1. Ntakhara heeni alapeli a Yehova ilukuluku ikina anniisoona omeekha?

ANCIPALE a hiyo ninniisoona omeekha mu ilukuluku ikina. Wa akina muupuwelo yoola honatitelela mu elukuluku yincipale. Nyenya wa akina, onnatitelela mu elukuluku yincipale. Nnanwerya wiisoona omeekha naamwi nri veeri va achu. Wa akina onnakhala woovila waapaka asinthamwene mmuloko muvyaani. Akina anakhuma mu emusi yeeyo yaakhovelenlaaya opaka ichu vamoha nyenya vano anniisoona omeekha vaavaa ahinamalihaaya elukuluku ni yaawo. Ophiyerya wi akina aamuyeleela nthamwene aya oosiveliwa mookhwani. Nave Akristu akina, xaxaxa yaale ahusenrye eparipari hiihaanoru, anniisoona omeekha vaavaa anahoolelaaya wiiciwa ni wiikariwa orweela wa amusi oohiroromela ni asinthamwene aya akhalai.

2. Makoho taani nnahaalaahu waakhula mmwaha yoola?

² Yehova oosuwela nave onniiwexexa echu eri yoothene vooloca sa hiyo. Vaavaa nniisoonaahu omeekha, owo onnasuwela mukhalelo nniisoonaahu, nave onnachuna onikhaviherya ovootha muupuwelo yoowo. Ti mwawiihai Yehova onanikhaviheryeiye? Tiheeni nnaphwanelaahu weera wi niikhaviherye? Nave nni naakhaviherye hai akina mmulokoni yaawo aniisoona omeekha? Hankooni nthokororye maakhulo a makoho yaala.

3. Ti mwawiihai Yehova oonihenryeiye wi aanampwacha Eliya?

³ Yehova onachuna wi alapeli awe oothene ekhaleke oohakalala. Owo ori vakhiviru ni mmoha ti mmoha a hiyo nave onniiwexexa vaavaa nnakhalaahu awuukhuwa ni ooceecheya. (Sal. 145:18, 19) Moone mukhalelo Yehova oonihenryeiye wi aanampwacha  vancipale mulipa a miririmu awe Eliya. Mulopwana yoola oororomeleya aakhanle mu elukuluku yoovila ya miyaha sa Aisarayeli. Alapeli a Yehova mu elukuluku yeele yaanahoolela wiikariwa otokweene, nave xaxaxa Eliya taachuna wiiphiwa ni amwiicani oowerya a Yehova. (1 Mam. 19:1, 2) Opwaha yeeyo, Eliya uupuwela wi aahanle mukhateiye ntoko mulipa a miririmu a Yehova. Eyo yaanatepa omuceecheiha vancipale. (1 Mam. 19:10) Muluku aaheeravo echu mwawaakuveya wi amukhaviherye Eliya. Yehova aahimurumiha munkeelo wi amuroromelihe mulipa a miririmu awe wi owo haari meekheiye—Aisarayeli akina nlelo yaanamurumeela Muluku moororomeleya!—1 Mam. 19:5, 18.

4. Ti mwawiihai Marko 10:29, 30 onooniheryeiye wi Yehova onnaapwacha alapeli awe yaawo aniisoona omeekha?

⁴ Yehova onniiwexexa wi vaavaa naathanlilaahu omurumeela yoowo, akina a hiyo naahiya ichu ikina muculi. Akhweya nooyeleela nikhaviheryo na amusi ni asinthamwene ahu akhalai yaawo ahiri Akristu. Akhweya mwa wuukhuwa, murummwa Pedro aamukoha Yesu mu ekwaha emoha: “Hiyo noohiya soothene, nnoocharaani, nnaya waakhelani?” (Mat. 19:27) Mmukhalelo woosivela, Yesu aahaaroromeliha oohuserya awe wi muloko waahaala okhala emusi wa yaawo. (Mwaalakhanye Marko 10:29, 30.) Nyenya Yehova, Tiithi ahu a wirimu, oolaiherya wi onahaala waakhaviherya yaale anachuna omurumeela yoowo. (Sal. 9:10) Hankooni nthokororye ichu ikina soophara muteko seiho nnaphwanelaahu weera vaavaa nnawanihaahu ni muupuwelo wa wiisoona omeekha.

