WA ATHELI
3: Ncicimiho
NCICIMIHO TIHEENI?
Wakhala wi oothelana annacicimihana, awo annakhalihana phaama naamwi mweelukuluku ya ovaanyihana. Liivuru mmoha a othela oriye: “Atheli awo annasepa ovolowa mmukhalelo oopiili ahinachunaaya oloca. Moohiyana, annapwahiherya ovaanela sa nikacamiho nlo. Annawiriyanana mwa ncicimiho nave annaphiyerya makuchuwelo yaawo anaphariheleya wa oopiili.”—Ten Lessons to Transform Your Marriage.
PIIPILIYA ONI: “Okhwela [naari osivela] . . . honasya ophura waya.”—1 Korinto 13:4, 5.
“Omucicimiha mwaaraka enataphulela wi kinnoona esisapo awe nave nkinachuna weera echu yaahaala ompahula yene ni othela wahu.”—Micah.
NTAKHARA HEENI TI YOOCHUNEYA?
Waahikhalavo ocicimihana, olocihana wa atheli onakhala wa esara, munyemu ni oveihana. Iha mikhalelo seiyo alipa ootholathola aloncaaya wi sinnakumiherya omwalana.
“Omulocela mwaarinyu masu oovevula, a munyemu, naari ooroha anahaala opahula omuchu awe ni wiisoona wawe ni opahula othela wanyu.”—Brian.
ECHU YAWEERA
MWIISAALIKHELE
Muupuwelele olocihana wanyu ni saweera sanyu sa esumana emoha, nave mwiikohe:
-
‘Ikwaha kavi kimvevunlaaka oothelana aka, nave ikwaha kavi kimuthamalenlaaka?’
-
‘Mmikhalelo taani sawooneya koonihenryaaka ncicimiho wa oothelana aka?’
MULOCE NI OOTHELANA ANYU
-
Saweera taani naari masu eni emucicimihe mmoha ti mmoha a hiyo?
-
Saweera taani naari masu enamweeriha muchu wiisoona ohicicimiheya?
MWEERERYE ELA
-
Murepele mikhalelo miraru munachunaanyu wi mucicimihiweke. Oothelana anyu eereno tho emohamoha. Mutorokane soorepela iho nave mwiilipixerye wooniherya ncicimiho mmakupa yaawo murepenlaanyu.
-
Murepe mikhalelo seiyo sinoosivelani sa oothelana anyu. Nave mmuleele wi munnatepa osiveliwa ni mikhalelo seiyo.
“Waacicimiha aiyaka enataphulela wi kinnooniherya mu saweera wi vaya toochuneya nave wi kinachuna ehakalaleke. Tahi pahiru mu ichu itokweene ncicimiho nnooneyaaya, ikwaha sincipale nnooneya mu ichu ikhaani.”—Megan.
Moohipwacha waakhanle wi nyuwaano munniisoona okhala oocicimiheya naari hooye, musuwele wi echu yoochuneyaxa ti yawi oothelana anyu ooneke wi onnacicimihiwa.
PIIPILIYA ONI: “Warani murima wa ikharari, waphama, wawiyeviha, womala ni wovilela.”—Kolosi 3:12.
