1. Ntoko yooniheriwaaya mu 3 Yohani 3, 4, tiheeni enaneeriha okhala oohakalala?

APWANNE munnaanyiherya mukhalelo murummwa Yohani aahakalanleiye vaavaa iiwaleiye wi yaale aakhavihenryeiye ohuserya eparipari yaanatitelela omurumeela Yehova moororomeleya? Awo yaanahoolela makacamiho mancipale, nave Yohani aanalapa mwakuru wi alipihe nroromelo na Akristu oororomeleya yaawo aawooneiye ntoko anaawe oomunepani. Moolikana, ninnakhala oohakalala vaavaa aniihu, moohipwacha yaakhanle oomwiilini naari oomunepani, aniiveleelaaya wa Yehova ni otitelela omurumeela yoowo.—Mwaalakhanye 3 Yohani 3, 4.

2. Teevi yaari yoolakelela ya ikaarata seiho Yohani aarempeiye?

² Mu eyaakha ya 98 E.K., Yohani akhweya aakhala o Efeso naari waacamelawo. Akhweya owo aathamenle weiwo amanle okumihiwa mukariposo o evilivili yo Patimu. Mu elukuluku ene yeele, munepa waweela wa Yehova waahimuceenyerya orepa ikaarata raru. Yoolakelela ya ikaarata seiya, yaari waaceenyerya Akristu oororomeleya okhapelela nroromelo naya mwa Yesu ni otitelela weeca mu eparipari.

3. Makoho taani nnahaalaahu waakhula?

³ Yoohani aari murummwa ookuchula okhala, nave aanuukhuwa ni ovolowela woonanara yoowo ahusiha oowoka yaapakaaya mmilokoni. * (1 Yoh. 2:18, 19, 26) Alipa oomwaryeya awo yaaloca wi yaanamusuwela Muluku, nyenya hiyiiwelela malamulo a Yehova. Hankooni nthokororye ikano sooveereliwa seiho Yohani aavahereryiweiye. Vaavaa nnathokororyaahu, nnahaala waakhula makoho mararu ala: Weeca mu eparipari onataphulela eheeni? Makacamiho taani nnahoolelaahu? Nave nni nikhaviheryane hai mukina ni mukhwaawe otitelela mu eparipari?

4. Mwawiiwanana ni 1 Yohani 2:3-6 ni 2 Yohani 4, 6, tiheeni enavolowela weeca mu eparipari?

⁴ Wi neece mu eparipari, nnaphwanelela osuwela iparipari inaphwanyeya mu Masu a Muluku, Piipiliya. Mwawaacererya, nnaphwanela ‘ochariha malamulo a [Yehova],’ neerano hiiha nnahaala omwiiwelelaka yene. (Mwaalakhanye 1 Yohani 2:3-6; 2 Yohani 4, 6.) Yesu oovaha yootakiherya yoophaameya ya omwiiwelela Yehova. Mukhalelo mmoha woochuneya wa omwiiwelela Yehova ori ochariha yootakiherya ya Yesu vakhivirukhiviru ophiyerya nnaweryelaahuvo.—Yoh. 8:29; 1 Ped. 2:21.

5. Nnaphwanela olekecheya ni eheeni?

⁵ Wi ntitelele weeca mu eparipari, nnaphwanela olekecheya wi Yehova Muluku eeparipari, navetho wi yeeyo onanleeleiye Mmasu awe, Piipiliya, ti yeeparipari. Nave nnaphwanela ororomela wi Yesu ti Mesiya yoowo aalaiheryiwe. Ancipale olelo annakhwa minikwa wi Yesu oothanliwa okhala Mwene a Omwene wa Muluku. Yohani aahilopola wi yaahikhalavo “alipa oowoka ancipale,” yaawo yaahaala waawoka yaale yahaari ooreheryeya waakiha eparipari vooloca sa Yehova ni Yesu. (2 Yoh. 7-11) Yohani oorepa: “Taani ori mulipa awootha? Tahi yoole onakhooca wi Yeesu ti Kristu?” (1 Yoh. 2:22) Mukhalelo mmoha nneeraahu nsepe owokiwa, ori moorweela wa ohuserya Masu a Muluku. Pahiru wakhala wi nooheerano yeela, nnahaala omusuwela Yehova ni Yesu. (Yoh. 17:3) Nave voocharela nnahaala olekecheya wi nookhalano eparipari.

