1. Ntakhara heeni nnanwerya omulikanyiha Satana ni mulipa oosaya?

MULIPA oosaya onachuna ophara enama naari wiipha. Owo onanwerya opharihela miraakho soohiyanahiyana naari milapa, ophiyerya tho wi mmoha a asinthamwene oowoka a Yupu aahisuwela yeeyo. (Yobi 18:8-10) Ti mwawiihai mulipa oosaya onawokeleiye enama wi eye va muraakhoni? Owo onnavareryela phaama enama ti enama. Tuuvi ori mwinla aya? Tiheeni enasiveliwaayano? Muraakho taani onahaala okhala woophwanelela opharano? Satana ori ntoko namasaya yoola. Owo onnanihuserya. Owo onnoona meecelo ahu nave onnasuwela ichu sinansivela. Voocharela owo onnareya muraakho yoowo onooneiye wi onahaala oniheya elukuluku yeeyo nihinawehereryaahu. Nyenya, Piipiliya onnanleela wi wakhala wi nooheiwa, nnanwerya okophola. Owo tho onnanihusiha mukhalelo wa osepa miraakho seiha soothene.

2. Miraakho taani miili seiho sinakhumelela phaama wa Satana?

² Ichu piili sinakhumelela phaama wa Satana ori wiirumiha ni nrima. * Mu iyaakha sincipale, Satana onnakhumelela phaama mu opharihela miraakho seiha. Owo ori ntoko mulipa oosaya ipalame yoowo onakuha echu va muraakhoni naari vamulapani. (Sal. 91:3) Nyenya hiyaano hannaphwanela oheiwa ni Satana. Ntakhara heeni? Nthowa nawi Yehova onnanooniherya miraakho seiho Satana onaphariheleiye.—2 Kor. 2:11.

3. Ntakhara heeni Yehova aaphitaanyerya sootakiherya seeparipari Mpiipiliyani?

³ Yehova onnanihusiha mukhalelo nrima ni wiirumiha siraaya sawoopiha moorweela wa onileela wa yeeyo yeeren’ye ni akapuro akina, mwawiihiiha nnanwerya osepa opaka soohesa imohamoha. Nnahaala woona mukhalelo Satana aawenryeiye waaheya achu  yaawo yaamurumeela Yehova mu ilukuluku sincipale. Apwanne ela enataphulela wi hinni niwerye osepa okhala awiirumiha ni a nrima? Hooye. Yehova aaphitaanyerya sootakiherya seiha Mpiipiliyani “wi sinlopole.” (1 Kor. 10:11) Owo oosuwela wi hiyaano nnanwerya ohuserya orweela wa sootakiherya seiha soolopola ni osepa naari okophola orweela wa miraakho seiha sa Satana.

4. Tiheeni enahaala weereya wakhala wi naachu a wiirumiha?

⁴ Satana onachuna wi ninnuwihe mukhalelo wa wiirumiha woohiphwanelela. Owo oosuwela wi wakhala wi noheemererya wiirumiha woohiphwanelela onivolowele, nnahaala okhala ntoko yene nave nnahaala oyeleela ekumi yoohimala. (Masi. 16:18) Mwawiiwanana ni yeela murummwa Paulo aalopola wi muchu onanwerya ‘wiikusererya nave aakhele ekoyi emohamoha aakhenleiye Satana.’ (1 Tim. 3:6, 7, BNM) Ela enanwerya weereya wa mmoha ti mmoha a hiyo, moohipwacha naari avyaani mweeparipari naari waakhanle ninnamurumeela Yehova mu iyaakha sincipale.

