Wakhala wi atheli anniiwanana, analikana ni mulipa a weeciha nceeke ni mukhaviheryi awe yaawo arino yoolakelela emohamoha. Vaavaa sookacamiha inakhumelelaaya, oopiili annawetha vamoha.

PIIPILIYA ONI: “Vano hari eli, nto mutxhu mmoha.”—Mateu 19:6.

“Mulopwana ni muthiyana anaphwanela owetha vamoha ntoko nikhuuru wi ekhumelele phaama.”—Christopher.

Nikacamiho nakhumelela, atheli yaawo ahiri awiiwanana anateteiwa ni soohesa sa mukina ni mukhwaawe opwahana omaliha nikacamiho nlo. Nave miyaha mikhaani sinnathatuwa ikhala mitokweene.

“Wiiwanana ti woochuneya veechokoni. Waakhanle wi miyaano ni aiyaka hanniiwanana, naahaala okhala ntoko achu anaamoona okhala vamoha eniiso ehirino soolakelela imohamoha.”—Alexandra.

MWIISAALIKHELE

• Apwanne ikhorowa kinaakhelaaka kinoona wi ti “saaka” pahiru?

• Apwanne kinnachuna oothelana aka ari ocai wi kipuhe phaama okumi?

• Apwanne kinnasepa waataana ni amusi a oothelana aka aniiso yene aatanneno?

MULOCE NI OOTHELANA ANYU

• Makupa taani a othela wahu nniiwananaahu ntoko nikhuuru?

• Apwanne aakhala makupa nnaphwanelaahu orehererya?

• Echu taani yaweera wi naaceererye wiiwanana ntoko nikhuuru?

MWEERERYE ELA

• Mwaanyiherye wi oopiili anyu muri mmakhuuru oohiyana a omvonya mphirya, echu taani mwaahaalaanyu weera wi mukhale mu nikhuuru nimohamoha ni oothelana anyu?

• Ohiyana wuupuwela wi, ‘kini kivoothe hai?’ muupuweleke ha, ‘hiyo oopiili nni nivoothe hai?’

“Muhaavyaavye omusuwela taani orino nthowa. Eyo tahi yoochuneya opwaha okhalano murecele ni wiiwanana veechoko.”—Ethan.

PIIPILIYA ONI: “Muhithokorerye sanyuru, nto sa akhwinyutho.”—Filipi 2:3, 4.