6. Nikacamiho taani amiravo ni asimwali Eekristu anahoolelaaya?

⁶ Akristu oothene anaphwanela okhalano ekaasoope wi ehiwokiwe ni mahusiheryo aachu. (1 Yoh. 2:26) Amiravo Eekristu anaphwanela osuwela yawoopiha yeela. Alexia, * murokora yoowo ori mwali orino iyaakha 25 o Fransa ooloca: “Elukuluku kaaryaaka mwaana kaanakacamiheya ni muupuwelo wawunlaana, ntoko nihusiheryo na othatuwa ni mahusiheryo aachu. Mu elukuluku yeele, kaanasiveliwa ni makina a mahusiheryo yaala. Nyenya kaahoona wi nkaaphwanela pahiru owiriyana yeeyo kaahusihiwaaka osikola ni ohimvaha Yehova ekari wi aloce ni miyo orweela Mpiipiliya.” Alexia aamuhuserya liivuru A Vida— Qual a Sua Origem? A Evolução ou a Criação? Mu isumana vakhaani, minikwa sawe saahimmalela. Alexia  ooloca: “Kaahiwerya woona mukhataaka wi Piipiliya onaloca eparipari. Nave kaahisuwela wi okhala mwawiiwanana ni malamulo awe waahaala okiruuhela ohakalala ni murecele.”

7. Okhinyererya taani nnaphwanelaahu okhooca, nave ntakhara heeni?

⁷ Akristu oothene, amiravo, asimwali, ni awunnuwelavo anaphwanela okhooca okhinyereryiwa okhala anamphara piili. Yohani aahiloca wi hinni niwerye weecaka mu eparipari eniiha mu elukuluku emohamoha nrino meecelo oohiphwanelela. (1 Yoh. 1:6) Wakhala wi ninnachuna omuhakalaliha Yehova hiihaano ni muhoolo, nnaphwanela wuupuwela wi onnoona echu vyakala nnapakaahu. Mweeparipari, hiyaavo yoocheka yoovitheya, nthowa nawi echu eri yoothene nnapakaahu ti yawooneya wa Yehova.—Ahe. 4:13.

8. Tiheeni nnaphwanelaahu okhooca?

⁸ Nnaphwanela okhooca moonelo wa elapo vooloca sa yoocheka. Murummwa Yohani oorepa: “Naloca wi hinaanono yoocheka, nniiwoka akaneene.” (1 Yoh. 1:8) Mmahiku a Yohani, alipa oomwaryeya yaaloca wi muchu anwerya opaka yoocheka nave nlelo akhaleno onthamwene ni Muluku. Olelo nnakhala variyari va achu yaawo arino moonelo woolikana. Ancipale analoca wi annamuroromela Muluku, nyenya awo haneemererya moonelo wa Yehova vooloca sa yoocheka. Xaxaxa awo haneemererya yeeyo Yehova onaloceiye sa okonihana. Aakhalavo meerelo oohiyanahiyana a okonihana yaawo Yehova onaloceiye wi toonanara, nyenya awo analoca wi taweemereryeya wa muchu vyakala wakhala wi onnachuna weerano.

9. Amiravo ni asimwali anaphura hai moorweela wa soororomela saya inathipeleya Mpiipiliyani?

⁹ Mmukhalelo wavameekhaaya, amiravo ni asimwali Eekristu ananwerya okhinyereryiwa ni asinthamwene aya oosikola naari oomutekoni wi echariheke moonelo aya vooloca sa okonihana. Ela yaaheereya ni Aleksandar. Owo onnuupuwela: “Asimwali akina oosikola yaanakikhinyererya wi nikonihane. Awo yaaloca wi  wakhala wi nkipanke ompwana, kaaphwanela okonihanaka ni alopwana akhwaaka.” Wakhala wi munnahoolela yaweeha yoolikana, muupuwele wi vaavaa munapharelelaanyu moolipa soororomela sanyu sinathipeleya Mpiipiliyani, munnakhapelela ocicimiheya wanyu, okumi anyu waphaama, muupuwelo anyu woophwanelela, ni onthamwene anyu ni Yehova. Nave elukuluku eri yoothene munakhoocaanyu yaweeha, onamukhala wookhweya wa nyuwo opaka yeeyo eri yawookololowa. Muupuwele tho wi, moonelo yoola wawunlaana ni woonanara onarweela wa Satana. Mwawiihiiha vaavaa munakhoocaanyu wuupuwela ntoko achu amweelaponi, nyuwo ‘munnamvootha mulipa oonanara.’—1 Yoh. 2:14.

10. 1 Yohani 1:9 onanikhaviherya hai omurumeela Yehova ni yawuupuserya ya murima yaweela?

