Saweereya sinnooniherya wi Yesu aapacenrye okhala Mutokweene a Anamukucho amanle opatisiwa, mu eyaakha 29. Nnasuwela hai yeela? Nthowa nawi mu opatiso awe, Yesu aahiiveleela ntoko mukucho va altare mwa “okhwela” wa Muluku. Eyo enataphulela wi vaavaa aapatisiweiye, Yesu aahooniherya wi aari ooreheryeya wi apake yookhwela ya Atiithi awe, naari, oveleela okumi awe ntoko woopola. (Gal. 1:4; Ahe. 10:5-10) Altare ola oosiphela aakhanle Yesu amanle opatisiwa. Khalai altare yaari makupa oochuneyaxa mu Empa ya Muluku. Nthowa na yeeyo nnawerya oloca wi empa etokweene yoomunepani yaapacenrye vaavaa Yesu aapatisiweiye. Empa eyo enavolowela soothene Yehova opankeiye ni mathipelo a mukucho wa Yesu wi achu emulapeleke mmukhalelo waweela.— Mat. 3:16, 17; Ahe. 5:4-6.

Hiiha ntoko khalai aachuneyeiye mutokweene a anamukucho mmoha, mu empa etokweene yoomunepani aanachuneya tho namukucho mutokweene. Wi yaakhwanele yoolakelela yeela Yehova aahimuthanla Yesu ni “munepa waweela ni owerya.” (Saw. 10:37, 38; Mar. 1:9-11) Nyenya nni niroromele hai wi Yesu aathanliwe ntoko Mutokweene a Anamukucho mu opatiso awe, ahaakumve okhwa ni oviihiwa mookhwani? Yootakiherya ya Aroni ni atokweene a anamukucho akina enanwerya onikhaviherya waakhula nikoho nenla.

Nlamulo aavahiwe Mose, naaloca wi mutokweene a anamukucho aaphwanela ovolowa mu Nipuro Naweelaxa na mu tapernaakulu, nave voocharela, mu Nipuro Naweelaxa na empa ya Muluku. Ekuwo yaanakawanya nipuro Naweela ni Naweelaxa. Mutokweene a anamukucho aavolowa pahiru mu nipuro nenle mu Nihiku na Weelihiwa. (Ahe. 9:1-3, 6, 7) Aroni ni alopwana akina oororomeleya yaathanliwe wi ekhale anamukucho ehaakumve ovira “withela wa muruku wa ekuwo” ni ovolowa mu nipuro naweelaxa. Moolikana, ahaakumve okhwa, Yesu aaphwanela othanliwa ntoko Mutokweene a Anamukucho wi awerye ovira “withela wa muruku wa ekuwo, ela tiwi, mwa mwiili awe,” ni oya wirimu. Mwiili wa Yesu waari ntoko muruku, naari ekuwo. Wi aakhele okumi wirimu, wuupaceryani aaphwanela othanliwa ntoko Mutokweene a Anamukucho. (Ahe. 10:20) Nthowa na yeela, murummwa Paulo ooloca sa Yesu ariki: “Mulipa a mukucho mutokotoko . . . oovolowa mu empa etokotoko, empa-empa, yoohitekiwa ni matata a achu,” ela tiwi, “wirimu wene.”— Ahe. 9:11, 24.

Hiwaavovo ohiyana vaavaa nlakano nivyaani ‘neemereryiwaaya’ ni vaavaa naapacenryaaya. Ntakhara heeni? Vaavaa Yesu aakookenleiye wirimu ni omvaha Muluku nlivelo na okumi awe woophaameya ntakhara hiyo, owo aheerano echu emoha mwa ichu raru wi neemereryiwe nlakano nivyaani. Mikhalelo seiha miraru sinnapaceriha tho nlakano nivyaani. Nyenya ichu taani?— Gal. 3:15; Ahe. 9:18.

Yoopacerya, Yesu aahiiveleela vamiithoni va Yehova. Yanaawiili, Yesu oveleela nlivelo na mukucho awe wa Yehova. Yaneeraru, Yehova oheemererya nlivelo na nikhami n’yeehiwe ni Yesu. Ihaakumve weemereryiwa ichu seiha raru, nlakano nivyaani hinaalapa.

Piipiliya hanaloca mookwakwaleya ti liini Yehova eemerenryeiye nlivelo na mukucho wa Yesu. Nthowa na yeeyo hinnaphwanela oloca nihiku nlakano nivyaani naapacenryaaya olapa. Echu nnasuwelaahu tiyawi Yesu aakookenle wirimu, ehalaka mahiku khumi nihaakumve nihiku na Pentekoste. (Saw. 1:3) Mu elukuluku vakhaani, Yesu aahiveleela nlivelo na mukucho awe, nave Yehova aaheemererya. (Ahe. 9:12) Yawooniherya yookwakwaleya ti yeeyo yeeren’ye mu Pentekoste a eyaakha 33. (Saw. 2:1-4, 32, 33) Moohikhwa minikwa, nlakano nivyaani naapacerya olapa.

Mookwasa, nlakano nivyaani neemereryiwe nave tho naapacenrye Yehova amanle weemererya nlivelo na nikhami na Yesu. Nlakano nivyaani naapacenrye vaavaa Mulipa a Mukucho mutokotoko Yesu aakhanleiye Mulipa Awaataanyiha.— Ahe. 7:25; 8:1-3, 6; 9:13-15.