5. Mwawiiwanana ni Eklesiyaste 7:16, 20, ti mwawiihai muchu onooniheryeiye wi tawiirumiha?

⁵ Wiirumiha mukhalelo wa wiicicimiha muchu mukhateiye. Satana onneererya oneeriha wi niisuupuweleleke mukhatiihu omuhiya Yehova, xaxaxa vaavaa nnakumanaahuno makacamiho. Ntoko yootakiherya, apwanne mohintoko wootheriwa? Naari mohintoko okhalihiwa moohookololowa? Satana aahaala osiveliwa owoonaani mmuruwanaka Yehova naari anninyu. Nave Musaserya onachuna wi muupuweleke wi pahiru mukhalelo wa orehererya makacamiho anyu ori weera ichu mmoonelo anyu ohiya ochariha ohoolela yoowo Yehova onavahereryeiye Mmasu awe.—Mwaalakhanye Eklesiyaste 7:16, 20.

6. Tiheeni nnahuseryaahu orweela wa yaweereya ya murokora o Olanta?

⁶ Muthokororye yaweereya ya murokora mmoha onakhala o Olanta yoowo aanyeenyeya nthowa na ohiphaameya wa akina. Owo aalakelela wi haahaala ochekulaka ni achu yaale. Owo ooloca, “Kaaniisoona omeekha nave nkaawerya otoroka moonelo aka. Kaahaaleela aiyaka wi nthaamele muloko mukina.” Voocharela  owo aamoona JW Broadcasting a mweeri wa Marsu a 2016. Broadcasting yoola aavahererya sooleeliherya ikina vooloca sa mukhalelo wa ovilela soohesa sa akina. Murokora onnathariha: “Kaahoona wi kaaphwanela okhala awiiyeviha ni wuupuwelelaka soohesa saka ohiya weererya waatoroka anna ni arokora a mmulokoni. Broadcasting yoola aakikhaviherya otikitheryeya mwa Yehova wi owo tonaphwanela onileela echu yeeyo nnaphwanelaahu weera.” Tiheeni nnahuseryaahuvo? Vaavaa munahoolelaanyu saweeha, mweererye otikitheryeya mwa Yehova. Mumveke owo wi ookhaviheryeeni owoonaka akina mmukhalelo owo onawooneiye. Tiithi anyu a wirimu onnoona soohesa saya; nyenya owo onnalakelela waakhurumuwela yaawo. Owo onachuna wi nyuwo tho mweereke emohamoha.—1 Yoh. 4:20.

7. Tiheeni yeeren’ye ni Mwene Usiya?

⁷ Wiirumiha waamweeriha Mwene Usiya a o Yuteya okhooca ikano sa akina nave aaheera echu yeeyo ahaareiyeno owerya weera. Usiya aapaka ichu sincipale saphaama. Owo aavootha ikhoco sincipale, aateka ipooma sincipale, nave aakhalano imaca sincipale. “Apwiya yanamwitxhàliha.” (2 Math. 26:3-7, 10, BNM) Piipiliya oni: “Nto aanceiyeno ikuru aaniisinnuwiha ophiyerya aipahunle.” Woopaceryani wene Yehova aalamulela wi pahiru anamukucho ti yeemereryiwa ovaha mukucho mu empa ya Muluku. Nyenya Mwene Usiya aaheerano echu yeeyo aahaareiyeno ophwanelela wa opaka nave aavolowa mu empa ya Muluku wi avahe mukucho. Yehova haasiveliwe ni wiirumiha wawe nave aamulaka ni mareca. Usiya aatitelela okhala ni mareca ophiyerya okhwa wawe.—2 Math. 26:16-21.