¹⁰ Noosuwela wi Yehova ookhalano ophwanelela wa olakelela teevi eri yoocheka naari ehiri yoocheka. Nave ninnapaka owetha wahu wi nihipake yoocheka. Nyenya wakhala wi noopaka yoocheka, ninnalokoha yoocheka ahu mu nivekelo. (Mwaalakhanye 1 Yohani 1:9.) Nave wakhala wi noopaka yoocheka etokotoko, ninnaavya nikhaviheryo na atokweene mmulokoni yaawo Yehova aathanlileiye wi enikhapelele. (Tiy. 5:14-16) Mwawiihiiha, hannaphwanela otitelela okhala awuukhuwa nthowa na soocheka naapankaahu khalai. Ntakhara heeni? Nthowa nawi Tiithi ahu oosivela, oovahererya mukucho wa woopola wa Mwanawe wi soocheka sahu ileveleliwe. Vaavaa Yehova onaloceiye wi onahaala omulevelela namacheka yoowo ocharunwe, owo onneerano chiryene. Mwawiihiiha hiyaavo echu enahaala onihiiha omurumeela Yehova ni yawuupuserya ya murima yaweela.—1 Yoh. 2:1, 2, 12; 3:19, 20.

11. Nni nikhapelele hai muupuwelo ahu wa mahusiheryo yaawo anahaala opahula nroromelo nahu?

¹¹ Nnaphwanela okhooca mahusiheryo aalipa oomwaryeya. Ovinyerya omapacereryo wa muloko Weekristu, Musaserya onnaapharihela alipa oowoka ancipale wi eruuhele minikwa  mmuupuweloni mwa alapeli ororomeleya a Muluku. Mwawiihiiha, nnaphwanela osuwela ohiyaniha teevi eri yeeparipari ni yawootha. * Amwiicani ahu ananwerya ompharihela interneti wi yeererye oceecheiha omuroromela wahu Yehova ni waasivela wahu anna ni arokora. Muheemererye sawootha iho, woona wi inarweela wa Satana!—1 Yoh. 4:1, 6; Wup. 12:9.

12. Ntakhara heeni nnaphwanelaahu olipiha nroromelo nahu mu iparipari seiho nihusenryaahu?

¹² Wi nikhooce saweeha sa Satana, nnaphwanela olipiha nroromelo nahu mwa Yesu ni mukhalelo Yehova onamphariheleiye wi aakhwaniherye yoolakelela awe. Nnaphwanelatho omuroromela pahiru Namuteko oororomeleya ni amiruku yoowo Yehova onamphariheleiye olelo. (Mat. 24:45-47) Ninnalipiha nroromelo nahu moorweela wa ohuserya Masu a Muluku. Neerano hiiha nroromelo nahu nnahaala okhala ntoko mwiri yoowo othipelen’ye moolipa vacheyani. Paulo aahiloca echu yoolikana vaavaa aarepenleiye ekaarata mmuloko wo Kolosi. Owo ooloca: “Ntoko mmwaakhenlaanyu Yeesu ori Kristu, Apwiya, mweeceke mwa yoowo, othipeleya ni otikitheryeya mwa yoowo, olipihiwa mu nroromelo.” (Kol. 2:6, 7) Wakhala wi ninnalapa moowetha wi nlipihe nroromelo nahu, honi okhale wooweryeya wa Satana naari akhaviheryi awe onimaaliha weeca mu eparipari.—2 Yoh. 8, 9.

13. Tiheeni nnaphwanelaahu owehererya, nave ntakhara heeni?

¹³ Nnaphwanela owehererya wiiciwa ni elapo yeela. (1 Yoh. 3:13) Yohani onnanuupuserya wi “elapo ya vathi yoothene enuupela wa mulipa oonanara.” (1 Yoh. 5:19) Vaavaa elapo ela enaacamelaaya omakuchuwelo, owali wa Satana onamvira waaceereryeyaka. (Wup. 12:12) Owo onnapharihela mikhalelo mincipale soovitheya wi anihiphele, ntoko muraakho wa ocapaheya naari sawootha sa alipa oomwaryeya. Owo tho onnapharihela mikhalelo sawooneya ntoko wiikara woopwaha mphimo. Satana oosuwela wi ohanleno elukuluku yavakhaani wi eererye omaaliha muteko woolaleerya ni opahula nroromelo nahu. Ela henantikhiniha vaavaa nnoonaahu muteko ahu ohiiheryiwaka naari okhwatiihiwa mu ilapo sincipale. Naamwiihiiha, anna ni arokora ahu a ilapo seiha annavilela. Awo annooniherya wi moohipwacha yeeyo mutakhali onaneereleiye, nnanwerya ovootha!