5. Ntakhara heeni ti yaphaama otikitheryeya mmukhalelo Yehova onookhaviheryeiyeni?

⁵ Mutikitheryeye mmukhalelo Yehova onookhaviheryeiyeni. (Sal. 55:22) Mweerano yeela munahaala owerya okhalano moonelo woophimelela vooloca sa mukhalelo anyu. Murokora awiichaniwa Carol, * yoowo ori muciye nave ari mukhateiye mu eparipari, ooloca: “Oweha muculi ni wuupuwelela mukhalelo Yehova okikhavihenryeiye mu ilukuluku soovila, ennakeeriha olekecheya wi nkiri mukhataaka nave wi Yehova ilukuluku soothene onahaala okhala mmakupa aka.”

6. Ti mwawiihai 1 Pedro 5:9, 10 oneereiye aakhaviherye yaale anawaniha ni muupuwelo wa omeekha?

 ⁶ Muupuwele mukhalelo Yehova onaakhaviheryeiye anna yaawo aniisoona omeekha. (Mwaalakhanye 1 Pedro 5:9, 10.) Hiroshi, munna mmoha yoowo onamurumeela Yehova mu elukuluku yincipale mukhateiye mu emusi awe, ooloca: “Mmulokoni, ti wookhweya wiiwexexa wi haavo ori oophaameya. Osuwela wi achu oothene anamwiilipixerya wi epake owetha waya ntakhara Yehova, onanwerya waalipiha yaale aniisoona okhala mukhataaya mu eparipari ntoko miyo.”

7. Ti mwawiihai nivekelo nneeraaya nookhaviheryeeni?

⁷ Mukhaleno yookhovelela yaphaama ya opaka ichu soomunepani. Eyo enaphitaanyerya oloca ni Yehova mooluluwanya vooloca sa yeeyo enawuukhulaani. (1 Ped. 5:7) Moone yeeyo murokora mmoha awiichaniwa Massiel olonceiye: “Echu emoha yaakikhavihenrye owaniha ni muupuwelo wa omeekha waari ovekela wa Yehova ni murima aka woothene. Yehova aari ntoko Tiithi aka eeparipari. Kaanavekela wa yoowo mahiku oothene, ikwaha sincipale vanihikuni, kimuleelaka mukhalelo kiisoonaaka.”

8. Ti mwawiihai waalakhanya Masu a Muluku ni wuupuwelela yaawo onookhaviheryayaani?

⁸ Mwaalakhanye Masu a Muluku moohihiyererya, ni wuupuwelela saweereya sa Mpiipiliyani sooluluwanya seiho inooniherya mukhalelo Yehova onoosiveleiyeeni. Bianca, murokora mmoha yoowo onavilela ni masu ooceecheiha orweela wa emusi awe, onnathariha: “Waalakhanya saweereya sa Mpiipiliyani ni miyaha sa okumi wa alapeli a Yehova yaawo yaahoolenle makacamiho ntoko awaka ni wuupuwelela seiho, wookikhaviherya vancipale.” Akristu akina anniikhoveleliha soorepa sa Mpiipiliyani xaxaxa seiho siri soohakararya, ntoko Salumu 27:10 ni Isaiya 41:10. Akina annoona wi owiriyana waalakhanyiwa wa Piipiliya wookaravaariwa ni soolaleeryiwa seiho inathokororyiwa mmithukumano onnaakhaviherya ohiisoona omeekha.

