1, 2. (1) Murecele taani nneeraahu nikhaleno hiihaano? (2) Ntakhara heeni olelo honaweryeya okhalano murecele wawaakhwanela? (Moone eruku yoopacerya.)

OOTHENE ahu ninnachuna murecele mookumini mwahu, nave ninnachuna osepa okhala ooteteiwa. Mwawiihiiha ninnamuthamalela Yehova onivaha “muretxele wa Muluku.” Murecele owo ti woomaaliha yoowo oni onikhapelele orweela wa miyuupuwelo ni miyoonelo soonanara. (Filipi 4:6, 7) Woona wi nohiiveleela wa Yehova, nookhalanotho “muretxele ni Muluku.” Eyo enataphulela wi nookhalano onthamwene waphaama ni yene.​—Aroma 5:1.

² Nyenya, ela tahi elukuluku wi Muluku aruuhe murecele wawaakhwanela veelaponi yavathi. Nnakhala mmahiku oomaliherya, mwawiihiiha aakhalavo makacamiho mancipale yaawo ananruuhela oteteiwa. Nrukureryiwe ni achu a nlala. (2 Timóteo 3:1-4) Nnaphwanelatho owana ni Satana nave ni mahusiheryo awootha owo onavuwiheiye. (2 Korinto 10:4, 5) Nyenya echu  enanruuhelaxa oteteiwa ori wiica onarweela wa amusi ahu yaawo ahinamurumeela Yehova. Akina a yaawo akhweya anamunyemulaka soororomela sahu naari onootherya wi nookawanya emusi. Awo anamphiyerya oloca wi hinni nipake makupa a emusi waahikhala wi noomaala omurumeela Yehova. Vanonto, nnaphwanela woonaka hai wiica onarweela veemusini? Nave nni nikhapelele hai murecele ahu wakhala wi eyo yoheereya?

3, 4. (1) Mahusiheryo a Yesu arino yookhumelela taani? (2) Ti liini xaxaxa waahaalaaya okhala woovila omuchara Yesu?

³ Yesu aahisuwela wi tahi wi oothene yaahaala weemererya mahusiheryo awe. Owotho aahisuwela wi oohuserya awe yaahaala ochuna olipa murima nthowa nawi akina yaahaala owiica. Wiica iwo waahaala ovolowela murecele wa imusi saya. Yesu aaloca: “Muhupuwele wi kirwele oruha muretxele vathiva. Nkirwele oruha muretxele, nto kirwele oruha nsipatxa. Kirwele ommwalanyiha mwana n’atithinya, mwana amwamuthiyana n’amannya, mutheliwa n’apwiyamwana, nave amwitxana a mutxhu eni ekhale atxhu a vate.”—Mateu 10:34-36.

⁴ Tiheeni Yesu aachuneiye oloca vaavaa aalonceiye wi “Muhupuwele wi kirwele oruha muretxele”? Owo aachuna wi achu esuwele wi saahaala okhalavo sookhumelela wakhala wi oohuserya awe. Mweeparipari, yoolakelela ya Yesu waari waahusiha achu eparipari vooloca sa Muluku, ohiya okawanya imusi. (Yohani 18:37) Nyenya oohuserya awe yaaphwanela osuwela wi wiiliwiili hiwaahaala okhala wookhweya omuchara, xaxaxa wakhala wi asinthamwene naari achu a veemusini vaya haneemererya eparipari.

5. Yaweereya taani yaakhumelenle oomuchara a Yesu?

⁵ Yesu olonce wi wiica yoowo onarweela veemusini eri echu emoha oomuchara awe yaaphwanelaaya wiirehererya wi evilele. (Mateu 10:38) Wi emuhakalalihe, oohuserya a Yesu yaahivilela vaavaa imusi saya saanyemulaaya ophiyerya waakhooca yaawo. Nyenya awo yaahaakhela sincipale opwaha ichu seiyo yaayelenlaaya.​—Mwaalakhanye Marko 10:29, 30.

6. Tiheeni nnaphwanelaahu wuupuwelela wakhala wi amusi ahu annaniica?

⁶ Naamwi amusi ahu eniicaka nthowa na omulapela Yehova, nlelo ninnaasivela. Nnaphwanela wuupuwelela, wi omusivela wahu Muluku ni Kristu onaphwanela okhala woolipa opwaha omusivela wahu muchu vyakala. (Mateu 10:37) Nnaphwanelatho osuwela wi Satana onanwerya opharihela waasivela wahu amusi wi aneerihe okhala oohiroromeleya wa Yehova. Hankooni nthokororye mikhalelo mikina nave noone mukhalelo nneeraahu nivilele.

