1. (1) Ewehereryo taani Yehova onanivaheiye? (2) Enataphulela eheeni ‘onweherya Yehova?’ (Moone “Masu Atharihiwe.”)

 YEHOVA ohaavaha ewehereryo yaphaama oothene yaale anamusivela yoowo. Moohilekela owo onahaala omalihavo ireca, iyinlo ni okhwa. (Wup. 21:3, 4) Owo onahaala waakhaviherya “awiichacala” yaawo enanwehererya yoowo wi atatuxe elapo okhala parataiso ooreera. (Sal. 37:9-11) Nave owo onamweeriha wi mmoha ti mmoha a hiyo akhaleno onthamwene wavameekhaaya ni yoowo, yoowo onahaala okhala wootikhiniha opwaha yoola nnapuhaahu olelo. Mweeparipari ela ewehereryo yootikhiniha! Nyenya mathipelo taani nryaahuno a weemereryeya wi soororomeliha sa Muluku sinahaala waakhwanela? Yehova aroromeliha, onnaakhwaniherya. Mwawiihiiha, nookhalano mathowa aphaama a ‘onweherya [Yehova].’ * (Sal. 27:14, BNM) Ninnooniherya yeela moorweela wa owehererya moopixa murima ni ohakalala wi Muluku ahu onamwaakhwaniherya yoolaiherya awe.—Isa. 55:10, 11.

2. Tiheeni Yehova eenreiye?

² Yehova ohooniherya wi onnaakhwaniherya soororomeliha sawe. Muthokororye yootakiherya emoha yootikhiniha. Mu liivuru a Wupulula, Yehova aahilaiherya wi mu mahiku ahu, owo aahaala waathukumanya achu a maloko oothene, a mahimo oothene ni a ilocelo soothene wi emulapeleke yoowo mwawiiwanana. Olelo nikhuuru nenlo navameekhaaya na achu nniichaniwa “mucici muncipale.” (Wup. 7:9, 10) Naamwi yaale anapaka makupa a nikhuuru nenla eri alopwana, athiyana ni anamwane a ikoore, ilocelo ni sookhovelela soohiyanahiyana, awo tawiiwanana nave ari ntoko emusi emoha ya murecele. (Sal. 133:1; Yoh. 10:16) Yaale a mucici muncipale alaleeryi  tho amvai. Awo ari oorehereya okawana ni akina sa ewehereryo aya vooloca sa elapo yaphaama. (Mat. 28:19, 20; Wup. 14:6, 7; 22:17) Waakhanle wi nyuwaano munnapaka makupa a mucici muncipale, moohikhwa minikwa ewehereryo ya ichu saphaama sinoorwa echu yoochuneyaxa wa nyuwaano.

3. Teevi eri yoolakelela ya Satana?

³ Musaserya onachuna owaakhaani ewehereryo anyu. Yoolakelela awe ori oweerihaani weemererya wi Yehova hanookhapelelaani nave wi Owo harwa aakhwaniherya soororomeliha sawe. Wakhala wi Satana ohiiya ewehereryo ahu, nnahaala oyeleela olipa murima, ophiyerya tho omaala omurumeela Yehova. Ntoko nnahaalaahu woona, Musaserya aaheererya wiiya ewehereryo ya Yupu ni ommaaliha omurumeela Yehova.

4. Tiheeni nnahaalaahu othokororya mmwaha yoola? (Yobi 1:9-12)

⁴ Mmwaha yoola, nnahaala ohuserya miraakho seiho Satana aapharihenleiye wi ananarihe ororomeleya wa Yupu. (Mwaalakhanye Yobi 1:9-12.) Nnahaala tho othokororya tiheeni nnahuseryaahu orweela wa yootakiherya ya Yupu nave ntakhara heeni oryaaya woochuneya wuupuwela wi Muluku onnanisivela ni wi onahaala okhwaaniherya soororomeliha sawe.

5-6. Tiheeni yeeren’ye ni Yupu mu elukuluku ya vakhaani?

⁵ Yupu aakhalano ekumi yaphaamaxa. Owo aakhalano onthamwene wawaacameleya ni Yehova. Aakhalano emusi etokweene, yawiiwanana nave aari ooreelaxa. (Yobi 1:1-5) Nyenya mu nihiku nimoha pahi, Yupu aahiyeleela soothene. Voopacerya, owo aayeleela muhakhu awe. (Yobi 1:13-17) Voocharela, anamwane awe oothene yaahikhwa. Nkuupuwelani vakhaani vooloca sa epahu yeela. Asitiithi annatepa ohooxeya wakhala wi mmoha a anaaya ookhwa. Vanonto mwaanyiherye mukhalelo Yupu ni amwaariye yaaryaaya awuukhuwa, awiikhupanyerya ni ohikhalano ewehereryo vaavaa yaasuwenlaaya wi anamwane aya oothene yaahikhwa. Hannatikhina chiryene wi Yupu aahaahula soowara sawe wa nthowa na wiikhupanyerya nave aanakona vachayani!—Yobi 1:18-20.

