeiha yoowo onamvira otepaka naamwi mpanke mavekelo oorweela vathi va murima? Eyo enanwerya weereya. Yehova hanaviihavo makacamiho yaawo nnahoolelaahu mu elapo yeela enalamuleliwa ni Satana. (1 Yoh. 5:19) Naamwi hiihaa, muroromele ela: Yehova onnoona soothene munahoolelaanyu, nave tho onnookhapelelaani. (Mat. 10:29-31; 1 Pet. 5:6, 7) Ohiya yeeyo, owo oororomeliha: “Nkirwa koohiya nave nkirwa koonyanyala.” (Ahe. 13:5) Yehova onanwerya wookhaviheryaani ovilela naamwi muhoolelaka makacamiho yaawo munoonaanyu wi hemala. Hankooni noone mukhalelo yeeren’yaaya ni Yosefe.

9. Tiheeni enooniherya wi Yehova aari ni Yosefe vaavaa owo aareiye mukariposo? (Mapacereryo 39:21-23)

⁹ Mwaalakhanye Mapacereryo 39:21-23, PMM. Naamwi variyari va ilukuluku sookacamiha mukariposo, Yehova aanamweeriha Yosefe okhumelela phaama. Mwawiihai? Mu elukuluku aya, Yosefe aanaroromeliwa ni ocicimihiwa ni mutokweene a ekariposo, hiihaa ntoko yeeren’yaaya ni Potifare. Mwawooneya, mutokweene a ekariposo aahimvaha Yosefe murici wa waakhapelela oophariwa akina. Mweeparipari, Piipiliya olonce wi “mutokweene a okaripooso huukhuwaru ni ichu saari mmatatani mwa Yoosefe.” Yosefe vano aahikhalano echu yooweiwano—muteko woophwanelela. Awo yaari matorokelo oohiwehereryeya! Onaweryeya hai mulipa oophariwa yoowo aalociwe wi aachuna omukoniha mwaara a mutokweene a alipa oolipelela ovahiwa murici woocicimiheya? Nrivo pahiru nthowa nimoha. Mapacereryo 39:23 onnaloca: “Apwiya [Yehova] yaari ni yoowo nave soothene eereiye Apwiya yaanreeliha.”

10. Mutharihe ntakhara heeni Yosefe akhweya isooneiye wi haakhumelela phaama mu ichu soothene.

¹⁰ Mweererye wuupuwela mukhalelo Yosefe isooneiye. Amanle wootheriwa ni owaleliwa, apwanne munoona wi owo aaniisoona wi aanakhumelela phaama mu ichu soothene? Tiheeni Yosefe aachuneiye opwaha echu eri yoothene? Apwanne owo aachuna ororomeliwa vamiithoni va mutokweene a okariposo? Mwawooneya, Yosefe aachuna otaphuliwa. Ophiyerya tho wi owo aahimveka mulipa oophariwa mukina aahala vakhaani otaphuliwa wi aloce ni Farawo mu nsina nawe wi amukumihe mukariposo. (Map. 40:14) Nyenya, mulopwana owo hamuleenle Farawo mwawaakuveya. Ntoko yookhumelela, Yosefe aahititelela okhala mu ekariposo yeele mu iyaakha piili mulopwana yoole amanle otaphuliwa. (Map. 40:23; 41:1, 14) Naamwi hiihaa, Yehova aahititelela omukhaviherya yoowo okhumelela phaama. Mwawiihai?

11. Owerya taani wa vameekhaaya Yehova aamvanheiye Yosefe, nave ti mwawiihai owo waakhavihenryaaya mu waakhwanela wa yookhwela awe?