7. Munaphwanela woona hai mukhalelo anyu wakhala wi oothelana anyu hanamurumeela Yehova?

⁷ Piipiliya onnanlopola wi yaale anathelana “anamukhalano sokatxamiha,” naari soohooxa. (1 Korinto 7:28) Wakhala wi mmuthenle naari mutheliwe ni muchu yoowo ohinamurumeela Yehova, eyo enamwaacererya wuukhuwa ni oteteiwa mu othela wanyu. Nyenya, ti yaphaama woona mukhalelo anyu hiiha ntoko Yehova onooneleiye. Owo ooloca wi hannaphwanela omwalana naari omuhiya oothelana ahu pahiru nthowa nawi owo hanamurumeela Yehova. (1 Korinto 7:12-16) Wakhala wi iyanyu hanamurumeela Yehova nave hanakhaviherya malapelo eeparipari,  nlelo munaphwanela omucicimiha ntoko muhooleli a emusi anyu. Nave wakhala wi mwaarinyu hanamurumeela Yehova, nlelo munaphwanela omusivela ni omukhapelela.​—Éfeso 5:22, 23, 28, 29.

8. Makoho taani munaphwanelaanyu wiipakela wakhala wi oothelana anyu onneererya ohela mphimo malapelo anyu?

⁸ Tiheeni munaphwanelaanyu opaka wakhala wi oothelana anyu onneererya ohela mphimo malapelo anyu? Murokora mmoha, iyawe aahimuleela wi owo aaphwanela opharihela pahiru mahiku vakhaani va esumana wi aye mmuteko woolaleerya. Wakhala wi muri mmukhalelo woolikana, mwiikohe: ‘Apwanne oothelanaaka onakiwaatiiha omulapela Yehova moomalela? Wakhala wi hooye kinanwerya opaka yeeyo oothelana aka onavekeiye?’ Mwakhala oophimelela, munahaala okhalano makacamiho vakhaani mu othela wanyu.​—Filipi 4:5.

9. Akristu eni yaahusihe hai anamwane aya omucicimiha tiithi naari mai ohiri Mukristu?

⁹ Enamukhala yoovila waahusiha anamwane anyu wakhala wi oothelana anyu hanamurumeela Yehova. Ntoko yootakiherya, munaphwanela waahusiha anamwane anyu wiiwelela nlamulo na Piipiliya nnaloca: “Watxitximiheke atithi-à ni amai-à.” (Éfeso 6:1-3) Nto tiheeni munaphwanelaanyu opaka wakhala wi oothelana anyu hanachariha malakiheryo a Piipiliya? Nyuwaano munaphwanela otikitherya yootakiherya yaphaama wa anamwane anyu moorweela wa omucicimiha oothelana anyu. Muupuwele sa mikhalelo sawe saphaama, nave mmuleele oothelana anyu wi munnathamalela mwa ichu soothene saphaama onapakeiye. Muhiloce ichu soonanara vooloca sa oothelana anyu anamwane anyu eri vaava. Moohiyana, mwaatharihele wi muchu ti muchu onaphwanela othanla omurumeela Yehova naari hooye. Wakhala wi mohaavyakiha anamwane anyu omucicimiha tiithaaya naari mai ohiri Mukristu, yootakiherya aya yaphaama enahaala omweeriha oothelana anyu ochuna ohuserya vooloca sa Yehova.

10. Asitiithi Eekristu eni ewerye hai waahusiha anamwane aya omusivela Yehova?

 ¹⁰ Oothelana akina ahiri Akristu akhweya anahaala ochuna wi anamwane aya echapeleke mahiku a ifesta naari ohuserya mahusiheryo a ikerexa sawootha. Alopwana akina ananweryatho omuhiiha muthiyana Eekristu waahusiha anamwane Piipiliya. Nyenya naamwi mmikhalelo seiyo, muthiyana onaphwanela opaka yeeyo onaweryeiye wi aahusihe anamwane awe eparipari. (Saweriwa T’arummwa 16:1; 2 Timóteo 3:14, 15) Ntoko yootakiherya, mulopwana ohiri Mukristu hani achune wi mwaariye akhaleno yoohuserya ya Piipiliya ni anamwane naari oyano mmithukumano. Vaavaa onacicimiheiye yoolakelela awe, owo nlelo onanwerya oloca wa anamwane awe vooloca sa soororomela sawe wakhala wooweryeya. Mmukhalelo yoowo, awo ananwerya ohuserya vooloca sa Yehova ni malakiheryo awe vooloca sa yaphaama ni yoonanara. (Saweriwa T’arummwa 4:19, 20) Ohoolo waya, anamwane anahaala olakelela waakhanle wi anahaala omurumeela Yehova. * (Moone masu avathi.)​—Malamulo 30:19, 20.