9. Ntakhara heeni ohicompela mithukumano ti yaphaama wa nyuwaano?

⁹ Mpake owetha wanyu wi mphiyeke mmithukumano moohihiyererya. Nyuwaano munahaala olipiheya ni mithukumano nave munahaala waasuwela phaama anna ni arokora. (Ahe. 10:24, 25) Massiel, yoowo olociwe woopaceryani, ooloca: “Naamwi kiri awuuliwa muru, kaalakelela ophiyaka mmithukumano soothene ni ovaha maakhulo. Eyo yaakikhaviherya woona wi kinnapaka makupa a muloko.”

10. Ntakhara heeni oryaaya woochuneya okhala asinthamwene a Annihu mmulokoni?

¹⁰ Mpake onthamwene ni anna ni arokora a mmulokoni. Mweererye opaka onthamwene ni anna ni arokora a mmulokoni yaawo ari sootakiherya saphaama. Awo ananwerya okhala ooyeveelavo naari awunnuwelavo ohiyana ni nyuwo naari ananwerya okhalano sookhovelela soohiyana  ni sawinyu. Piipiliya annanuupuxerya wi “awuuluvala t’amiruku.” (Yobi 12:12, BNM) Nyenya awunnuwelavo tho ananwerya ohuserya vancipale orweela wa anaamiravo a mmulokoni. Tavite aari ooyeveelavo ohiyana ni Yonata, nyenya eyo hiyaahinhe okhala asinthamwene aphaama. (1 Sam. 18:1) Awo yaahikhaviheryana mukina ni mukhwaawe otitelela omurumeela Yehova moohipwacha makacamiho matokweene. (1 Sam. 23:16-18) Irina, murokora yoowo ori meekheiye mu eparipari mu emusi awe, ooloca: “Anna ni arokora ahu a mmulokoni ananwerya okhala asitiithi ni annihu. Yehova onanwerya oweeriha awo okhala emusi yeeyo nnachunaahu.”

11. Tiheeni munaphwanelaanyu weera wi mukhaleno asinthamwene awaacameleya?

¹¹ Onanwerya okhala woovila waapaka asinthamwene avyaani, xaxaxa wakhala wi mwa muchu awuuliwa muru. Ratna, murokora awuuliwa muru yoowo ahusenrye eparipari naamwi aakaahiwaka, onnuupuwela: “Miyaano kaaphwanela weemererya wi kaanachuna nikhaviheryo na emusi aka yoomunepani.” Onanwerya okhala woovila oloca moonelo anyu ni muchu mukina, nyenya okhala ootaphuwa oloca, mapacereryo a onthamwene waphaama. Asinthamwene anyu annachuna wooceenyeryaani ni wookhaviheryaani, nyenya nyuwaano munaphwanela waaleela wi awo esuwele echu yaweera.

12. Muteko woolaleerya oni onikhaviherye hai waapaka asinthamwene aphaama?

¹² Mukhalelo mmoha waphaama wa waapaka asinthamwene ori olapaka vamoha mmuteko woolaleerya ni Akristu akina oororomeleya a Yehova. Carol, yoowo oromoliwe woopaceryani, ooloca: “Olapa mmuteko woolaleerya ni miteko mikina soomunepani vamoha ni arokora a mmulokoni yookikhaviherya waapaka asinthamwene aphaama. Moovira wa iyaakha, waari moorweela wa asinthamwene yaala Yehova okikhavihenryeiye.” Mweeparipari, wiilipixerya woothene nnapakaahu wi nikhale asinthamwene a akapuro a Yehova onnakumiherya mphurelo. Yehova onnaapharihela asinthamwene yaala wi enikhaviherye owaniha ni moonelo wawuukhula, ntoko wiisoona omeekha.—Masi. 17:17.