¹¹ Vaavaa Yosefe aareiye mukariposo, Yehova aaheeriha wi mwene o Yikuputu okhalano sooloha piili sawuukhula. Farawo aari awuukhuwa  wi asuwele sootaphulela sene. Vaavaa mwene aasuwenleiye wi Yosefe aahikhalano owerya wa otaphulela sooloha, aahimwiichaniha yoowo. Nnikhaviheryo na Yehova, Yosefe aahitaphulela sooloha nave Farawo aahitikhiniheya ni ekano yoophara muteko yeeyo owo aamvanheiye. Vaavaa owo oonneiye wi Yehova aari ni mmiravo yoole, Farawo aahimuthanla Yosefe ntoko muhooleli a soolya mu Oyikuputu woothene. (Map. 41:38, 41-44) Voocharela, yaahikhalawo etala etokweene Oyikuputu ni o Kanani, elapo yeeyo amusi a Yosefe yaakhalaayawo. Yosefe vano aari oorehereryeya ovulusa emusi awe, nave eyo yaataphulela wi aanwerya okhapelela emusi yeeyo ohoolo waya aahaala okhumamo Mesiya.

12. Mmikhalelo taani Yehova aamweerinheiye Yosefe okhumelela phaama?

¹² Muupuwele vooloca sa saweereya soohiwehereryeya mu okumi wa Yosefe. Taani aamweerinhe Potifare omuroromela Yosefe, yoowo aari kapuro vyakala? Taani aamweerinhe mutokweene a okariposo omuroromela Yosefe, yoowo aari mulipa oophariwa vyakala? Taani aamweerinhe Farawo okhalano sooloha sawuukhula nave taani amvanhe Yosefe owerya wa otaphulela seiho? Taani aamweerinhe Farawo omuthanla Yosefe ntoko muhooleli a soolya Oyikuputu? (Map. 45:5) Moohikhwa minikwa, aari Yehova aamweerinhe Yosefe okhumelela phaama mu soothesene. Naamwi asinna a Yosefe yachunaka omwiipha yoowo, Yehova aahitoroka mukhalelo yoole wi aakhwaniherye yookhwela Awe.

13. Apwanne Yehova onneeravo echu mmakacamiho oothene nnahoolelaahu? Mutharihe.

¹³ Tiheeni nnahuseryaahu orweela wa yaweereya ya Yosefe? Apwanne Yehova aaheeravo echu mmikhalelo soothene owo aahooleleiye? Apwanne Yehova tonatannya makacamiho a mu okumi ahu, wi ookhalano mathowa aphaama mu ichu soothene soonanara sineereya? Hooye, Piipiliya hanahusiha moonelo yoowo. (Ekl. 8:9; 9:11) Nyenya, hiyaano noosuwela ela: Vaavaa nnahoolelaahu nikacamiho, Yehova onnoona nave onnawiriyana winla wahu ntakhara nikhaviheryo. (Sal. 34:15; 55:22; Yes. 59:1) Opwaha yeela, Yehova onanwerya onikhaviherya ovilela makacamiho. Mwawiihai?

14. Ti mwawiihai Yehova onanikhaviheryeiye mu ilukuluku sa makacamiho?

 ¹⁴ Mukhalelo mmoha Yehova onanikhaviheryeiye ori moorweela wa onivaha nihakararyo ni nlipiho, seiho wiiliwiili sinaphiya mu elukuluku yoophwanelela. (2 Ako. 1:3, 4) Ti yeeyo yeeren’ye ni Eziz, munna mmoha onakhala o Turkiministawu yoowo aathoriheliwe okhala mukariposo iyaakha piili nthowa na nroromelo nawe. Owo ooloca: “Wooxiixelo wa nihiku kaahaalaaka othorihiwa, munna mmoha aahikaalakhanyerya yoorepa ya Yesaya 30:15, TNM, yeeyo eni: ‘Ikuru sanyu ini ikhale moorweela wa otitelela okhala oomaaleleya ni okhalano nroromelo.’ Ilukuluku soothene eversikulu yeela yaahikikhaviherya otitelela okhala oomaaleleya ni omuroromela Yehova mu soothesene. Wuupuwelela eversikulu yeela waahikikhaviherya variyari va elukuluku yoothene kaaryaaka mukariposo.” Apwanne munnuupuwela vaavaa Yehova ookhavihenryeiyeni moorweela wa woovahaani nihakararyo ni nlipiho mu elukuluku yeeyo mwaachunaanyuxa?