11. Tiheeni eni eruuhe nikacamiho ni amusi ahu yaawo ahinamurumeela Yehova?

¹¹ Vaavaa naapacenryaahu ohuserya ni Anamoona a Yehova, akhweya hinaalenle amusi ahu. Nyenya vaavaa nroromelo nahu nunnuwaaya, naahisuwela wi naanaphwanela waaleela wi naanachuna omurumeela Yehova. (Marko 8:38) Ororomeleya wanyu wa Muluku akhweya waahikumiherya nikacamiho variyari va nyuwo ni veemusini vanyu. Hankooni nthokororye ichu ikina munaphwanelaanyu opaka wi mukhapelele murecele nave mutitelele ororomeleya wa Yehova.

12. Ntakhara heeni amusi ahu annaniica, nave nni nooniherye hai wi ninnapwacha miyoonelo saya?

¹² Mweererye wiiwexexa moonelo wa amusi anyu ahiri Akristu. Ninnatepa ohakalala osuwela eparipari orweela wa Piipiliya. Nyenya, amusi ahu akhweya anamweemererya wi noohuwela naari wi nnapaka makupa a nikhuuru na ekerexa ehisuweliwe phaama. Awo akhweya anamuupuwela wi hannaasivela nthowa na ohichapela mahiku aweela ni yaawo. Ophiyerya wi awo anamoova wi yookhala echu yoonanara enahaala oniphacuwela nimanle okhwa. Nnaphwanela weererya wiiwexexa mukhalelo anoonaaya nave niwiriyane phaama yeeyo analocaaya wi nsuwele ntakhara heeni anakhalaaya awuukhuwa ni hiyo. (Masiposipo 20:5) Murummwa Paulo aaheererya owiiwexexa achu “othene” wi awerye waahusiha michaka saphaama. Wakhala wi noheererya owiiwexexa achu a veemusini vahu, eyo enahaala onikhaviherya osuwela mukhalelo wa waahusiha eparipari.​—1 Korinto 9:19-23.

13. Nnaphwanela oloca hai ni amusi ahu ahiri Akristu?

 ¹³ Muloce mwaphaama. Piipiliya onnaloca: “Malocelo anyu mahiku othene ekhaleke òsivela.” (Kolosi 4:6) Eyo henakhala yookhweya. Nnaphwanela omveka Yehova munepa awe waweela wi onikhaviherye okhala awiiyeviha ni aphaama wa amusi ahu. Hannaphwanela weererya waakhulana ni yaawo vooloca sa soororomela saya soothene. Wakhala wi ninnakhulumuwa ni echu aloncaaya naari apankaaya, nnaphwanela waatakiherya arummwa. Paulo ooloca: “N’nanyemuliwahu ninnaréliha; n’nahóshiwahu ninnavilela; n’notheryiwahu, ninnaveka.”​—1 Akorinto 4:12, 13, Nlakano Nahihano.

14. Tisivi siri miphurelo sa meecelo aphaama?

¹⁴ Mukhaleno meecelo aphaama. Ntakhara heeni oryaaya wookhweleya? Naamwi oloca mwa wiiyeviha onikhaviheryaka okhapelela murecele ni amusi ahu, meecelo ahu aphaama annaloca vancipale. (Mwaalakhanye 1 Pedro 3:1, 2, 16.) Mweerihe wi amusi anyu yoone yootakiherya anyu wi Anamoona a Yehova aakhalano othela woohakalaliha, annaakhapelela anamwane, anakhala mwawiiwanana ni malakiheryo a Piipiliya, nave aakhalano ekumi yoohakalaliha. Naamwi wakhala wi amusi ahu hantonko weemererya eparipari, nnamukhala oohakalala osuwela wi meecelo ahu aphaama annamuhakalaliha Yehova.

15. Nni niwerye hai olakelela woosiilo wi nsepe waakhulana ni amusi ahu?

¹⁵ Mulakelele woosiilo ene. Muupuwele mikhalelo saahaala otannya waakhulana ni amusi anyu. Voocharela mulakelele yeeyo munahaalaanyu opaka. (Masiposipo 12:16, 23) Ti yeeyo murokora mmoha o Australiya aapankeiye. Apwiyamwana awe yaaniica vancipale eparipari nave ikwaha ikina yaananyeenyeya. Mwawiihiiha ehaakumve waawopa, owo ni iyawe yaamveka Yehova wi aakhaviherye osepa owaakhula enyeenyen’ye. Awo yaahuupuwela ichu soohakalaliha awo yaaphwanelaaya oloca. Nave wi esepe omaliha elukuluku yincipale evaanelaka, yeeyo yaahaala ohoolela waakhulana vooloca sa ekerexa, awo yaahilakelela elukuluku yeeraaya emalihe evaanelaka.