8. Mwawiiwanana ni 1 Korinto 4:6, 7, nni niwerye hai osepa okhala awiirumiha?

⁸ Apwanne nnanwerya okhala a wiirumiha ni opaka yoocheka yoolikana ni yeeyo Usiya aapankeiye? Moone yootakiherya ya José. Owo aanakhumelela phaama mu nakoso nave aarumeela ntoko mutokweene a mmulokoni oocicimiheya. Owo aanaperekha miyaha mu mithukumano sa ekulucu ni sa miceche, nave ooweherya a ikulucu yaanamveka miruku. Owo ooloca: “Nyenya kaaroromela mavyakelo aka. Nkaamuroromela Yehova. Kuupuwela wi kaari oolipa, nave nkaawiriyana olopola ni miruku sa Yehova.” José aapaka soocheka itokweene nave aahiikariwa mmulokoni. Sivinrevo iyaakha sincipale, owo aakookela mmulokoni. Owo vano ooloca: “Yehova ookihusiha wi echu yoochuneyaxa tahi murici, nyenya weera yeeyo owo onanivekeiye.”  Nuupuweleke wi mavyakelo oothene nryaahuno ni mirici nnaakhelaahu mmulokoni sinarweela wa Yehova. (Mwaalakhanye 1 Korinto 4:6, 7.) Wakhala wi ninniirumiha, Yehova hani anipharihele.

9. Nrima naamweerinhe Satana ni Eva opaka eheeni?

⁹ Vaavaa nnuupuwelaahu sa nrima, akhweya ninnamuupuwela Satana Musaserya. Ntoko mmoha a ankeelo a Yehova, akhweya owo aakhalano mirici sincipale saphaama. Nyenya owo aachuna sincipale. Owo aachuna olapeliwa echu yeeyo enamphwanela pahiru Yehova. Satana onachuna wi nikhale ntoko yene. Mwawiihiiha owo onneererya oneeriha ohaakhwaneliwa ni yeeyo nryaahuno. Mu ekwaha yoopacerya vaavaa owo eenreiyeno yeela yaari elukuluku yeeyo aalonceiye ni Eva. Moosivela Yehova aamvahererya Eva ni iyawe yoolya yincipale yoopuheya wi elyeeke, “sawiima sa miri mikina soothene” nyenya mmoha hiyaaphwanela olya. (Map. 2:16) Nyenya, Satana aamweeriha Eva wuupuwela wi aanaphwanela olya sawiima sa mwiri yoole waakhwatiihiwe. Eva hoonihenrye othamalela wa yeeyo aareiyeno; owo aanachuna sincipale. Noosuwela yeeyo yeeren’ye ohoolo waya. Eva aacheka nave voocharela owo aakhwa.—Map. 3:6, 19.

10. Tiheeni yeeren’ye vaavaa Mwene Tavite aakhanleiye a nrima?

¹⁰ Nrima naamweeriha Mwene Tavite ocuwala yeeyo Yehova aamvanheiye, ophitaanyerya ekumi yaphaama, ocicimiheya, ni ovootha variyari va amwiicani awe. Tavite athamalelaka aaloca wi soovaha sa Muluku “ti sincipale!” (Sal. 40:5) Nyenya mu ekwaha ekina, Tavite aacuwala soothene seiho Yehova aamvanheiye. Owo haakhwaneliwe ni seiho aareiyeno. Owo aanachuna sincipale. Naamwi Tavite aarino athiyana ancipale, owo aaheemererya wi nchuno noonanara ntakhara mwaara a mwaneene nunnuwe mmurimani mwawe. Muthiyana owo aari Patesepa, mwaara a Uriya mu Heeti. Tavite aathokororya soochuna sawe nave aapaka mararuwo ni Patesepa, nave owo aarupala. Yeeyo Tavite aapankeiye yaatepa onanara. Nyenya voocharela owo aapaka echu yoonanara yoopwaha vaavaa, owo aahipaka marehereryo wi Uriya iiphiwe! (2 Sam. 11:2-15) Tiheeni Tavite uupuweleiye? Apwanne owo aanyiherya wi Yehova haahaala woona? Naamwi Tavite aamurumeela Yehova mu elukuluku yincipale, owo aakhala a nrima nave eyo yaahimuruuhela makacamiho  mancipale. Moohakalaliha Tavite aaheemererya yoocheka awe nave aahicharuwa. Owo aahithamalela vancipale woona wi Yehova aahimulevelela!—2 Sam. 12:7-13.