13. Murici taani oothene mmulokoni aryaayano?

¹³ Oothene mmulokoni aakhalano murici wa okhaviherya wi muloko okhale nipuro na osivela ni murecele mummo muchu ohinaphwaneleiye wiisoona omeekha. (Yoh. 13:35) Masu ni saweera sahu inanwerya chiryene otoroka okumi wa muchu! Moone yeeyo murokora olonceiye: “Vaavaa kaahusenryaaka eparipari, muloko waakhala emusi aka. Miyaano nki kiwerye okhala Namoona a Yehova nihirivo nikhaviheryo naya.” Muni mmukhaviherye hai muchu yoowo ori mukhateiye mweeparipari wiisoona wi onnapaka makupa a muloko?

14. Tiheeni munaphwanelaanyu weera wi mpake onthamwene ni avyaani?

¹⁴ Mukhale oopacerya opaka onthamwene ni avyaani. Nnanwerya opacerya moorweela wa owaakhela phaama avyaani yaawo anaphiya mmulokoni. (Aro. 15:7) Eparipari wi onnachuneya opaka sincipale ohiya pahiru oloca wi: “Mooni, mooxeliwa?” Moovira wa elukuluku, nnachuna okhala asinthamwene aya aphaama. Mwawiihiiha mukhale ooreera murima nave mooniherye wi munnaapwacha mweeparipari yaawo ari avyaani. Mweererye wiiwexexa makacamiho anakumanaayano, nyenya mucicimihe ichu saya sookhuweya. Muupuwele wi wa akina onamukhala woovila oloca miyoonelo saya. Mwawiihiiha mukhaleno ephoole wi muhaakhinyererye weerano yeeyo. Wi musuwele mukhalelo aniisoonaaya, mwaapakele makoho mooreera murima ni moopwacha, nave muwiriyaneke maakhulo aya moopisa murima. Nikoho naphaama akhweya nnanwerya okhala nawi: “Muhusenrye hai eparipari?”

15. Ti mwawiihai anna yaawo ari amavyakelo aneeraaya yaakhaviherye akina mmulokoni?

 ¹⁵ Vaavaa anna amavyakelo, xaxaxa atokweene a mmulokoni, anooniheryaaya opwacha wa akina, muloko woothene onnakhala woolipa. Melissa, yoowo ophwiiwale mweeparipari ni amamaawe, onnathariha: “Nkinawerya othariha mukhalelo kinaathamalelaaka anna, yaawo moovira wa iyaakha, yaari ntoko asitiithi aka. Awo yaanuukhuwa nave yaanamaliha elukuluku ni miyaano. Ilukuluku soothene vaavaa kaachunaaka oloca kaanasuwela wi awo yaahaala okiwiriyana.” Mauricio, mmiravo yoowo isoonne omeekha vaavaa muhusiha awe aahin’yeiye eparipari, ooloca: “Atokweene a mmulokoni yaahooniherya wi yaanakipwacha nave eyo yaakikhaviherya vancipale. Ilukuluku soothene awo yaanachekula ni miyaano. Awo tho yaanalapa ni miyaano mmuteko woolaleerya, yaanakileela ipontu soochuneya seiho yaahusenryaaya mu yoohuserya aya ya muchu mukhateiye nave ophiyerya wi yaanathata ni miyaano.” Melissa ni Mauricio, olelo awo annamurumeela Yehova mmuteko wa elukuluku yoothene.

16-17. Nni niwerye hai opharihela meerelo oophwanelela wi naakhaviherye akina?

¹⁶ Mvahererye nikhaviheryo noophara muteko. (Gal. 6:10) Leo, yoowo onarumeela ocai ni emusi awe, ooloca: “Mweeparipari, echu muchu onachuneiyexa ori woona mukhalelo wooreera murima yoowo onaphiya mu elukuluku yoophwanelela. Miyaano kinnuupuwela nihiku nenlo kaampankaaka asitenti ni ekaaro. Vaavaa kaaphin’yaaka owaani, kaatepa wuukhuwa. Nyenya mu elukuluku yeele mutheli mmoha aakiwopa wi nalye vamoha. Nkinuupuwela echu naalyilaahu, nyenya nkinacuwala mukhalelo awo yaakiwiriyannaaya moopwacha. Voocharela, kaakhala phaama!”