15-16. Tiheeni muhusenryaanyu orweela wa yaweereya ya Tori?

¹⁵ Wiiliwiili, hanniiwexexa mmukhalelo Yehova onikhavihenryeiye ovilela ni makacamiho ahu ophiyerya vaavaa anamalaaya. Murokora mmoha awiichaniwa Tori onneemererya yeela. Mwanawe awiichaniwa Mason, aahiwaniha ni ereca ya kanser mu iyaakha thanu nammoha ahaakumve okhwa. Mwawiiwexexeya, Tori aahikhala oothananaxa. Owo ooloca: “Ole waari mukhalelo woovilaxa wa miyo ntoko maayi.” Owo ohaaceererya: “Kinnaroromela wi asitiithi akina enneemererya wi omoona mwanaya ahooxeyaka echu yawiicelaxa opwaha ohooxeya wa weyo mwaneene.”

¹⁶ Naamwi Tori aari oothananaxa omoona mwanawe ahooxeyaka vancipale, ohoolo waya  owo aahoona mukhalelo Yehova aamukhavihenryeiye ovilela. Owo ooloca: “Vaavaa kinuupuwelaaka vooloca sa elukuluku yeele, kinnawerya woona mukhalelo Yehova okikhavihenryeiye mu wiiceliwa woothene wa mwanaka. Ntoko yootakiherya, naamwi Mason aatempe wiiceliwa nave ahinawerya owoona achu yaamuxekurya, anna ni arokora yaanapaka mukwaha mutokweene eyaaka oxipitale. Ilukuluku soothene oxipitale weiwo mu esaala ya alipa oowehererya aanakhalawo muchu yoowo aari oorehereryeya ovahererya nikhaviheryo. Nave tho anna ni arokora yaanakhapelela soothowa sahu soomwiilini. Naamwi vaavaa waaryaaya woovilaxa, ilukuluku soothene naanakhalano seiho naachunaahu.” Yehova aahimvaha Tori ichu seiho aachuneiye wi avilele nave aaheerano emohamoha ni Mason.—Moone ekaaxa “ Yehova Aahinivaha Yeeyo Ene Naachunaahu.”

17-18. Tiheeni enahaala onikhaviherya woona ni othamalela nikhaviheryo na Yehova variyari va makacamiho? (Salmu 40:5)

¹⁷ Mwaalakhanye Salmu 40:5, PMM. Muchu yoowo onawela mwaako yoolakelela awe ori ophiya othoma wa mwaako. Nyenya, mummo onavireiyemo aakhalamo mapuro oohiyanahiyana onaphwaneleiye weemela ni opuha ichu sooreera onooneiye. Mmukhalelo woolikana, mwaavye elukuluku moohihiyererya wi mmaale ni wuupuwelela vooloca sa mukhalelo Yehova oweerinheiyeni okhumelela phaama naamwi variyari va makacamiho. Omakuchuwelo wa nihiku ti nihiku, mwiikohe: ‘Mmikhalelo taani koonnaaka mareeliho a Yehova olelo? Naamwi makacamiho ehimanle, ti mwawiihai Yehova onakikhaviheryeiye ovilela?’ Mweererye woona nimoha na mareeliho noorweela wa Yehova niweerinheeni okhumelela phaama.

¹⁸ Mweeparipari, nyuwaano akhweya munanwerya ovekela wi makacamiho anyu emale. Eyo ti yawiiwexexeya ni yoophwanelela. (Afi. 4:6) Nyenya hiyaano tho nnaphwanela woonaka mareeliho yaawo nryaahuno hiihaano. Opwaha soothene, Yehova oororomeliha onivaha ikuru nnikhaviheryo wi nivilele. Mwawiihiiha ilukuluku soothene mmuthamaleleke Yehova woona wi onnookhaviheryaani. Voocharela munahaala woona mukhalelo Yehova onookhaviheryeiyeni okhumelela phaama, naamwi variyari va ilukuluku sookacamiha, hiihaa ntoko eenreiye ni Yosefe.—Map. 41:51, 52.