⁶ Voocharela, Satana aahimuhiphela Yupu ni ereca yawiicelaxa ni yawuuliha muru. (Yobi 2:6-8; 7:5) Ehaakumve yeela, Yupu aanacicimihiwa mmukuma awe. Achu yaanarwa wa yoowo wi eveke miruku. (Yobi 31:18) Vano awo yaanamusepa yoowo. Owo aanathanyiwa ni asinnawe, asinthamwene awe avamurimani, ophiyerya tho anamuteko awe!—Yobi 19:13, 14, 16.

7. (1) Tiheeni Yupu eemereryeiye vooloca sa mathowa a ohooxeya wawe, nyenya tiheeni owo aakhonceiye opaka? (2) Ti mwawiihai Mukristu oneereiye ahoolele makacamiho analikanyihiwa ni yaawo nnoonaahu va eruku?

⁷ Satana aachuna wi Yupu eemererye wi owo onahooxeya wa nthowa nawi ooyeleela weemereryiwa ni Yehova. Ntoko yootakiherya, Satana aahipharihela echeku yoowali wi emwarye empa yeeyo yaarimo anamwane khumi a Yupu yaawo yaari va efesta. (Yobi 1:18, 19) Owo tho aatannya mooro orweela wirimu waatolonxe ohiya pahiru muhuwo wa Yupu nyenya tho anamalapa yaawo yaakhapelela yoowo. (Yobi 1:16) Woona wi echeku ni mooro saarweenle wirimu, Yupu uupuwela wi saarweela wa Yehova. Nave ntoko yookhumelela, Yupu aaneemererya wi aahimunyeenyeiha Yehova. Naamwi hiiha, Yupu aahikhooca omuulumela Tiithi awe a wirimu. Yupu aanasuwela wi moovira wa iyaakha, owo aahaakhela ichu sincipale saphaama orweela  wa Yehova. Mwawiihiiha, owo aahuupuwelela wi waakhanle wi aaheemererya waakhela ichu saphaama, aanaphwanela tho weemererya waakhela ichu soonanara. Mwawiihiiha owo aahi: “Ncicimihiwe nsina na Apwiya [Yehova].” (Yobi 1:20, 21; 2:10) Naamwi Yupu aayeleenle muhakhu awe, anaawe nave iiceliwa, owo aatitelela okhala oororomeleya wa Yehova. Nyenya Satana haamuhiyerenrye omweeha owo.

8. Muraakho taani mukina Satana aapharihenleiye wa Yupu?

⁸ Satana aahipharihela muraakho mukina ntakhara Yupu; owo aahaapharihela alopwana araru yaawo yiiseera okhala asinthamwene a Yupu wi emweerihe owo wiisoona ohikhala echweenevo. Alopwana yaala yaaloca wi Yupu aahooxeya nthowa nawi aahipaka ichu sincipale soonanara. (Yobi 22:5-9) Awo tho yaaheererya omulekecha wi moohipwacha ichu sincipale saphaama owo aapakeiye, Muluku haapwacha ichu seiho. (Yobi 4:18; 22:2, 3; 25:4) Mweeparipari, awo yeererya omweeriha Yupu wuupuwela wi Muluku haamusivela, haampwacha yoowo nave hiwaarivo mphurelo wa omulapela yoowo. Masu aya yaahaala omweeriha Yupu wuupuwelela wi mukhalelo awe hiwaarino ewehereryo.

9. Tiheeni yaamukhavihenrye Yupu okhala oolipa murima ni akuru?

⁹ Mwaanyiherye ela: Akiranthe vacuurwani, Yupu onnoona wiicela otokweene. (Yobi 2:8) Asinthamwene awe annatitelela oloca wi tahi muchu aphaama nave hiyaavo echu owo eenreiye eri yasisapo. Makacamiho awe annamuhokola ntoko maluku oolimela, nave elukuluku emohamoha onnahooxeya nthowa na waayeleela anaawe. Woopaceryani, Yupu ori oomaaleleya. (Yobi 2:13–3:1) Nyenya waakhanle wi asinthamwene a Yupu anuupuwela wi omaaleleya wawe onataphulela wi owo onahaala ommwareela Yehova, awo anuupuwela moohesa. Akhweya Yupu onnaviiha muru awe aaweha asinthamwene awe oowoka  nave aloca ariki: “Ophiyerya okhwa waka nkirwa kihiya okhala ororomeleya.” (Yobi 27:5) Tiheeni yaamukhavihenrye Yupu okhala oolipa murima ni akuru naamwi aahoolela makacamiho? Naamwi aari ooceecheyaxa, Yupu haayelenle ewehereryo yawi Muluku awe oosivela aahaala omaliha makacamiho awe. Owo aasuwela wi naamwi owo akhwile, Yehova aahaala omviiha mookhwani.—Yobi 14:13-15.