16. Muni nwerye hai ovootha wiisoona okhalano nthowa vooloca sa ohaahakalaliha amusi anyu?

¹⁶ Mweeparipari, himuwerya osepa ohiiwanana woothene ni amusi anyu ahiri Akristu. Mwawiihiiha wakhala wi wookhalavo ohiiwanana, munahaala wiisoona okhalano nthowa woona wi munnaasivela amusi anyu nave munnachuna waasiveliha. Nyenya muupuwele wi ororomeleya wanyu wa Yehova onaphwanela okhala woolipa opwaha omusivela mmusi anyu. Vaavaa amusi anyu anasuwelaaya yeeyo, awo anamwiiwexexa ophiyerya mweeryo taani oryaaya wookhweleya omurumeela Yehova. Hamunaphwanela omukhinyererya muchu weemererya eparipari. Nto munaphwanela waahiya akina wi yoone mukhalelo munaphuraanyu ochariha iphiro sa Yehova. Mweeparipari, Yehova onnaavaha ekari emohamoha yeeyo onivanheiye, othanla omurumeela.​—Isaiya 48:17, 18.

17, 18. Tiheeni eni yookhaviheryeeni wakhala wi muchu a veemusini oomuhiya Yehova?

¹⁷ Vaavaa muchu a veemusini oniikariweiye naari wiisiikara mmulokoni, eyo enanwerya okhala yoovila wa hiyo. Enamukhala yawiicelaxa ophiyerya woona ntoko wi muchu onoohomaani ni mwaalo. Muni nwerye hai ovilela wiicela yoowo?

¹⁸ Mutitelele omulapela Yehova. Wakhala wi mookhalano wiicela wa mukhalelo yoowo, munaphwanela olipiha nroromelo nanyu. Mmwaalakhanyeke Piipiliya mahiku oothene, murehereryeke nave mphiyeke mmithukumano, mutitelele olaleerya, nave mvekele wi Yehova oovaheeni ikuru wi mvilele. (Yuda 20, 21) Hanka wakhala wi munnapaka soothene seiya nave nlelo wiicela onnatitelela? Muhivelavele! Mutitelele okhala ooweiwa mmuteko anyu wa Yehova. Veelukuluku aya, enahaala wookhaviheryaani ovareryela miyuupuwelo ni miyoonelo sanyu. Ti yeeyo yeeren’ye ni namarepa a Salumu 73. Yaahikhalavo elukuluku mu okumi awe aaphwannyeiye nikacamiho na ovareryela miyuupuwelo ni miyoonelo sawe. Nyenya omurumeela Yehova waahimukhaviherya wanaawiili woona ichu mmukhalelo woophwanelela. (Salumu 73:16, 17) Eyo enanwerya weereya ni nyuwaano.

19. Muni nwerye hai ocicimiha mukhalelo Yehova onaalakeiye achu awe?

¹⁹ Mucicimihe olaka wa Yehova. Muluku oosuwela wi olaka wawe onahaala waakhaviherya oothene avoloweliwe, ophitaanyerya yoowo iikariwe mmulokoni. Naamwi etepaka wiicela omoona muchu nnamusivelaahu alakiwaka, eyo enammukhaviherya omukookela Yehova omwaahiyu. (Mwaalakhanye Ahebri 12:11.) Ophiyerya elukuluku yeeyo, nnaphwanela ocicimiha ohoolela wa Yehova wa ‘ohatàna’ ni yaale yiikariwe mmulokoni. (1 Korinto 5:11-13) Eyo tahi yookhweya. Nyenya nnaphwanela osepa olocihana ni telefoni, michaka, ikaarata, emaili naari mu interneti.

20. Tiheeni nnaphwanelaahu otitelela owehererya?

²⁰ Muhivelavele owehererya! Okhwela “onnawehererya sothene,” mwawiihiiha ninnawehererya wi oosiveliwaahu onahaala omukookela Yehova. (1 Korinto 13:7) Wakhala wi munnoona sawooniherya wi muchu aveemusini onnarehererya moonelo awe, munaphwanela omvekelela wi aphwanye ikuru orweela Mpiipiliya ni weemererya nwopelo wa Yehova: “Mukitxhikele miyano.”​—Isaiya 44:22.

21. Tiheeni munaphwanelaanyu weera wakhala wi amusi anyu annawicaani nthowa na omuchara Yesu?

²¹ Yesu olonce wi nnaphwanela omusivela vancipale opwaha omusivela muchu vyakala. Nave owo aanaroromela wi oohuserya awe yaahaala olipa murima wi etitelele ororomeleya wa yene moohipwacha wiica wa amusi aya. Mwawiihiiha wakhala wi amusi anyu annawicaani nthowa na omuchara Yesu, mmuroromele Yehova. Mumveke wi ookhaviheryeeni ovilela. (Isaiya 41:10, 13) Mphwanye nihakalaliho mu osuwela wi Yehova ni Yesu annasiveliwa ni nyuwaano nave wi awo anahaala woovahaani nchuwelo ntakhara ororomeleya wanyu.