¹⁷ Oothene ahu ninnasiveliwano mithukumano mitokweene, ntoko sa ekulucu ni sa muceche. Mu ilukuluku seiha, nnanwerya okhala vamoha ni annihu ni ochekula vooloca sa yeeyo nihusenryaahu mu miyaha iperekhiwe. Nyenya moone yeeyo Carol, oromoliwe woopaceryani, olonceiye: “Mithukumano sa ekulucu ni sa muceche saari ilukuluku soovilaxa wa miyaano.” Ntakhara heeni? Owo ooloca: “Eparipari wi kaarukureryiwe ni masana naari macikhwi a anna, nyenya owoona achu oothene eri ni imusi saya hiyaari echu yookhweya wa miyaano. Saari ilukuluku seiha kiisoonaakaxa omeekha.” Akina annoona okhala woovila ophiya mu saweereya ntoko seiha emanle omuyeleela oothelana aya. Moomusuwela muchu onahoolela makacamiho si yaala? Munoona hai onwopa wi aphiye va muthukumano  wa ekulucu ni wa muceche onacharela vamoha ni emusi anyu?

18. Vaavaa nnawaakhelaahu aleco, nni nimpharihele hai 2 Korinto 6:11-13?

¹⁸ Mmaliheke elukuluku ni yaawo. Mweererye omalihaka elukuluku ni anna ni arokora oohiyanahiyana, xaxaxa yaale aniisoona omeekha. Nnachuna ‘otaphula murima ahu’, xaxaxa wa anna ni arokora yaala. (Mwaalakhanye 2 Korinto 6:11-13.) Melissa, oromoliwe woopaceryani, onnuupuwela: “Ilukuluku soothene waari woohakalaliha wa hiyaano vaavaa anna yaaniwopaaya wi n’ye owannyaya naari opaka mikwaha vamoha ni amusi aya.” Apwanne munnamuupuwela munna a muloko anyu yoowo munaphwanelaanyu onwopela owannyu?

19. Mu saweereya taani soochuneya nnaphwanelaahu omalihaka elukuluku ni annihu?

¹⁹ Mu ilukuluku ikina, annihu anahaala ochuna okhala vamoha ni hiyaano. Ntoko yootakiherya, mmahiku makina a ifesta nnanwerya okhala nikacamiho wa yaawo okhala vamoha ni amusi aya oohiroromela. Akina, akhweya enanwerya okhala oothananaxa vaavaa nnaphiyaaya nihiku na omuupuwelela mmusi aya yoowo akhwile. Vaava nniivahaahu okhala vamoha ni annihu mu ilukuluku seiha soovila, ninnooniherya wi ninnaapwacha awo “mweeparipari.”—Fil. 2:20.

20. Ti mwawiihai masu a Yesu anaphwanyeya mu Mateu 12:48-50 eneeraaya enikhaviherye vaavaa nniisoonaahu omeekha?

²⁰ Ntoko nonnaahu, aakhalavo mathowa mancipale yaawo anaweeriha Akristu wiisoona omeekha mu ikwaha ikina. Nyenya hannaphwanela ocuwala wi Yehova onniiwexexa phaama mukhalelo nniisoonaahu. Ohiya yeeyo, owo onnanivaha nikhaviheryo nenlo nnachunaahu, mmikhalelo mincipale moorweela wa Annihu a munroromeloni. (Mwaalakhanye Mateu 12:48-50.) Nave wi nooniherye wa Yehova wi ninnamuthamalela ntakhara muloko, nnaphwanela opaka owetha wahu wi nikhaviherye emusi ahu yoomunepani. Moohipwacha mukhalelo muniisoonaanyu mu ilukuluku ikina, nyuwaano hamuri mukhatiinyu. Yehova ilukuluku soothene ori mmakupa anyu!