10. Yaweereya ya Yupu enanihusiha eheeni?

¹⁰ Yaweereya ya Yupu ennanihusiha wi Satana hanawerya onikhinyererya omuhiya Yehova nave Yehova onnasuwela ichu soothene. Yaweereya ya Yupu enanwerya onikhaviherya wiiwexexa phaama soothene saavolowenlevo. Muthokororye yeeyo nnahuseryaahu orweela wa Yupu.

11. Wakhala wi nootitelela omuroromela Yehova, yoororomeliha taani nryaahuno? (Tiyako 4:7)

¹¹ Yupu ohooniherya wi natitelela omuroromela Yehova, nnanwerya ovilela ni makacamiho vyakala ni omvootha Satana. Ni yookhumelela taani? Soorempwa sinnaniroromeliha wi Musaserya onahaala onchawa hiyo.—Mwaalakhanye Tiyako 4:7.

12. Ti mwawiihai ewehereryo ya ovinya mookhwani yaamulipinhaaya Yupu?

¹² Hiyaano nnaphwanela okhalano nroromelo noolipa vooloca sa ewehereryo ya ovinya mookhwani. Ntoko elociwaaya mmwaha ovirale, Satana onnapharihela woova okhwa wi aneerihe okhala oohiroromeleya wa Yehova. Vooloca sa Yupu, Satana aaloca wi owo aahaala weera echu vyakala ophiyerya tho ohiya omurumeela Yehova wi avuluxe okumi awe. Satana aahesa. Naamwi Yupu uupuwelaka wi aahaala okhwa, owo aatitelela okhala oororomeleya wa Yehova. Nroromelo nawe mu oreera murima wa Yehova ni ewehereryo awe yoolipa yawi Yehova aahaala orehererya ichu, waamukhaviherya ovilela. Yupu aanaroromela wi waakhanle wi Yehova haamukhavihenrye elukuluku aareiye mukumi, Owo aahaala omviiha mookhwani omwaahiyu. Ewehereryo ya ovinya mookhwani yaari echu yeeparipari wa Yupu. Wakhala wi ewehereryo yeela ti yeeparipari wa hiyaano, woova naari woopopiha wa okhwa horwa oneeriha ohiya okhala oororomeleya.

13. Ntakhara heeni nnaphwanelaahu ovareryelaka phaama miraakho seiho Satana aapharihenleiye wa Yupu?

¹³ Nnaphwanela ovareryelaka phaama miraakho sa Satana seiho aapharihenleiye wi amweehe Yupu woona wi olelo Satana onnapharihela miraakho imohamoha wa hiyo. Moone yawootha Satana olonceiye: “Muchu [ohiya pahiru Yupu] onnavaha soothene oreiyeno wi oopole okumi awe.” (Yobi 2:4, 5) Mweeparipari, Satana aaloca wi hiyaano hinnamusivela chiryene Yehova nave wi hiyaano nnahaala omurukunuwela yoowo wakhala wi nnachuna ovuluxa okumi ahu. Ohiya yeeyoru, Satana aaloca wi Muluku hananisivela nave wi Owo hanoona wiilipixerya nneeraahu wi nimuhakalalihe Yoowo. Woona wi noosuwela yeeyo Satana onachuneiye waakhwaniherya, hiyaano hinneemererya sawootha sawe.

14. Tiheeni makacamiho anaweryaaya wuupulula sa hiyo? Mvahe yootakiherya.

¹⁴ Nnaphwanela woonaka makacamiho okhala ikari sa wiivyakiha mukhatiihu. Makacamiho Yupu aakumanneiyeno yaamukhaviherya woona sooceecheya sawe nave orehererya seiho. Ntoko yootakiherya, owo aahihuserya ochuneya waya okhala muchu awiiyevihaxa. (Yobi 42:3) Hiyaano tho nnanwerya ohuserya vooloca sa hiyo mukhatiihu vaavaa nnakumanaahu ni makacamiho.  Munna awiichaniwa Nikolay, * yoowo aawaleliwe mu kariposo naamwi ahooxeyaka ni makacamiho a okumi, ooloca: “Owaleliwa mu kariposo ori ntoko raiyu-X, onooniherya mikhalelo sa mpuwa sa Mukristu.” Vaavaa nnasuwelaahu sooceecheya sahu, nnanwerya wiilipixerya wi nrehererye seiho.