11. Mwawiiwanana ni Éfeso 5:3, 4, tiheeni enahaala onikhaviherya owaniha nrima?

¹¹ Tiheeni nnahuseryaahu orweela wa yootakiherya ya Tavite? Ninnahuseryavo wi nnanwerya owaniha ni nrima wakhala wi ninnatitelela othamalela soothene seiho Yehova onanivaheiye. (Mwaalakhanye Éfeso 5:3, 4.) Nnaphwanela waakhwaneliwa ni yeeyo nryaahuno. Vaavaa nnapaceryaahu omuhuserya Piipiliya ni achu, nnaphwanela waahusiha wuupuwela echu yeeyo Yehova aavanheiye ni omuthamalela Yehova ntakhara yeeyo. Wakhala wi muchu onneerano yeela nihiku ti nihiku va esumana, eyo enahaala wooniherya wi onnavekela ntakhara ichu thanu napiili soohiyana. (1 Tes. 5:18) Apwanne munneerano echu yoolikana? Wakhala wi munnuupuwelela ichu soothene Yehova opankeiye wa nyuwo, eyo enahaala wookhaviheryaani okhala oothamalela. Vaavaa munooniheryaanyu othamalela, nyuwo munahaala okhala awaakhwaneliwa. Nave vaavaa munakhalaanyu awaakhwaneliwa, munahaala ohakalalaka ni yeeyo muryaanyuno.

12. Tiheeni Yutasi Isikariote eenreiye nthowa na nrima?

¹² Nrima naahimweeriha Yutasi Isikariote opaka echu yoonanara nave aahimutumiha Yesu. Nyenya woopaceryani tahi wi Yutasi aari oonanara murima. (Luka 6:13, 16) Yesu aahimuthanla owo okhala murummwa awe. Yutasi aari oophwanelela ni oororomeleya, nthowa nawi owo taakhapelela ekaaxa ya ikhorowa. Yesu ni arummwa awe yaapharihela ikhorowa seiho wi yaakhwaniherye soothowa saya mmuteko aya woolaleerya. Mmukhalelo yoola saari ntoko sooveleela sa muteko wa elapo yoothene nneeraahuno olelo. Yutasi aapacerya wiiya naamwi owo iiwale olopola wa Yesu mwawuuluulela vooloca sa nrima. (Mar. 7:22, 23; Luka 11:39; 12:15) Yutasi haapwanche olopola yoola.

13. Elukuluku taani Yutasi oonihenryeiye wi aari a nrima?

¹³ Yutasi aahooniherya wi aari a nrima Yesu ahaakumve okhwa. Yesu ni oohuserya awe, ophitaanyerya Mariya ni murokora awe, Marta, yaari vaate va Simoni yoowo aarino mareca. Variyari va yoolya, Mariya aavinya nave aahela vamuru va Yesu makhurwa awunkhela ni oowalamela. Yutasi ni arummwa akina yaanyeenyeya vancipale. Arummwa akina akhweya yoona wi waahaala okhala woophwanela opharihela ikhorowa iho mmuteko woolaleerya. Nyenya Yutasi aarino moonelo woohiyana. Owo “aari mpava,” nave aachuna wiiyakamo ikhorowa mu ekaaxa. Voocharela nrima naahimweeriha Yutasi omutumiha Yesu ni ikhorowa seiho aakuliwano kapuro.—Yoh. 12:2-6; Mat. 26:6-16; Luka 22:3-6.