14. Tuuvi ori mukhalelo nneeraahu naakhaviherye anna ni arokora ahu wi etitelele weeca mu eparipari?

¹⁴ Wi naakhaviherye anna ni arokora ahu otitelela weeca mu eparipari, nnaphwanela wooniherya niphwanya. (1 Yoh. 3:10, 11, 16-18) Nnaphwanela okhaviheryana mukina ni mukhwaawe ohiya pahiru vaavaa ichu inaneecelaaya phaama nyenya tho vaavaa makacamiho anakhumelelaaya. Ntoko yootakiherya, apwanne moomusuwela muchu yoowo omuyelenle oosiveliwa awe mookhwani nave onachuna ohakararyiwa naari okhaviheryiwa mmikhalelo sawooneya? Naari apwanne mohiiwa wi aakhalavo akhwiinyu a munroromeloni yaawo anahooxeya nthowa na oyeleela ichu saya nthowa na epahu ya maphacuwelo, nave enachuna okhaviheryiwa wi Ipa saya sa Omwene naari sawaya itekiwe wanaawiili? Ninnooniherya osivela wahu wawiiseela ni niphwanya wa anna ni arokora ahu ohiya pahiru orweela mwa yeeyo nnalocaahu, nyenya echu yoochuneyaxa, ori orweela mwa yeeyo nnapakaahu.

15. Hiiha ntoko elociwaaya mu 1 Yohani 4:7, 8, tiheeni nnaphwanelaahu opaka?

¹⁵ Ninnamutakiherya Tiithi ahu oosivela awirimu vaavaa nnooniheryaahu osivela wa mukina ni mukhwaawe. (Mwaalakhanye 1 Yohani 4:7, 8.) Mukhalelo mmoha nnooniheryaahu  osivela ori moorweela wa olevelelana mukina ni mukhwaawe. Ntoko yootakiherya, muchu onanwerya onnyeenyeiha nyenya aniveke nikhurumuwelo. Ninnooniherya osivela orweela mwa ocuwala yoocheka onipakenleiye. (Kol. 3:13) Munna oniichaniwa Aldo aahihoolela yaweeha yeela vaavaa aamwiwaleiye munna yoowo aamucicimiheiye alocaka masu oonyemula vooloca sa achu a nloko nawe. Aldo ooloca: “Kaahivekela wa Yehova moohihiyererya wi akikhaviherye ohikhalano moonelo woohiphwanelela vooloca sa munna ole.” Nyenya Aldo aahipaka echu ekina. Owo aahimveka munna ole wi ekhume vamoha mmuteko woolaleerya. Vaavaa yaalapaaya vamoha mmuteko woolaleerya, Aldo aahimutharihela munna ole mukhalelo masu ale yaamuukhunlaaya. Aldo ooloca: “Vaavaa munna ole onneiye mukhalelo masu awe yaakuukhunlaaya, aakiveka nikhurumuwelo. Orweela mmukhalelo aaloceiye, kaahoona ophiyerya mweeryo taani aareiyeno ekeerelani nthowa na yeeyo aalonceiye. Evinre yeela, naahikhala asinthamwene wanaawiili nave naahicuwala nikacamiho nle.”

16-17. Tiheeni nnaphwanelaahu olakelela opaka?

¹⁶ Murummwa Yohani aanaasivela vancipale annawe nave aachuna wi awo ekhaleno nroromelo noolipa. Osivela ni wuukhuwa wawe ohooniherya mookwakwaleya mu ikano ovanheiye mu ikaarata sawe raru. Ti yoohakalaliha osuwela wi alopwana ni athiyana, ntoko Yohani, aathanliwa ni munepa waweela wi yalamulele vamoha ni Kristu!—1 Yoh. 2:27.

¹⁷ Nnaphwanela okhapelela vamurimani ikano nivahiwaahu mmwaha yoola. Hankooni nikhale oolakelela weeca mu eparipari, omwiiwelela Yehova mmikhalelo soothene mookumini mwahu. Muhuseryeke masu awe, ni ororomela yaawo. Mulipihe nroromelo nanyu mwa Yesu. Mukhooce mahusiheryo aachu ni aalipa oomwaryeya. Mukhooce okhinyereryiwa okhala anamphara piili, ni oheemererya opaka yoocheka. Mukhaleke mwawiiwanana ni malamulo avasulu a Yehova. Nave hankooni naakhaviherye anna ni arokora ahu otitelela weeca mu eparipari orweela mwa waakhurumuwela yaale annyeenyeihale ni waakhaviherya oothoiwa. Neerano hiiha, moohipwacha nikacamiho nnahaalaahu ohoolela, nnahaala otitelela weecaka mu eparipari.