15. Taani nnaphwanelaahu onwiriyanaka, nave ntakhara heeni?

¹⁵ Hiyaano nnaphwanela onwiriyana Yehova, ohiya amwiicani ahu. Yupu aanawiriyana phaama vaavaa Yehova aaloceiye ni yene. Muluku aahimpakela makoho Yupu wi amukhaviherye wiiwexexa wi owo aanamukhapelela. Muluku aamukoha ariki: ‘Wohoona ikuru saka soopatuxano ichu? Kinnoona soothene ineereya ni weyaano. Apwanne weyaano onuupuwela wi miyaano nkiwerya wookhapelela?’ Yupu aahaakhula mwawiiyeviha ni mwancicimiho wa nthowa na oreera murima wa Yehova. Owo aaloca: “Tiwi, miyo kaamwiiwaru, vano kinnawoonaani ni miitho aka.” (Yobi 42:5) Mwawooneya Yupu nlelo aakiranthe vacuurwani, mwiili awe osaren’ye makhwaca nave nlelo aari oothanana nthowa na waayeleela anamwane awe, vaavaa aalonceiye masu yaala. Naamwiihiiha, Yehova aahooniherya wi aanamusivela Yupu nave wi aanamweemererya yoowo.—Yobi 42:7, 8.

16. Mwawiiwanana ni Isaiya 49:15, 16, tiheeni nnaphwanelaahu okuha mmuupuweloni vaavaa nnakumanaahu ni makacamiho?

¹⁶ Olelo tho, achu annaninyemula nave annanikhaliha ntoko wi hineechweenevo. Awo anamweererya onanariha mukhalelo wa mmoha ti mmoha a hiyo naari ntoko nikhuuru  ni ‘onilocela ichu soonanara.’ (Mat. 5:11) Orweela mu yaweereya ya Yupu, ninnahuserya wi Yehova onnaroromela wi nnahaala otitelela okhala oororomeleya wa yoowo naamwi nikumanaka ni makacamiho. Yehova onnanisivela nave harwa aanyanyala yaale ananwehererya yoowo. (Mwaalakhanye Isaiya 49:15, 16.) Muhiwiriyaneke masu a munyemu yaawo analociwa ni amwiicani a Muluku! James, munna onakhala o Turkiya, yoowo emusi awe yaahoolenle wiikariwa, ooloca: “Naahoona wi owiriyana sawootha vooloca sa achu a Muluku, sinanwerya oniceecheiha. Mwawiihiiha, naatikitheryeya mu ewehereryo ahu ya Omwene ni otitelela okhala amvai mmuteko wa Yehova. Ntoko yookhumelela, ninnatitelela okhala oohakalala.” Ntoko Yupu, hiyaano ninnanwiriyana Yehova! Sawootha sa amwiicani ahu, hirwa imaliha ewehereryo ahu.

17. Tiheeni nnahuseryaahu orweela wa yootakiherya ya alopwana ni athiyana oororomeleya yaawo analociwa mu Ahebri ekapitulu 11?

¹⁷ Yupu, mmoha a alapeli a Yehova yoowo aatitelenle okhala oolipa murima ni oowerya variyari va makacamiho mancipale. Mu ekaarata awe wa Aheepiri, murummwa Paulo aahaaloca ancipale yaawo ari ntoko “neeku ntokotoko na anamoona.” (Ahe. 12:1) Oothene awo yaakumana ni makacamiho mancipale; nyenya mu okumi aya woothene, awo yaatitelela okhala oororomeleya wa Yehova. (Ahe. 11:36-40) Apwanne ovilela waya ni olapa waya mwakuru waari wasiiyo? Mweeparipari hooye! Naamwi mu okumi aya yahintonko woona waakhwanela wa soororomeliha soothene sa Muluku, awo yaatitelela onwehererya Yehova. Nave woona wi awo yaalekecheya wi aakhalano weemereryiwa ni Yehova, awo yaanaroromela wi enahaala woona waakhwaniheryiwa wa soororomeliha sa Muluku. (Ahe. 11:4, 5) Yootakiherya aya enanwerya olipiha yoolakelela ahu ya otitelela onwehererya Yehova.

18. Tiheeni mulakelenlaanyu weera? (Ahebri 11:6)

¹⁸ Olelo nnakhala mu elapo yeeyo ichu soonanara sinaanviraaya saaceereryeyaka. (2 Tim. 3:13) Satana hahin’ye oweeha achu a Muluku. Moohiphwacha makacamiho eni ekhumelele, nnanwerya olakelela olapa mwakuru ntakhara Yehova, nroromelaka wi “owehererya wahu onakhala wa Muluku ookumi.” (1 Tim. 4:10) Muupuwele, nchuwelo nenlo Yehova aamvanheiye Yupu yawooniherya yawi “Apwiya tawaaca ikharari ni mahala.” (Tiy. 5:11) Nnanwerya tho otitelela okhala oororomeleya wa Yehova, nsuwelaka wi owo onahaala waachuwela “yaawo anamwaavya.”—Mwaalakhanye Ahebri 11:6.