Yakopo aanasuwela wi Yehova tonaphwanelela olampwa, naamwi Owo ahaavaherenrye malamulo yaheemererya olapela soophwaniherya. (Muk 20:3-5) Mwawiihiiha, amanle Yehova omuleela wi akookele o Peteli, Yakopo aahaaleliherya oothene a veemusini vawe wi erihe soophwaniherya saya. Voocharela, Yakopo aanyaanya soophwaniherya, ophitaanyerya ipirinku, akhweya tho vamoha ni ikhulula. (Map 35:1-4) Moohikhwa minikwa, Yehova aatepa ohakalala ni yeeyo Yakopo enreiye.

Mmahiku ahu yaala, nni nooniherye hai wi ninnamulapa pahiru Yehova? Ninneerano yeeyo, moorweela wa osepa echu vyakala enavolowela soophwaniherya naari minepa. Eyo enaphitaanyerya oriha echu vyakala eniiwanana ni onamulosiwe vamoha ni ovareryela mathatelo ahu. Wiiliwiili, ti woochuneya wiikoha: ‘Apwanne kinasiveliwa ni aliivuru naari ixilema sinooniherya ichu ntoko anaaminepa, masempwani, naari ichu samalavi? Apwanne mathatelo aka annooniherya meerelo awiisaciherya, okhwiri ni olowa ntoko ochekula ohinapahula?’ Nnaphwanela okhala ocai wa echu vyakala yeeyo Yehova oniiceiye.—Sal 97:10.

MOONE EXILEMA  “MUMVAANYEKE MUSASERYA,” NAVE MWAAKHULE MOKOHO ANACHARELA:

• Makacamiho taani oohuserya a Piipiliya awiichaniwa Palesa aahoolenleiye mu ekumi awe?

• Ntakhara heeni ti ya miruku oveka nikhaviheryo na atokweene wakhala wi muchu mmusuwenlaanyu ookumanano nikacamiho si nenla?

• Wakhala wi ninnachuna naakiho na Yehova, ichu taani nnaphwanelaahu oriha?

• Yoolakelela taani Palesa aapankeiye?

• Weiwo munakhalaanyuwo, mikhalelo taani mikina munaphwanelaanyu opaka wi musepe ovoloweliwa ni masololo?