14. Ti mwawiihai mutheli mmoha aapharihenleiye nihusiheryo nnaphwanyeya mu Luka 16:13?

¹⁴ Yesu aawuupuxerya oomuchara awe eparipari ela: “Hamunawerya omulapa Muluku ni olapa muhakhu.” (Mwaalakhanye Luka 16:13.) Ela nlelo eparipari. Ntoko yootakiherya, moone mukhalelo mutheli mmoha o Romaniya aapharihenleiye yeeyo Yesu aalonceiye. Awo yaavahiwa muteko wa elukuluku yavakhaani mu elapo yeeyo eri yooreelaxa. Awo aaloca, “Naapoleya ikhorowa sincipale opanku, nyenya voopaceryani nuupuwela wi muteko owo waari mareeliho oorweela wa Yehova.” Nyenya, nlo naari nikacamiho. Waakhanle wi awo aheemererya muteko yoole hiwaahaala waavahaka awo elukuluku wi emurumeele Yehova. Emanle waalakhanya mwaha waaloca “Mantenha a lealdade com um coração unificado” mu Mulipeleli a 15 a Akostu a 2008, awo yaapaka yoolakelela aya. Awo annathariha: “Waakhanle wi noothaamela mu elapo ekina wi naphwanye ikhorowa sincipale, waahaala okhala woovila omurumeela Yehova, nave onthamwene ahu ni Yehova hiwaahaala okhala echu yoochuneyaxa  mu okumi ahu. Naalekecheya chiryene wi naahaala opwata mmakupa oomunepani.” Mwawiihiiha awo yaakhooca yamahala yeela. Tiheeni yeeren’ye? Munna aaphwanya muteko mu elapo awe, yoowo waakhwaniherya soothowa saya. Mwaariye ooloca: “Chiri moono wa Yehova hokhuven’ye.” Mutheli ola vano ari oohakalala omweera Yehova Pwiya aya ohiya ikhorowa.

15. Ntakhara heeni nnaphwanelaahu weemererya wi ti wooweryeya okophola mmiraakho sa Satana?

¹⁵ Tiheeni nnaphwanelaahu weera waakhala wi nohoona wi noopacerya wiirumiha naari nookhalano nrima? Nnanwerya okophola! Paulo ooloca wi yaale ‘aphariwe’ ni Musaserya ananwerya okophola mmiraakho sawe. (2 Tim. 2:26) Ti yeeyo yeeren’ye ni Tavite. Owo aawiriyana ekano yakuru ya Natani, aahiya okhala a nrima, nave aarehererya onthamwene awe ni Yehova. Muhirwe mucuwale, Yehova toowerya ompwaha Satana. Mwawiihiiha, wakhala wi nooheemererya nikhaviheryo na Yehova, nnahaala okophola orweela wa muraakho vyakala naari ntapha nenlo Satana onareyeiye.

16. Tiheeni enahaala onikhaviherya osepa miraakho sa Satana?

¹⁶ Mweeparipari, waahaala okhala waphaama ohikhala a wiirumiha naari a nrima. Nnawerya weerano yeela pahiru nnikhaviheryo na Muluku. Nyenya hannaphwanela wuupuwela wi naachu oolipa nave wi hinrwa nikhala awiirumiha naari a nrima! Ophiyerya alapeli a Yehova yaawo anamurumeela mu elukuluku yincipale ananwerya okhala a wiirumiha naari a nrima. Mwawiihiiha nvekeleke wa Yehova wi ookhaviheryeeni osuwela muupuwelo anyu ni saweera sanyu. (Sal. 139:23, 24) Mweererye opaka owetha wanyu wi muhikhale awiirumiha naari a nrima!

17. Tiheeni enahaala weereya moohilekela ni mwiicani ahu Musaserya?

¹⁷ Mu iyaakha sincipale, Satana mulipa oosaya. Nyenya moohilekela owo onahaala omakiwa nave vookuchulani atoloxiwe. (Wup. 20:1-3, 10) Ninnawehererya nihiku nenla. Nyenya ophiyerya nihiku nenlo, mukhale oovareryela miraakho sa Satana. Mwiilipixerye wi muhikhale a wiirumiha naari a nrima. Mukhale oolakelela, ‘omvaanya Musaserya; nave owo onarwa oochawaani nyuwo.’—Tiy. 4:7.